रोमि 16
16
पावलऎ स्यामिॽमिम्पा
1ह चाइ कानिमि एक्क फिबि लोमॆ मेॽनुङ्मा लाङ्काम् आन्ना लेमिकानि। खो किङ्किरिया हाटाबि चुक्मिहा निवाँयुङ् लॆखुबा याॽमिचिमि लुम्पि डिकानमि योम्पक् यिगुक्। 2खो आन्नॆ पारभुमि निङ्पि निवाँहाङ्मि एक्क याॽमि रक्न नुःर लॆटाम्नॆ कामानुङ् नुःर लोकानि। खो माङ्माङ् पाबुक्र पिट्टाम्नॆ मान्ठाभनॆ खोसॆ सङ्क डिरिक् याॽमिचि मुबाक्डुचि हाङ् काङा सङ्क खाङ्डिङ।
3काङॆ पिरिस्किला नुङ् आक्बिला सङ्क स्यामिकुङ्चि। खिरिस्ट येसुमि लागि खोचिऎ कानुङ् योम्पक् मुडाचि। 4काङा कोप्माडोःब्मामि लागि खोचि हिप्पाङ् झान्नॆ सिखाराचि। खोचि ओहाक लोखुबा काङा टेः हॆॽनॆ, टर हॆॽनिबारेक्चिमि चोब्न मान्डालिऎ सङ्क खोचि ओहाक् पिकुचि। 5हाङ् खोचिम् खिम्पि खोम्खुबा निवाँयुङ् लॆखुबाचि सङ्क स्यामिकुङ्चि।
हाङ् काङाम नेन्चामालुऎ लाङ्काम इपेनिटास स स्यामिकुङ्। खो चाइ एसिया ठालबि चोब्बाङ् याॽल खिरिस्टबि निवाँयुङ् लॆखुबा याॽमि यो। 6हाङ् मारियाम स स्यामुहाङ्डा लोबिॽमा। खोसॆ आन्नामि लागि एट्टान निवाँ टिसे योम्पक मुःॽडु। 7हाङ् काङानुङ् सोरि सॆक्चिम्पि सिडामिहा याहुडि लाङ्काम्चि एन्डोनिपास हाङ् युनियास स्यामिहाङ्डुङ्चि। खोचिम् निङ् सॆक्ढुङ्पाचिम् लुम्पि चु हाङ् काङाबाङ् याॽल खोचि खिरिस्टबि निवाँयुङ् लॆःॽमिम्पा लॆटाचि।
8हाङ् पारभुबि निवाँयुङ् लॆखुबा काङॆ एट्टान नाम्नाम् पिसिकुङॆ ऎम्प्लिआटस स स्यामुकुङ्। 9हाङ् खिरिस्टबि काङ्कानुङ् सोरि सोरि योम्पक मुखुबा उर्बानास स स्यामुहाङ्डुङ। हाङ् काङाम नेन्चामालुऎ स्टाकुस स स्यामुहाङ्डा लोबिॽमा। 10हाङ् डुखाबि सङ्क टाङ्पॆ खिरिस्टबि लॆःॽमिम्पा निवाँयुङ् चाइबानऎ कामानुङ् खाङ्मिखुबा आपेल्लेस स्यामिकुङ्। हाङ् अरिस्टोबुलसमि खिम्पिहाचि सङ्क स्यामुहाङ्डुङ्चि। 11हाङ् काङाम याहुडि लाङ्काम् हेरोडियान स्यामुहाङ्डुङ। हाङ् पारभुबि निवाँयुङ् लॆखुबा नार्किसासमि खिम्पिहाचि स स्यामुहाङ्डा लोबिॽमा।
12हाङ् पारभुमि योम्पक् मुखुबा टुरफॆना हाङ् टोरफासा हिप्पान स्यामिकुङ्चि। हाङ् पारभुबि एट्टान योम्पक मुःडॆ काङॆ नाम्नाम् पिसिमिम्पा पारसिस स स्यामुहाङ्डा लोबिॽमा। 13हाङ् पारभुमि लागि एट्टान योम्पक् पिक्खुबा रुफास हाङ् काङाम आमा रकॆन लॆऎ रुफासमि आमा स स्यामिकुङ्। 14हाङ् आसिङ्किरटास, फेलेगान, हारमेस, पटरोबास, हरमेस हाङ् खोचिनुङ् चुःक्मिहा बुबुनुसाचि स काङॆ स्यामुहाङ्डानि लोबिॽमा। 15हाङ् फिलोलोगस, युलिया, नेरियस हाङ् खोम साम्सामा नुसा, हाङ् ओलिम्पास हाङ् खोचिनुङ् चुखुबा चोब्न निवाँयुङ् लॆखुबा याॽमिचि काङॆ स्यामुहाङ्डुङ्चि लोबिॽमा।
