रोमि 14
14
होइढाचि आब्डिक् आटिमॆ
1निवाँयुङ्पि चॆन्टुनॆ याॽमि नुःर लॆटाम्नॆ। खोमि निवाँबि नुऎ हाङ् फॆन्नि मिन्मिम्पा खानावाँबि याटक्माटक आलॆटानॆ। 2एक्कसॆ चोब्न ठका चामा नुक् कामानुङ् निवाँयुङ् लॆकु, टर निवाँयुङ्पि चॆकुनॆ याॽमिऎ साघा टे चाकु। 3हाङ् चोब्ठका चाखुबाऎ चोप्ठका ऎचाखुबा आब्डिक् टिमा फॆन्नि। आक्रहाङ्न आचाखुबॆ चाखुबा आब्डिक टिमा फॆन्नि मान्ठाभनॆ निवाँहाङ्मि लागि हिप्पान नुऎन लिःक्चि। 4हाङ् होइकमि योम्पक मुखुबा न्यायॆ लॆखुबा आना आसार? खोम् टुङ्घङ्पाऎन खोसॆ काम्नुऎ योम्पक् यिगुवॆ रु काइसॆ कामानुङ् लोकु। हाङ् पारभुऎ खोम् योम्पक्बि मुबाकु मान्ठाभनॆ पारभु नुङ् मुबाक्मॆ चॆक्मावा चु।
5एक्क याॽमिमि लागि एक्क डिना चाइ होइक डिनाबाङ् ढ्या लि#१४:५ ऎॽवा खिरिस्टियान याहुडिचिऎ ह सङ्क नाचामॆ डिना हाङ् ऎॽवा चाडामि डिना होइढा डिनाबाङ् सॆङ्सॆङॆ लि लोमॆ खानावाँबि निवाँयुङ् लॆःॽयुक्सुचि। गालाटि ४:१०; कालास्सि २:१६ खाङाम्नॆ, होइक याॽमिमि लागि चोब्न डिना एक्कन लि। टर टाङ्पॆ मिन्मिम्पा खानावाँबि टाङ्पॆन नुःर निवाँयुङ् लॆःॽमा लॆ। 6एक्क डिना चाइ ढ्या मिन्खुबॆ पारभु ठेॽमामि लागिॽन आक्र मिम्मा लॆ। हाङ् चोब्न ठका चाखुबॆ निवाँहाङ्मि निङ् ठेॽमामि लागिॽन चाउर मान्ठाभनॆ खोसॆ निवाँहाङ् ओहाक पिकु हाङ् चाकु। हाङ् ऎचाखुबॆ सङ्क निवाँहाङ्मि निङ् ठेॽमामि लागिॽन आचाउर हाङ् आक्कसॆ सङ्क निवाँहाङ् ओहाक् पिःकु। 7मान्ठाभनॆ कानि सिखॆकि हाङ्स, हिङ्चाकि हाङ्स, कानि कानिमि लागि हॆॽनॆ। 8कानि हिङ्चाकि हाङ्स हाङ् सिखॆकि हाङ्स पारभुमि लागिॽन हिङ्चामा लॆकि हाङ् सिखॆॽमा लॆकि। मसॆ कानि हिङ्चाकि हाङ्स सिखॆकि हाङ्स पारभुमि याॽमि यो। 9मान्ठाभनॆ हिङ्चाखुबाचि नुङ् सिखॆॽमिम्पा याॽमिचिमि पारभु लिमामि लागि खिरिस्ट सिखारा हाङ् हिङ्पका। 10मसॆ मान्ठा आन्नॆ निवाँयुङ् लॆखुबा होइढा याॽमिचि आब्डिक टिकाम्चिनॆ? हाङ् मान्ठा खोचि माङ्ना माङ्हा याॽमिचि मिकाम्चिनॆ? इॽया कानि चोब्न निवाँहाङ्मि न्यायमि लागि खोम् ङारिङ्पि येब्मा लॆकि। 11मान्ठाभनॆ निवाँनेन साब्चिराबि गरहाङ् साब्डा,
“पारभुऎ गर लोकु,
‘मान्टहाङ् काङा हिङ्चाङा,
चोब्न याॽमिचि काम ङारिङ्पि पोप्टाक्मि।
