सॆःक्ढुङ्पा 4
4
पाट्रुस हाङ् युहान्ना टुङ्घङ्पाचि खोम्ठाम् ठालबि
1पाट्रुस हाङ् युहान्नाऎ याॽमिचि खानावाँ खेम्मिसॆ लॆःॽमार याटाङ्पाचि, निवाँहाङ्मि खिम् हुङ्खुबा टिलिङ्गाचिम् टुङ्घङ्पा हाङ् सडुकिचि आक्कुबि टाआमि। 2खोचिऎ येसु सिखॆम्पाबाङ् हिङ्पम्पा रक्न होइढा याॽमिचि सङ्क हिङ्पमि लोमॆ खानावाँ खोचि हिप्पाङ्ऎ खेम्मिॽमिम्पासॆ खोचि एट्टान सोम् खेरामि, 3खोचिऎ पाट्रुस नुङ् युहान्ना लाबुचि टर नाम् किक्खॆम्पासॆ सेन्सेन् सॆक्चिम्पि सॆगुचि। 4टर पाट्रुस नुङ् युहान्नाऎ खेम्मिॽमिम्पा खानावाँ खेमुचिहाङ् ओइर याॽमिचिऎ निवाँयुङ् लॆटुचि हाङ् निवाँयुङ् लॆखुबा वाठाङ्पाचि पुबक्मानुङ् ङाबङ् जानार लिसामि। 5हाङ् वेन्डाक् लाम्पॆ आक्खाचिम् टुङ्घङ्पाचि, डिड्ढाचि, हाङ् मोसामि यायेॽमा चिन्खुबाचि, यारुसालेम्पि खोमामि। 6आक्कुबि चोब्नबाङ् ढ्या याटाङ्पा हन्नास, हाङ् काइफास, योना, आलॆक्जेन्डर हाङ् चोब्नबाङ् ढ्या याटाङ्पामि होइढा टाङ्पाम् याॽमिचि खोम्टि खॆॽमिम्पा लॆटामि। 7हाङ् खोचिऎ युहान्ना नुङ् पाट्रुस खोचिम् लुम्पि लाटॆटुचिहाङ् गर कामानुङ् सिमुचि, “हाम्पॆ चॆक्मावाबाङ् हाङ् आसाम् निङ्पि आन्चिनॆ गरक्मा योम्पक् मुमे पाइचुनॆ?”
8हाङ् पाट्रुस सॆङ्सॆङॆ लावाऎ चेप्खॆटुहाङ् आक्खाचि लोसुचि, “याॽमिचिम् टुङ्घङ्पाचि नुङ् आन्ना हाङ्चि। 9आयु आन्नॆ काङ्कॆ ग लाङ् फॆन्नॆ याॽमि नाम्नाम् पिसिसे नुबक्मिम्पासॆ, ग मान्टहाङ् नुःबकॆ कामानुङ् सिम्ङानि हाङ्ग, 10ह आन्ना हाङ् इस्साएलबिहा चोब्न याॽमिचिऎ ग लेसाम्नॆ आन्नॆ कुरुसाबि कॆङ्मिम्पा हाङ् निवाँहाङ्ऎ सिखॆम्पाबाङ् हिङ्पॽमिम्पा, नासरटमि येसु खिरिस्टमि निङ्पि ग याॽमि नुबक्डाहाङ् आन्नामि लुम्पि येप्पक्डा 11निवाँनेन् साब्चिराबि गरहाङ् साब्डा, खो म लुङ्कॽवा रेम, ठक्खुबाचिऎ योम्पक् पिॽनि कामानुङ् वेल्लाह्ङ्पा लुङ्कॽवान चोब्बाङ् योम्पक् पिक्खुबा लिसा।#खोम्मिम्पासाम् ११८:२२ 12होइक आसाबाङ्स हिङ्चाहिसिनि, मान्ठाभनॆ कानि हिङ्चामाम् लागि येसुमि निङ्बाङ् बाखाटेम्पि होइक निङ् मापिट्टि।”
