रोमी 9

इस्राएली मेह्‍णु बेलिए परमेश्वरे योजना पूरी भुण

(9:1—11:36)

परमेश्वरे चुणो इस्राएली मेह्‍णु

1अउं जे बोलुण लगो असा, से सच्चु असु। अउं झूठ नेईं बोलुण लगो किस कि अउं मसीहे चेला भिन्थ, होर शुची आत्मा में उगाह असी। 2मोउं सुआ दुख असा, होर में मन हमेशा अशी असी, 3कि में अपु भाई, में ऊड़ी जे यहूदी टज असी, मसीह केआं दूर असे। काश अउं मसीह केईआं दूर भुणे बेलि, होर मोउं पुठ परमेश्वरे शराप लगणे बेलि से मसीह केईं एई बटतेथ, त अउं खुशी खुशी तीं करण जे तेयार असा। 4किस कि में ईं से बि इस्राएली भो, त परमेश्वरे गभुर भुण जे तेन्हि पेहला हक मेआ। तेन्हि परमेश्वरे महिमा काई, होर तेन्हि जे परमेश्वरे अपु जुबान दुतो थी, होर अपु निआंग बि तेन्के धे दिती। तेन्हि केईं परमेश्वरे देहरे पूजा अराधना थी, होर तेन्के धे परमेश्वरे सुआ जुबान दुतो असी। 5से महान पुरखे बि तेन्केरी भो, होर मसीह बि जिसमे हिसाब जोई तेन्हि अन्तरा भुआ। तेन्हि सोबी के अधिकारी परमेश्वर भो। तसे जइ जुग जुग तकर भुन्ति रिहे!

आमीन!

6पर एसे मतलब ईं नेईं कि परमेश्वरे जुबान बेकार भुई, किस कि जे बि इस्राएले वंश अन्तर जमो असे, से सोब सच्चे इस्राएली ना भो। 7होर ना अब्राहम केईआं जमणे बझई जोई सोब तसे गभुरु बणे। पर धरमे कताब अन्तर अब्राहम जे परमेश्वरे बोलो बोके लिखो असी कि

“इसहाके बेलिए तें वंश मानिन्ता।”#शुरुवात 21:12

8मतलब कि जिसमे बेलि जमो गभुर परमेश्वरे गभुर ना भो, पर परमेश्वरे जुबान बेलिए जमो गभुर, ऊड़ी मानिन्ते। 9किस कि परमेश्वरे ईं बोल कइ जुबान दुतो थी कि

“फिरि, इस टेम तकर अउं वापस एन्ता,

होर तें जुएली सारे कुआ जमता।”#शुरुवात 18:10,14

10होर सद एईएं ना, पर जपल इसहाके जुएली रिबेका जूंठे कुआ एसाव त याकूबे बेलि गभुरवाल थी, 11-12त होता से कुआ जमोरे बि नेओथ, होर ना तेन्हि कोई भलु बुरु किओ थिउ। तोउं बि परमेश्वरे बोलु, “जेठा से केंठे सेवा कता।”#शुरुवात 25:23 एसे बेलि ई पता लगता कि परमेश्वरे मेह्‍णु चुणुणे मकसद, तेन्के कमी के हेसाब जोई ना, बल्कि तेन्हि भिआणे बाड़े इच्छाई हेसाब जोई असा। 13धरमे कताब अन्तर बि इहांणि लिखो असु,

“मेईं याकूब जोई परेम किआ,

पर एसाव रशुणा किआ।”#मलाखी 1:2-3

14मोखयाल कोउं जेईं ईं बोलियाल कि परमेश्वर अन्याय कता। अउं बोता कि “ना, कदी ना!” 15किस कि परमेश्वर मूसा जे बोता,

“अउं जेस केसे पुठ दाह करुण चहूं त तेस पुठ दाह कता,

होर जेस केसे पुठ कृपा करुण चहूं त तेस पुठ कृपा कता।”#निसुणे 33:19

16त ना मेह्‍णु चहणे बेलि, होर ना तसे कोशिश करणे बेलि परमेश्वर मेह्‍णु चुणता। पर परमेश्वर अपफ दाह कर कइ तेन्हि चुणता। 17किस कि धरमे कताब अन्तर मिस्र देशे राजा फिरोन जे परमेश्वरे बोलो बोके लिखो असी,

