लुका 8
8
येसु मुबाक्खुबा मेॽनुङ्माचि
1आक्क डॆङ्पि येसु गॆअङ्मॆअङ्हा हाटा नुङ् गाँवाँबि निङ्वहाङ्मि हाङ्डाम्मि बारेबि काम्नुऎ खानावाँ खेम्मिसे वाइबका। खोसॆ खोम् एपङ्हि टिङ्खुबाचि सोरि लॆहॆट्टुचि। 2हाङ् खोसॆ टुक्खाचि नुङ् चाप्चिऎ लाॽमिम्पाबाङ् नुबक्मिम्पा हिप्पा सुम्पा मेॽनुङ्माचि सङ्क खोनुङ् चुआमि। आक्खाचिबि मारियाम मग्डलिनि लोमॆ मेॽनुङ्माबाङ् वाङ्चि चाप्चि आम्पक्मिम्पा लॆटा। 3हेरोडमि चासुम्मि योम्पक् मुखुबा खुजासमि खिम्टाङ्मा योअन्ना मभाङ् सुसान्ना नुङ् होइढा डिरिक् मेॽनुङ्माचिऎ उम्चि चासुम्ऎ येसु पाइबाक्युक्सुचि।
चारिक् टुप्खुबामि काठा
(मट्टि १३:१-९; मारकुस ४:१-९)
4इॽया डिरिक् याॽमिचि खोम् खानावाँ खेम्माम् लागि डिरिक् हाटाबाङ् टाआमि हाङ् खोम्टि खारामि। हाङ् येसुऎ आक्खाचि ग काठा लोसुचि, 5“एक्क चारिक् टुप्खुबा चारिक् टुप्सि खारा। टुप्सॆ लॆःॽमार ऎॽवा चारिक् लाम्फुबि सिट्टा हाङ् याॽमिचिऎ सिगुचि हाङ् सँवाँचिऎ कोप्चाइटुचि। 6होइढा ऎॽवा चारिक् लुङ्कॽवा नुङ्मा बाखाबि सिट्टा हाङ् कॆॽमाग कॆप्पका टर टाॽमिम्पा बाखा माऎसॆ हॆङ्खारा। 7ऎॽवा चारिक् चिचिङ् नुङमा याॽवासिवाँबि सिट्टा हाङ् आक्कनुङ् सोरि याॽवा सिवाँ सङ्क पुबका हाङ् म पुमा मापिट्टु। 8हाङ् ऎॽवा चारिक् चाइ काम्नुऎ बाखाबि सिट्टा हाङ् एक्कग् बाङ् डिरिक् उम्चा सिसु।” गर लोसिटु हाङ् येसुऎ आक्खाचि ढ्या साम्लाऎ लोसुचि, “आसाम् नाबाक् चुः खोसॆ खेमुर!”
काठाऎ लोमा यकुवॆ खानावाँ
(मट्टि १३:१०-२३; मारकुस ४:१०-२०)
9येसु टिङ्खुबाचिऎ येसु ग काठाऎ लोमा यकुवॆ खानावाँ माल कामानुङ् सिमुचि। 10हाङ् येसुऎ लोसु, “आन्ना ग निवाँहाङ्मि हाङ्टेम्पिऎ हङ्सिहा खानावाँ वाब्मॆ निवाँ पिडानि, टर होइढा याॽमिचि नुङ्ग काङा काठापि टेःॽन यामुङा, मान्ठाभनॆ आक्खाचिऎ खाङुकुचि हाङ्सङ्क ऎखाङ्टकुचिर हाङ् खेम्कुचि हाङ्सङ् ऎवाबुचिर।”
11हाङ् येसुऎ लोसु, “काठाऎ लोमा यकुवॆ खानावाँ ग यो, चारिक् चाइ निवाँहाङ्मि खानावाँ रेम। 12लाम्फु कॆक्पि हेड्ढॆम्पा चारिक् आक्खाचि रेम, खोचिऎ खानावाँ खेम्कुचि टर निवाँयुङ् ऎलॆटुचिर हाङ् ऎहिङ्चामिर कामानुङ् साइटान टाः हाङ् निवाँहाङ्मि खानावाँ उम्चि निवाँबाङ् लाफॆकु। 13लुङ्कॽवा नुङ्मा बाखाबि सिॽमिम्पा चारिक् चाइ आक्खाचि रेम, खोचिऎ खानावाँ खेमुकुचि हाङ् टाक्सॆ लःमि लागि चेन्चासे निवाँयुङ् लॆकुचि। टर खानावाँ काम्नुःर निवाँबि मॆन्युङ्मिम्पासॆ निवाँ ठाःक्मार लॆॽल्हाङ्कुचि। 