Mupala'a 13

Tami tavova tamei mipa

1Ioxe, emalei la emaisou mi vova vile mupa no luaki. Anu kisou 7 xe komonu 10. La ati aini loxo noxi'a takingi 10 mumomoxu komokonu. Xe no kisokisou la ualauala. Ualauala ne so anu ulu'enu Mosinge ualasou mo uxililiou no anu. 2Mi vova emaisou ne musaxi loxo salimile toxoxu ane ilemolu lexe lepati. Xe tava'u aloxo misoposi vea mo anaxu a loxo laioni 'o. La mi loxo sineke tatila muvulanu xaviou mulai noxou mo so mi vova ne uxali kingi mo xavinu loxo anu. 3La mi vova ne kisou vile musaxi loxo mito'omolu mo musoli, ia tanixu ne muvesasi. Laso tatemanu lialia mukalusi mikulukemolu sila mimulimulinu mi vova ne. 4Mimulinu xo milavu lexe mi loxo sineke tatila muvulanu xaviou mulai noxou ane. Laso ane'i mi'itinu ualasou mi loxo sineke tatila ilou mi vova ne. Mo mivikala lexe, “Ena'ei xavinu loxo mi vova 'o? Ena'ei so uua'ulixu no anu oto? Uasi to!”

5Ioxe, Mosinge mu'italonusi mo so mi vova ne mulanu vaivaikala so molu mu'itinu ualasou ia noxou Mosinge la mulu'enu mo mupupuiou. Mosinge mu'italonu so u'oxo axone umomomo no anu so'io 42. 6La vaikala so pupui mula no anaxu mo muvikala masuaou vaikalaou Mosinge xe tasou xe tamitemaou ane ixolu no tualasou lailaixe. 7Xe Mosinge mu'italonu kalumo so u'otoxa'a tamitemaou Mosinge mu'isalili no lialia la muua'ulixa'a. La anu muno'u xavi so mu'uli laxune'i lailaili mukalusi xe vasime'a iouiou xe vaikalai'a vilevilesi xe tatemanu tuatuala mukalusi. 8La tatemanu lialia i'itinu ualasou mi vova ne. Ane'i e i'itinu ne, ane'i ualasi'a uxolu no anu lavuku so mauli noxou Sipisipi Ilie uasi. Anu ane mivau mo musoli tatei. Ualauala e no anu lavuku so mauli ne Mosinge mukaukavunu mi ne ukoinu lialia uao. 9Loxo itema sangalou la ulomuxu vaikala ano'o. 10Aloxo 'o. Loxo Mosinge usosovosou itema vile so ulai ukalavusu la anu ukalavusu ane. Xe loxo usosovosou itema vile so tamitema ivau no anu laviso so oto la ivau no anu laviso ka usoli ane. Laso loxo mi axone uxali la ngingi tamitemaou Mosinge mu'isalili ngatulu pumungenge mo ngalopala noxousi.

11Ioxe, emaleila la emaisou mi vova vilela muxali telo no lialia. La no kisou komonu tamei utulu a loxo tasipisipi ta'ili'a komone'i. Xe no anu vaivaikalaou la tamaxu u'isalili no anu mi loxo sineke tatila. 12Mi vova tameisou 'o muxolu no iou anu ane tei so loxo u'oxonu mi ma'ia la uno'u xavi noxou. La anu mupamuxane'i tatemanu lialia so i'itinu ualasou mi vova ane tei. Anu e mito'omolu la umomomo no anu soli ia mumauli mo tanixu muvesasi. 13Xe anu ane tameisou mu'oxonu sosovo so xavi iouiou. La sosovo ane tatila aloxo 'o. No ie'i tamitema latala la anu mu'oxonu navu molu no loxotolo so mulu'e no lialia. 14Mosinge mu'italonu so u'oxonu sosovo so xavi axone no iou mi vova ane tei. Mo so axone la anu u'oxonu loloxa'a tatemanu lialia la mupalupalusi'a aloxo 'o. Mupalusi'a lexe ane'i i'oxonu mi vile ane usaxi loxo mi vova ane tei so i'itinu ualasou. Mi vova e mito'omolu no anu laviso so oto ia mumauli mo tanixu muvesasi. 15La Mosinge mu'italonu mi vova tameisou 'o so utausou mauli u'una no anu mi e tamitema mi'oxonu musaxi loxo mi vova ane tei. Mutausou mauli mu'una sila mi ne muvivikala. Xe tamitema loxo ilotu no anu mi e musaxi loxo mi vova uasi la anu xavinu so uve'ave'a isoisoli.

16Ioxe, mi vova tameisou muvikala lexe ane'i imulaxu sosovo no anu avo'avo'a tema xe no ala'alaie'i tamitema mukalusi. Tamitema loxo vitavitanisi o ane'i loxo ualaualasi'a xe ane'i loxo lamolii'a o ane'i loxo uasi xe ane'i ixolu lalavulusi o tasilevi, ane'i mukalusi mixalisou sosovo ne. 17Laso loxo sosovo ne uxolu noxou itema vile uasi la umomomo so ulotonu mi vile o usalimunu mi vile uasi. Sosovo ne anu ualasou mi vova xe navasou ualasou. 18Laso loxo ena'ei lavulavuou laixe, la mi 'o masi upala'a noxou. Upala'a noxou xo utongonu nava noxou mi vova ne lexe anu nava noxou itema vile. La anu nava noxou 666.

Currently Selected:

Mupala'a 13: ATA

Highlight

Copy

Compare