प्रेरीत 10
10
कर्नेलीयसकीइ पत्रुसला केक्याःप्क्योक
1कैसरीया क्याःसाला कर्नेलीयस मीःन पेःक्योक मेःन्दा चीग मीः तेःकुके। खुङ रोमी थेक्याइ इटाली लाःकेन पल्टानगीइ कप्तान एःके। 2खुङ कोन्ज्योला आराधना पेःगेन मीः एःके ओःले खुङगीइ थाम्जेर फेबेक्याङ कोन्ज्योला जीबा पेःउके। खुङगीइ कोःकेन मीःक्याला छ्योम्बो सेम पेःदी तेर्कुके ओःले तेन्दुरा कोन्ज्यो ङीमु प्रार्थना पेःउके।
3ङीःमा चीग छाकालला सुम बज्तीजे छोल्सुना कर्नेलीयसकीइ दर्शन चीग थोङ्सी। दर्शनला खुङगीइ कोन्ज्योइ स्वर्गदुत खुङ साःला ओःङ्देरा पेःक्योक साङ्बु पेःदी थोङ्सी। स्वर्गदुतकीइ खुङला लाःसी, “कर्नेलीयस!” 4कर्नेलीयस जीबाइ स्वर्गदुतला तादीरा तेःसी ओःले लाःसी, “हजुर, दीखो चीम्बा?” स्वर्गदुतकीइ लाःसी, “ख्योइ पेःक्योक प्रार्थना कोन्ज्योइ कोःदी एः ओःले ख्योइ प्राङ्नाक्याला तेर्क्योक तामक्या कोन्ज्योइ टेःम्बा साल्दी एः। 5ताः ख्योइ योप्पा क्याःसाला एःक्योक पत्रुस लाःकेन सीमोनला केक्याःप्काला चीङ मीःक्या ताङ्तेर। 6खुङ कोबाइ लेःगा पेःगेन सीमोनगीइ खीमला तेःती एः, खुङगीइ खीम चाङ्बुइ सुःरला एः।” 7ओःले ओः स्वर्गदुत कर्नेलीयसलाःम्ले काःल्सी, ओःले कर्नेलीयसकीइ राःङगीइ मेःन्दा ङी लाबुक्याला ओःले कोन्ज्योला आराधना पेःगेन्दी मेःन्दा चीग थेला केक्याःप्सी। 8खुङगीइ राःङगीइ थोङ्क्योक थाम्जेर ताम लाःसी ओःले खुङक्याला योप्पा क्याःसाला ताङ्सी।
9ङार्तो च्योःङ्रा ङीःमा फेला खुङक्या योप्पा क्याःसाइ सुःरला लेप्सी। ओः तेःकासु पत्रुस प्रार्थना पेःजेला खीमखाला#१०:९ खीमखाला ओः तीःनामला इस्राएलगीइ खीमक्याइ तुःङ्सोदी थाङ च्योःङ्रा सम्म एःके। काःल्सी। 10खुङला तोःपा तोसी ओःले खुङगीइ चीङ साःगेन स्याः छोल्सी, ओःले राःङ्साक्याइ साःगेन स्याः जोदेरा एःकासुना खुङगीइ दर्शन चीग थोङ्सी। 11खुङगीइ नाःम्खालीङ फ्याक्योक थोङ्सी ओःले ओःलाःम्ले छ्योम्बो तन्ना च्योःङ्रा सीःगार सुरला ताःम्दी जाम्बुलीङछ्योले ताःप्तेरा पेःक्योक थोङ्सी। 12ओः तन्नाला थाम्जेर खालेइ रीःदाकक्या, टोःपा टीःती डोगेन पशुक्या ओःले नाम्सार्गाइ थाम्जेर च्याःज्युङ्माक्या एःके। 13ओःले के चीगकीइ खुङला लाःसी, “ए पत्रुस, लोःङ ओःले दीक्याला सेती सोः।” 14इःनाङ पत्रुसकीइ लाःसी, “मीःङे प्रभु, उःइ छ्येइ ठीमला साःजे मेःयोङे लाःक्योक एःन्डुबा चीबु स्याःक्या ङाःइ नाःमाङ साःदी म्याः!” 15ओः केइ फीर्च्या लाःसी, “कोन्ज्योइ चाङ्मा जोक्योक स्याःक्याला ख्योइ चीबु माःलाःप।” 16खेप सुमथुप एःन्डुबारा काःल्सी ओःले खेप चीगलारा ओः तन्ना नाःम्खालीङला खेर्सी।
