1 KHO:KHAM 14
14
Yeroboam Nho: Yauggai Zo: Shid: Ra" Khyo
1Ai: ayo, mae kho:kham Yeroboam nho: yauggai zo: Abiya wa no: gyo" lo" ra". 2Yeroboam wa yao" yham sang myhi" re nao re khag' maqu" xam: gesho' nao yao" gaung re geim kad' mung: ngore Israel kho:kham boe" nae"- ga: ta" ra" yaug lapa Ahiya na: ra" Shilo khyo ye: wa,- 3Yao" qhid' mae" mug daxe thaung: kid' mug daqhae:- byoyhid dayae: vin: ye: byid: wa,- ngotao: yauggai zo: pe" boe" nae" rure yao: re myid: wa,- yao: nao re ta" kyo" li" nae"- ga: ta" ra".
4Aimung: yao: wa Shilo mae" Ahiya nho: yham khyo ye" lo" ra". Ahiya wa mao: yang: myo,jid: ava". 5Yeroboam nho: yham sang myhi" wa no: na: ra" yao" yauggai zo: nho: khyo re myid: nae" li" na: rure Asang wa yao: re ta" kyo" ra". Asang wa pe" ta" nae" rure Ahiya re ta" to" ra". Yeroboam nho: yham sang myhi" joe" li" lao"- yao: wa gatau dayaug ngad: ra" khyo" geim kad' ra". 6Ngadqere: Ahiya wa yao: kham: dung: mae joe" li" na: rure the' gyo: lao"- vao li" ri:- nao Yeroboam nho: yham sang myhi" ngad: rure ngo ba:- gayaug ngad: khyo" nao pe"mung: geim kad' i? Ni" qhid' mae" magai: ra" lau dao: ngo qo"- 7Yeroboam re- ceru wa Israel nho: Mao"So Asang yao: re ta" ra" dao: ngad: ra". Ngo wa nao re amyu" byu qe: phaung gaung: mae" khyin: yu mung: nga" byumyu" Israel re eib: ra" yaug kad' nhao va". 8Ngo wa mung"dan: re Davi nho: myid:zo: qe: lo,mae" yu: pye' mung: nao re byid: va". Ngadqere: ngore bin sho' jhaug' zaug yaug- nga" amyin" dao: jham re mho dao: gyo: yaug- ngo myid vang" rure za: kad' yaug ngad: ra" nga" daui daui yaug Davi we' dakhyo: nao makad' lo ngad: ra". 9Nao wa ni" qhid' mae eib: ra" mo, tho' je: qi" ra" qobo re shad' lhoe" ava". Nao wa ngore ngag: pye' mung: caung:pa" nae" so alho jham re we' to' khyao dau jham re kad' ra" khyo" yang ngore nhag' jam: yo: nhao: ra". 10Ce: mathao mae ngo wa ni" kho:kham yham khaung re kyi" khyag' ru boe" nhao nae". Ni" myid:zo: yauggai qe wa- aqi: angai dakhyo: za: se' pye' qhug' li" nae". Ngo wa ni" yham khaung re yu: pye' nae". Yao: bam wa- gug'nyhug' khyid' re"ru sham" pye' qhug' li" nae". 11Vogaung: khug mae shid: ra" ni" yham khaung byu qe wa lakha: jham: yang zo" pye' li" genae"- pa: din" mae shid: ra" yaug wa lang da: yang zo" pye' li" nae". Ngo Asang ta" va"- ga: ta" ra" ein: lo" ta" kyo: wa,- ga: ta" ra".
12Ahiya wa Yeroboam nho: yham sang myhi" re xo' mung:- ana" yham khyo phao: lo" se,- vogaung: khyo nao joe" vao lo" we' ni" yauggai zo: shid nae". Israel byu alhab' mo, wa yao" mathao mae kaug' ngug mung: yao: re nyhab' pye' li" genae". 13Yeroboam nho: yham khaung byu qemae" yao: dayaug za: nyang" za: nyhab' ru qhug' li" nae". Pe"mung:ga"re Israel nho: Mao"So Asang: yang o ngaui byid: qhug' yaug wa yao: dayaug za: ngad: ra". 14Asang wa Yeroboam nho: kho:kham yham khaung re thao" lo" nhao nae" qhid' mae" Israel re eib nae" kho:kham dayaug kad' nhao nae". 15Asang wa Israel re qobo dae byid' li" nae". Qid zo: gyaung: mae" qid phaung: yao: laui" nan" ruru: nan" nae". Yao" yang yao: bam: phug' pho" qere byid' to" ra" ce: gai: ra" mung"dan: mae" Israel byumyu" qere: yao: phan" pye' li" nae". Amung: Uphrad gyaung: lai sho' yao: bam re pyo: sin" pye' nae". Pe"mung:ga"re so myhi" Ashe lho jham re kad' ra" khyo" yang yao: bam yao: re nhag' jam: yo: nhao geyang: ngad: ra". 16Yeroboam wa qobo shad' lhoe" mung:- Israel byu qere qobo shad' nhao: ruyang Asang wa Israel byu qere shapye' pye' li" nae"- ga: ta" ra".
