सॆःक्ढुङ्पा 20
20
पावल माकेडोनिया नुङ् गिरिसबाङ् लाम्ढुमिम्पा
1हाङ् आक्कुबिऎ याटक्माटक् टङ्खारा। आक्क डॆङ्पि पावलऎ निवाँयुङ् लॆखुबाचि सेःरुचिहाङ् पारभु येसुबि निवाँयुङ् लॆढाङ्सानॆ कामानुङ् आँटा पिट्टुचि। हाङ् खोचिनुङ् खाइटिङ्यो कासा हाङ् माकेडोनिया खारा। 2हाङ् खो माकेडोनियाबिहा ठवाँबि लाम्ढुमार खोसॆ निवाँयुङ् लॆखुबाचि डिरिक् खानावाँ इसे आँटा पिट्टुचि। आक्र लॆसॆ खो गिरिस हाङ्टेम्पि टाआ। 3खो आक्कुबि सुम्चि माइना पेना। हाङ् पॆरॆरॆमामि लाम्फु लिसे सिरियाबि खॆॽमा मिना। टर याहुडिचिऎ खो सेॽमॆ निवाँ मुमिम्पा खानावाँ खोसॆ वाप्टकु। मसॆ खोसॆ माकेडोनिया ऎम्पक्माहाङ् आक्कबाङ् सिरिया खॆॽमॆ निवाँ मुसु। 4गबाङ् बेरियाबिऎ पुरसमि पासा सोपाटोरोस, ठिस्सालोनिकाबिऎ अरिस्टखारास नुङ् सिकन्डर, डारबिबिऎ गायस नुङ् टिमोठि, हाङ् एसिया ठालबिहा टुखिकस नुङ् टोरोफिमसऎ पावल लाम्ढुबाक्कुचि। 5खोचि कानिबाङ् याॽल खारामिहाङ् टोरोआस हाटाबि काङ्का हुङिङ्का। 6काङ्का चाइ फाक्मॆ#२०:६ ग चाडामि निङ् निस्टार स लोकुचि। लोमॆ चाडा डॆङ्पि फिलिप्पिबाङ् पॆरॆरॆमामि लाम् लङ्पकिङ्का। हाङ् ङाचि डिना डॆङ्पि टोरोआसबि खोचि काङ्कॆ चुबुङ्का। आक्कुबि काङ्का वाङ्चि डिना पेनिङ्का।
पावल टोरोआसबि
7हाङ् हाप्टामि याॽलऎ डिना काङ्का हाङ् होइढा निवाँयुङ् लॆखुबा बुबुनुसाचि पारभु भोजा चासि खोम्टिखारिङ्का। वेन्डाक् लाम्पॆ पावलऎ खाइमॆ निवाँ मुमिम्पासॆ बुबुनुसाचिनुङ् सेन्टाराम्पाढारि यामुचाआ। 8काङ्का खोम्मिम्पा सङ्पिटुऎ टालाबि डिरिक् ओप्लिङ् ओप्मानुङ् युङ्मिम्पा लॆटा। 9आक्कुबि युटिकस लोमॆ एक्क वॆन्चा झ्यालाबि खाराहाङ् पेना। पावलऎ टक्भॆऎ टक्भॆऎ खानावाँ इमार, आक्क वॆन्चा इम्मॆ मिच्चाउ। मसॆ खो मॆक्मॆक् इम्टिखॆॽमार सुम्चि टालाबाङ् मिम्मु हेड्ढिन्टा। याॽमिचिऎ खाङ्मार खो सिखॆम्पा लॆटा।
10टर पावल मिम्मु युसाहाङ् उम् हुगॆ आक्क वेन्चा नुःर लाप्से याॽमिचि लोसुचि, “आन्ना आकिसिआनॆ, ग मासिखॆटिॽ।” 11हाङ् फेरि पावल सङ्पिटुऎ टालाबि ठाङाहाङ् पारभु भोजा चाआ। हाङ् वेन्डा नाम्स लिरढारि खोचिनुङ् यामुचाआ हाङ् लङ्पका 12बुबुनुसाचिऎ आक्क वॆन्चा हिङ्चाम्पान उम् खिम्पि चिक्टिडाउचि, हाङ् ढ्या आँटा नुङ्मा लिसामि।
