प्रतिनिधि 20

मकिदुनिया, यूनान राज्य अन्तर पौलुस

1जपल हल्ला ठमी गा त पौलुसे विश्वासी भिआई कइ तेन्हि हिम्मत दिती। तोउं तेन्हि जे आबिश कर कइ मकिदुनिया राज्य जे घेई गा। 2तेस राज्ये जगाई जगाई हंट कइ तेन विश्वासी भाई भेणि हिम्मत दिती त अखिर अन्तर यूनान#20:2 यूनान राज्य जे “अखया” बि बोते। राज्य आ। 3टाई मेहन तकर तठि बिश कइ से तठिआ जहाज पुठ सीरिया राज्य जे घेणे जे तेयार थिआ। पर यहूदी मेह्‍णु तसे खिलाफ मेझर करण लगे, त तेन मकिदुनिया राज्य बइ सीरिया राज्य वापस घेणे ठीक समझु। 4बिरीया शेहरे पुर्रुसे कुआ सोपत्रस त थेस्सलुनीका शेहरे अरिस्तर्खुस, सिकन्दुस, देरबे शेहरे गयुस तेस जोई साते गे। तेन्हि जोई तिमुथियुस, एशिया इलाके तुखिकुस त त्रुफिमुस बि तेस जोई साते थिए। 5ए भाई असी केआं पेहलाई घेई कइ त्रोआस शेहर अन्तर असी भाड़ बिशे थिए।#20:5 20:5 केआं 21: 18 तकर इस कताबे लेखक लूका पौलुस जोई साते घेण लगो थिआ। इस बझई जोई से इस हेस्से अन्तर “अस” सर्वनामे इस्तेमाल कता। 6पर अस रौठि त्योहार केआं पता पन्ज रोज तकर जहाज पुठ बिश कइ फिलिप्पी शेहर केआं त्रोआस शेहर तेन्हि केईं पुजे, त सत रोज तठि बिशे।

पौलुस यक जवान कुआ दुबारी जीआण

7शिण्हेचरे ब्यादि टेम जपल अस प्रभु रौठि खाण जे किठिए, त पौलुस जे दोके रोज घेणे बाड़ा थिआ, किठे मेह्‍णु जोई बोक की; त अधरात तकर शिचालता रिहा। 8जेस भखेरी अस कठे थिए, तठि सुआ दीये जाओ थिए। 9तोउं यूतुखुस नओएं यक जवान, गलेज पुठ बिश कइ झूल किढ़ण लगो थिआ। जपल पौलुस चेरे तकर बोक कता रेहा त से झूली बेलिए टेके पूरे गलेज केआं झड़ गा। जपल तेन्हि से खड़ेरा त से मर गो थिआ। 10पर पौलुस झट बुन्ह घेई कइ तेस जोई कलोशि गा। तोउं कियाड़ी जोई लाई कइ बोलु, “डरे नउ; ए जीन्ता असा।” 11तोउं तेन्हि बेहीं घेई कइ प्रभु रौठि खाई त अत चेरे तकर बोके करण लगा कि दिस करहण लग गई। तोउं से घेई गा। 12मेह्‍णु तेस जवान जीन्ता गी घिन गे त से सुआ खुश थिए।

त्रोआस शेहर केआं मिलेतुस शेहर घेण

13अस पेहलाई जहाज पुठ अस्सुस शेहर जे घेई गे, जेठिआ असी पौलुस बि जहाज पुठ चढ़ाण थिआ। पौलुसे अपफ ई योजना बड़ो थी, किस कि तेन हंट कइ तेस शेहर पुजणे ठीक किओ थी। 14जपल से अस्सुस शेहर अन्तर असी मेईंया त असी से जहाज पुठ चढ़ाई कइ मितुलेने शेहर जे आए। 15तठिआ जहाज पुठ घेई कइ दोके रोजे अस खियुस नओएं टापु समाणि पुजे, त होउस सामुस नओएं टापु पुठ पुजे। तोउं फिर होर रोज मिलेतुस बंदरगाह पुजे। 16किस कि पौलुस उतोड़ि अन्तर थिआ कि अगर भोई सकियेल त से पिन्तेकुस्ते त्योहारे रोज यरुशलेम शेहर बिशाल, त तेन इफिसुस शेहर बइ घेणेरी नेओथ किओ, किस कि तेस लगण लगो थिउ कि एशिया इलाके बइ तेस चेरे भोई घेन्तु।