14चिचिङ्पि सिक्खुबा चारिक् चाइ आक्खाचि रेम, खोचिऎ खानावाँ खेम्कुचि टर डॆङ्पि बाखाटेम्पिहा चासुम् नुङ् होइढा डिरिक् काम्नुहा काम्नुहा खानावाँ हाङ् हिङ्खामामि निवाँऎ उम्चि निवाँयुङ् पुमा पिट्टुचिनि हाङ् आक्खाचिऎ माङ्स उम्चा सिसुचिनि। 15टर काम्नुऎ बाखाबि सिॽमिम्पा चारिक् चाइ आक्खाचि रेम, खोचिऎ खानावाँ खेम्कुचि हाङ् काम्नुःर उम्चि निवाँबि युङुकुचि हाङ् लोमिम्पा रक्न लॆसे डुखाबि सिःॽमि हाङ्सङ्क टःक्म उम्चा सिकुचि।”
हामिम्पा ओप्लिङ्
(मारकुस ४:२१-२५)
16“ओप्लिङ् ओबुकुचि हाङ् आसॆस खङ्ऎ डॆगुचिनि हाङ् लिःॽमारामि मिम्मु सङ्क युङुचिनि, टर चोब्नमि लागि हार कामानुङ् लुम्पिऎ पङ्पङ्माऎ ठावाँबि युङुकुचि। 17गरहाङ्न माङ्माङ् चुम्से युङ्डार चोब्न लाबक्हाछ, हाङ् माङ्माङ् डॆःक्ढार चोब्न यक्टहाछ हाङ् चोब्नऎ वाबुकुचि। 18मसॆ काम्नुःर काम् खानावाँ खेमाम्नॆ; मान्ठाभनॆ आसाचिनुङ् चु खोचिऎ होइढा डिरिक् टक्चाकुचि टर आसाचिनुङ् माआ खोचिबि चुहा मिःॽम सङ्क ङाप्लाल्हाङ्ऎछ।”
येसुमि मा नुङ् नुसाचि
(मट्टि १२:४६-५०; मारकुस ३:३१-३५)
19येसु चुब्सि खोम् उम्मा हाङ् नुसाचि टाआमि टर डिरिक् याॽमिचि खोम्टि खॆॽमिम्पासॆ खो मॆचुप्हिसुचि। 20एक्कसॆ येसु लोसु, “आना चुॽमाम् लागि आनाम् आमा नुङ् नुसाचि डिरिक् याॽमिचिम् कॆक्पि हुङ्मे सिःक्मि।” 21टर येसुऎ आक्खाचि लोसुचि, “काम् उङ्मा नुङ् उङ्नुसाचि आक्खाचिन, खोचिऎ निवाँहाङ्मि खानावाँ खेम्कुचि हाङ् आक्रक्न लॆखुबाचि।”
हिॽयापाऎ सङ्क येसुऎ लोमिम्पा खासिम्पा
(मट्टि ८:२३-२७; मारकुस ४:३५-४१)
22इॽया येसु खो टिङ्खुबाचि नुङ् योवाखङ्पि ठाङा हाङ् आक्खाचि लोसुचि, “कानि टोम्पॽलिॽवामि मॆआरॆङ् खारियॆ।” हाङ् खोचि योवाखङ्पि ठाङामि हाङ् खारामि। 23योवाखङ्बाङ् खॆॽमॆ पाइटामिर येसु इम्टिखारा। टोम्पलिॽवाबि ढ्या हिॽयापा लुबका। हाङ् योवाऎ योवाखङ् चेप्खॆॽमा परकु हाङ् आक्खाचि ढ्या किसिमाबि सिट्टामि। 24हाङ् खोचिऎ येसु गर कासॆ हुम्पकुचि, “चिन्खुबो, चिन्खुबो काङ्का रुम्सिखॆॽमा ठाबाकिङ्का।” खो हुम्पका हाङ् म ढ्या योवा नुङ् हिॽयापा वोसु हाङ् आक्रलॽन आक्क हिॽयापा लुमा नुखारा हाङ् चोब्न काम्नुऎ लिखारा। 25खोसॆ आक्खाचि सिमुचि, “आन्नामि निवाँयुङ् हाम्पि खाइटॆ?” आक्खाचि किसिआमि, हाङ् आक्खॆसे टाङ्पाटाङ्पाबि गर कासामि, “इग आसार? हिॽयापा नुङ् योवा सङ्क यामिकु हाङ् आक्कसॆ खोम् खानावाँ खेम्कु।”
खारिॽमाङ्ऎ लाॽमिम्पा याॽमि नुबक्मिम्पा
(मट्टि ८:२८-३४; मारकुस ५:१-२०)