टोरोआसबाङ् मिलेटसढारि
13पावलबाङ् होइढा काङ्का चोब्न योवाखङ्बाङ् याॽलन आस्सोस्बि खारिङ्का। आक्कबाङ् पावल योवाखङ्पि ठाङ्मिॽमॆ खानावाँ चुआ। मान्ठाभनॆ खोसॆ आक्कढारि लाम्ढुसे खॆॽमॆ निवाँ मुमिम्पा लॆटु। 14खोसॆ काङ्का आस्सोसबि चुबिङ्का, हाङ् काङ्कॆ खो योवाखङ्पि ठाङ्मिटुङ्का। हाङ् काङ्का मिटिलेने लोमॆ ठाल पोट्टा टाइङ्का। 15आक्कबाङ् काङ्का वेन्डाक् लाम्पॆ खियस् लोमॆ ठाल कॆक्पि टाइङ्का। हाङ् सिन्डाक्लाम्पॆ सामोसबि टाइङ्का, हाङ् खङ्डाक्लाम्पॆ मिलेटसबि टाइङ्का। 16पावलऎ एसियाबि डिरिक् पेन्मा मामिनु मसॆ खो एफिससबि माआम्पक्। मान्ठाभनॆ सॆङ्सॆङॆ डिनाबि खो यारुसालेम टामा मिम्मिम्पासॆ हॆङ्मिम्पा लॆटा।
पावलऎ एफिससबिऎ मान्डालिबिहा टुङ्घङ्पाचि चुप्मिम्पा
17पावलऎ मिलेटसबाङ् एफिससबिऎ मान्डालिबिहा टुङ्घङ्पाचि काङा चुब्सि टाआनॆ कामानुङ् सॆहाङ्सुचि। 18खोचि आक्कुबि टाआमि, हाङ् पावलऎ आक्खाचि लोसुचि, “काङा एसियाबि टाडिङॆ डिनाबाङ् चोब्न डिना मान्टहाङ् आन्नानुङ् पेनिङॆ लोमॆ आन्नॆ नुःर लेकाम्नि। 19याहुडिचिऎ डुखा पिट्टिङ्मिर सङ्क मिछुॽपा लॆङ्से हाङ् मिॽवाबि सिस्से हाङ्स पारभुमि योम्पक् यिगुङ। 20आन्नॆ लेकाम्नि आन्ना नुऎ खानावाँ खेम्मिॽमाम् लागि काङा माङ्स मामिङ्ङा। टर याॽमिचिम् लुम्पि खेम्मिटानि हाङ् खिम्खिम्पि खेम्मिटुङ्चि। 21याहुडिचि नुङ् होइढा याॽमिचि टाङ्पाम् हिङ्वाबाङ् निवाँहाङ्बि ऎम्पकानॆ। हाङ् कानिम् पारभु येसुबि निवाँयुङ् लॆटानॆ कामानुङ् लोडुङ्चि।
22“ह सॆङ्सॆङॆ लावाऎ लोमिम्पा रक्न काङा यारुसालेम खॆॽमॆ पाइङा। आक्कुबि काङा माङ्माङ् लिःॽङॆर माङ्स लेङानि। 23टर सॆङ्सॆङॆ लावाऎ चोब्न हाटाबि सॆक्चिम् नुङ् डुखाऎ हुङ्मॆ पाइङा कामानुङ् लोःॽङा। 24टर काम् हिङ्खामा माङ्स हॆॽनॆ मिङ्ङा। काम् निवाँबि ग टेःॽन चु, निवाँहाङ्ऎ याॽमिचि नाम्नावाँ लॆडुचि। म नाम्नावाँमि नुऎ खानावाँ फुबक्मॆ योम्पक् पारभु येसुऎ का पिडिङ। म पिॽमिम्पा योम्पक् यॆॽहिङार।