इफिसुस शेहरे सतसंगे स्याणी जे पौलुसे उपदेश

17पौलुसे मिलेतुस बंदरगाह केआं इफिसुस शेहर जे जवाब लंघाई कइ सतसंगे स्याणे भिए। 18जपल से हंट कइ तेस केईं ए, त पौलुसे तेन्हि जे बोलु: “तुस जाणते कि एशिया इलाके पुजणे पेहले रोज केआं तुसी जोई साते बिशणे अखिर रोज तकर अउं कीं जीआ। 19त कीं अउं अपफ सुआ घटाई कइ, रोली रोली, होर तेन्हि भुंजाण सेही कइ, जे में खिलाफ यहूदी मेह्‍णु के मेझर बझई जोई मोउं पुठ आए, तोउं बि अउं प्रभु सेवा कते रिहा। 20होर तुस जाणते कि जे जे बोके तुं भलाई लिए थी, तेस बारे प्रचार करण जे अउं कदी ना डरा, बल्कि मेह्‍णु के सम्हाणि त गी गी घेई कइ बि मेईं तुसी शिचालु। 21मेईं कि यहूदी मेह्‍णु त कि गैर यहूदी मेह्‍णु, सोबी के सम्हाणि प्रचार किओ असा कि सोब परमेश्वरे कना जे अपु मन बदलण त हें प्रभु यीशु मसीह पुठ विश्वास करण चहिए।”

22“अब हेरे, अउं शुची आत्मा जोई बन्हि कइ यरुशलेम शेहर जे घेण लगो असा। होर अउं न जाणता कि तठि मोउं जोई की की भुन्तु। 23पर सद ईं जाणता कि शुची आत्माई हर शेहर अन्तर उगाही दी दी कइ अउं चौकाने किओ असा कि तठि मोउं जेहेल त दुख तकलीफ भाड़ण लगो असे। 24तोउं बि मोउं अपु प्राण ट्यारे नेईं। में त यके इच्छा असी कि अपु दौड़ त से कम पूरु करुण, जे प्रभु यीशु मेन्धे दुतो असे। से कम भो - परमेश्वरे कृपाई खुश खबरी उगाही देण।”

25“अब, अउं जाणता कि तुस सोब, जेन्हि बुछ अउं परमेश्वरे राज्ये खुश खबरी प्रचार कता रेहा, में मुंह फिर कदी न हेरते। 26तोउं त, अउं आज तुसी जे उगाही दी कइ बोता कि अगर तुस मसीह पुठ बजन विश्वासे मर घेन्ते त अउं तसे लिए जिम्मेबार नेईं। 27किस कि मेईं परमेश्वरे पूरी योजना तुसी शुणाण केआं कदी झिझक न की। 28तोउं त, तुस अपु त परमेश्वरे तेस दले चौकसी करे जे शुची आत्माई तु जिम्म छो असी। तुस परमेश्वरे सतसंगे#20:28 कोठि कोठि “प्रभु सतसंग” लिखो असु। गुआले ईं देखभाल करे, किस कि तेन ए अपु कोईया लहुए बइ खरीदो असे। 29मोउं पता असा कि में घेण केआं पता, चीरणे बाड़े शंखु के ईं तुं बुछ झूठे शिक्षा देणे बाड़े एन्ते त दल खतम कइ छते। 30तुसी अन्तरा बि ईं ईं मेह्‍णु खड़ भुन्ते, जे विश्वासी अपु कना करण जे सच्चाई बुमोरि छते। 31तोउं त चौकाने बिशे, त याद रखे कि टाई साल तकर दन रात रोल रोल कइ अउं हर यक जेईं चेता दिआन्ता रिहा।”

32“अब अउं तुसी परमेश्वरे त तसे कृपाई वचने हवाले कता; जे तुं सुहलियत कइ सकता त जे सोब शुचे किओ मेह्‍णु जुओई तुन्धे बि विरासत दी सकता। 33मेईं केसेरी सुन्ने, चन्नी त झिणि के लालच न की। 34तुस अपफ जाणते कि अपु जंघि बेहि रोलाई कइ मेईं अपु त में साथी के जरूरत पूरी की। 35जे किछ बि मेईं किउ, तसे बेलि मेईं तुसी हरालु कि इस रीत जोई मेहनत कर कइ गरीब मेह्‍णु के मदत करीण। असी से वचन याद रखण जरूरी असा, जे प्रभु यीशु अपफ बोलो असा:

‘नेण केआं देणे बाड़ा धन्य असा।’”

36जिखेईं पौलुस अपु बोक बोल गा त तेन उटेऊ बिश कइ तेन्हि सोबी जोई साते प्रार्थना की। 37से सोब रोलुण लगे त पौलुसे गड़ामेड़ा कर कइ से फोकड़िये। 38सोबी केआं ज्यादा दुख तेन्हि इस बोक पुठ भुआ कि तेन बोलु कि से तसे मुंह फिर कदी न हेरते। तोउं तेन्हि से जहाज तकर पुजा।

Currently Selected:

प्रतिनिधि 20: pgg

Highlight

Compare

Copy