1 KHO:KHAM MHOMYI: 17
17
Davi Re Nathan Ta Ra" Mung Dao:
(2 Samuela 7.1-17)
1Ana" kho:kham Davi wa yao" kho:kham kho" mae na: jo; ra". Daba na mae yao: wa Nathan re khai: yu nhao mung: yao: re- Ngo wa cetau mae shaug' the" yang kad' ra" yham mae na: jo;- ngad qere: Asang: nho: Dao: Thang" Ban" wa zaung mae za: to" to" ra"- ga: ta" ra".
2Nathan wa nao myid: ra" ja: pe" rere: kad' wa,- Pe"mung: gare Mao"So wa nao we' daga" ngad: ra" ga: tau" ra".
3Ngadqere: ai: myi mae Mao"So wa Nathan re- 4Nga" daui daui yaug Davi jhao" ye: mung:- nao wa ngo na nae" nga" qhid' mae" caung:pa" yham kad' nae" yaug mangad:- 5Egutu mung" mae" Israel byu qere ngo khyad' yu: ra" ayo, mae" ana" joe"sho'- ngo wa caung:pa" yham mae khonhae" re: mana: qu"- Ngo wa khonhae" re: zaung jham mae na: lo mung: dajo, qo mae" dajo,qo khyo qui" na: lo:. 6Israel byu qe we' daga" nga" gyaung: khyo thao" sho' au: jhaung qere khonhae" re: yao: bam re shaug' the" yang kad' ra" caung:pa" yham pe" mung: ngo re makad' byid: ko" i?- ein: ngo yao: bam re mata" qu"-
7Aimung: qam: bo: thao" ra" Asang ngo wa nao re pa" din" mae yao jham re lhaug' na: ru mae" jhui" yu mung: nga" Israel byumyu" re eib: ra" zug: kad' nhao va". 8Ngo wa nao khai: ye: khai: nao we' daga" ngad: lo va". Nao qhid' au: khyo jhui" ye" lo" au: ngo wa ni" gyevo qe alhab' re aung: pye' nhao va". Ngo wa mug: myid dao mae" qi" qhang: thao" ra" au: jhaung qe qhi" nao re mang qi: nhao va". 9-10Ngo wa nga" byumyu" Israel qhid' mae" jo, qo dalam re khyin: yu mung: aimae yao: bam re na nhao va". Yao: bam wa aimae zag zo" ru ma qhug' lo: genae". Yao: bam ce: mung" khyo vao lo: ra" ayo, mae" yao: bam wa aqan alan kad' ra" byumyu" qe yang gye khe' zin" rure thaung" qhug' ako". Ngadqere: ceru khonhae" re: madam: boe" lo nae". Ngo wa ni" gyevo alhab' re aung: pye' nhao nae" we' nao re myid:zo: byid: nae" dao:so: byid' ra". 11Nao shid: lo" mung: ni" phug' pho" qe we' daga" nyhab pye' lao" ni" yauggai zo: qe mae" dayaug re ngo kho:kham kad' nhao mung: yao" kho:kham mung"dan: wa qam: bo: jo, nhao nae". 12Yao: wa nga" qhid' mae" caung:pa" yham kad' byid: nae" yaug ngad: li" nae". Yao" nho: kho:kham nyaug xo' wa apyad ato mae dang: jo; li" nae". 13Ngo wa yao" nho: yao: pho" boe" li" mung: yao: wa nga" yauggai zo: boe" li" nae". Nao kho:kham qo" kad' sho' ngo yang yu: pye' ra" Sholu re ngo kad' lo: ruru: yao: re ngo yang bao" thaug' rure yao: mae" ngo matug' yu nae". 14Nao re nga" byumyu" qe: dao mae we' nga" mung"dan: dao mae apyad ato yao: re au: jhaung kad' nhao nae". Yao" nho: kho:kham nyaug xo' wa khonhae" re: mathao" nae" ga"- ein: nga" daui daui yaug Davi re yeta" kyo: wa,- ga: ta" ra".