17Yeroboam nho: yham sang myhi" wa Tiza khyo dam: phao: lo" ra". Yao" yham khyo vao lo" we' zoshao shid: lo" ra". 18Asang: yang yao" daui daui yaug lapa Ahiya nhad' khyo" ta" to" ru we' dakhyo:- Israel byu qe wa yao" mathao mae kaug' ngug mung: nyhab' pye' ako".
Yeroboam Shid: Ra" Khyo
19Kho:kham Yeroboam kad' ra" mau" gatau ja: khao: ngo"- yao: gyekhe' ra" khyo- yao: mung" eib: ra" khyo alhab' Israel kho:kham qenho: mhomyi: paug' mae tung" xam" to" ako". 20Yeroboam wa kho:kham khyo" shid' xe: shid' zin eib: ra". Yao: shid: lo" mung: nyhab' pye' ako". Yao" yauggai zo: Nadab wa yao" khu mae kho:kham xo' kad' ra".
Yuda Kho:kham Rehoboam
(2 Kho:kham mhomyi: 11.5-12.15)
21Sholamon nho: yauggai zo: Rehoboam wa yao: Yuda kho:kham boe" lo: ra" au: byid xe: dazin ngad: ra". Yao: re caung:pa" byid: nae" jo, qo khyo" Israel mung" alhab' mae" Asang: yang khyin: yu: to" ra" vomo" Yerusalem mae na mung: daxe: nhad' zin eib: ra". Rehoboam nho: yao: myhi" wa Amon mae" Naama ngad: ra".
22Yuda byu qe wa Asang re qobo shad' lhoe" mung: yao: bam: phug' pho" qe alhab' mo, tho' re je yang: yao" nhag' jam: re yo: nhao: ako". 23Yao: bam wa so apyag' qe: qhid' mae" caung:pa" jo, qo jham re kad' mung:- laug baui zang baung: jham re tau: zhaug' mung: bug gaung jham mae we' sag' gae jham: aqab mae caung:pa" byid: nae" Ashe alho jham re kad' to" ako". 24Alhab' mae xo: thao" ru wa- ai: tarha" taung bug qe: caung:pa" jo, qo mae shava myhi" khyo" caung: da" byid: ko" ra" yauggai we' myiqe: qe na ko" ru ngad: ra". Israel byu qe mung"dan: khyo jhin" vao ye" lo" ko" au: Yuda byu qe wa Asang: yang mung"dan: mae" khe' thug' pye' ra" mo, kad' ko" ra" aqho' aqhid mau" alhab' kad' ako".
25Rehoboam eib: ru daxe: ngo" zin ein: zin mae Egutu kho:kham Shishag wa Yerusalem re gyekhe' zin" ra". 26Yao: wa Caung:pa" Yham mae"- kho:kham kho" mae"- Sholamon kad' ra" qhang go jham bobo mung: jo,nho" alhab' re yu: lo" byaug: ra". 27Kho:kham Rehoboam wa aijham: khu mae dam: ke' to: nae" gyid: ne go jham re kad' mung: kho:kham kho" kham: dung: zaung" ra" zug: qere lam: to" ra". 28Kho:kham pho" Caung:pa" Yham khyo ye: khao: ngo" zaung" mo, wa ai: go jham re dao: ye: mung: thao re aijham re zaung" ra" qe, mae dam dao: to" ako".
29Kho:kham Rehoboam kad' ra" gatau: mau" ja: khao: ngo" re Yuda kho:kham qenho: mhomyi: paug' mae tung" xam" to" ako". 30Ai: ayo, gyo: geim" mae Rehoboam we' Yeroboam wa yao: cao: abang mabyid gye jho" khe' ako". 31Rehoboam wa shid: lo" mung: Davi vomo" mae" kho:kham lap mae nyhab' pye' ako". Amung: yao" yauggai zo: Abiya wa yao" khu mae kho:kham xo' kad' ra".
Currently Selected:
1 KHO:KHAM 14: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
