सॆःक्ढुङ्पा 1
1
निवाँहाङ्ऎ पाङ्हाङ्कुङ् लोमिम्पा सॆङ्सॆङॆ लावा
1-2टुङ्घङ्पा ठियोफिलस, येसुऎ योम्पक् मुमा परक्मिम्पाबाङ् खो पारुबि माखॆॽलढारि लिमिम्पा चोब्न खानावाँ कॆ आना याॽलन साप्सिडुङ। येसु पारुबि खॆॽमाबाङ् याॽल खोसॆ सॆःक्मिम्पा सॆःक्ढुङ्पाचि सॆङ्सॆङॆ लावाबाङ् खोचिऎ लेॽमॆ खानावाँ इबिट्टुचि। 3येसुऎ डुखा आङुहाङ् सिखारा, हाङ् रिपङ् डिनाढारि खो फेरि सिखेम्पाबाङ् हिङ्पका हाङ् हिङ्पॽमिम्पा खानावाँ खाङ्मिसि टिङ्खुबाचिबि हसहस खाङ्ङुसा, हाङ् निवाँहाङ्मि हाङ्डाम्मि बारेबि खोसॆ याॽमिचि खेम्मिटुचि। 4इॽया खो आक्खाचिनुङ् चामे सिसार खोसॆ आक्खाचि गर लोसुचि, “यारुसालेम याइमानुङ् आन्ना हाबिस आखारानॆ, टर पारुबिऎ काम आपॆ पिक्खानि कामानुङ् लोमिम्पा सॆङ्सॆङॆ लावा हुङाम्नॆ। इग याॽलन कॆ आन्ना लोःॽडानिहा खानावाँ खेम्डाम्नि। 5युहान्नाऎ ग आन्ना योवाऎ बाप्टिस्मा पिट्टानि, टर डॆङ्पि आन्नॆ सॆङ्सॆङॆ लावाबाङ् बाप्टिस्मा टक्चाकाम्नि।”
येसु पारुबि खॆॽमिम्पा
6इॽया येसु खोसॆ सॆःक्मिम्पा खोम् सॆःक्ढुङ्पाचि नुङ् चुआर आक्खाचिऎ खो सिमुचि, “पारभु, माल हन इस्राएलि याॽमिचि फाक्बकुचिना हाङ् काङ्काम् हाङ्डाम् मुबिक्चिमॆ?” 7येसुऎ आक्खाचि लोसुचि, “ग खानावाँ हानाम् लिऎ कामानुङ् लेमॆ योम्पक् आन्नामि हॆॽनॆ आक्क ग पारुबिऎ निवाँहाङ् आपामि निवाँमि ढुप्पाट्ट हङ्सिऎ खानावाँ रेटा।” 8टर आन्ना सक्पि सॆङ्सॆङॆ लावा टा हाङ् आन्नॆ चॆक्मावा टक्चाकाम्नि हाङ् यारुसालेम हाटाबि, याहुडिया हाङ् सामारिया लोमॆ ठाल लॆसे चोब्न बाखाटेम्पि आन्नॆ काम् निङ् फुबकाम्नि।
9आक्र कामानुङ् येसुऎ खोम् खानावाँ इसिटु हाङ् खो आक्खाचिऎ खाङ्भॆॽमारॽन नाम्फॽलिॽवा पोट्टि ठेट्टि खारा हाङ् खिन्दुमाबि आक्खाचिम् मिक्बाङ् माखारा।
10आक्खाचिऎ खो नाम्फॽलिॽवा पोट्टि खॆॽमॆ पाइमिम्पा साँवाँऎर खाङ्मॆ पाइटुचि, मरॽलॽन बिइःमा चेः चाङ्मिम्पा हिप्पा निवाँखाटॆखुबाचि आक्खाचिम् कॆक्पि येबाचि। आक्रलॽन उम्चि कॆक्पि येॽमानुङ् 11खोचिऎ लोसाचु, “ओ गालिल ठालबिहा याॽमिचि, आन्नॆ मान्ठा नाम्फॽलिॽवा पोट्टि खाङ्काम्नॆ? मान्टहाङ् आन्नॆ येसु पारुबि खॆॽमिम्पा खाङाम्नि, गरहाङ्न इॽया खो ऎन्टा यो।”
याहुडामि ठालबि होइक टिङ्खुबा सॆःक्मिम्पा