16खिरिस्टबि निवाँयुङ् लॆखुबा चोप्पासॆ गबाङ् आन्ना स्यामुहाङ्डानि हाङ् आन्ना स एक्कसॆ होइक निवाँऎ नाम्नाम् पिस्सिसे स्यामिपे चुआनॆ।
डॆङ्पिऎ खानावाँ
17बुबुनानुसाचि, काङॆ हस एक्क खानावाँ आन्ना लोकानि, आन्नॆ चिन्मिम्पा चाइबानऎ खानावाँबाङ् होइक खालॆ खानावाँ चिन्खुबा याॽमिचिबाङ् नुःर पेनानॆ। गसॆ आन्नामि लुम्पि निवाँ ऎटङ्खुबा मुकानि हाङ् याॽमिचि उम्चि निवाँयुङ्बाङ् मॆॽयङ् मुकुचि। गरहा याॽमिचिबाङ् मिउन पेनानॆ। 18मान्ठाभनॆ आक्रहा याॽमिचिऎ कानिमि पारभु खिरिस्टमि योम्पक् मुमिनि, टर खोचिऎ टाङ्पामि नुऎमि लागि टेः योम्पक् मुकुचि। उम्चि लिम्पा हाङ् खेम्मार नुऎ खाङ्मुहा खानावाँऎ नुहा याॽमिचि फोःप्सिॽमॆ पाइकुचि। 19हाङ् आन्ना निवाँहाङ्ऎ लोमिम्पा रक्न पाइकानि लोमॆ खानावाँ चोब्न याॽमिचिऎ खेम्डुचि, मसॆ काङा आन्नानुङ् चेन्चाःडिङ। टर माङ् चाइ नुऎ लॆ म खानावाँ आन्नॆ लेसाम्नॆ हाङ् काइसॆबाङ् टाङ्पा मॆयङ् युङाम्नॆ कामानुङ् मिनुॽङा। 20हाङ् सान्टि पिक्खुबा निवाँहाङ्ऎ सॆॽलन आन्ना साइटान हेचाइमिकानि। कानिम पारभु येसुमि नाम्नावाँ आन्नाबि लिर।
21हाङ् काङानुङ् योम्पक मुखुबा टिमोठिऎ आन्ना स्यामिडानि। हाङ् काङामि याहुडि टाङ्पाम याॽमिचि लुकियास, यासोन हाङ् सोसिपाट्रोसऎ स आन्ना स्यामुहाङ्डानि।
22हाङ् पावलऎ लोमिम्पा रक्न ग साब्चिरा साप्खुबा काङा टारर्टियासऎ स आन्ना पारभुमि निङ्पि स्यामिडानि। 23हाङ् काङा पेन्डिङॆ खिम्पिऎ गायसऎ आन्ना स्यामुहाङ्डानि। हाङ् गुबिहा निवाँयुङ् लॆखुबा याॽमिचि खोमि खिम्पि खोमुक्मि। हाङ् ग हाटाबि याङ्मि योम्पक् मुखुबा इरास्टास हाङ् कानिमि नुसा क्वार्टासऎ आन्ना स्यामिडानि। 24[कानिम पारभु येसुमि नाम्नावाँ आन्ना चोब्नुङ् लिर। आमेन।]#१६:२४ ग भाग याॽलिहा साब्चिराबि माआ, टर डॆङ्पिहा साब्चिराबि चु।
25ह कानि चोब्पासॆ निवाँहाङ्मि निङ् ठेरुम्ये। निवाँहाङ्ऎ आन्नामि निवाँ चॆकुवॆ मुहिकु। काङॆ येसु खिरिस्टमि बारेबि खेम्मिकुङॆ नुऎ खानावाँऎ आक्र लोकु। ग नुऎ खानावाँ निवाँहाङ्ऎ याॽलऎ बाङ्न चुम्मिम्पा येसु खिरिस्टबाङ् आन्ना निवाँहाङ्ऎ आम्नि निवाँयुङ्पि चॆकुवॆ मुहिकानि। 26टर निवाँहाङ्मि खानावाँ लोखुबाचिऎ याॽलिन लोमिम्पा रक्न हाङ् हानाम्स लिढ्याङ्ऎ निवाँहाङ्ऎ लोमिम्पा रक्न चोब्न हॆॽनिबारेक्चिऎ निवाँहाङ् निवाँयुङ् लॆटुचिर हाङ् खोसॆ लोमिम्पा खेमुचिर कामानुङ् ग नुऎ खानावाँ खोचि चोब्नमि लागि चोब्न ठालबि ह खाङ्मुडा। 27हाङ् येसु खिरिस्टबाङ् कानिऎ चोब्न खानावाँ लेक्खुबा एक्क टे निवाँहाङ् हानाम्स निङ्लावा लॆटुम्यॆ। आमेन।
Currently Selected:
रोमि 16: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
