Mupala'a 18

Vaviloni mumamulo avile

1Ioxe, mukalu la emaisou angelo vilela molu no tualasou Mosinge mulu'e. Anu xaviou musuku mo iaxu mutalosou lialia. 2La mu'ava tatila lexe, “Taoni tatila ne Vaviloni mumamulo e mumamulosi. Mo a muxali tasi'a ta'angelo e tauluaou, a tanixa'a ta'ulenu tamasua e. Ane'i tangiala tamasua e ani'anixa'a nuni'usi tatatananu tatani ne. 3La ili'ilixo nuni'u so taoni ne a loxo uaini pakia'u. Mole ane'i tatemanu tuatuala mine'e mi'oxonu ili'ilixo nuni'u la loxo miie mo misipaki no anusi. Xe takingi so tuatuala no lialia kalumo milailai no anu ilixo olele. Mo tamitema so lailoto mixalisou lamoli tatila no anu mimi iouiou ane mumomomosou masamasaxa no anu vasime'a tatemanu taoni ne.”

4Angelo muvikala axone xe mukalu la elomosou xoli vilela molu no tualasou Mosinge muvikala aloxo 'o, “O ngingi tamitemaxeli. Ngingi ngalala mo ngaxexesou tuala ne. Ngala so ngapita no anu susu ne uasi mo so loxo tu'umaxu uxalisou taoni ne ili'i la uxalisinge kalumo uasi. 5Xo susu noxi'a tatemanu taoni ne la'oluxu e la'oluxu mo loxo mutelai avile no tualasou Mosinge. Laso anu a tanuou ili'ilixo masua mi'oxonu ne. 6Laso ngingi so ngakoline'i tatemanu tuala ne la ngakoline'i ulovo no anu mi ma'ia mi'oxonu. Xo ane'i mivo'utulonixu susu noxi'a laso loxo ngakolinu la ngavo'utulonixu kalumo. Xe ane'i la mino'u kapu so ili'ilixo noxi'a olele so miie no anu. Laso loxo ngini ngakolinu ili'ilixo ne la ngatau kapu tamei so iiexu. 7Xo ane'i mi'itinu ualasi'a mo masaxa masua no anu vasime'a loxo uxali la mimomoxusi. Laso loxo ngakoline'i la umomomo u'isalili no anu ilixo noxi'a. Mo ngalosi'a navunavu so itatamanixu. Xo ane'i ilavusou i'itine'i mo ivikala lexe, 'Ai tualasinge 'o u'uli laxunu tuatuala mukalusi. Anu uxolu loxo quini no sia noxiesi. Anu uxalisou tu'umaxu so tatatamanixu uasi ane.' 8I'itine'i axone ia alaxu vilesisi la voxosou tu'utu'umaxu uxalisi'asi. Xo pipiena iouiou xe tamatama xe vitovitolo u'okisi. Mo tuala Vaviloni ne u'elasi. Tu'utu'umaxu u'oki axone xo Tatananenge anu Mosinge xavinu la anu molu utilovosou mo ukolinu ilixo noxi'a tatemanu tuala ne.

9Ioxe, ane'i takingi so tuatuala no lialia milai ne so mi'oxonu ili'ilixo nuni'u mo mimomomosou masamasaxa no anu vasime'a. Laso loxo imaisou umuxu navu u'elaxu taoni ne la iielieli so tamasi. 10Ane'i imaisi'a tatemanu taoni ne itavulenu tu'umaxu misevile la i'ume mo itulu nopaxa so isu'anu ie'iousi. La itama lexe, 'Iauo, iauo malamenge Vavilonio. Taoni toxoxu mo xavinuo. Axovae, no anu aso iou vilesisi la nexalisou mamulosou ilixo noxinesi.'