26हाङ् येसु नुङ् खो टिङ्खुबाचि गालिल टोम्पॽलिॽवामि मॆआरॆङ् गारासेन लोमॆ ठालबि टाआमि। 27येसु योवाखङ्बाङ् युमा अक्सि खोसॆ हाटाबिऎ एक्क याॽमि चुब्सिटु, आक्क याॽमि खारिॽमाङ् टुम्सिम्पा लॆटा। आक्कसॆ याॽलिऎबाङ्न चेः स मॆचाङ्ले हाङ्खिम्पि सङ्क मापेन्रे येःॽमाबि पेन्युक्सा। 28आक्कसॆ येसु खाङ्टकु हाङ् स्यामिस्से ढ्या साम्लाऎ गरहाङ् कासा, “ओ चोब्बाङ् सङ्पिऎ निवाँहाङ्मि पासा येसु, आनाम् कानुङ् माङ् योम्पक् चुऎ? कॆ स्यामिस्से लोखाना काङा डुखा आपिॽङॆ।” 29मान्ठाभनॆ येसुऎ आक्क खारिॽमाङ् आक्क याॽमिबाङ् खाइटॆ लोमिम्पा लॆटा। आक्क याॽमि ऎॽवा खेपा खारिॽमाङ्ऎ लाॽमिम्पा लॆटा। हाङ् आक्क काम्नुःर चॆक्चिऎ हिक्भुङ्मा हाङ्स खारिॽमाङ्मि चॆक्मावाऎ चोब्न टेॽलाल्हाङ्युक्सु हाङ् ठाॽनाम्बि खाइहाङ्युक्सा।
30येसुऎ आक्क “आनाम् निङ् माल” कामानुङ् सिमु, आक्कसॆ “फाउज” लोसु मान्ठाभनॆ खोबि डिरिक् खारिॽमाङ्चि भॆम्मिम्पा लॆटामि। 31हाङ् आक्खा खारिॽमाङ्चिऎ येसु लोसुचि, “काङ्का चाप्चिमि सॆक्चिम्पि ऎपाङ्हाङ्चिमॆ।” 32आक्क पङ्पङ्माबि डिरिक् बाक्चि नोचामॆ पाइटामि। हाङ् आक्खा खारिॽमाङ्चिऎ काङ्का आक्खा बाक्चि हङ्सि भॆम्मा पिच्चिमॆ कामानुङ् येसु लोसुचि हाङ् येसुऎ भॆनानॆ लोसुचि। 33हाङ् खारिॽमाङ्चि आक्क याॽमिबाङ् आम्पकामि हाङ् आक्खा बाक्चिबि भॆनामि हाङ् बाक्चि मबाङ् युम्फे पिन्से टोम्पलिॽवाबि चेढिन्टामि हाङ् रुम्सि खारामि।
34ग खाङुचि हाङ् बाक् कुखुबाचि किसिआमि हाङ् पिन्से हाटाबि खारामि हाङ् चोब्न गॆअङ्मॆअङ्हा ठालबि ग खानावाँ इसुचि। 35हाङ् याॽमिचि माल लिसॆ टा कामानुङ् खाङ्माम् लागि येसु चुऎ ठालबि खोम्टि खारामि हाङ् आक्खाचिऎ म खारिङ्माङ्चिऎ लाॽमिम्पा याॽमि नुबखॆॽमिम्पा हाङ् काम्नुःर चे चाङ्मानुङ् येसुमि लाङ् कॆॽपि पेन्ढाङ्मिम्पा खाङ्टकुचि। हाङ् याॽमिचि किसिआमि। 36हाङ् खारिॽमाङ्ऎ लाॽमिम्पा याॽमि माङ्टहाङ् नुबकॆ कामानुङ् खाङ्टखुबाचिऎ टाखुबा चोब्न याॽमिचि इटुचि। 37हाङ् गेरासेन गॆअङ्मॆअङ् ठालबिहा याॽमिचिऎ येसु ग ठालबाङ् खाइहाङ् इट्टॆ लोसुचि, मान्ठाभनॆ आक्खाचि किसिमिम्पा लॆटामि। हाङ् येसु ऎम्पक्माम् लागि योवाखङ्पि ठाङा। 38हाङ् आक्क खारिॽमाङ्बाङ् नुबक्मिम्पा याॽमिऎ येसु लोसु, “कास आनानुङ् लाखॆॽङॆ” टर येसुऎ गर लोसॆ खिम्पि पाङ्हाङ्सु, 39“आम् खिम्पि खारॆ हाङ् निवाँहाङ्ऎ आनाम् लागि लॆडुयॆ ढ्या योम्पक्मि खानावाँ फुबकॆ।” हाङ् आक्क खिम्पि खारा हाङ् हाटाबि खोम् लागि निवाँहाङ्ऎ लॆॽमिम्पा खानावाँ फुबक्से खारा।
याइरसमि मॆॽनुङ्मा पासा नुङ् टुक्खा मॆॽनुङ्मा
(मट्टि ९:१८-२६; मारकुस ५:२१-४३)