13हाङ् टुङ्घङ्पाचि खोम्ठाम् ठालबिहा याॽमिचिऎ पाट्रुस नुङ् युहान्नामि आँटा खाङुचिहाङ् आक्खॆमानुङ् इघाचि पाढाआलिम्पा मिॽमिहा याॽमिचि कामानुङ् लेसुचि। हाङ् खोचिऎ इघा याॽमिचि येसु नुङ्न पेम्मिम्पा खानावाँ लेट्टकुचि। 14टर आक्क नुबक्मिम्पा याॽमि स पाट्रुस नुङ् युहान्ना नुङ् सोरि येप्मिम्पा खाङ्टम्पासॆ याॽमिचिऎ खोचि हिप्पा माङ्स मालोहिसुचि। 15मसॆ आक्खाचिऎ खोचि टुङ्घङ्पाचि खोम्ठाम् ठालबाङ् बाहिर लाफॆटुचिहाङ् गर कामानुङ् याकासामि, 16“ह इघा याॽमिचि माङ् लॆःॽमाचिहा? घाचिऎ लॆःॽमिम्पा आक्खॆॽमाह खानावाँ यारुसालेम पेन्खुबा चोब्न याॽमिचिऎ खाङ्डुचि। कानिऎ स म खानावाँ हॆॽनि कामानुङ् काहिसिनि। 17टर ग खानावाँ याॽमिचिबि ऎफुबक्ल कामानुङ् आक्खाचि हयॆबाङ् ग निङ्पि याॽमिचि आचिनॆचॆ कामानुङ् वोमा लॆःॽमि।”
18मसॆ आक्खाचिऎ पाट्रुस नुङ् युहान्ना सेःरुचिहाङ् “येसुमि निङ्पि चिन्मा हाङ् याम्मा याइटाचॆ” कामानुङ् काइर गारि वोसुचि। 19टर पाट्रुस हाङ् युहान्नाऎ गर कामानुङ् खानावाँ ऎम्पिटुचि, “ह याॽमिऎ लोमिम्पा खेम्मॆ रु निवाँहाङ्ऎ लोमिम्पा खेम्मॆ? आन्नॆॽन लोचिमॆ। 20मान्ठाभनॆ काचि ग येसुऎ लॆःॽमिम्पा खानावाँ खाङ्मिम्पा हाङ् खेम्मिम्पा खानावाँ माइरे पेन्हिचिगानि।” 21ह चोब्न याॽमिचिऎ आक्कुबि लिमिम्पा खानावाँ खाङुचि मसॆ याहुडि टुङ्घङ्पाचिऎ इघा याॽमिचि मान्टहाङ् डान्डा पिॽमॆ कामानुङ् लाम्फु मान्टक्कुचि। हाङ् चोप्पासॆ निवाँहाङ् ओहाक् पिस्से खोम् निङ् ठेॽमिम्पासॆ हाङ् आक्खाचिऎ सॆःक्ढुङ्पाचि काइर गारि वोसुचिहाङ् पाङ्हाङ्सुचि। 22आक्खॆॽमा लुर काइदाऎ नुबक्खुबा याॽमि रिपङ् निङ्ऎ लॆटा। खो जान्म लिसारक्न लाङ् फॆन्नॆ लॆटा।
निवाँयुङ् लॆखुबाचिऎ चॆकुमिॽमामि लागि पारठाना लॆटामि
23पाट्रुस नुङ् युहान्ना आक्खा याॽमिचिबाङ् होइढा निवाँयुङ् लॆखुबा टाङ्पाम् याॽमिचि चुब्सि खाराचि। हाङ् ढ्या याटाङ्पाचि नुङ् याहुडि टुङ्घङ्पाचिऎ लोमिम्पा चोब्न खानावाँ लाङ्काम्चि नुङ् इसाचु। 24हाङ् खोचिऎ ग खानावाँ खेमुचिहाङ् एक्क ठालबि खोम्मानुङ् हाङ् एक्क निवाँ मुसे गरहाङ् पारठाना लॆटामि, ओ काङ्काम् चोब्बाङ् सङ्पिऎ पारभु, आनॆ ग बाखाटेम्, पारु, पॆरॆरॆमा मुसुना हाङ् आक्कुबि चुहा चोब्न ठका मुमिम्पा रेम। 25आनॆ आनाम् योम्पक् मुखुबा काङ्काम् पाप्पाटुबा डाउडबाङ् सॆङ्सॆङॆ लावाबा गर लोसुना,
मान्ठा होइढा हॆॽनिबारेक्चि याक्चाकुचिहा?
