प्रेरीत 5
5
हननीया ओःले सफीरा
1इःनाङ हननीया लाःकेन मेःन्दा चीग मीः एःके। खुङगीइ छ्युङ्माइ मीःन सफीरा एःके। खुङक्याइयाङ राःङगीइ तीबी चीग सीःङ चोङ्सी। 2ओःले खुङक्याइ टेः पेःदी ओःलाःम्ले ओःङ्क्योक तीबी चीग डेबा राःङगीइ लागी ज्यासी ओःले लीःक्योक डेबादी थाम्जेर इःङे लाःती स्योप क्युःर्ती हननीयाइ प्रेरीतक्याला खेर्तेर्सी। 3ओःले पत्रुसकीइ खुङला लाःसी, “हननीया, ख्योइ सेम चीले शैतानला काङ्जे तेर्पा? ख्योइ चाङ्मा ला ङीमु स्योप क्युःर्सी ओःले सीःङ चोङ्दी ज्योर्क्योक डेबाइ चीङ बो ख्यो ङीमु ज्यासी। 4ओः सीःङ मेचोङ्गासुनाङ ख्योइदीरा एःके। चोङमीःजीक ज्योर्क्योक डेबाङ ख्योइदीरा एःके। ओःले चीले ख्योइ राःङगीइ सेमला एःन्डुबा स्योप क्युःर्केन ठीवा चेपा? ख्योइ मीःक्या ङीमु चीग्रा मीःङे, इःनाङ ख्योइ कोन्ज्यो ङीमु स्योप क्युःर्ती एः!” 5पत्रुसकीइ ताम कोःलुङ्म्याःपा हननीया साला रीःल्सी ओःले सीसी। दी ताम कोःगेनक्या थाम्जेरकीइ माःङ्बुरा जीबा पेःसी। 6स्याराक्या ओःङ्दी हननीयाइ रोः तुम्सी ओःले फीला खेर्ती कुम्तेर्सी।
7घण्टा सुम तीङ्ला हननीयाइ छ्युङ्मा नाःङ्ला ओःङ्सी। खुङगीइ राःङगीइ ख्योबो सीक्योक ताम छोर्ती म्याःके। 8पत्रुसकीइ खुङला टीःसी, “ङाःला लोःप ले, ख्योक्याइ ओः सीःङ एःजेरा डेबाला चोङ्क्योक इःङे?” खुङगीइ लाःसी, “इःङे, ओःजेलारा चोङ्क्योक इःङे।” 9ओःले पत्रुसकीइ लाःसी, “ख्योक्याइ चीले प्रभुइ लाला जाँचला पार्तीगेन ठीवा चेपा? तादो, ख्योइ ख्योबोला तीःप्चेला काःल्क्योक मीःक्या ताःसे कोःलारा लेप्ती एः, ओःले खुङक्याइ ख्योलाङ ओःन्डुलेरा खुर्ती खेर्केन एः।” 10ओः तेःकासुरा खुङ पत्रुसकीइ काङ्बाइ तोःङ्ला रीःल्सी ओःले सीसी। ओः स्याराक्या नाःङ्ला ओःङ्सी ओःले खुङला सीक्योक थोङ्दी खुङगीइ रोःलाङ खुङगीइ ख्योबोइ सुःरलारा खुर्ती खेर्ती तीःप्तेर्सी। 11एःन्डुबा ताम कोःदी कोःम्साइ मीःक्या ओःले दी ताम कोःगेन राःङ्सा थाम्जेर मीःक्या माःङ्बुरा जीसी।
याःमाछाककीइ लेःगाक्या ओःले चुःन्डुलक्या
12प्रेरीतक्याइ मीःक्याइ कील्ला माःङ्बुरा याःमाछाककीइ लेःगाक्या पेःदेरा चुःन्डुलक्या तेङ्गुके। ओःले येशुला सेमल्हुक लुगेनक्या थाम्जेर कोन्ज्योइ मन्दीरकीइ सोलोमन लाःकेन दलानला जोम्ङेन्दी पेःउके। 13राःङ्सा मीःक्यादी खुङक्या ङीमु डीक्चेला आ क्याःप्चे माःखु। इःनाङ मीःक्याइ खुङक्याला सेःसा पेःउके। 14प्रभुला सेमल्हुक लुगेन ख्य्वापीःजाक्या ओःले पेःन्पीःजाक्या ताःरुङ बढ्तीगाला स्युःसी। 15ओः सोङ्गारा, मीःक्याइ नेःपाक्याला पत्रुस गल्लीक्यालाःम्ले डोगासुना टीःप्सोक चीग्रा एःनाङ ओः नेःपाक्याला लेप्च्युक लाःती खुङक्याला ख्योङ्दी ओः गल्लीक्याला तेनला ङ्याल्दी ज्यातेर्कुके। 16यरुशलेमगीइ छुरफारक्याला एःक्योक युःलक्यालाःम्लेङ माःङ्बुरा मीःक्या ओःङ्सी। खुङक्याइ नेःपाक्या ओःले हेन्डी क्याःप्क्योक मीःक्याला ख्योङ्सी ओःले खुङक्या थाम्जेर टाःसी।
