1 KHO:KHAM 22
22
Lapa Mikhaia Ahab Re Ta" Peim: Byid' Ru
(2 Kho:kham mhomyi: 18.2-27)
1Israel byu qe we' Suri byu qe: agyo: mae thao shid' zin mang: yaug yo: jo; ra". 2Ngadqere: sam zin ein: zin mae Yuda kho:kham Yehoshaphad Israel kho:kham Ahab re ye qhug' ra".
3Ahab wa yao" zug: qere- Suri kho:kham eib: ra" Gilead mung" mae" Ramod re sang: yu nae" ngonhaung" daja: re: makad' ru wa pe"mung: i? Aiwa ngonhaung" sang: ru ngad:- ga: ta" ra". 4Amung: Ahab wa Yehoshaphad re Ramod re gye yezin: nae" nao ngo we' daga" cao" nae" i? ga: myid' ra".
Yehoshaphad wa- nao jin" lao" wa ngo wa jin" jin" ngad:- nga" gyezo: qe nga" myao: jhui: mo, re: airu: ngad:- 5Ngadqere: Asang we' shi" sao qhid' jho" qham: qu" lang: ga: tau" ra".
6Aimung: Ahab wa lapa alaug byid yo yaug ko re khai: yu: mung: yao: bam re- ngo Ramod khyo gye yekhe' nae" ye: zai i? maye: zai i? ga: myid' ra".
Yao: bam wa yekhe' wa,- Asang wa nao re aung doe; ru byid' li" nae" ga: tau" ako".
7Ngadqere: Yehoshaphad wa yao: khyo" yang nga" shid' yaug byin phyo: qo" jho" qham nae" lapa ga yaug mana i? ga: myid' ra".
8Ahab wa Imla nho: yauggai zo: Mikhaia ga" ru gatau dayaug na shi" ra". Ngadqere: ngo yao: re nghang" ra". Pe"mung:ga"re yao: wa nga" qhid' mae" khonhae" re: gai: ru daja: re: lapa mapa: qu" ngad: ra"- ga: tau" ra".
Yehoshaphad wa- nao airu: ta" nae" maang ga: phaug' ta" li" ra".
9Ailao" Ahab wa kho:kham vang" mae" zug: re khai: yu mung: ai jao" Mikhaia re ye jhui" yu nae" yao: re ta" ra".
10Kho:kham shid' yaug wa yao: shid' yaug: nho: kho:kham bau: qhang ve, mung: Samari vogaung: kham: nho: taung gaung shad' gaug nao: jo, qo mae" yao: shid' yaug: tao" khau" mae zaung: jo; ako". Lapa qe alhab' wa yao: shid' yaug: qhid' kheim: mae lapa pa: ako". 11Yao: bam mae" Khenana nho: yauggai zo: Zedekia wa jo,to' khyug jham kad' mung: Ahab re Asang ceru: ta" ra". Cejham ci yang: nao Suri byu qere khe' zin" re yao: bam re bin sho' aung: pye' li" nae"- ga: lapa pa: ra". 12Lapa gaje alhab' re: dakhyo: za ta" ako". Yao: bam wa Ramod re gye yezin: wa,- nao aung nae"- Asang wa nao re aung doe; ru byid' li" nae"- ga: ta" ako".
13Ai: au: re Mikhaia re ye jhui" ra" zug: pho" wa yao: re- lapa gaje qe alhab' wa kho:kham pho" qhid' mae" aung myaug: nae" rure lapa pa: avako". Nao re: dakhyo: za: lapa pa wa,- ga: ta" ra".
14Ngadqere: Mikhaia wa ngo wa yao" yang ngore ta" ra" dao: re ngo ta" nae" ein: daui: na: ra" Asang: mang khyo" ngo dao:so: to" ra"- ga: tau" ra".
15Kho:kham Ahab qhid' kheim: mae yao: thug' li" lao"- kho:kham pho" wa Mikhaia we"- kho:kham Yehoshaphad we' ngo wa Ramod re gye yekhe' zai i? maye: khe' zai i? ga: myid' ra". Mikhaia wa ye khe' wa,- nao aung nae"-
Asang wa nao re aung doe; ru byid' li" nae"- ga: tau" ra".
16Ngadqere: Ahab wa Asang: mang mae nao ngore dao: jhau: ra" au: dangman" ru ta" lhe"- ein: nao re ngo khonho" lhang ta" va" i? ga: phaug' ta" ra".
17Mikhaia ai wa Israel gyezo: qe wa yao lhaug' yaug mabo: ra" yao jham re" ru: bug gaung khaung: mae byo: sin" na: rure ngo the' myao:- amung: Asang wa ce: byu qe au: jhaung maqo" ngad: ako". Yao: bam re yaug yo za: yham phao: lo" nhao ge, ga: ta" ra"- ga: phaug' tau" ra".
