1 KHO:KHAM MHOMYI: 28
28
Caung:pa" Yham We' Sin: Yang: Davi Mho" Shid' Dao:
1Kho:kham Davi wa Israel nho: zug: qe alhab' mo, re Yerusalem khyo zang" li" genae" qhid' mae" amyin" khyo" ke' ra". Aimung: amyu" qe: zug: qe- kho:kham mung"dan: re eib: na ko" ra" zug: qe- amyu" kaung qe: au: jhaung qe- zug: qe kho:kham we' yao" yauggai zo: qe sang: ra" jo, nho" we' gug'nyhug' jham re zaui" ra" mo,- kho:kham kho" mae" zug: qe alhab'- au: jhaung gyezo: qe- akhyag: ra" byu qe alhab' gagai: yao: Yerusalem mae zang" ham: ako".
2Davi wa yao: bam: qhid' au: mae ye; jo,mung: yao: bam re- nga" byu qe we"- nga" dao: re tae" gyo: byid: gela,- ngo wa ngonhaung" Mao"So Asang: nho: khyid kai tao" Dao: Thang" Ban" qhid' mae" yham dalam: ngo kad' nug: ra". Ngo wa yao: re nga: yhe' nae" caung:pa" yham kad' nae" qhid' mae" nyhang" seim" to: va". 3Ngad qere yao: wa ngo re tam" pye' ra". Pe"mung: gare ngo wa gyezo: ngad mung: sa: myo: sho' sheim nhao: pye' yang: ngad: ra". 4Israel nho: Mao"So Asang wa Israel re apyad ato eib nae" qhid' mae" ngo we' nga" myid:zo: qere khyin: yu: ava". Yao: wa au: jhaung kad' nae" Yuda amyu" kaung re khyin: yu mung: Yuda amyu" mae" nga" pho" yham khaung re yao: khyin: yu: ra". Ai: yham khaung byu alhab' mae" ngo re khyin: yu nae" o mung: Israel alhab' re eib: ra" kho:kham ngo re kad' nhao: ra". 5Yao: wa ngo re yauggai zo: myo: sho' we' ai bam alhab' mae" yao: wa Asang: nho: mung"dan: Israel re eib nae" Sholamon re khyin: yu: ra".
6 Asang wa ngo re ni" yauggai zo: Sholamon wa nga" Caung:pa" Yham re kad' nae" yaug ngad: ra". Ngo wa nga" zo: boe" nae" ngo yao: re khyin: yu mung: ngo wa yao" yao: pho" boe" nae". 7Yao: wa ana" yao: phug' cao" ru we' dakhyo: nga" tarha" jham re we' amyin" jham re nyang" za: xo' yang: yao: phug' cao" re wa ngo wa yao" mung"dan: re apyad ato mae dang: jo, nhao nae" ga: ta" ra".
8Aimung: ana" nga" amyu" byu qe we"- ngonhaung" Mao"So: qhid' kheim: mae we' Asang: nho: amyu" byu ce: zang" ham: na: ra" Israel byu qe: qhid' kheim: mae- ce: gai: ra" mung" re naonhaung" xo' yang: qo" sang: yu geshao: amung: ai re xo' yang: daqae: mae" daqae: apyad ato xo' byid: lo" geshao: ngonhaung" Mao" Asang: yang ngonhaung" re amyin" byid' to" ra" gu: ja: khao: ngo" re nyang" za: naonhaung" phug' cao" genae" qhid' mae" ta" jhan: byid' ra".
9Amung: yao: wa Sholamon re nga" zo: we"- ni" pho" Mao"So re lhang: yu nae" nhag' lam: dakhe' za: kad' mung: kao bau taung" yao: re caung da" byid: nae" ngo nao re ta" jhan" ra". Yao: wa ngonhaung" nho: myid: rure we' kao bau: rure alhab' re ba: ra". Nao yao: jhao" ye" re- nao re yao: khae: yu: li" nae". Ngadqere: nao yao: mae" phaug' lo"byaug: ngad: re yao: wa nao re apyad ato mae shapye' pye' li" nae". 10Asang wa nao re yao" gyang" lho" Caung:pa" Yham kad' nae" khyin: to" rure nao beim: ca" ra". Ana" ai re kad' wa,- myid: phyid' yang: kad' wa,- ga: ta" ra".
11Davi wa Caung:pa" Yham- zai to: kug qe, jham- gatau qe, jham- qobo khyad' pye' ra" jo, qo gyang" lho" thao" jo, qo qhid' mae" yaung: to" ra" khyo alhab' Sholamon re byid' ra". 12Yao: wa yao" myid mae bo: ra" vang" jham we' lhang" gam: qe, jham- zai to" ra" qe, jham Caung:pa" Yham zai jham Asang re qhaug' byid' to" ra" jhaung qhu" jham: khyo we' sin" ra" yaung: to" ra" khyo rere: byid' ra". 13Davi wa khinjaung qere Levi byu qere yao: bam: mau" re zaui: genae"- Caung:pa" Yham mau" re zaui: genae"- Caung:pa" Yham mae" keim kang: zai jham alhab' qu" caung genae" qhid' mae" yaung: to" rure re: yao: re byid' ra". 14Yao: wa keim kang: zai jham re kad' ru mae re:- 15Myi kaug' lam: khao: ngo" we' myi: kaug' tao"- 16Ngaui saboe" jham Mao"So re qhaug' byid' ra" mug thaung: jham to" ra" qhang saboe" jham lam: khao: ngo" kad' ru mae ngaui we' qhang khonho" khoru: ci nae" ra" khyo re mho" byid' ra". 17Yao: wa lakya yaug gaung: ku"- khug' jham- yae: jham kad' ru mae qhang gyang" khonho" khoru: ci nae" rure re:- ban jham kad' ru mae ngaui we' qhang khonho" ci nae" khyo- 18Sheim nae pyo: ja: phad' nghaui" ra" phan- Asang: nho: Dao: Thang" Ban" dao mae phyid: nghoe' to" ra" kherubin qhid' mae" lhin" kad' ru mae qhang gyang" khonho" ci nae" rure re: mho" byid' ra". 19Kho:kham Davi wa- ce kad' boe" nae" qhid' mae" Asang: yang yao: ngo re byid' to" ra" mho" shid' rure cao" yang: tung" to" ra" yaung: to" ru mae cegu: alhab' bo:- ga: ta" ra".
20Kho:kham Davi wa yao" yauggai zo: Sholamon re- myid: phyid' mung: vae" myid bo wa,- Mau" zaui" qhid wa,- pe" ja" yang re: nao re datam" pye' nhao- Ngo caung: da" byid' ra" Mao"So Asang wa nao we' daga" ngad: li" nae". Yao: wa nao re mashapye' nae". Ngadqere: yao: wa yao" Caung:pa" Yham kad' ra" mau" bin yo, joe" sho' nao we' daga" na: li" nae". 21Khinjaung qe we' Levi byu qe wa Caung:pa" Yham mae mau" zaui: nae" qhid' mae" jaung: to: gau ngad: ako". Ja: khao: ngo" re ba jhao: ra" mau" zaui: byu qe wa nao re bao" thaug' nae" kao bau: ako". Amyu" byu alhab' we' yao: bam: au: jhaung qe wa ni" amyin" qao: mae na: jo; ako"- ga: ta" ra".
Currently Selected:
1 KHO:KHAM MHOMYI: 28: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