प्रेरीतक्याला तुःक्पु ओःङ्क्योक
17चोइ पुजाहारी ओःले खुङगीइ सदुकी रोःक्याइ प्रेरीतक्याला माःङ्बुरा मीसेर पेःगाला स्युःसी। 18खुङक्याइ प्रेरीतक्याला जुम्दी चेङाङला कातेर्सी। 19इःनाङ ओः कुःङ्मु प्रभुइ स्वर्गदुतकीइ चेङाङगीइ कोःक्या फ्यादी प्रेरीतक्याला फीला ख्योङ्सी। स्वर्गदुतकीइ खुङक्याला लाःसी, 20“कोन्ज्योइ मन्दीरला सुङ ओःले मीःक्याला दी सेम्बा मीःलीइ बारेला थाम्जेर लेःङ्गो लाःतेर।” 21दीखो कोःदी खुङक्या ङामुरा कोन्ज्योइ मन्दीर नाःङ्ला काःल्सी ओःले मीःक्याला लोप्काला स्युःसी।
चोइ पुजाहारी ओःले खुङगीइ रोःक्याइ इस्राएलीक्याइ थाम्जेर छेस्यो मीःक्याला महासभाला केक्याःप्सी ओःले प्रेरीतक्याला चेङाङलाःम्ले ख्योङ्जेला मीःक्याला ताङ्सी। 22इःनाङ थेक्या चेङाङला काःल्दी तागासुना प्रेरीतक्याला माःफ्रे। ओः सोङ्गारा, खुङक्या लोःदी ओःङ्दी दीखो लेःङ्गो तेर्सी, 23“चेङाङला नी याःबुलेरा कोः क्याःप्ती दु ओःले चेङाङ ह्रुङेनक्याङ कोःला लाःङ्दी तेःती दु, इःनाङ कोः फ्यागासुना नाःङ्ला नी सुङ माःफ्रे।” 24दीखो कोःदी कोन्ज्योइ मन्दीरकीइ थेक्याइ कप्तान ओःले छेस्यो पुजाहारीक्या जोल्सी। खुङक्याइ ताः ची ओःङ्डो लाःती ठीवा चेखुदी म्याःके। 25ओःले मेःन्दा चीग मीः ओःङ्दी खुङक्याला लाःसी, “कोःदो! ख्याक्याइ चेङाङला काक्योक मीःक्या नी कोन्ज्योइ मन्दीरला मीःक्याला लोप्तेरा एः।” 26ओः सोङ्गारा, कप्तान ओःले थेक्या काःल्दी प्रेरीतक्याला लोदी ख्योङ्सी। खुङक्याइ जबरजस्ती माःबेबारा ख्योङ्सी चीलेलाःना मीःक्याइ खुङक्याला तोः क्याःप्टो लाःती जीदी एःके।
27खुङक्याइ प्रेरीतक्याला महासभाइ तोःङ्ला लाःङ्च्युसी। चोइ पुजाहारीइ खुङक्याला टीःसी, 28“ङीःइ ख्योक्याला येशुइ बारेला फीर्च्या सुलाङ चीङ माःलाःप लाःती चोक्पो आज्ञा तेर्ती एःके इःनाङ तादो ख्योक्याइ ची पेःदी एःपा! ख्योक्याइ नी मीःक्याला खुङगीइ बारेला लोप्ती यरुशलेम काःङ्रा फेल्दी एः ओःले ओः मीःला सेक्योक माःताक्पा ङीःखाला ख्योङ्देरा एः।”