“मेईं तु तोउं खड़ेरो असा कि तें सामणि अउं अपु ताकत हरालुण,

ताकि में नओएं इज्जत पूरी धरती पुठ भोल।”#निसुणे 9:16

18तोउं त, परमेश्वर जेस चहाल तेस पुठ दाह कता, होर जेस चहाल तेस नकठर बड़ाई छता।

सज्जा देण केआं पेहले परमेश्वरे लाह

19मोखयाल कोउं जेईं बोलियाल, “अगर तीं असु त फि से असी पुठ दोष किस लान्ता? किस कि कोई जेईं बि तसे इच्छाई खिलाफ कम कइ ना बटता?” 20पर अउं बोता कि ए मेह्‍णुआ! भला तु कोउं भो, जे परमेश्वर जुए मुहाबला कता? कि बणो घड़ु कुम्हार जे बोल बटतु ना “तेईं अउं ईं किस बणाउ?”#यशायाह 29:16; 45:9 21कुम्हारे शोउ पुठ पूरा हक असा कि से तस शोउए थेच अन्तरा यक घड़ु खास कमे लिए, त होरु गीहे कमे लिए बणान्ता। 22अगर परमेश्वरे अपु लेहेर कढ़णे जे त अपु ताकत हरालण जे ईं भाणे बणाए, जे खतम करणे लिए असे, पर तेन्हि सुआ लाह जोई सेहु, त एस अन्तर हैरान भुणे बाड़ी कोई बोक नेईं। 23होर अगर तसे इच्छा थी कि तेन्हि लाह जोई सेहणे बेलि से अपु सुआ महिमा तेन्हि भाणि पुठ हरालता, जे तसे दाहई लिए पेहलाई बणो असे, त एस अन्तर बि अस कुछ बोल ना बटते। 24तेन्हि दाहई भाणि अन्तर अस असे, जे तेन ना सद यहूदी मेह्‍णु बिचा भिहो असे, बल्कि गैर यहूदी मेह्‍णु बिचा बि भिहो असे। 25जीं से होशै भविष्य वक्ते कताब अन्तर बि बोता,

“जे में टज ना थी, तेन्हि जे अउं ‘अपु टज’ बोता;

होर जे में ट्यारे ना थिए, तेन्हि जे अउं ‘अपु ट्यारे’ बोता।”#होशै 2:23

26“होर भुन्तु ईं कि जेस जगाई पुठ तेन तेन्हि जे बोलो थिउ कि ‘तुस में टज ना भो’,

तसे जगाई से ‘जीन्ते परमेश्वरे गभुर’ बोलिन्ते।”#होशै 1:10

27होर यशायाह भविष्य वक्ता इस्राएले मेह्‍णु बारे लियार दी कइ बोता,

“चहे इस्राएले मेह्‍णु के गिणती समन्दरे रेते बराबर भोल,

तोउं बि तेन्हि अन्तरा थोड़े ईं बचते।

28किस कि प्रभु अपु जुबान हेसाब जोई

झट धरती मेह्‍णु के अखिर लिंगि न्याय कर कइ तेन्हि सज्जा देन्ता।”#यशायाह 10:22-23

29एसे बारे यशायाह भविष्य वक्ते बि पेहलाई बोलो थिउ,

“अगर सर्व शक्तिमान प्रभु हें लिए कुछ मेह्‍णु ना बचान्ताथ

त अस सदोम शेहरे ईं बरबाद भोई घेन्तेथ,

होर अमोरा शेहरे ईं हें हाल भुन्तेथ#9:29 सुआ पापी के बझई जोई परमेश्वर सदोम त अमोरा शेहर पूरा खतम कइ छो थिआ। एन्हि दुई शेहरी कोई बि ना बचा, त ए शेहर खतम भोई गे। (शुरुवात 19:1-25)।”#यशायाह 1:9

इस्राएली मेह्‍णु के विश्वास ना करण

30तोउं असी की बोलुण? ई कि गैर यहूदी मेह्‍णु जे परमेश्वरे सामणि धर्मी बणणे कोशिश न कतेथ, से परमेश्वरे तेन्के विश्वासे बझई जोई धर्मी बणाए; 31पर इस्राएली मेह्‍णु तेन्हि नियमी तोपुण लगो थिए, जेसे बेलि से धर्मी बण बटियेल, होर से तेन्हि ना मेईंए। 32मोखयाल कोउं जेईं बोलियाल, “किस ना मेईंए?” अउं बोता, किस कि तेन्हि से विश्वासे बेलि ना, बल्कि अपु कमी के बेलिए तोपुण लोओ थिए। से तेस घोड़ जोई उछुट गे, जे मेह्‍णु उछुट छताथ, मतलब मसीह जोई, 33जीं धरमे कताब अन्तर परमेश्वरे यीशु मसीहे बारे बोलो बोक लिखो असी,

“हेरे, अउं सिय्योन#9:33 मतलब “यरुशलेम शेहर अन्तर” अन्तर यक ईं घोड़ रखता,

जेसे बेलि मेह्‍णु उछुट घेन्ते, होर भीं झड़ते।

होर जे तेस पुठ विश्वास करियेल, से लजेईन्‍ते नउ।”#यशायाह 28:16; 8:14

Currently Selected:

रोमी 9: pgg

Highlight

Compare

Copy