17राःङगीइ थोङ्क्योक दी ताम मासेबाइ पत्रुस जोल्सी। ओः तेःकासुरा कर्नेलीयसकीइ ताङ्क्योक मीःक्या सीमोनगीइ खीमला लेप्सी ओःले खुङक्या कोःला लाःङ्दी तेःसी। 18खुङक्याइ केक्याःप्तेरा लाःसी, “पत्रुस लाःकेन सीमोन दीला एःपा?” 19ओः तेःकासु पत्रुसदी राःङगीइ थोङ्क्योक दर्शन ची इःन्स्वा लाःती ताःरुङ ठीवा साल्देरा एःके। कोन्ज्योइ लाइ खुङला लाःसी, “कोःदो, ख्योला वाःला मेःन्दा सुम मीःक्याइ छोल्देरा एः। 20लोःङ ओःले माःर्ला सुङ, ओःले चीङ काःबु माःबेबारा खुङक्या ङीमु सुङ, चीलेलाःना खुङक्याला ङाःइ ताङ्क्योक इःङे।” 21पत्रुस माःर्ला पाःप्सी ओःले ओः मीःक्याला लाःसी, “ख्याक्याइ छोल्क्योक मीः ङाःरा इःङे। ख्याक्या दीला चीले ओःङ्क्योक?” 22खुङक्याइ लाःसी, “कप्तान कर्नेलीयसकीइ ङीःला ताङ्क्योक इःङे। खुङ याःबु ओःले कोन्ज्योला जीबा पेःगेन मीः इःङे, ओःले खुङला थाम्जेर यहुदीक्याइयाङ सेःसा पेःउए। चाङ्मा स्वर्गदुत चीग खुङ साःला ओःङ्दी ख्याला खुङगीइ खीमला केक्योःप ओःले ख्याइ लाःक्योक ताम कोःदो लाःती ओः स्वर्गदुतकीइ खुङला लाःती एःके।” 23दीखो कोःदी पत्रुसकीइ ओः मीःक्याला नाःङ्ला केक्याःप्ती तोःङ्ज्याङ पेःसी ओःले खुङक्या ओः कुःङ्मु ओःलारा तेःसी।
ङार्तो च्योःङ्रा पत्रुस ओःले योप्पाला एःक्योक प्रभुला सेमल्हुक लुगेन चीङ आतानोःक्या ओः मीःक्या ङीमुरा काःल्सी। 24नाङ च्योःङ्रा खुङक्या कैसरीयाला लेप्सी। कर्नेलीयसदी राःङगीइ छ्योरीक्या ओःले सुःरकीइ रोःक्याला केक्याःप्ती पत्रुसकीइ लाःम तादी तेःती एःके। 25पत्रुस ओःङ्दी खीम नाःङ्ला स्युःमीःजीक कर्नेलीयसकीइ खुङगीइ काङ्बाइ तोःङ्ला पीमु चुसी ओःले खुङला फ्या छाल्सी। 26इःनाङ पत्रुसकीइ खुङला एःन्डु लाःतेरा याःरला लाङ्सी, “लोःङ, ङाःङ नी ख्यो च्योःङ्रा मीः चीग्रा इःङे।” 27पत्रुस कर्नेलीयस ङीमु ताम लाःतेरा खीम नाःङ्ला स्युःसी। ओःला खुङगीइ माःङ्बुरा मीःक्या जोम्क्योक थोङ्सी। 28पत्रुसकीइ खुङक्याला लाःसी, “ङीः यहुदी मीःक्या राःङ्सा क्युःपाइ मीःक्या ङीमु डीक्ती तेःचे ओःले खुङक्या ङीमु फ्रेचे ङीःइ छ्येइ ठीमगीइ मेतेरए लाःकेन ताम ख्याक्या थाम्जेरकीइ छोर्तीरा एः। इःनाङ काःखोङ मीःला मीचीक्पा मीः लाःचे मेःयोःङे लाःती कोन्ज्योइ ङाःला तेङ्दी एः। 29ओः सोङ्गारा, ङाः ख्याक्याइ केक्याःप्कासुना काःबु माःबेबारा ओःङ्सी। ताः ङाःला लोःप, ख्याक्याइ ङाःला चीले केक्याःप्क्योक?”