25“खेमाम्नॆ, आन्ना आसा आसाबि निवाँहाङ्मि हाङ्डाम्मि बारेबि खानावाँ इसे काङा टाइङ। ह आन्नॆ हानाम्स का खाङ्टॽङानिनि लोमॆ कॆ लेकुङ। 26मसॆ आइ कॆ आन्ना चाइबान लोकानि, याॽमिचि हिङ्वाबि सिॽमानुङ् सिखारामि हाङ्ग, आक्कमि आब्डिक् काम् निङ्टँवाँबि सिॽनि। 27मान्ठाभनॆ कॆ आन्ना निवाँहाङ्मि निवाँबिऎ चोब्न खानावाँ इमाबि माङ्स माचुम्टिॽङा। 28ह आन्ना टाङ्पा हाङ् सॆङ्सॆङॆ लावाऎ खाङाम्चिनॆ कामानुङ् पिॽमिम्पा याॽमिचि, हाङ् निवाँहाङ्मि मान्डालि खाङ्सि नुःर निवाँ टिसाम्नॆ। मान्ठाभनॆ आक्क निवाँहाङ्ऎ खोम् टाङ्पाम् पासामि हारिऎ इम्मिम्पा यो। 29कॆ लेकुङ्, काङा खाइङा हाङ् आन्नाबि हुन्नहा खानावाँ चिन्खुबा स्याला रक्मा याॽमिचि टाक्मि हाङ् सामुङ्चि पिस्सिन्टक्न आन्ना डुखा पिॽमा याइटुचिनि। 30आन्नामि लुम्पाङ्न हुन्नहा खानावाँ चिन्खुबाचि आम्पक्मि। हाङ् निवाँयुङ् लॆखुबाचि फोप्सिकुचि हाङ् उम्चि लाम् पोट्टा सॆप्फॆकुचि। 31मसॆ आक्रहाचिबाङ् नुःर पेनानॆ कामनुङ् कॆ आन्ना सुम्चि निङ्ढारि लेन्टा सेन्टा मिॽवाबि सिॽमार सङ्क इमिम्पा खानावाँ मिॽलापाम्नॆ।
32“ह कॆ आन्ना निवाँहाङ् हाङ् खोम् नाम्नावाँ नुङ्मा खानावाँबि युङुकानि। आक्कसॆ आन्ना निवाँयुङ् चॆकुवॆ मुकानि। हाङ् सॆङ्सॆङॆ याॽमिचिम् लुम्पि खोम् ढुप्पाट्ट पिकानि। 33कॆ आसाम् सङ्क फिःइया, सिः हाङ् चेबि मिक् माटिङा। 34आन्नॆ लेकाम्नि, कॆ काम् योम्पक् कॆःॽन मुसुङ। हाङ् कानुङ् चुखुबा काम् लाङ्काम्चिम् लागि पाबुहा ठका खोमुङ। 35कॆ चोब्न योम्पक् मुमानुङ् आन्ना खाङ्मिडानि। गरहाङ्न आन्ना स पाइटानॆ, हाङ् टाङ्पाम् लागि माङ्स ऎटङ्हिखुबाचि खाङाम्चिनॆ। पारभु येसुऎ ‘लामाबाङ् स पिॽमाबि डिरिक् आसिका लि।’ लोमिम्पा खानावाँ मिॽलापाम्नॆ।”
36पावलऎ इघा खानावाँ इसिटु। हाङ् पुम्रुॽवा ठक्मानुङ् पेनाहाङ् आक्खाचिनुङ् सोरि पारठाना लॆटा। 37खोचि चोब्न हाप्से पावल खारेम्टा कामानुङ् स्यामिटुचि। 38पावलऎ हयॆबाङ् मरक् आन्नॆ का हानाम्स खाङ्टॽङानिनि लोमिम्पासॆ खोचिम् निवाँ एट्टान टुक्मिम्पा लॆटा। हाङ् खोचिऎ पावल योवाखङ्ढारि चिक्टिडाउचि।
Currently Selected:
सॆःक्ढुङ्पा 20: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
