रोमि 10
10
1बुबुनानुसाचि, इस्राएलि याॽमिचि हिङ्चामिर कामानुङ् काङा निवाँ हङ्सिॽयुबाङ्न मिनुॽङा हाङ् निवाँहाङ् नुङ् पारठाना सङ्क लॆःॽङा। 2हाङ् खोचिऎ निवाँहाङ् एट्टान टिङ्मा मिनुकुचि लोमॆ खानावाँ कॆ लेकुङ्, टर खो मान्टहाङ् टिङ्मॆ लोमॆ चाइ खोचिऎ लेसुचिनि। 3मान्ठाभनॆ मान्टहाङ् याॽमिचि निवाँहाङ्मि ङारिङ्पि निवाँनेन लिःक्मिहा लोमॆ खानावाँ खोचिऎ लेसुचिनि। मसॆ खोचि मोसामि यायेॽमा टिङ्मानुङ् निवाँनेन् लिमा यगुक्मि। हाङ् निवाँहाङ्मि निवाँनेन् लाम्फुबि लाम्ढुमा मिन्मिनि। 4मान्ठाभनॆ यायेॽमाऎ लोमा यगुकुवॆ चोब्न खानावाँ खिरिस्टऎ यॆरु। मसॆ आसॆ चाइ खिरिस्टबि निवाँयुङ् लॆकु खो निवाँहाङ्मि ङारिङ्पि निवाँनेन् याॽमि लिक्।
चोब्नमि लागि फाग्लाम्
5यायेॽमा टिङ्मानुङ् निवाँनेन् लिमॆ बारेबि मोसाऎ सङ्क गर लोडु, “आसॆ चाइ यायेॽमाबि चुहा चोब्न खानावाँ टिङुकु खो हिङ्चा।”#लेबि १८:५ 6-7टर निवाँयुङ्बाङ् निवाँहाङ्मि ङारिङ्पि निवाँनेन याॽमि लिमॆ बारेबि निवाँनेन् साब्चिराबि गरहाङ् साब्डा, “आन्नॆ आन्नामि निवाँबि खिरिस्ट टॆःॽमाम् लागि आसा चाइ हिङ्चामिक्खुबा खानावाँनुङ् पारुबि खॆडॆ हाङ् आसा चाइ नाराक्पि खॆडॆ कामानुङ् आकासानॆ।” मान्ठाभनॆ खिरिस्ट कानिमि लागि पारुबाङ् उङ्डा हाङ् सिखॆम्पाबाङ् हिङ्पडा। 8निवाँनेन् साब्चिराऎ लोमा यकुवॆ खानावाँ माङ्भनॆ, “निवाँहाङ्मि खानावाँ आनामि कॆक्पिन, याबिॽन हाङ् निवाँबिॽन चु।”#यायेॽमा ३०:१२-१४ हाङ् काङ्कॆ निवाँयुङ्मि बारेबि खेम्मिॽमिम्पा खानावाँ सङ्क आक्कन। 9आनॆ होइढा याॽमिचिमि लुम्पि येसुन पारभु यो कामानुङ् याऎ इकुना हाङ् निवाँहाङ्ऎ खो सिखॆम्पाबाङ् हिङ्पॽमिडु कामानुङ् टाङ्पाम निवाँऎ निवाँयुङ् लॆकुना हाङ्ग, आना हिङ्चाक्ना। 10मान्ठाभनॆ हानाम् एक्क याॽमिऎ टाङ्पामि निवाँबि निवाँयुङ् लॆकु, खो निवाँहाङ्मि ङारिङ्पि निवाँनेन् याॽमि लि। हाङ् हानाम् खोसॆ खोमि याबाङ् येसु काङामि पारभु लोकु आक्क हिङ्चा। 11निवाँनेन साब्चिराऎ लोकु, “खो सक्पि निवाँयुङ् लॆखुबा आसास ङेसिखॆॽमिनि।”#यासाइया २८:१६ 12याहुडि नुङ् हॆॽनिबारेक्चिम् लुम्पि फाग्मॆ खानावाँ माङ्स माआ। एक्क पारभु चोब्नमि पारभु यो हाङ् खोमि निङ् लाखुबाचि चोब्न खोसॆ खेःॽल आसिका पिकुचि। 