15Nathan wa yao: re Mao"So: yang qhu" byid: va" gu: ja: khao: ngo" Davi re ta" kyo" ra".
Davi Nho: Je"Ju" So: Akyu" Mho' Dao:
(2 Samuela 7.18-29)
16Ailao" Davi wa Asang: nho: qhid' kheim: Zaung khyo vao ye: mung: ye zaung: jo, yang:- Mao"So Asang we"- ngo re we' nga" yham khaung re nao kad' va" ra" gu: wa ngo we' ma man: qi" ngad: ra". 17Ngadqere: ana" nao wa je: lhao" re: myo: sho' kad' ava". Nao wa joe" lo nae"ayo, mae" nga" myid:zo: qe: khyo we' sin: yang: dao:so: jham byid' to" ava". Nao Mao"So Asang wa ngo wa byuqi: dayaug khyo" kad' ava". 18Ngo nao re pe" tho' ta" lo" i?- Nao wa ngo re nyang" ba: ra". Ngadqere: ni" daui daui yaug ngo re nao nga: yhe' byid' ra". 19Nao ngo re ceru: kad' nae" ru we' nga" nho: joe" lo nae" ayo, qi" qhang: ra" khyo nao ngo re qhu" byid: nae" ru wa ni" myid o: ra" khyo we' ni" au: qang khyo ngad: ra". 20Asang we"- nao we' dau ru khag' mana- nao dayaug za: Mao"So ngad: rure khonhae" re: ngonhaung" ba va". 21Naoyao" byumyu" boe" nae" qhid' mae" yao: bam re jeim doe; na: ru mae" khyad' yu: ra" Israel byu we' dau ru myid gaung dao mae pe" byumyu" re: mana: ngad: ako". Yao: bam: qhid' mae" nao kad' ra" qi" qhang: ru we' mug' pho: mau" jham wa mug: myid jao: sho' ni" lahau: re pyo: ke' avako". Nao wa ni" byumyu" qe qhid' au: khyo jhin" vao ye" lo" au: gatau: byumyu" qere nao aimae" khe' thug' pye' ra". 22Nao we' Israel byumyu" re apyad ato: qhid' mae" naoyao" byumyu" te' yu: ava". Asang we"- nao wa yao: bam: Mao"So boe" lo: ava".
23O" Asang we"- ana" ngo re we' nga" myid:zo: qe: khyo we' sin: yang: nao ta" to" ra" dao:so: re jab byang" li" nhao wa, nao kad' nae" ta" to" rure kad' wa,- 24Ni" lahau: wa qi" qhang: li" nae"- Amung: byumyu" qe wa qam: bo: thao" ra" Asang wa Israel nho: dao mae Mao"So ngad: ra" ga: apyad ato ta" li" genae". Amung: nao wa ayo, alhab' mae nga" kho:kham nyaug xo' re zaui" ci: li" nae". 25Nga" Mao"So we"- nao re ce: akyu" mho' dao: mho' nae" ngo qam: qo" ra". Pe"mung: gare nao wa ni" daui daui yaug ngo re cegu: alhab' qhu" byid' ava". Nao wa nga" myid:zo: qere kho:kham kad' nhao nae" ga: ngo re ta" to" ava". 26Asang we"- nao wa Mao"So ngad: ra". Nao wa ce: mug' pho: dao:so: ngo re byid' to" ava". 27Yao: bam ni" nga: yhe' rure xo' yang: kham zo: geshao: nga" myid:zo: qere shaman" byid: nae" ngo nao re mho' ra". Asang we"- nao yao: bam re shaman" byid' ava". Ni" shaman" jeju wa yao: bam: dao mae apyad ato dang: jo,vashao: wo" ga: akyu" mho' ra".
Currently Selected:
1 KHO:KHAM MHOMYI: 17: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
