Mupala'a 4

Tamimi mi'itinu Tatananenge ulasou no tualasou

1Ioxe, mune'e xe esaxila, sila emaisou aitenga mukisi no loxotolo. La xoli utama loxo piuka e elomusou tei muvikalaleli mulu'e aloxo 'o. “Nini natelo 'o mo so apela'inexu mimi so uxali ili'i.” 2Xe alaxu vilesisi Ulenu mupamuxaleli sila exolu no tualasou Mosinge. La emaisou sia kingi muai la Vile mutalupexa no anu. 3Mutalupexa la vasimolu lamanaxu loxo lavo'o e tiasipa xe lavo'o lauoinu e koniliani. Xe sosovosou vavalima muxixaosou sia kingi la emaisou lamanaxu loxo lavo'o kailanu e emelali. 4La sia 24 muxixaosou sia kingi ne. Mo emaisi'a tatiatila 24 a mitalutalupexa no anu. Ane'i mitalupexa la lavulutii'a kea veveni xe no kisi'a la ati koli a loxo takingi ilavusou itanu. 5Xe no anu sia kingi la emaisou lele'e mulamilami mo elomusou mupaupau. Mo no laxunu sia ne la telu 7 a muka. Telu 7 ne so usosovosou Mosinge Ulenu ane noxou 7. 6Mo kalumo no laxunu sia la mi loxo luaki a loxo titilo toxoxu muxolu.

Xe no anu pa'upa'umolu sia la emaisi'a tamimi tami'a a mixolu kalumo. Tamimi tami'a ne ie'i ie'i tavu'alo muxolu no vasime'a mukalusi, no talaxa'a xe no tumali'a kalumo. 7Noxi'a tamimi tami'a ne la ane tei la iou loxo laioni 'o. Xe ane tameisou la iou loxo kau mulu. Xe ane tatalusou la iou loxo itema. Xe ane tami'asi'a la loxo nenu suluvi anu a uvava. 8La tamimi tami'a ne vivivisi'a 6 mukalusi. Ie'i ie'i musu'asou vasime'a mo muxolu no laxu vivisi'a kalumo. Mo kakau olovoxo ivikala lexe, “Tatananenge anu Mosinge anusisi U'uli'uli. Anu malemalenga. Anu malemalenga. Anu malemalenga. Anu muxolu tei tei manina mo a uxoxolu vaimomo 'o mo anu une'e uxolu ili'i avile.” Ane'i ixolu ivikala axone mo italo uasi.

9Laso tamimi ne i'itinu ualasou mo itoxu mo imaxa'u osa'ilasou anu ane utalupexa no anu sia kingi ne. Anu ane uxolu kaluxu uasi. 10Tamimi i'oxo axone laso tatiatila 24 itangatulu mo ixolasou tava'a no laxunu anu ane utalupexa no sia kingi ne. Mo i'itinu ualasou xo anu ane uxolu kaluxu uasi ane. Mo ati koli no kisi'a ne ino'u so ipilixinu no tava'u. La ivikala aloxo 'o, 11“Nini Tatananexi mo nini Mosixe. Ninisisi nalaixe so tamitema i'itinu ualasine mo ia'aloxu ilixo noxine laixe mo itoxu xavi noxine. Xo nini nekoinu mimi mukalusi, mo muxali no anu masaxa noxinemo.”

Currently Selected:

Mupala'a 4: ATA

Highlight

Copy

Compare