यूहना 9

जन्म गै आंधै नै आंख्या गो दान

1फेर यीसू रा में जावंता टेम जन्म ऊं एक आंधै आदमी नै देख्यो। 2जद यीसू गा चेला यीसू नै केयो, “हे गुरूजी, ओ आदमी आपगै पापां ऊं आंधो पैदा होयो है या आपगै मां बाप गै पापां ऊं?”

3यीसू उतर दियो, “ना तो इंगै मां बाप पाप करयो है अर ना अण खुद। पण ओ ईंखातर आंधो पैदा होयो कै लोग बिंगै जीवन में परमेसर गै चमत्कार नै देख सकै। 4मेरै भेजण आळै गा काम ऐ है कै आपां बिंगा काम दिन में ई पूरा करणा जरूरी है क्यूंकै रात आण आळी है झिकै मैं आपां कोई काम कोनी कर सकां।” 5यीसू केयो, “जद मैं संसार में हूं, मैं संसार गी जोती हूं।”

6इतो केगे यीसू धरती पर थूक्यो अर माटी में कर'गे बिंगी आंख्या पर लगा दियो। 7यीसू बिनै केयो, “अब तूं सीलोह गै कुण्ड गै कनै जा अर आपगी आंख्यां धो ले,” फेर बण जा'गे आपगी आंख्यां धो ली अर अब देखतो होयो पाछो आयो (सीलोह गो मतलब है भेजेड़ो)।

8जद बिंगै पड़ोसी अर झिका बिनै भीख मांगता देख्यो हो केण लागग्या, “मनै तो इयां लागै है कै ओ बो ई है झिको पेलां बेठगे भीख मांगतो हो।” 9कीं लोगां केयो, “ओ बो ई है,” अर केईयां केयो, “ओ बो कोनी पण बिंगै बरगो है जद बण आंधै आदमी केयो मैं बोई हूं।” 10जद बे बिनै पूछण लागग्या तनै दिखण किंया लागग्यो? 11बण उतर दियो, “यीसू नाम गो एक आदमी मनै आपगै थूक ऊं माटी गीली कर'गे मेरी आंख्या पर लगाई अर मनै केयो जा'गे सीलोह कुण्ड में धो ले। मैं जा'गे आपगी आंख्यां धोई अर मनै दिखण लागग्यो।” 12फेर लोग बिनै पूछयो, “बो कठै है बण उतर दियो मनै ठा कोनी।”

फरीसियां गै द्वारा चंगाई गी जांच पड़ताल

13जद लोग बिनै झिको पेलां आंधो हो कीं फरीसियां कनै ले आया। 14बिं दिन यीसू माटी गीली कर'गे बिंगी आंख्या खोली ही बो सब्त गो दिन हो। 15ईंखातर फरीसियां बिनै पूछयो तनै किंया दिखण लागग्यो। बण बानै केयो, बण माटी गीली कर'गे मेरी आंख्या गै लगाई अर फेर मैं धो ली जद मनै दिखण लागग्यो।

16कीं फरीसी केण लागग्या, “ओ आदमी परमेसर गी ओर ऊं कोनी क्यूंकै ओ सब्त गै दिन गो पालण कोनी करै।” कीं केण लागग्या, “कोई पापी आदमी हिस्या चमत्कार जमाई कोनी कर सकै हो।” ईं तरियां बामै फूट पड़गी। 17फेर बां बिं आंधै आदमी नै झिको ठीक होयो बिनै केयो, “तेरी आंख्या ठीक करण आळै गै बारै में तूं के केवै?” जद बण केयो, “बो एक परमेसर गी बात बताण आळो है।” 18यहुदी अधिकारी बिंगै मां बाप नै बुला'गे पूछयो जद तांई बिं पर बिस्वास कोनी करयो कै बो आदमी आंधो हो अर बिनै आंख्या ऊं दिखण लागग्यो। 19बां बिंगै मां बाप नै बुला'गे पूछयो कै, “ओ थारो बेटो है के?” ओ जामतो ई आंधो पैदा होयो हो के? अर अब इनै किंया दिखण लागग्यो है?