40येसु टोम्पॽलिॽवामि गॆआरॆङ् टाआ हाङ् आक्कुबि डिरिक् याॽमिचिऎ खो टुम्लग्मा लॆटुचि मान्ठाभनॆ आक्खाचिऎ खो हुङ्मॆसिसुचि। 41हाङ् आक्कुबि एक्क याइरस लोमॆ याहुडिचि खोम्ठाम् खिम्पिऎ टुङ्घङ्पा टाआ हाङ् येसुमि लाङ्पि स्यामिस्से काम् खिम्पि खॆॽमा कामानुङ् येसु लोसु, 42मान्ठाभनॆ खोम् एपङ्हि निङ्ऎ एक्क टेःॽन साम्सामा सिखॆॽमा परक्मिम्पा लॆटा। येसु खोनुङ् खारा। आक्रल डिरिक् याॽमिचि येसुमि कॆक्पि खोम्टि खारामि हाङ् खो चक्पकुचि।
43आक्कुबि एक्क एपङ्हि निङ् याॽलबाङ् हारि अङ्ऎ टुक्मावाऎ लाॽमिम्पा मेॽनुङ्मा चुआ। आसॆस खो नुबक्मिॽमा माहेबा लॆटा। 44खो येसुमि डॆङ्कॽवा पोट्टाभाङ् डाबा हाङ् येसुमि मिःॽम चे डिन्चउ हाङ् आक्रलन खोम् हारि अङ्मा याइटु। 45हाङ् येसुऎ सिमु, “आसॆ काङा डिन्चाइङॆ?” चोप्पासॆ “काङॆ ग हॆॽनॆ यो” कासामि। हाङ् पाट्रुसऎ लोसु, “चिन्खुबो, डिरिक् याॽमिचिऎ आना चक्मॆ पाइमि।” 46टर येसुऎ लोसु, “एक्कसॆ काङा डिन्चाडिङ्न, मान्ठाभनॆ काबाङ् कॆ चॆक्मावा आम्पडॆ लेटकुङ।” 47ह आक्क मेॽनुङ्माऎ कुम्हिङानि कामानुङ् वाबु हाङ् किसिमाऎ यङ्से येसुमि लाङ्पि स्यामिटु हाङ् मान्ठा कॆ आना डिन्चाआनॆ हाङ् माङ्टहाङ् नुबक्किङॆ कामानुङ् चोब्न याॽमिचिम् लुम्पि इसु। 48येसुऎ आक्क मेॽनुङ्मा लोसु।
“चाचो, आनाम् निवाँयुङ्ऎ आना नुबक्मिडा, नुःर खारॆ।” 49येसु यामुभॆट्टा रक्न याहुडिचि खोम्ठाम् खिम्पिऎ टुङ्घङ्पा याइसरमि खिम्बाङ् एक्क याॽमि टाआ हाङ् याइरस लोसु, “आनाम् साम्सामा लुक्खारा। ह चिन्खुबा डुखा आपिट्टॆ।” 50टर येसुऎ ग खानावाँ खेमु हाङ् याइरस लोसु, “आकिसिऎ, निवाँयुङ् टेःॽन लॆटॆ हाङ् आनाम् चाचा हिङ्प।” 51येसु याइरसमि खिम्पि टाआ हाङ् खोनुङ् पाट्रुस, याकुब, युहान्ना नुङ् साम्सामामि आपा आमाबाङ् होइढा आसास आक्क मेॽनुङ्मा चुऎ ठालबि भॆम्मा मापिट्टुचि। 52चोब्न याॽमिचि पिसा सिखॆम्पासॆ निवाँ टुक्मानुङ् हाःब्मॆ सिसामि टर येसुऎ आक्खाचि लोसुचि, “आन्ना आहाबानॆ, ग मासिखॆटि, टर इम्टिखॆडा।” 53आक्खाचिऎ येसुमि खानावाँ खेमुचि हाङ् चोब्न यिचाआमि मान्ठाभनॆ आक्खाचिऎ आक्क सिखॆडा कामानुङ् लेमिम्पा लॆटा। 54टर येसुऎ उम् हुक्पि लाबु हाङ् लोसु, “चाचो, पःगॆ।” 55हाङ् मेॽनुङ्मा पिसामि सक्मा ऎन्टाआ हाङ् आक्रलन येप्पका हाङ् येसुऎ खो चामा पिट्टाम्नॆ कामानुङ् लोसुचि। 56मेॽनुङ्मा पिसामि आपा आमा आक्खॆटुचि, टर येसुऎ आक्खाचि “ग खानावाँ आसस आलोसाम्नॆ” कामानुङ् लोसुचि।
Currently Selected:
लुका 8: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