30कर्नेलीयसकीइ लाःसी, “ङीःमा सीः तोःङ्गीइ ताम इःङे। छाकालगीइ सुम बज्तीदी एःकासुना ङाः खीमला प्रार्थना पेःदेरा एःके। एक्कासी कार्मु छ्य्वामे केःला केःङ्क्योक मीः ङाःइ सुःरला लाःङ्सी 31ओःले लाःसी, ‘कर्नेलीयस, कोन्ज्योइ ख्योइ प्रार्थना कोःदी एः ओःले ख्योइ प्राङ्नाक्याला तेर्क्योक लेःगाक्या कोन्ज्योइ टेःम्बा साल्दी एः। 32ओः सोङ्गारा, योप्पा क्याःसाला पत्रुस लाःकेन सीमोनला केक्याःप्काला ताङ्दो। खुङ कोबाइ लेःगा पेःगेन सीमोनगीइ खीमला तेःती एः, खुङगीइ खीम चाङ्बुइ सुःरला एः।’ 33ओः सोङ्गारा, ङाःइ ओः तेःकासुरा ख्याला केक्याःप्काला ताङ्सी ओःले ख्या दीला ओःङ्दी याःबुरा काःल्सी। ताः प्रभुइ ख्याला आज्ञा पेःक्योक ताम कोःजेला ङीः थाम्जेर कोन्ज्योइ तोःङ्ला दीला जोम्दी एः।”
पत्रुसकीइ लेःङ्गो
34पत्रुसकीइ लाःसी, “ताः ङाःइ तेःन्दामरा छोर्ती एः, कोन्ज्योइ थाम्जेर मीःक्याला चीग्रा चेपा पेःउए। 35मीः काःखो क्युःपाइदीरा एःनाङ कोन्ज्योला सेःसा पेःगेन्दी ओःले डीक्पु लेःगा पेःगेन मीःला खुङगीइ सेम थेकुए। 36ख्याक्याइ छोर्तीरा एः, खाम्साङ्बु तेर्केन याःबु लेःङ्गो कोन्ज्योइ येशु ख्रीष्टलाःम्ले इस्राएलीक्याला ताङ्सी, ओःले दीखो येशुरा थाम्जेरकीइ प्रभु इःङे। 37युहन्नाइ बप्तीस्माइ लेःङ्गो प्रचार पेःमीःजीक गालील क्षेत्रमीःजीक छुदी यहुदीया क्षेत्र काःङ्रा काःल्क्योक तामक्याइ बारेला ख्याक्याइ छोर्तीरा एः। 38ख्याक्याइ छोर्तीरा एः, कोन्ज्योइ नासरतकीइ येशुला दाम्दी चाङ्मा ला ओःले ल्हे खुङखाला पुङ्तेर्सी। खुङगीइ याःबु लेःगा पेःदेरा काःल्सी ओःले शैतानगीइ तुःक्पु तेर्क्योक मीःक्याला टाःच्युदेरा थाम्जेरछ्योले काःल्सी, चीलेलाःना कोन्ज्यो खुङ ङीमु एःके। 39खुङगीइ यहुदीया क्षेत्र ओःले यरुशलेमला पेःक्योक थाम्जेर तामगीइ पाङ्बु ङीः इःङे। खुङक्याइ खुङला क्रुसला प्याङ्दी सेसी। 40इःनाङ ङीःमा सुम तीङ्ला कोन्ज्योइ खुङला सीक्योकलाःम्ले सोम्बो जोसी ओःले कोन्ज्योइ खुङला मीःक्याइ तोःङ्ला थोङ्च्युसी। 41खुङला थाम्जेर मीःक्याइ नी थोङ्जे माःज्योर, इःनाङ कोन्ज्योइ तोःङ्लारा पाङ्बुइ लागी दाम्क्योक ङीःक्याइ चीग्रा थोङ्जे ज्योर्सी, ओःले कोन्ज्योइ खुङला सीक्योकलाःम्ले सोम्बो जोमीःजीक खुङ ङीमु साःजे थुङ्जे पेःगेन्दी ङीःक्यारा इःङे। 42खुङगीइ ङीःला प्रचार पेःजेला ओःले खुङला कोन्ज्योइ सोम्बो रा सीक्योकक्याइ ठीम पेःजेला दाम्क्योक इःङे लाःती मीःक्याला पाङ्बु तेर्चेला ङीःला आज्ञा तेर्ती एः। 43खुङला सेमल्हुक लुगेनक्या थाम्जेरकीइ खुङगीइ मीःनलाःम्ले लाःयो क्षमा ज्योर्केन एः लाःकेन ताम कोन्ज्योइ लेःङ्गो तेर्केन थाम्जेर मीःक्याइ खुङगीइ बारेला लाःती एःके।”
44पत्रुस ताःरुङ ताम लाःतीरा एःकासुना, खुङगीइ ताम कोःगेनक्या थाम्जेरखाला चाङ्मा ला ओःङ्सी। 45कोन्ज्योइ राःङगीइ चाङ्मा लाइ वरदान राःङ्सा क्युःपाइ मीःक्यालाङ तेर्क्योक थोङ्दी पत्रुस ङीमु योप्पालाःम्ले ओःङ्क्योक प्रभुला सेमल्हुक लुगेन यहुदीक्या याःमाछाक काःल्सी। 46चीलेलाःना खुङक्याइ राःङ्सा तामक्यालाःम्ले ताम लाःक्योक ओःले कोन्ज्योला प्रशंसा पेःक्योक खुङक्याइ कोःसी। पत्रुसकीइ लाःसी, 47“ङीःइ च्योःङ्रारा दीखुङक्याइयाङ चाङ्मा ला ज्योर्ती एः। ताः दी मीःक्याला छ्युइ बप्तीस्मा लेःङ्जेला सुइ काखुगे?” 48ओःले पत्रुसकीइ खुङक्याला येशु ख्रीष्टकीइ मीःनला बप्तीस्मा लेःङ्दो लाःती आज्ञा तेर्सी। ओः तीङ्ला कर्नेलीयसकीइ पत्रुसला चीङ ङीःमाथुप खुङक्या ङीमुरा तेःचेला वासी पेःसी।
Currently Selected:
प्रेरीत 10: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