18Ahab wa Yehoshaphad re yao: wa nga" qhid' mae" khonhae" re: gai: ra" dao: lapa mapa: qu" ngad: ra" ein: nao re ngo mata" i? Khonhae" re: aqeim za:- ngad: ra"- ga: ta" ra".
19Mikhaia wa xo' yang: ana"- Asang ta" rure tae" gyo: wa,- Asang wa yao" mug: lagyo: jham yao" nhae mae ye; jo, mung:- mug: khaung dao mae" yao" tao" khau" dao mae zaung jo; rure ngo myao:. 20Yao: wa ye" lo" mung: Ramod mae se' pye' qhug' nae" qhid' mae" Ahab re khag' yang mhug' pyag' nae" i? ga: Asang myid' ra". Mug: lagyo: jham wa daqhae: daja: ga: ta" na: ako". 21Byo dadau: wa Asang jhao" bye ce" ye: mung: yao: re ngo mhug' pyag' nae"- ga: ta" ra". 22Asang wa khoru: mhug' pyag' nae" i? ga: myid' ra". Ai: byo wa ngo ye: mung: Ahab nho: lapa qe alhab' re mhug' ta" nhao nae" ga: phaug' tau" ra". Asang wa yao: re ye mhug' pyag' wa,- nao aung myaug: li" nae"- ga: ta" ra".
23Mikhaia wa ceru boe" ava"- Asang wa ai ni" lapa qere nao re mhug' ta" nhao: ava". Ngadqere: nao qug: khai: kyi" khyag' ru qhug' nae" amyin" khyo" to" ava"- ga: dao: pin" ra".
24Ailao"- Zedekia wa Mikhaia jhao" ye: mung: yao" myo, khung: re ye pyo' mung:- Asang: byo wa khoyo, re ngo mae" thug' lo" mung: nao re dao: jhau: ra" i? ga: myid' ra".
25Mikhaia wa nao nhaung thao" qe, khyo phao: vho' nae" ye" lo" lao"- nao ba li" nae"- ga: phaug' tau" ra".
26Ailao" kho:kham Ahab wa yao" gyezug: dayaug re Mikhaia re taung: wa,- yao: re vomo" zug: Amon jhao" jhui" lo" mung: kho:kham nau" Yoasha re lo" byid: wa,- 27Ngo pe" maqo dam: tug' joe" lo sho'- yao: re thaung: mae pye' zaui: to: mung: zo:ve we' qid masho: majhin kad' ge,- ga" ein: yao: bam re ta" wa,- ga: amyin" byid' ra".
28Mikhaia wa nao pe" maqo lo: dam: tug' lo:ngad: re wa Asang nga" nhad' khyo" dao: jhau va" ru wa mangad: nae" ga: ta" ra". Amung: yao: wa ngo ta" ra" dao: re yaug khao: ngo" tae" gyo: ge,- ga: paug' ta" ra".
Ahab Shid: Ra" Khyo
( 2 Kho:kham mhomyi: 18.28-34)
29Ai: thao Israel kho:kham Ahab we' Yuda kho:kham Yehoshaphad wa Gilead mae" Ramod vogaung: re gyekhe' nae" ye" lo" ako". 30Ahab wa Yehoshaphad re nga" shid' yaug gyekhe' poe khyo ye" lo" au:- ngo yao" gaug re geim kad' nae". Ngadqere: nao wa naoyao" kho:kham mai bau: re ve, wa,- ga: ta" ra". Aimung: Israel kho:kham wa geim kad' mung: gye poe khyo ye" lo" ra".
31Suri kho:kham yao" gyekhe' myao: lhin" zug: sam xe: shid' yaug re Israel kho:kham mae" je yang: gatau khag' rere: makhe' zin: nae" amyin" byid' to" ra". 32Aimung: yao: bam: kho:kham Yehoshaphad re myao gelao"- yao: bam alhab' wa yao: re Israel kho:kham ngad: ga: jho mung: yao: bam wa yao: re khe' zin" ako". Ngadqere: yao: zag: hug' lao"- 33Yao: wa Israel kho:kham mangad' rure yao: bam qu" xam: mung: khe' zin" rure thang: pye' ako". 34Ngadqere: Suri gyezo: dayaug: yang mageim bag: ke' ra" myo: dakhe' wa kho:kham Ahab re yao" gyebau: axo' mae lo zao" ra". Yao: wa ngo dae de; va"- ga: yao" gyekhe' myao: lhin" keim: yaug re hug' mung:- lhang lo wa,- ngore gye poe mae" jhui" thug' lo" la,- ga: ta" ra".