13मान्ठाभनॆ निवाँनेन् साब्चिराबि गरहाङ् साब्डा, “आसॆ चाइ निवाँहाङ्मि निङ् इढाङ्कु आक्क हिङ्चा।”#योएल २:३२ 14टर याॽमिचिऎ खोबि निवाँयुङ्न मान्लॆपा मान्टक्रो खोम् निङ् लाकुचॆ? हाङ् खोमि बारेबि माखेम्टिटुचि हाङ्ग मान्टक्ल निवाँयुङ् लॆकुचॆ? हाङ् आसॆस खोचि मान्खेम्मिटा हाङ्ग मान्टक्ल खोचिऎ खेम्हिकुचॆ? 15हाङ् आसास मान्पाहाङ् हाङ्ग, आसॆरो खेम्मिऎ? निवाँनेन साब्चिराऎ इकु, “नुऎ खानावाँ खेम्मिखुबाचि टामाग एट्टान नुऎ खानावाँ यो।”#यासाइया ५२:७
16टर नुऎ खानावाँ खेम्खुबा ऎॽवा इस्राएलि याॽमिचिऎ ग नुऎ खानावाँऎ लोमिम्पा खेमुचिनि मान्ठाभनॆ निवाँहाङ्मि खानावाँ लोखुबा यासाइयाऎ गरहाङ् इकु, “पारभु, काङ्कॆ खेम्मिॽमिम्पा खानावाँ आसॆ निवाँयुङ् लॆडुचॆ?”#यासाइया ५३:१ 17मसॆ निवाँयुङ् चाइ खेम्मिम्पा खानावाँबाङ् टा हाङ् खिरिस्टमि बारेबि खेम्मिखुबा याॽमि चु हाङ्टेःॽन याॽमिचिऎ खेम्टकुचि। 18टर कानि गर आकासिये, “इस्राएलि याॽमिचिऎ हढारि नुऎ खानावाँ माखेम्टक्टिट्टुचि।” आक्र हॆॽनॆ, खोचिऎ खेम्सिडुचि। मान्ठाभनॆ निवाँनेन् साब्चिराबि गरहाङ् साब्डा,
“नुऎ खानावाँ चोब्न बाखाटेम्पि खेम्मिडामि
हाङ् खेम्मिखुबाचिऎ खेम्मिॽमिम्पा आक्खा चोब्न खानावाँ चोब्न याॽमिचिमि लुम्पि फुबःक्डा।”#खोम्मिम्पासाम् १९:४
19हाङ् कानिऎ गर स लोमा फॆन्नि, “इस्राएलिचिऎ नुऎ खानावाँ मावाबुचि।” खोचिऎ म खानावाँ ग वाब्डुचि मान्ठाभनॆ निवाँहाङ्मि खानावाँ लोखुबा मोसाऎ गरहाङ् इसु,
“काङॆ हॆॽनिबारेक्चि नाम्नाम् पिसिॽमिम्पा खाङुकाम्नि
हाङ् आन्ना याहुडिचि सोम्खेरुकनि।
हाङ् माङ्स निवाँ माआमिहा याॽमिचि काङॆ नाम्नाम् पिसिकुङ्चि
आक्क खाङुकाम्निहाङ् आन्ना याहुडिचि सोम खेरुकानि।”#यायेॽमा ३२:२१
20यासाइयाऎ मान्किसिरे निवाँहाङ्मि खानावाँ गरहाङ् लोकु,
“काङा आयक्खुबाचिऎ काङा टक्चाडिङ्मि,
हाङ् काङा आयक्खुबा याॽमिचिमि लुम्पि
काम् टाङ्पॆ काङॆ खाङ्मुसुङ।”#यासाइया ६५:१
21टर इस्राएलि याॽमिचिमि बारेबि निवाँहाङ्ऎ गर लोकु,
“काङॆ लोमिम्पा आखेम्खुबाचि हाङ् काङा सिच्चाखुबाचि काङाबि टॆःॽमामि लागि काङॆ हेर लेन्टा सेन्टा हुक् पिट्टुङ्चि,
टर खोचिऎ काम् खानावाँ माखेमुचि हाङ् काङा सिच्चाखुबा याॽमिचि लिसामि।”#यासाइया ६५:२
Currently Selected:
रोमि 10: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