12हाङ् सॆःक्ढुङ्पाचि जाइटुन लोमॆ पङ्पङ्माबाङ् यारुसालेम ऎम्पकामि। आक्क पङ्पङ्मा यारुसालेमबा आढा घान्टा रऎ लाम्फु लॆटा। 13खोचि यारुसालेम हाटाबि टाआमिहाङ् याॽल खोचि पेनुक्मिहा खिम्मि मिट्टुऎ टालाबि पाट्रुस, युहान्ना, याकुब, आन्ड्रेयस, फिलिप, ठोमा, बारठोलोमाइ, मट्टियास, अल्फायासमि पासा याकुब, सिमोन हाङ्टेम् नेन्चा, हाङ् याकुबमि पासा याहुडा भॆनामि। 14खोचि चोब्न एक्क ठालबि खोमामिहाङ् एक्कन निवाँ लिसामिहाङ् येसुमि आमा मारियम, नुसाचि हाङ् होइढा मेॽनुङ्माचि नुङ् पारठाना लॆढाङ्सामि।
15आक्रल आक्क ठालबि एकग् हिपङ् रः याॽमिचि खोम्मिम्पा लॆटामि। पाट्रुस निवाँयुङ् लॆखुबाचिम् लुम्पि येप्पकाहाङ् लोसुचि, 16“बुबुनुसाचि, येसु लाॽमिॽमाम् लागि टुङ्घङ्पा लिटाखुबा याहुडामि बारेबि सॆङ्सॆङॆ लावाऎ डाउडमि याबाङ् निवाँनेन् साब्चिराबि याॽलन लोमिम्पा खानावाँ लिमान लॆटा। 17मान्ठाभनॆ खो कानि हङ्सियुॽन ङेःप्सिखॆम्पा लॆटा हाङ् ग योम्पक्मि एक्क भाग लामिम्पा लॆटा।”
18(मसॆ खोसॆ खोम् काइसॆ योम्पक्बा डुॽमिम्पा याङ्ऎ एक्क रोपा इनु#१:१८ ग याहुडाऎन इम्मिम्पा चाइ हॆॽनॆ टर खोसॆ डुॽमिम्पा याङ्बा याटाङ्पाचिऎ रोपा इन्मिम्पा रेम। हाङ् आक्कमि लुम्पि रप्चॆक्ट निङ्टवाँ डुङ्ढिमानुङ् चेप्सिआ हाङ् उम् बक् पक्बकाहाङ् ठक् आम्पका। 19हाङ् ग खानावाँ यारुसालेमबि पेन्खुबा चोब्नसे खेमुचि, मसॆ, खोचिऎ आक्क रोपामि निङ् उम्चि खाप्पि आल्कॆल्डामा लोसुचि, म लोमिम्पा चाइ हारिमि रोपा रेम।)
20पाट्रुसऎ लोसु, “मान्ठाभनॆ खोम्मिम्पासाम् लोमॆ साब्चिराबि गर साब्डा, ‘आक्कमि खिम् माङ्स माऎ लिर’ हाङ् ‘आक्कुबि पेन्खुबा आसास आलिमिर’ हाङ् ‘उम् ढुप्पाट्ट होइकसॆ टक्चाउर’।”#खोम्मिम्पासाम् ६९:२५; १०:८ 21मसॆ पारभु येसु कानिनुङ् पाइटिॽमार कानिनुङ् सोरि चुखुबाचिबाङ् एक्क कानिबि लाटॆॽमा लॆ। 22खो युहान्नाऎ पिॽमिम्पा बाप्टिस्माबाङ् कानिबा येसु ठाङ्पे पारुबि खाइहाङ्डॆ खानावाँ लेक्खुबा लिमा लॆ हाङ् पारभु येसु सिखॆम्पाबा हिङ्पडॆ खानावाँ कानिनुङ्ननःफुबक्खुबा लिमान लॆ।
23मसॆ आक्खाचिऎ बारसाबास लोमॆ योसेफ (उम् निङ् युस्टस स लॆटा) हाङ् मट्टियास हिप्पाङ्मि निङ् लाटॆटुचि। 24-25हाङ् आक्खाचिऎ गर कामानुङ् पारठाना लॆटामि, “चोब्नमि निवाँबिहा खानावाँ लेक्खुबा पारभु, इघा हिप्पाङ्बि सॆःक्ढुङ्पामि योम्पक् मुमाम् लागि आनॆ आसा चाइ सॆःक्डुनॆ काङ्का खाङ्मिचिमॆ। मान्ठाभनॆ याहुडा खोम् ठालब्न ऎल्लिङ्खारा।” 26मसॆ खोचिऎ आक्खा हिप्पाङ् निङ्पि सॆॽनाम् टिसुचि, हाङ् आक्क माट्टिमि निङ्पि सिट्टा, हाङ् खो एपङ्ऎ सॆक्ढुङपाचिबि येट्टिखारा।
Currently Selected:
सॆःक्ढुङ्पा 1: LBR
Highlight
Share
Compare
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
