Vakatekivu 28
28
1A sa kacivi Jekope ko Aisake ka sa vosavakalougatataka, ka vakarota, ka kaya vua, “Mo kakua ni vakawati kei na dua na goneyalewa ni Kenani. 2Mo cavu tu, mo lako ki Petani-erama, ki na vale i Pecueli, na tama i tinamu; ka vakawati kei na dua mai kea, mai vei ira na luvena yalewa ko Lepani, na gane i tinamu. 3Ia me vakalougatataki iko na Kalou Kaukauwa#28.3 Yaca ni Kalou vakaIperiu El Shaddai ka qisi iko mo vakaivakawa, ka vakalewevuqataki iko, mo tubu me tamata lewe vuqa sara; 4#Vteki 17.4-8ka vakayacora vei iko na veivakalougatataki i Eparaama, io, vei iko, kei ira talega na nomu kawa; mo taukena na vanua ko sa tiko vulagi kina, ka solia vei Eparaama na Kalou.” 5A sa vakatalai Jekope yani ko Aisake; a sa lako ki Petani-erama, kivei Lepani na luve i Pecueli na kai Siria, na gane i Repeka, na tina i Jekope kei Iso.
Taura na Luvei Isimeli me Watina ko Iso
6Ia sa kunea ko Iso ni sa vosavakalougatataki Jekope ko Aisake, a sa talai koya ki Petani-erama, ka me kauta mai kina e dua na watina, ia ni sa vosavakalougatataka, sa vakarota, ka vaka, “Mo kakua ni vakawati kei na dua na goneyalewa ni Kenani,” 7ka sa vakarorogo kina ko Jekope vei tamana kei tinana, ka sa lako ki Petani-erama. 8Ia ni sa kunea ko Iso ni sa sega ni vinakata na goneyalewa ni Kenani ko Aisake na tamana, 9sa qai lako ko Iso kivei Isimeli, a sa vakaikuritaka na watina sa tiko vua, ni sa tauri Meelaci, na gane i Nepeioci, me watina, ko koya na luve i Isimeli, na luve i Eparaama.
Na Tadra nei Jekope mai Peceli
10A sa lako tani mai Peri-sepa ko Jekope, ka lako vaka ki Karana. 11A sa donuya e dua na yasana, a sa moce kina, ni sa dromu na mata-ni-siga. A sa taura e dua na vatu e na yasana ko ya, ka tauca me nona kali, a sa koto sobu e na yasana ko ya. 12#Joni 1.51A sa tadra, ka raica, e dua nai kabakaba sa tu e vuravura, a sa yacovi lomalagi na muana; ka raica, sa kaba cake ka kevu sobu tiko kina ko ira na agilosi ni Kalou. 13#Vteki 13.14,15Ka raica, sa tu mai muana ko Jiova, a sa kaya, “Koi au ko Jiova na Kalou i Eparaama na tamamu, kei na Kalou i Aisake; a vanua ko sa koto kina ka'u na solia vei iko, kei ira na nomu kawa; 14#Vteki 12.3; 22.18ia na nomu kawa ena vaka na kuvu ni qele; ia ko na tete yani vaka ki na ra, ka vaka ki na tokalau, ka vaka ki na vualiku, ka vaka ki na ceva; ia ena kalougata e na vukumu kei na nomu kawa na veimataqali kecega e vuravura. 15Ka raica, ka'u na tiko vata kei iko, ka vakabulai iko e na nomu i lakolako kecega, au na vakalesui iko talega ki na vanua oqo; ni'u na sega ni biuti iko, ka me'u cakava mada vei iko na ka ka'u a vosa kina vei iko.” 16A sa yadra mai na nona moce ko Jekope, ka sa kaya, “Sa tiko vakaidina ko Jiova e na vanua oqo—ka'u a sega tu ni kila!” 17A sa tarai koya na rere, ka sa kaya, “Sa vakariseyate dina na vanua oqo! Sa sega ni ka tani, a vale ga ni Kalou, kei na matamata-ni-koro kei lomalagi.”
18A sa sou e na mataka ko Jekope, ka sa taura na vatu ka tauca oti me nona kali, ka sa vakaduria me duru, ka sa livia na waiwai ki delana. 19A sa vakatoka na yaca ni tikina ko ya ko Peceli;#28.19 Kenai balebale Vale ni Kalou ia na yaca ni koro ko ya eliu ko Lusa. 20A sa qai bubului ko Jekope, ka kaya, “Kevaka sa na tiko vata kei au na Kalou, ka vakabulai au e na sala oqo ka'u sa lako kina, ka solia vei au na kakana me'u kania, kei nai sulu me'u vakaisulu kina, 21ka'u sa lesu vakavinaka tale kina ki na vale i tamaqu, ena qai noqu Kalou ko Jiova, 22kei na vatu oqo, ka'u sa vakaduria me duru, e sa na vale ni Kalou; ia na ka kecega ko ni sa solia vei au, au na solia vakaidina na kenai katini vei kemuni.”
Currently Selected:
Vakatekivu 28: FRV21
Highlight
Copy
Compare
Share
Want to have your highlights saved across all your devices? Sign up or sign in