20बिंगै मां बाप उतर दियो, “म्हे तो जाणा हां कै म्हारो बेटो है अर आंधो पैदा होयो हो।” 21म्हे ओ कोनी जाणा कै ओ अब किंया देखै अर ना म्हे ओ जाणा कै इंगी आख्यां कण ठीक करी है। इनै आपनै पूछो, क्यूंकै ओ अब सयाणो है अर आपगै बारै में ओ आप बता सकै है। 22बिंगै मां बाप आ बात ईंखातर कैई क्यूंकै बे यहुदी अधिकारियां ऊं डरता हा क्यूंकै बां ईं पर पेलां ई सेहमती बणा ली कै झिको कोई यीसू नै मसी मानै तो बिनै सतसंग घर ऊं बारै काड़ देवांगा। 23ईं कारण बिंगै मा बाप केयो कै बिनै आपनै पूछ ल्यो क्यूंकै बो सयाणो है।

24जद बां ठीक होएड़ै आदमी नै दूसर बुला'गे बिनै केयो, “परमेसर गै सामणै सच्च बोल क्यूंकै म्हे तो जाणा हां कै बो एक पापी आदमी है।” 25बण उतर दियो कै मैं कोनी जाणू पापी है या कोनी मनै तो इतो ठा है कै पेलां मनै दिखै कोनी हो पण अब मैं देख सकूं हूं। 26बां बिनै फेर केयो तेरै सागै बण के करयो। तेरी आंख्या किंया खुली? 27बण बानै केयो, “मैं थानै साची बता दियो है अर थे सुण्यो बी है, अब दुसर क्यूं सुणनो चावो हो के थे बी बिंगा चेला बणना चावो हो?”

28ईं पर बां बिनै धमकायो अर केयो तूं ई बिंगो चेलो है म्हे तो मूसा गा चेला हां। 29म्हे जाणा हां कै परमेसर मूसा सागै बात करी ही पण म्हे कोनी जाणा ओ आदमी कठूं आयो है। 30बण उतर दियो, “अण मेरी आंख्या ठीक कर दी थे लोग फेर बी कोनी मानो कै ओ कठूं आयो है। आ अचंभै गी बात है। 31आपां जाणा हां कै परमेसर पापियां गी बात कोनी सुणै पण जे कोई परमेसर नै आदर कर'गे बिंगी इच्छा पूरी करण आळो है तो बो बिंगी सुणै है। 32कणैई अजे तांई कोनी सुण्यो कै कणैई कोई जन्म ऊं आंधै गी आंख्या खोल दी होवै। 33जे ओ आदमी परमेसर कनूं कोनी आएड़ो होवै तो बो कीं कोनी कर सकै।” 34बां बिनै उतर दियो, “तूं पाप ऊं पैदा होयो है तनै म्हानै सिखाण गो अधिकार कोनी है। ईं तरियां यहुदी अधिकारियां बिनै सतसंग घर ऊं बारै काड़ दियो।”

आत्मा ऊं आंधो

35यीसू सुण्यो कै बां बिनै सतसंग घर ऊं बारै काड़ दियो है जद यीसू गी मुलाकात बिंगै सागै होई तो बण केयो कै तूं परमेसर गै बेटै पर बिस्वास करै है के? 36बण उतर दियो, “हे गुरूजी बो कुण है कै मैं बिं पर बिस्वास करूं।” 37यीसू बिनै उतर दियो, “तूं बिनै देख लियो है अर बो ई है झिकै गै सागै तूं अब बात करण लागरयो है।” 38बण केयो, “हे गुरूजी मैं बिस्वास करूं हूं अर बिनै प्रणाम करयो।” 39यीसू केयो, “मैं ईं संसार में फेंसलो करण आयो हूं कै बे झिका कोनी देखै बे देखण लाग जावै अर बे झिका देखण लागरया है बे आंधा हो जावै।” 40कीं फरीसी झिका यीसू गै सागै हा ओ सुणगे यीसू नै केयो, “सच्च में म्हे बी आंधा हां के?” 41यीसू बानै केयो, “थे आंधा होवंता तो परमेसर थारै पाप नै माफ करै देवंतो पण थे तो बोलो हो कै म्हे देखा हां ईंखातर थारै पापां नै परमेसर माफ कोनी कर सकै।”

Currently Selected:

यूहना 9: BGQ

Highlight

Copy

Compare