हाङ् मान्ठा याॽमिचिऎ हुन्नहा खानावाँबि निवाँ टिकुचॆ? 26पारभु हाङ् खोसॆ सॆःक्मिम्पा याॽमि काइर लॆःसि बाखाटेम्बिहा हाङ्चि हाङ् टुङ्घङ्पाचि एक्क ठालबि खोमामि।#खोम्मिम्पासाम् २:१-२
27चाइबान म खानावाँ ग हाटाबि पुरा लिडा। मान्ठाभनॆ आनॆ सॆःक्मिम्पा सॆङ्सॆङॆ आनाम् योम्पक् मुखुबा येसु काइर लॆसि हेरोड हाङ्, पान्टियास पिलाटस हाङ्, होइढा हॆॽनिबारेक्चि हाङ् इस्राएलिचि खोम्टि खॆॽमिम्पा लॆटामि। 28आनाम् निवाँ रक्न लिर कामानुङ् याॽलन आनाम् चॆक्मावा हाङ् आनाम् निवाँऎ मिॽलामिम्पा रक्न आक्खाचिऎ लॆटुचि। 29ओ पारभु, आक्खाचिऎ काङ्का आनाम् योम्पक् मुखुबाचि किसिमावाँ खाङ्मिॽमिम्पाबि ह आनॆ आनाम् निवाँ टिसे, हाङ् आनाम् योम्पक् मुखुबाचि आनाम् खानावाँ ढ्या मुमाम् लागि चॆक्मावा पिच्चिमॆ। 30हाङ् सॆङ्सॆङॆ आनाम् योम्पक् मुखुबा येसुमि निङ्पि याॽमिचि नुबक्मिर, हाङ् आक्खॆॽमाहा चिन्ना आक्खॆॽमाहा योम्पक् लिर कामानुङ् आनाम् हुक् फेबकॆ।
31खोचिऎ पारठाना लॆःसिटुचि हाङ् आक्खाचि खोम्टि खॆॽमिम्पा ठालबि लुक्ढिमा रक्मा टाआहाङ् खोचि चोब्न सॆङ्सॆङॆ लावाऎ चेप्खॆटुचिहाङ् चॆक्मावा नुङ् निवाँहाङ्मि खानावाँ इसामि।
निवाँयुङ् लॆखुबाचिऎ उम्चि चासुम् हाचामिम्पा
32ह निवाँयुङ् लॆखुबाचि चोब्न निवाँबि एक्कन लिसे काम्नुःर टङ्से पेम्मिम्पा लॆटामि। खोचिनुङ् चुहा चासुम् “ग काम् यो” कामानुङ् मालोयुक्सुचि, टर चोप्पासे हाचायुक्सामि। 33हाङ् सॆःक्ढुङ्पाचिऎ ढ्या चॆक्मावाबि हाङ् पारभु येसु सिखॆम्पाबा हिङ्पडॆ खानावाँमि चुमॆक्सङ् पिॽमानुङ् खोचि निवाँहाङ्मि ढ्या नाम्नावाँबि चुआमि। 34खोचिम् लुम्पि आचुखुबा याॽमि मालियुङ्मि, मान्ठाभनॆ आक्खाचिनुङ् चुहा खिम्नाम्, बाखा इन्चायुक्सुचि 35हाङ् उम्चि याङ् सॆःक्ढुङ्पाचिबि लाटॆॽमानुङ् याॽमिचि पाबुक्मिहा आनुसारॆ हाबियुक्सुचि। 36-37इॽया युसुफ निङ् लॆखुबा फॆगङ् सामॆक्बिऎ साइपारास लोमॆ ठालबि पेन्खुबाऎ सङ्क खोनुङ् चुहाबाङ् मिःक्म बाखा इन्चोउहाङ् याङ् सॆःक्ढुङ्पाचिबि लाटॆटु। सॆःक्ढुङ्पाचिऎ खो बारनाबास कामानुङ् निङ् वॆटिटुचि (ग लोमिम्पा चाइ होइढाचि मुबाक्खुबा रेम)।
Currently Selected:
सॆःक्ढुङ्पा 4: LBR
Highlight
Share
Compare
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
