प्रतिनिधि 19
19
इफिसुस शेहर अन्तर पौलुस
1जपल अपोलुस कुरिन्थुस शेहर अन्तर थिआ, तपल पौलुस बत अन्तर एणे बाड़े सोबी राज्य के दौरा कर कइ इफिसुस शेहर पुजा। तठि तस कुछ विश्वासी भाई मेईंए। 2पौलुसे तेन्हि केआं पुछु, “विश्वास कते टेम कि तुसी शुची आत्मा मेओ थी ना?” तेन्हि तेस जे बोलु, “असी त शुची आत्माई बारे कोई बोक कदी नेईं शुणो।” 3त तेन तेन्हि जे बोलु, “त फिर तुं पुओणि अन्तर चुसीणे मतलब की भुआ?” तेन्हि बोलु, “तसे मतलब भुआ से, जे यूहन्ने पुओणि अन्तर चुसुणे बारे प्रचार#19:3 यूहन्ना बोताथ कि अपु अपु पाप केआं मन बदलाण दिए त तस हरालण जे पुओणि अन्तर चुसीण दिए। किओ थिआ।”#मत्ती 3:1-12; मरकुस 1:1-8; लूका 3:1-17; यूहन्ना 1:26-27 4पौलुसे बोलु, “यूहन्ने तेन्हि पुओणि अन्तर चुसताथ, जेन्हि अपु पाप केआं मन बदलो थिए। से मेह्णु जे ईं बोताथ ‘जे मोउं केआं पता एणे बाड़ा असा, तुसी तेस पुठ विश्वास करण, मतलब यीशु पुठ विश्वास करण।’”#मत्ती 3:11 5ईं शुण कइ पौलुसे बेलिए से प्रभु यीशु नओएं बइ पुओणि अन्तर चुसिए। 6तोउं जपल पौलुसे तेन्हि पुठ हथ रखा, त शुची आत्मा तेन्हि पुठ एई गई, त से होरे होरे भाषा बोलुण त भविष्य वाणि करण लगे। 7से सोब लगभग बाराह मेह्णु थिए।
इफिसुस शेहरे सतसंग बधण
8तोउं पौलुस टाई मेहन तकर यहूदी अराधनालय अन्तर घेई घेई कइ त नडर भोई कइ परमेश्वरे राज्ये बारे बोता रिहा, त यहूदी मेह्णु समझान्ता रिहा। 9पर तठि कुछ मेह्णु नकठर भोई कइ विश्वास ना किआ, त मेह्णु के समाणि एस बत जे भलु बुरु बोलुण लगे। त पौलुस तेन्हि छड़ दी कइ अपु विश्वासी बखरे कइ छड़े। तोउं से रोज तुरत्रुस नओएं यक बोडी भखेरी अन्तर परमेश्वरे बारे बोक विचार कता रिहा। 10दुई साल तकर इहांणि भुन्तु रेहु। त एशिया इलाके मेह्णु, कि यहूदी त कि गैर यहूदी सोबी प्रभु वचन शुणे।
11परमेश्वरे पौलुसे बइ सुआ चमत्कारे कम किए। 12इठि तकर कि कोई टलि त झिणे पौलुस जोई छुआई कइ बीमार मेह्णु पुठ रखतेथ, त तेन्के बीमारी ठीक भोई घेन्तीथ; त दुष्ट आत्मा बि बाहर निस घेन्तीथ।
स्किवासे सत कुआ
13तोउं भु ईं कि कुछ यहूदी, जे कारी-फुकारी कतेथ, दुष्ट आत्माई धरो मेह्णु पुठ यीशु नओं नी कइ तेन्हि निसाणे कोशिश की। से ईं बोतेथ, “जेस यीशु बारे पौलुस प्रचार कता, अउं तोउ तसेरी सोहो दी कइ बोता कि एस अन्तरा बाहर निस!” 14मुख्य पुजारा स्किवासे सत कुआ बि इहांणि कतेथ। 15पर यक रोज यक दुष्ट आत्माई तेन्हि जे जवाब दिता, “यीशु अउं जाणती, होर पौलुस बि पिछाणती, पर तुस कोउं भिन्थ?” 16तोउं तेन मेह्णु जेस अन्तर दुष्ट आत्मा थी, तेन्हि पुठ उछिड़ कइ से अपु वश अन्तर किए, त से मडी मडी कइ अभूक कइ छड़े। त से नगे त लहु लछार भोई कइ तेस गीहा दौड़ी बाहर नश गे। 17एस बोकी इफिसुस शेहरे बाड़ी, कि यहूदी त कि गैर यहूदी सोबी पता लग गा। त से सोब डर गे; होर प्रभु यीशु नओएं जइ जइ भुण लगा।
18विश्वासी मेह्णु बिचा बि सुआ जेईं एई कइ सोबी के समाणि मनु कि से बि इहांणि बुरे कम कतेथ। 19जादुटोणा करणे बाड़ी अन्तरा सुआ जेईं अपु अपु जादुटोणा करणे पोथि किठेर कइ सोबी के समाणि जाई छेई। जपल मेह्णु तेन्के कीमत जोड़ी, त से सोब पन्जाह हजारे चन्नी सिक्की के बराबर निथि।
20ईं भोई कइ प्रभु वचने चोहरो कना बोडे जोर शोर जोई हू भुन्तु गोउ।
