Mupala'a 9

Angelo ta'uvesi'a mutaunu piuka noxou

1Ioxe, angelo ta'uvesi'a mutaunu piuka noxou. La emaisou taoto ane mulapau no tualasou Mosinge mulu'e no lialia. La ane'i milosou lakisou taxa tatila ane mulu'elai avile mo taxalisou tava'u uasi. 2La anu mukisinu taxa mulu'elai avile ne. Mukisinu la umuxu molu no taxa ne mutelai a loxo tasexetelu 'o. Xe umuxu musu'asou aso ilou loxotolo la isivoxosi. 3Xe tamimi loxo tamusia'e me'a no anu umuxu mixali la misu'asou lialia mukalusi. Ane'i mino'u xavi loxo tatanga xavine'i so ilosi'a tamitema navunavu. 4Ia mi'apixa'a lexe mamu so imamulonu laxalasi o mimi ulemeleme o ovuovu. Mi'oxo lexe tamitemasi ane sosovo noxou Mosinge uxolu no alaie'i uasi, la ilosi'a navunavu. 5Ilosi'a tamitema ne navunavu mo uxolu umomomo no anu so'io ta'uve. Navunavu ne u'oki a iou vilesisi loxo tanga ukapinenge. Milosi'a tami loxo tamusia'e xavi so ilosi'a tamitema navunavu axone ia mi'apixa'a lexe umomomo no anu soli mamu. 6La no voxo anene tamitema ikamulinu vote'i lexe isoli axova ia ane'i imomomo uasi xo soli u'ume avile.

7Xe emalei la tamusia'e ne misaxi loxo ta'osi ane tamitema milalaxine'i so ilutu i'oto. La no kisi'a la ati koli. Mo ala'alaie'i a loxo tamitema 'o. 8Mo laxusi'a veveni kalumo loxo laxusi'a tasema. Xe anaxa'a anaxu loxo anaxa'a talaioni. 9Xe no lutune'i la mi loxo lasioti aioni a loxo ta'ami itanu so i'oto. Mo vivisi'a luluxu loxo kali kali tavu'alo ane ta'osi ilapunu no anu oto. 10La ane'i tamusia'e ne xela'a xe mi so uto'omenge kalumo a loxo tatanga 'o. Xavi so ilosi'a tamitema navunavu uxolu umomomo no anu so'io ta'uve a muxolu no xela'a ne. 11La ane'i kingii'a so u'uli laxune'i ne anu angelo e tatananu taxa e mulu'elai avile. No anu vaikala Ipilu la imoxo'u lexe Avatoni. Xe loxo nenge la talemolu lexe Mosou Mamulo.

12Anu ane. Tu'umaxu e mu'oki tei a mukalu 'oe. Ia ngalomu, tu'umaxu tatamei a so umulinula.

Angelo 6-si'a mutaunu piuka noxou

13Ioxe, angelo 6-si'a mutaunu piuka noxou. Xe no anu tanixu navu koli e mutulu no laxunu Mosinge la elomusou xoli vile. Anu molu no tainu mi loxo kau komonu tami'a e mutulu no mailu'axu tami'a. 14La xoli ne mupela'u 6-si'a ta'angelo e mutetelisou piuka aloxo 'o, “Ta'angelo tami'a e miloiloki no lexa tatila e Iupeletisi, ne nalulusi'a ilaisi.” 15Ane'i ta'angelo tami'a ne a milalaxine'i so aso iou xe voxo xe so'io xe tau ie ne u'isalili. Mixolu milalaxi axone so loxo takalipalane'i tamitema ixali laili tatalu la no anu laili vile la ive'ave'a isoisoli avile. Laso ane, milulusi'a so i'oxonu xaixai anene. 16La emaisi'a ta'ami mitalutalupexa noxi'a ta'osi. La elomusou milemolu navasi'a lexe 200 milioni. 17Xe no anu aisaxi ne la emaisi'a ta'osi xe ane'i ane mitalupexa noxi'a aloxo 'o. Ane'i mivaxanu lasioti aini kalasou lauoinu xe ela'ela xe ponu. Xe kisi'a ta'osi a loxo kisi'a talaioni. Xe no anaxa'a navu xe umuxu xe lavo'o axexaxu mulala. 18Laso mimi tatalu masua e mula no anaxa'a ta'osi ne la muxalixu mamulosi'a tamitema. Mo so loxo takalipalane'i tamitema no lialia mukalusi ixali laili tatalu, la laili vile ne misoisoli mukalusi. 19Xo xavi noxi'a ta'osi ne a uxolu no anaxa'a xe no xela'a. Xo xela'a loxo sineke, mo kisokisou kalumo. Laso ixalixu mamulosi'a tamitema no anu.

20Ioxe, tu'utu'umaxu ne mumamulone'i laili toxoxu e toxoxu. Ia ane'i loxo mixoxolusio ixiunu opone'i uasi no anu mimi masua loxo me'a mixalixu no avo'avo'a. Xo ane'i mi'itine'i ta'angelo tamasua. Mo mixalixu momosi'a kalavoi no anu koli xe siliva xe valasi. Mo mipuinu lavo'o ilou ovu so lexe momosi'a ia mi axone umauli so umalei o ulomu o umuamua'i uasi to! 21Ane'i tamitema anene mive'ave'a tamitema misoisoli xe mi'oxonu ta'uluxu xe ili'ilixo nuni'u xe mipakapakali. Mi'oxo axone ia ixiunu opone'i mo i'isalilinoxu so susu noxi'a ne uasi.

Currently Selected:

Mupala'a 9: ATA

Highlight

Copy

Compare