Mupala'a 16

Minixi'u lisi 7 e muana'ana no anu la'ia noxou Mosinge

1Ioxe, elomu la xoli tatila molu no tasou Mosinge la muvikalane'i ta'angelo 7 aloxo 'o, “Ngingi ngano'u lisi 7 e muana'ana no anu la'ia noxou Mosinge mo nganixinixi'u ulu'elai no lialia.” 2Laso angelo ane tei mulai munixi'u lisi noxou mulu'elai no lialia. Munixi'u la muxalixu xalexalevi kole masua manina no vasime'a tamitema. Muxali noxi'a ane'i ane sosovo noxou mi vova uxolu noxi'a mo mi'itinu mi e musaxi loxo anu.

3La angelo tameisi'a munixi'u lisi noxou mulu'elai no luaki. Munixi'u la luaki muxiu muxali sialu aloxo itema musoli vasimolu sialuxu. La tamimi no luaki mukalusi ne misoisoli avile.

4La angelo tatalusi'a munixi'u lisi noxou mulu'elai no lexalexa xe no anu luxuluxu mukalusi la muxali sialusi. 5Sila elomusou angelo e usaxila'u lexalexa muvikala aloxo 'o, “Mosixe, nini nexolu tei tei manina mo vaimomo 'o a naxoxolusi. Ilixomeni mulapu mo malemalengasi. Nini netilovosi'a tamitema laso nekolinu aloxo 'o la ne'oxonu mulapusi. 6Xo ane'i tamitema ne mive'ave'a tamitemameni mu'isalili oli'a tapolopeti. Mive'ave'a la sialuxa'a munixisi. Laso nexiunu lexaxa'a muxali sialu so iiexu la nekoline'i mulovo xo tava'u noxi'asi.” 7La elomusou xoli molu no tanixu navu muvikala aloxo 'ola, “Ani, manina. Tatananexi nini Mosixe. Nini na'uli'uli avile, mo loxo nini natilovosou ili'ilixo so nakolinu la manina mo ulapusi.”

8Mukalu la angelo tami'asi'a munixi'u lisi noxou mulu'elai no anu aso. Munixi'u laso aso ialuxu misevile la muxutu lala'a tamitema. 9La aso ialuxu mu'oki e mu'oki mo muxutu lala'a tamitema ia ixiunu opone'i mo so i'itinu ualasou Mosinge uasi. Ane'i milemolu vaikala masua so mipupuiou ualasou xo mimi tu'utu'umaxu ne muxali no anu xavi noxousi. 10La angelo ta'uvesi'a munixi'u lisi noxou mulu'elai no anu sia kingi noxou mi vova. Munixi'u laso isivoxo musu'asi'a tatemanu xale tuatuala ane mixolu no anu xavi noxou. La navunavu mukasi'a e mukasi'a mole mikolokolonu levexa'asi. 11Ane'i mitavulenu navunavu mo vasime'a xalevi kolesi ia ixiunu opone'i so ilixo masua noxi'a uasi. Mixolu milemolu vaikala masua so mipupuiou ualasou Mosinge e uxolu no tualasou lailaixe.

12La angelo 6-si'a munixi'u lisi noxou mulu'elai no lexa tatila Iupeletisi. Munixi'u laso lexa musi so mulalaxinu vote'isi'a takingi me'a loxo aso uxali. 13Xe no anaxa'a mi loxo sineke tatila xe mi vova xe polopeti kalavoi la emaisi'a ta'ulenu tamasua a loxo talokoloko milala. 14Ta'ulenu ne ane'i ta'angelo tamasua ane ilavusou i'oxonu sosovo so xavi iouiou. Ane'i milailai mipitane'i takingi so xale tuatuala mo so ilalaxi no anu uo. Uo anene so voxo tatila noxou Mosinge e u'uli'uli avile.

15La Tatananenge vaikalaou aloxo 'o, “Ai ngalomu. Ane'e la tamitema ikulukemelo aloxo ikulukemolu itema so pakali. Laso ngingi la ngaai uasi, ngasakinu lavalava so ngaxolu ngalalaxi. Mo so axone la ngaxalisou osa. Xo loxo uasi la ngingi loxo itema ane ukuluke xe ula mo uxalisou maila no ie'i tamitema xo pangapanga'usi.”

16Ioxe, ta'angelo tamasua mipitane'i takingi mine'ene'e no anu xale lia ilemolu no anu vaikala Ipilu lexe Alimaxetoni.

17La angelo 7-si'a munixi'u lisi noxou mulu'elai no loxotolosi. Munixi'u sila xoli tatila nonano no tasou Mosinge molu no sia kingi muvikala lexe, “Anu ane, mukalu.” 18La lele'e mulamilami mo mupaupau xe uni'uni tatila e tatila. No voxo loxo tamitema mixali no lialia mo mune'e avile la ixamulinu uni'uni axone uasi. 19La taoni tatila ne Vaviloni mumamulo xe muvala muxali pa'usou tatalu mo taotaoni no anu xale tuatuala mumamulo kalumo. Xo Mosinge muxavutalanu ili'ilixo masua noxi'a tatemanu taoni ne Vaviloni la mukolinu. Mukolinu la mixamulinu la'ia noxou Mosinge toxoxu a loxo itema uxamulinu uaini no anaxu loxo uiexu. 20La ai'ailani no luaki tasiauxu avile xe loxo tasu'anu ienge no lialia la tasaxisou la'olu vile uasisi. 21Mo kalumo uali loxo aisi mulapalapau mulu'e. La aisi vilevilesi ne tu'umaxu e tu'umaxu, mumomomo no anu 50 kilo. Aisi mulapalapau no loxotolo mulu'e xe mutuvusi'a tamitema la mitavulenu navunavusou mu'oki e mu'oki avile. Laso ane'i mivikala masuaou ualasou Mosinge so mupalusou tu'umaxu ne.

Currently Selected:

Mupala'a 16: ATA

Highlight

Copy

Compare