प्रतिनिधि 17
17
थेस्सलुनीका शेहर अन्तर यहूदी मेह्णु पौलुसे खिलाफ भुण
1तोउं पौलुस त तसे साथी अम्फिपुलिस त अपुल्लोनिया शेहर बइ हंट कइ थेस्सलुनीका शेहर अन्तर आए, जेठि यहूदी मेह्णु के अराधनालय थिआ। 2पौलुस अपु रीति हेसाब जोई तठि तेन्के भेएड़ गा। तेन टाहो लिंगि भक्ति करणे रोज तेन्हि जोई बेहेस की। त धरमे कताब तेन्हि समझाई कइ 3ईं साबित किआ कि मसीहे दुख तकलीफ सेहण त मरो तेन्हि अन्तरा दुबारी जीण जरूरी थिउ; तेन ई बि बोलु कि “एईएं यीशु, जेसे बारे अउं तुं बुछ प्रचार कता, मसीह भो।” 4तेन्हि अन्तरा केहि यहूदी मेह्णु विश्वास किआ त पौलुस त सीलास जोई मिइ गे। सुआ भक्त गैर यहूदी मेह्णु त सुआ खास खास जिल्हाणु बि यीशु मसीह पुठ विश्वास किआ।
5ईं भुणे बेलि यहूदी मेह्णु जड़ी कइ बाजारे कुछ ठगी के मदते बेलि मेह्णु के हुसुड़ा किठेरा त शेहर अन्तर हल्ला करण लगे। से यासोने गी घेई गे कि तठिआ पौलुस त सीलास टाइ कइ शेहरे सभाई घरे समाणि पेश करेल। 6पर से तठि न मेईंए। तोउं से हुशेरि देन्ते यासोन त होरे कुछ विश्वासी भाई ढीड़ कइ शेहरे अधिकारी केईं घिन आए, “ए मेह्णु जेन्हि मतोक उमल-समल कइ छओ असा, अब इठि बि पुजी गो असे। 7यासोने से अपु गी रखो असे। ए सोब ईं बोते कि यीशु नओएं यक होरा राजा असा, त ए रोमी सम्राट कैसरे निआंगी खिलाफ घेन्ते।” 8ईं शुण कइ हुसुड़ा त अधिकारी परेशान भोई गे। 9तेन्हि यासोन त होरे मेह्णु केआं डन नी कइ से छड़ दिते।
बिरीया शेहरे मेह्णु पौलुसे खिलाफ भुण
10इस बझई जोई तठियाणि विश्वासी भाई भेणि रातो रात पौलुस त सीलास बिरीया शेहर जे लंघाई छड़े; तोउं से तठि पूज कइ यहूदी मेह्णु के अराधनालय अन्तर गे। 11ए यहूदी मेह्णु थेस्सलुनीका शेहरे यहूदी केआं ज्यादा खुले मने बाड़े थिए। त से पूरे मन लाई कइ प्रभु वचन शुणतेथ, त रोज धरमे कताब अन्तर तोपते रेहन्तेथ कि ए बोके सच्ची असी कि नेईं। 12तोउं त, तेन्हि अन्तरा सुआ जेईं विश्वास किआ। तेन्हि छड़ दी कइ केहि खास खास गैर यहूदीण त मड़दी बि विश्वास किआ। 13पर जपल थेस्सलुनीका शेहरे यहूदी मेह्णु पता लगा कि पौलुस बिरीया शेहर अन्तर बि परमेश्वरे वचन शुणान्ता, त तेन्हि तठि बि एई कइ मेह्णु उकसे त हल्ला करण लगे। 14तोउं त, विश्वासी भाई भेणि पौलुस तठिआ झठ समन्दरे कना जे लंघाई छड़ा; पर सीलास त तिमुथियुस तठि बिशे। 15पौलुस पुजाणे बाड़े तेस जहाज पुठ चढ़ाई कइ एथेन्स शेहर तकर घिन गे। तोउं तठिआ वापिस एन्ते टेम पौलुसे तेन्हि जे बोलु कि सीलास त तिमुथियुस जे जवाब देण कि से झठ मोउं केईं एईए।
एथेन्स शेहर अन्तर पौलुस
16जपल पौलुस एथेन्स शेहर अन्तर सीलास त तिमुथियुस भाड़ बिशो थिआ, त पूरा शेहर मुर्ति बइ भरिए हेर कइ से दुखी भोई गा। 17इस बझई जोई से न सद अराधनालय अन्तर यहूदी त परमेश्वरे भक्ति जोई, बल्कि चौक पुठ मीणे बाड़े हर यक मेह्णु जोई रोज बोक विचार त बेहेस कता रेहन्ताथ। 18तठि एपिक्यूरी#17:18 एपिक्यूरी: ए सोच रखणे बाड़े मेह्णु मानतेथ कि जीणे मकसद सद मौज मस्ती असी। भगवाने धरती जोई कोई वास्ता नेईं। से अपु मौज त शान्ति जोई बिश्ते। मेह्णु मकसद बि तीं भो लौता। त स्तोईकी#17:18 स्तोईकी: ए सोच रखणे बाड़े मानतेथ कि जीणे मकसद अपु जिम्मेबारी पूरी करीण असी। से एहसास केआं ज्यादा सोचुण पुठ जोर देन्तेथ, होर मानतेथ कि भगवान होर यक चीज अन्तर असा। सोच रखणे बाड़े कुछ मेह्णु बि तेस जोई मिए। पौलुसे बोक शुण कइ कुछ मेह्णु बोलुण लगे, “ए थपल्याटा, की बोलुण चहन्ता?” पर होरी बोलु, “ए केस परदेशी देवती के प्रचार करणे बाड़ा लगता।” तेन्हि ईं बोलु, किस कि पौलुस यीशु त दुबारी जीणे बारे बोक करण लगो थिआ। 