29पत्रुस ओःले राःङ्सा प्रेरीतक्याइ लेःन लोदी लाःसी, “ङीःइ कोन्ज्योइ लाःक्योक ताम ङीःन्कोःउए, मीःक्याइ लाःक्योक ताम मीःङे। 30ख्याक्याइ क्रुसला प्याङ्दी सेक्योक येशुला उःइ फाफामुक्याइ कोन्ज्योइ खुङला फीर्च्या सोम्बो जोसी। 31इस्राएलगीइ मीःक्याइ स्याबा पेःदी लाःयो पोःर्च्युक ओःले क्षमा ज्योर्च्युक लाःती कोन्ज्योइ येशुला क्याःल्बु ओःले थार्च्युगेन्दी जोदी राःङगीइ च्याःबु लाःक्पाछ्योले ज्यासी। 32ङीः दीखोइ पाङ्बु इःङे ओःले कोन्ज्योइ राःङगीइ आज्ञा ङीःन्ङेनक्याला तेर्क्योक चाङ्मा लाइयाङ ओःखोइ दीखोरा पाङ्बु तेर्कुए।”
33दीखो कोःदी छेस्योक्या सीःताङगीइ मार्थुम खील्सी ओःले प्रेरीतक्याला सेचे सेम पेःसी। 34इःनाङ मेःन्दा चीग गमलीएल मीःन पेःक्योक फारीसी ओःला एःके, खुङदी थाम्जेरकीइ सेःसा पेःक्योक छ्येइ ठीमगीइ लोबेन एःके। खुङ लाःङ्सी ओःले प्रेरीतक्याला याःम्बा चीगकीइ लागी फीला खेर लाःती आज्ञा तेर्सी। 35ओःले खुङगीइ महासभाइ मीःक्याला लाःसी, “ए इस्राएलीक्या, ख्याक्याइ दी मीःक्याला ची पेःजे छोल्क्योक, च्यागाताःक्पु पेःदो। 36चीङ तीःनाम तोःङ्ला थुदास लाःकेन मेःन्दा चीग मीः राःङ छ्योम्बो मीः इःङे लाःकुके। इःनाङ खुङला सेसी ओःले खुङला ब्य्राङेन क्याःसीःजे मीःक्या थाम्जेर टाःम्सी ओःले खुङगीइ मीःन तोर्ती काःल्सी। 37ओः तीङ्ला मीःक्या टाःङेन तीःनामला गालीलगीइ यहुदा लाःकेन मीः एःके। माःङ्बुरा मीःक्या खुङगीइ तीङ्ला ब्य्राङ्सी, इःनाङ खुङलाङ सेसी ओःले खुङला ब्य्राङेनक्या थाम्जेर टाःम्दी काःल्सी 38ओः सोङ्गारा, दी मीःक्याला पोःर्तेर लाःती ङाः ख्याक्याला टेः तेर्के। खुङक्याला डोजे तेर चीलेलाःना खुङक्याइ दी लेःगा मीःक्यालाःम्ले तेःदाम पेःदी पेःक्योक एःना ओःखो राःङ्रा तोर्ती डोगेन एः। 39इःनाङ दीखो लेःगा कोन्ज्योलाःम्ले काःल्क्योक इःङे लाःना ख्याक्याइ दीखो मीःक्याला कादी कामीःखुगेन एः। मीःङे लाःना नी ख्याक्या कोन्ज्योइ वीरुद्धला लाःङेन एः।”
40खुङक्याइ गमलीएलगीइ लाःक्योक ताम ङीःन्सी ओःले खुङक्याइ प्रेरीतक्याला नाःङ्ला केक्याःप्ती कोर्रा क्याःप्सी ओःले फीर्च्या नाःमाङ येशुइ मीःनला चीङ माःलाःप लाःती आज्ञा तेर्सी ओःले खुङक्याला ताङ्तेर्सी। 41प्रेरीतक्या महासभा नाःङ्ले पाङ्ला थेङ्सी ओःले कोन्ज्योइ खुङक्याला येशुइ लागी तुःक्पु खुर्चेला लायककीइदी जोसी लाःती केःदाङ पेःसी। 42ओः तीङ्ला खुङक्या ङीःमारी टाःङ्मा कोन्ज्योइ मन्दीरला ओःले मीःक्याइ खीमक्याला काःल्दी येशुरा थार्च्युगेन ख्रीष्ट इःङे लाःती याःबु लेःङ्गो लाःचे ओःले लोप्चे नाःमाङ माःपोःर।
Currently Selected:
प्रेरीत 5: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