हाङ् चोप्पासॆ काङाम् निङ् ठेकुचि’।”#यासाइया ४५:२३; ५:१०
12मसॆ कानि चोब्पासॆ मान्टहाङ् योम्पक् यिगिये लोमॆ खानावाँ निवाँहाङ् इमा लॆ।
होइढाचि आब्डिक आटिमॆ
13मसॆ हऎबाङ् कानि हङ्सिबि एक्कसॆ होइक न्यायॆ लॆःॽमा याइटुम्यॆ। हाङ्स कानिमि निवाँबि निवाँयुङ् लॆखुबा होइढा याॽमिचिमि काइर मिन्मिखुबा हाङ् हिङ्वा लॆःॽमिखुबा खानावाँ हानाम्स इङानि कासियॆ। 14हाङ् पारभु येसुबि निवाँयुङ् लॆमिम्पासॆ काङॆ ग खानावाँ लेकुङ् माङ् चामॆ ठका सङ्क सॆङसॆङॆ मॆड्डिङ्मा लिनि। टर एक्कसॆ एक्क चामॆ ठका सॆङ्सॆङॆ मॆड्डिङ्मा लोकु हाङ्ग, आक्क खोम् लागि सॆङ्सॆङॆ मॆड्डिङ्मान लि। 15आनॆ चामॆ ठकाऎ निवाँयुङ् लॆखुबा होइक याॽमि काइर मिन्मिकुना हाङ्कॆग, आनॆ खो नाम्नाम् पिसिटुनानि लोमॆ खानावाँ खाङ्मुकुना। खिरिस्टऎ सिखॆॽमानुङ् हिङ्पॽमिम्पा याॽमि आनामि चामॆ ठऎ सिखॆॽमॆ लाम्फुबि आटॆटुर। 16मसॆ आनॆ काम्नुःर मिकुनॆ खानावाँ होइढा याॽमिचिऎ काइसॆ आलोसुचिर। 17मान्ठाभनॆ निवाँहाङ्मि हाङ्डाम् चामॆ नुङ डुङ्मॆ खानावाँ हॆॽनॆ, टर सॆङ्सॆङॆ लावाबाङ् टाऎ निवाँनेन्, सान्टि नुङ् हाङ्हाङ्मि खानावाँ यो। 18हाङ् गरहाङ् खिरिस्टमि योम्पक मुखुबॆ चाइ निवाँहाङ् चेन्चामिकु। हाङ् होइढा याॽमिचिऎ सङ्क खो नुऎ लोकुचि।
19मसॆ कानिऎ सान्टि टॆकुवॆ हाङ् एक्कसॆ होइक निवाँयुङ्पि चॆकुवॆ खानावाँबि हानाम्स निवाँ टिमा लॆ। 20हाङ् निवाँहाङ्मि योम्पक चामॆ डुङ्मॆ खानावाँऎ नासॆ आलॆटाम्नॆ। चोब्न चामा ठका चामा नुक्। टर होइक याॽमि हिङ्वाबि सिॽमिखुबा चामा चाइ फॆन्नि। 21हाङ् आनॆ चाकुनॆ सा, डुङुकुनॆ डिबु हाङ् लॆकुनॆ होइढा ठकाऎ याॽमिचि हिङ्वाबि सिॽमिकुचि हाङ्ग, आक्खा ठका आडिन्चामान नुऎ लिक्। 22ग खानावाँमि बारेबि आनॆ लॆकुनॆ निवाँयुङ् आना नुङ् निवाँहाङ्मि लुम्पि टे युङॆ। एक्क याॽमिऎ उम् निवाँबि माङ्स मामिन्रे पाइ हाङ्ग, खोसॆ लॆःॽमिम्पा योम्पक्बि निवाँहाङ्ऎ आक्क आसिका पिकु। 23टर टाङ्पॆ चामॆ ठकाबि टाङ्पॆॽन माङ् ह माङ् मिन्से चाकानि हाङ्ग, निवाँहाङ्ऎ आक्क याॽमि आब्डिक टिकु। मान्ठाभनॆ कानिऎ निवाँयुङ् मॆड्डिङ् यिक्मिम्पा चोब्न योम्पक् हिङ्वा रेम।
Currently Selected:
रोमि 14: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