19त से तेस अपफ जोई साते अरियुपिगुस#17:19 अरियुपिगुस: एथेन्स शेहरे यक फाटे नओं असु, जेठि ज्ञानी मेह्णु किठे भुन्तेथ त प्रवचन शुणतेथ त शुणान्तेथ बि। कपले कपले तठि पंची करण जे पेशी बि भुन्तीथ। समिति अन्तर घिन गे त पुछु, “अस कि जाण बटते ना, ए की नोई शिक्षा तुस शिचालण लगो असे? 20किस कि तुस ईं नोई बोके असी शुणान्ते, जे असी अनोखी लगती। तोउं त अस जाणण चहन्ते कि असे मतलब की असा।” 21तेन्हि तस जे ईं बोलु, किस कि एथेन्स शेहरे बिशणे बाड़े त परदेशी मेह्णु जे तठि बिशतेथ, से सोब होर केसे कम अन्तर ना, पर नोई नोई बोके बोलुण त शुणुण अन्तर अपु टेम काटतेथ।
एथेन्स शेहरे समिति समाणि पौलुसे भाषण
22तोउं पौलुसे एथेन्स शेहरे समिति अगर खड़ भोई कइ बोलु, “ए एथेन्स शेहरे मेह्णुओ! अउं हेरण लगो असा कि तुस सुआ देवी देवती मानणे बाड़े असे। 23अउं हंटते हंटते जिखेईं तुं पूजा करणे चीज हेरण लगो थिआ, त मोउं यक ईं वेदी बि मेई, जेस पुठ लिखो थिउ, ‘अणजाणे ईश्वरे लिए।’ तुस बगैर जाणणे जेसे पूजा कते, अउं तसे बारे तुसी शुणान्ता।”
24“जेन परमेश्वरे भुमण त तसे सोब किछ बड़ोउ, से स्वर्गे त धरती मालिक भुणे बझई जोई हथे बड़ाओ देहेर अन्तर न बिश्ता; 25होर ना तेस केसे चीजी घाटा असा कि मेह्णु के मदत नेन्ता, किस कि से अपफ सोबी कें धे जीवन, प्राण त हर यक चीज देन्ता। 26तेन यके मनख केईआं सोब जाति बड़ाई कि से धरती पुठ बसे। होर तेन तेन्के बिशणे टेम त जगाह पेहलाई केआं ठीक किओ असी। 27तेन ईं किउ ताकि से परमेश्वर तोपेल, त तोपते तोपते शयद तेन्हि मेई बि घियाल, तोउं बि सच्चाई ई असी कि से असी अन्तरा केसे जेईं केआं दूर नेईं। 28किस कि तसे बेलिए ईं अस जीन्ते रेहन्ते, हंटते-फिरते त अस टिग बिशो असे; जीं तुं कत लेखकी बि बोलो असु, ‘अस बि परमेश्वरे गभुर भिन्थ।’ 29तोउं त, अगर अस परमेश्वरे गभुर असे त ई समझुण ठीक नेईं कि परमेश्वर सुन्ने, चन्नी या घोड़े मुर्ति ईं असा, जे मेह्णु के कारगीरी त सोचणे फल असे।”
30“तोउं बि परमेश्वरे पेहलकण जमाने मेह्णु के मुर्खे कमी पुठ ध्यान न दिता, पर अब तसे निआंग ईं असी कि हर जगाई मेह्णु अपु अपु मन बदलाए। 31किस कि तेन यक ईं रोज ठीक किओ असा, जेस रोज अन्तर से तेस पेहलाई चुणो मेह्णु बेलिए मतोके सोबी धरम जोई न्याय कता। होर परमेश्वरे से मरो तेन्हि अन्तरा दुबारी जीआई कइ सोबी जे एस बोकी सबूत दुतो असा।” 32मरो तेन्के दुबारी जीणे बोक शुण कइ कुछ मेह्णु फूल बणाण लगे, पर कुछ मेह्णु बोलु, “एस बोकी बारे अस तोउ केआं फिर कदी शुणते।” 33तोउं पौलुस तेन्के बुचा घेई गा। 34तोउं बि कुछ मेह्णु तेस जोई मिए त विश्वास किआ। तेन्हि अन्तर एथेन्स शेहरे समिति सदस्य दियोनिसियुस, त दमरिस नओएं यक जिल्हाणु थी। होर तेन्हि जोई केहि होरे जेईं बि थिए।
Currently Selected:
प्रतिनिधि 17: pgg
Highlight
Share
Compare
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
