Cakacaka 14
14
Ko Paula kei Panapasa mai Ikoniona
1A sa yaco mai Ikoniona, ni rau sa lako vata ki na nodra valenilotu na Jiu, ka rau sa vosa, ka sa vakabauta kina e lewe vuqa na Jiu kei ira sa matanitu tani. 2Ia ko ira na Jiu era vakatitiqa, era sa vakauqeta na lomadra era sa matanitu tani, me ra lomaca vei ira na veiwekani. 3A rau sa tiko vakadede kina ka vosa doudou e na vuku ni Turaga, ko koya sa vakatakila ni sa dina na vosa ni nona loloma, ka solia me caka rawa e na ligadrau eso nai vakatakilakila, kei na veika e veivakurabuitaki. 4A sa tawase rua ko ira na lewe vuqa e na koro; eso sa totaki ira na Jiu, ka so sa totaki rau nai apositolo. 5Ia ni ra sa lako vakaukauwa ko ira sa matanitu tani, kei ira talega na Jiu, kei ira na nodra turaga, me ra vakacacani rau ka vakaviriki rau e na vatu, 6erau sa kila mada eliu, ka rau dro tani ki Lisitira kei Tapi, erau sa koro vaka-Likeonia, ki na yasana talega sa vakavolivolita; 7ka rau sa vunautaka talega mai kea nai tukutuku-vinaka.
Ko Paula kei Panapasa mai Lisitira kei Tapi
8A sa tiko mai Lisitira e dua na tamata, sa malumalumu na yavana, ko koya sa lokiloki ni sa sucu mai, a sa sega ni lako rawa e na dua na siga. 9Sa rogoci Paula ko koya ni sa vosa tiko. Ia ni sa vakaraici koya matua ko Paula, ka kunea ni sa tu vua na vakabauta me vakabulai kina, 10sa vosa e na domo levu, “Tu vakadodonu cake.” A sa rika ko koya, ka sa lako voli. 11Ia ni ra sa raica ko ira na tamata na ka sa kitaka ko Paula, era sa tabalaka cake na domodra, ka kaya e na vosa vaka-Likeonia, “O ira na veikalou era sa liatamata mai, ka sa lako sobu mai vei keda!” 12A ra sa vakatokai Panapasa mei Seusi, kei Paula mei Eremasi, ni sa dau ni vosa ko koya. 13O koya talega na bete i Seusi, ka tiko e mata ni koro na nona burekalou sa kauta mai ki na matamata-ni-koro eso na bulumakau kei na salusalu, a sa vinakata kei ira na lewe vuqa me ra vakacaboisoro. 14Ia ni rau sa rogoca koi rau nai apositolo ko Panapasa kei Paula, erau sa dresulaka na nodrau i sulu, ka cici yani vei ira na tamata, ka qoqolou, 15#Lako 20.11; Same 146.6ka kaya, “Oi kemuni na turaga, a cava ko ni sa kitaka kina na veika oqo? Eda sa tamata vata kai tovo vata talega kei kemuni, ia keirau sa vunau vei kemuni mo ni saumaki tani mai na veika oqo sa sega ni yaga, kivei koya na Kalou bula, ko koya ka buli lomalagi kei vuravura, kei na wasawasa, kei na ka kecega sa tu kina. 16E na gauna eliu, a sa vakatara ko koya vei ira na lewe ni veivanua kecega me ra lako ga e na nodra sala; 17ia ka sa sega ga ni laiva me sega nai vakadinadina ni nona daucaka vinaka—ni sa solia mai vei keda na uca mai lomalagi, kei na yabaki e levu kina na vuata, ka sa vakamamautaka na lomada e na kakana kei na marau.” 18Ka dina ga ni rau sa vosa vakaoqo, ia sa dredre ga me rau tarovi ira na lewe vuqa me ra kakua ni vakacaboisoro vei rau.
19Ia era sa lako mai ki kea eso na Jiu mai Anitioki kei Ikoniona, a ra sa vakauqeti ira na tamata, ka ra sa vakaviriki Paula e na vatu, ka ra sa yarataka ki nai bili ni koro, ni ra sa nanuma sa mate ko koya. 20Ia ni sa tu vakavolivoliti koya na tisaipeli, sa tucake ko koya, a sa lako ki na koro. Ia e na siga ka tarava, erau sa lako kei Panapasa ki Tapi.
Lesu Tale ki Anitioki Mai Siria
21Ia ni rau sa vunautaka oti nai tukutuku-vinaka e na koro ko ya, ka vakalotutaki ira kina e lewe vuqa, erau sa qai lesu ki Lisitira, kei Ikoniona, kei Anitioki. 22A rau sa vakataudeitaka na yalodra era sa lotu mai kea ka vakauqeta vei ira me ra tudei e na vakabauta, ka kaya, “Ni sa kilikili me vuqa na ka rarawa me da sota kaya e na noda curu ki na matanitu ni Kalou.” 23Ia ni rau sa lesia eso me nodra qase nai soqosoqo lotu kecega, ni rau sa masu talega ka lolo, erau sa tataunaki ira vua na Turaga, ko koya era sa vakabauta.
24Ni rau sa lakovi sivita na vanua ko Pisitia, erau sa yaco sara ki Pamifilia. 25Ia ni rau sa vunautaka oti na vosa mai Perika, erau sa lako sobu ki Atalia. 26Erau a qai soko tani mai keri ki Anitioki, na koro erau a vatonaki taumada kina me nodrau na loloma ni Kalou e na vuku ni cakacaka era sa qai vakaotia. 27Ia ni rau sa yaco kina, ka vakasoqoni ira vata nai soqosoqo lotu, erau sa tukuna na ka kecega sa cakava na Kalou ni sa veivuke kei rau, ka sa dolava na katuba ni vakabauta vei ira na veimatanitu tani. 28A rau sa tiko vata vakadede kei ira sa lotu.
Currently Selected:
Cakacaka 14: FRV21
Highlight
Share
Copy
Want to have your highlights saved across all your devices? Sign up or sign in