11La tamitema so lailoto no xale tuatuala mukalusi opone'i tu'umaxu manina mo mitatamasou mi ane muxalisou tuala ne xo evile so ulotonu lakakoxa'ala uasi. 12La lakakoxa'a ane koli xe siliva xe lavo'o lailaixe mo xapo ane lamolisou tatila xe lavalava kea lailaixe xe lavalava lauoinu iouiou xe lavalava silika. Xe aloxo 'ola. Ovu iouiou ane tuma'u lailaixe xe mimi ane ipuinu no anu elapeni anaxu xe mimi ane ixalixu no anu ovu e lamolisou tatila mo valasi mo aini mo lavo'o ane lamalamakisou. 13Mo lakakoxa'a se'i aloxo 'ola. Lamalasini so la'ilali loxo sinamoni xe mi e ta'elaxu so tuma'u laixe xe pepiumu xe lapaula tuma'u lailaixe xe uaini xe ueli olivi xe palaua laixe xe uiti ngiaxu xe takau xe tasipsipi xe ta'osi ilou kalikali so ilapunu xe tasilevi ane tamitemasi. Anu ane, mimi anene evile so ulotonula uasi. 14La ane'i tamitema so lailoto itama lexe, 'Ovu ngiangiaxu ane opongengi musoliou a tasiauxu noxinge. Mo mimi lailaixe ane lamolisou mutiatila mo musaxi lailaixe no ie'i tamitema ne a mu'umesinge mole ngamaisoula uae.' 15La tamitema so lailoto itatamasou taoni tatila axone xo ane'i mixalisou lamoli tatila no anu. Itatamasou mo iielielisou ia itulu nopaxa xo i'umolu navunavu ane muxalisou tuala ne. 16Itulu mo ivikala lexe, 'Iauo, iauo taoni toxoxuo. Tatei la tatemanu misakinu lavuluti kea xe lauoinu iouiou xe mitokolomone'i no anu koli xe lavo'o lailaixe xe xapo ane lamolisou tatila. 17Mixolu no latanu lamoli xe mimi lailaixe axone ia aso iou soxu vilesisi la musu'a avilesi.'

La takepiteni xe tapasitia xe tamitema so xaixai no anu lasilasipi mukalusi xe tamitema ta'ei loxo ikalanu lakakoxa'a no anu lasilasipi so ixalisou lamoli la mitulu nopaxa no anu taoni ne Vaviloni. 18Itulu mo imaisou umuxu navu e u'elaxu taoni la mitama lexe, 'Taoni vilela toxoxu aloxo 'o a uxolu ne'ei? Uasi manina.' 19La ivaxanu lamulo no alaie'i la mitama tatila mo miielieli mole ie'i lexaxu munixinixi. La mivikala lexe, 'Iauo, iauo, malamenge taoni toxoxu. Ane'i tamosou lasipi mukalusi mixalisou lamoli tatila no anu. Ia aso iou soxu vilesisi la musu'a avile.'

20Ane'i tamitema mitamasou Vaviloni axone ia loxo ngingi no tualasou Mosinge xe tamitemaou u'isalili xe ta'aposeli xe tapolopeti, ngingi nga'osa'ilasi. Xo Mosinge mutilovosou mi ma'ia mi'oxonu noxinge la a mukolinu 'oe.”

21Ioxe, vaikala axone mukalu la angelo vile xavinu mu'itinu lavo'o alelaxu tatila. Lavo'o ne so imamulonu uiti ngiaxu no anu. Mu'itinu ka musu'anu mulu'elai no luaki. La muvikala aloxo 'o, “Ngamaisou e'okinu lavo'o 'o musu'asi. La no anu taoni toxoxu Vaviloni ne usu'a mo tasiauxu axonesi. 22Laso tamaxu kitakita xe iuiu xe piupiuka xe lexelexe iouiou uxali noxinela uasi. Xe tamitema so lavulavu no anu mi ma'ia so ixalixu no avo'a ixolu noxinela uasi. Xe lavo'o alelaxu ukalakolokolo so uxixao umamulonu uiti ngiaxu ne evile ulomusou noxinela uasi. 23Mo lalamo kaxu uxali noxinela uasi. Xe tamitema ilomusou xoline'i mulu olie sema ane so itaula'i uxali noxinela uasi. Mimi noxine ne tasiaxu avile xo tamitema so lailoto noxine ne ane'i tatiatila manina no anu lialia mo nini ne'oxonu loloxa'a tatemanu xale tuatuala mukalusi.”

24Xe Mosinge mukolinu susu no anu taoni ne xo anu mumaisou sialuxa'a tapolopeti xe sialuxa'a tamitemaou mu'isalili xe sialuxa'a tamitema ta'ei tauluai'a mive'a misosoli no lialia a muxolu ne Vaviloni ne.

Currently Selected:

Mupala'a 18: ATA

Highlight

Copy

Compare