21ईं सोब बोक भुण केआं पता पौलुसे ठीक किउ कि मकिदुनिया त अखया राज्ये बइ यरुशलेम शेहर जे घिउं। तोउं तेन बोलु, “तठि पुजुण केआं पता, मोउं रोम शेहर बि जरूर घेण असु।” 22त से अपु मदत करणे बाड़ी अन्तरा तिमुथियुस भाई त इरास्तुस भाई मकिदुनिया राज्य जे लंघाई कइ अपफ कुछ रोज एशिया इलाके बिशा।
इफिसुस शेहर अन्तर हल्ला भुण
23तोउं इफिसुस शेहर अन्तर मसीहे इस बते बारे तेन्हि दिनि सुआ हल्ला भुआ। 24किस कि देमेत्रियुस नओएं यक सुनिहार अरतिमिस देवी देहरे चन्नी मुर्ति बड़ाई कइ कारगरी कें धे सुआ कम देन्ताथ। 25तेन से कारगरी त इस व्यापारे होरे कम बाड़े कठे कर कइ बोलु, “ए मितरों! तुस जाणते कि एस कमे बइ हें कति कमाई भुन्ति। 26पर तुस हेरते त शुणते बि कि ना सद इफिसुस शेहर अन्तर, बल्कि पूरे एशिया इलाके अन्तर एन पौलुसे सुआ मेह्णु समझाई कइ भरमाओ असे। से बोता कि जे हथे बइ बणो असा, से सच्चे देवता नेईं। 27अब सद इस बोकी डर नेईं कि हें धन्दे इज्जत घेन्ति, पर ईं बि कि हें महान देवी अरतिमिसे देहरे शान घटती, होर जेस पूरा एशिया इलाके त मतोके मेह्णु पूजते, तसे मान बि घट घेन्ता।”
28से ईं शुण कइ लेहरी गे त हुशेरि दी दी कइ जइकारा भरण लगे, “इफिसुस शेहरे अरतिमिस देवी जइ!” 29त पूरे शेहर अन्तर सुआ हल्ला भुआ, त मेह्णु मकिदुनिया राज्ये गयुस त अरिस्तर्खुस, जे पौलुसे जोई साते हंटतेथ, ढीड़ कइ घिन गे त सोब जेईं साते तेस जगाई जे दौड़ दिती, जेठि तेन्के टजोट भुन्तीथ। 30जपल पौलुस हुसुड़े समाणि घेण चहा त विश्वासी से रोक छड़ा। 31एशिया इलाके अधिकारी अन्तरा बि तसे मितरी तेस जे जवाब लंघाउ त छनेअरे किउ कि तेस जगाई घेई कइ अपु अपफ खतरे अन्तर न छड़।
32तठि कोउं की बोता त कोउं की बोता। टजोट अन्तर सुआ गड़बड़ भुण लगो थिउ। सुआ मेह्णु त ईं बि ना जाणतेथ कि से किस तठि कठे भो असे। 33केहि मेह्णु ईं समझो थिउ कि ए सोब सिकन्दर नओएं मेह्णु बझई जोई भुण लगो असु। किस कि यहूदी मेह्णु सेईंए पेहलाई बोल बुल कइ अगर किओ थिआ। होर सिकन्दरे बि अपु हथे बइ भाश कर कइ अपु पक्ष अन्तर कुछ बोलुण जे कोशिश करण लगो थिआ। 34पर जपल तेन्हि पता लग गा कि ए यहूदी भो, त सम्हाई जे दुई घंटे तकर यके हुशेरि देन्ते रिहे, “इफिसुस शेहरे अरतिमिस देवी जइ!”
35तोउं शेहरे अधिकारी तेन्हि मेह्णु शान्त कराई कइ बोलु, “ए इफिसुस शेहरे मेह्णुओ! सोब जाणते कि इफिसुस शेहर अन्तर बिशणे बाड़े मेह्णु महान देवी अरतिमिसे देहेर, त अम्बर केआं झड़ो तसे मुर्ति पेहरेदार असे। 36एस बोकी कोई बि नाह कइ न सकता, त तुस शान्त भोई बिशे त बगैर सोचे समझे किछ न करे। 37किस कि तुसी ईं मेह्णु अण्हतो असे, जे ना देहेर लूटणे बाड़े भो, होर ना हें देवी बुराई करणे बाड़े भो। 38अगर देमेत्रियुस त तसे साथी कारगरी केसे जोई अणबण भो असी त कचेरी खुली असी त पंच बि असे; तठि यक होरी पुठ दोष बहाना लाए। 39पर अगर तुस केसे होरी बोकी बारे पुछुण चहन्ते, त शेहरे समिति अन्तर फैसला भुन्ता। 40किस कि आजकणे हल्ले बझई जोई असी पुठ दोष लगणे डर असा, किस कि असी केईं कोई बझह नेईं, एस हुसुड़े कठे भुणे। त अस कोई जवाब दी ना सकते।” 41होर ईं बोलुण केईआं पता तेन अधिकारी मेह्णु तठिआ लंघाई छड़े।
Currently Selected:
प्रतिनिधि 19: pgg
Highlight
Share
Compare
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