35Gye khe' poe gyai thin: au: kho:kham Ahab wa Suri byu qe shad' khyo myo, khung: qang yang: yao" gyekhe' myao: lhin" dao mae nga: jo; ra". Yao" dae khu mae" sa: wa yug: gyo" lo" mung: gyekhe' myao: lhin" athai mae dag sho' boe" byaug mung: myi" thao re shid: lo" ra". 36Ba vao zo" re yaug khao: ngo" yao: yao" mug:- vogaung: khyo phao: lo" genae" Israel gyetab geim" khyo amyin" joe" lo" ra".
37Kho:kham Ahab wa airu: shid: lo" ra". Yao" mao gaung re Samari khyo dao: lo" mung: nyhab' pye' ako". 38Yao" gyekhe' myao: lhin" re Samari qid kyaung" mae cid' pye' ako". Aimae airu: boe" nae" Asang ta" to" ru we' dakhyo:- lakha: jham wa yao" sa: jham re yo; pye' mung: shava myhi" qe wa yao: bam: gaung cid' ako".
39Kho:kham Ahab kad' ra" gatau lo,mau" ja: khao: ngo" we' yao" kho:kham kho" re xao zaui: yang lamyhung shaung: mung: yao: te" lo: ra" vogaung: alhab' nho: mau" zo" bobo: mung: Israel kho:kham qe: mhomyi: paug' mae tung" xam" to" ako". 40Yao: shid: ra" khu mae yao" yauggai zo: Ahazia kho:kham xo' kad' ra".
Yuda Kho:kham Yehoshaphad
(2 Kho:kham mhomyi: 20.31-21.1)
41Israel kho:kham Ahab eib: ru byid zin ein: zin mae Asa nho: yauggai zo: Yehoshaphad wa apyad sam xe: ngo" zin mae Yuda kho:kham boe" lo: ra". 42Yao: wa Yerusalem mae shid' xe: ngo" zin eib: ra". Yao: myhi" wa Shilhi nho: myiqe: zo: Azuba ngad: ra". 43Yao" nho: qhid' au: mae" yao: pho" Asa we' dakhyo: Asang: qhid' kheim: mae jo: ra" lo,mau" kad' ra". Ngadqere: taung bug so caung:pa" jo, qo jham re maphyo' pye' ngad: ra". Amyu" byu qe wa xo' yang ngaui" xeim: ngaui" byid: mung: aimae sheim nae pyo: ja: phad' ngaui" byid' ako". 44Yehoshaphad wa Israel kho:kham we' mang: dae khyo kad' ra".
45Yehoshaphad kad' ra" gatau lo,mau" ja: khao: ngo"- yao" mazag mavae mau" zo" alhab'- yao" gyekhe' poe jham: khyo wa Yuda kho:kham qe: mhomyi: paug' mae tung" xam" to" ako". 46Yao: wa yao: pho" Asa nho: pyad mae" dang: jo, shiko" ra" tarha" taung bug caung:pa" jo, qo jham mae" shava pho"- shava myhi" qe alhab' re yu: pye' ra".
47Edom mung" wa kho:kham maqo" ngad: ra". Aimung" re Yuda kho:kham: yang san: to" ra" zug' yang eib: ra".
48Kho:kham Yehoshaphad wa Ophi mung" khyo qhang yetho nae" panglai: gau: qid sang pho jham re zhaug' ra". Ngadqere: aijham wa Eziongeba mae byo; lo" gemung: khonhae" re: magau: ngad: ako". 49Israel kho:kham Ahazia wa yao" byu qe we' Yehoshaphad nho: byu qe we' qid sang pho daga" gau: nhao: nae" ta" ra". Ngadqere: Yehoshaphad wa ha: pye' ra".
50Yehoshaphad wa shid: lo" mung: Davi vogaung: mae" kho:kham lab mae nyhab' pye' ako". Yao" yauggai zo: Yehoram wa yao" khu mae kho:kham xo' kad' ra".
Israel Kho:kham Ahazia
51Yuda kho:kham Yehoshaphad eib: ru daxe: nhad' zin ein: zin mae Ahab nho: yauggai zo: Ahazia wa Israel kho:kham boe" lo: ra". Yao: wa Samari mae shid' zin eib: na: ra". 52Yao: wa yao: pho" Ahab yao: myhi" Yezebe- Israel byu qere qobo shad' lhoe" nhao: ra" kho:kham Yeroboam bam: makhyang" ra" alag aso: re cao" mung: Asang re qobo shad' lhoe" ra". 53Yao: wa yao" qhid' au: mae" yao: pho" we' dakhyo: Bala re caung:pa" mung: caung da" byid' ra". Amung: Israel nho: Mao"So Asang re nhag' jam: yo: nhao: ra".
Currently Selected:
1 KHO:KHAM 22: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009