Mupala'a 11

Tamitema so pela'a tatamei milanu Mosinge vaikalaou

1Ioxe mukalu, la milosilo tilovo vile a loxo vilaxo maxei 'o. La xoli muvikalaleli aloxo 'o, “Na'avuti mo natilovosou tasou Mosinge ilou tanixu navu. Mo na'itisi'a tamitema ane ixolu nonano so i'itinu Mosinge ualasou. 2Ia matamataunu noale no tasou Mosinge la naua'ulixusi, natilovosou uasi xo anene tanixa'a tamitema noale'alesi. Ane'i noale'ale ne ine'e ixixao isoasoa no taoni noxou Mosinge umomomo no anu so'io 42. 3Xe eni apalusi'a tamitemaxeli tamei so ilanu vaikalaxeli. La ilou isakinu lavalava so tama mo ixolu aso 1260 ne so ilanu vaikala so pela'asi.

4Ioxe, ilou ne ane'i a loxo ovu olivi tamei xe loxo lalamo tamei so utulu no laxunu Mosinge. Mosinge e anu mosou lialia. 5Xe loxo itema ena'ei utovonu so uve'a ilou la navu kaxu ula no anaxa'a ilou so u'elaxa'a tauluai'a. Laso ta'ei i'oxo lexe ive'a la me'a ixalisou soli no anu vote'i axone. 6La ilou ane'i xavine'i umomomo so no anu voxo loxo ilou ixoxolu ilanu vaikala so pela'a la itanuxu uali no loxotolo so usili uasi. Mo xavine'i so ixiunu lexalexa uxali sialusi. Mo loxo no voxovoxo aneva ilou imasaxau, la ixalixu tu'utu'umaxu masumasua noxi'a tatemanu lialia.

7Ioxe, ilou ixolu ilanu vaikalaou Mosinge xo xe ukalui laso ane. Mi vova molu no taxa e ulu'elai avile olele utelo so u'otoxa'a. U'otoxa'a xola uua'ulixa'a mo uve'a ilou isoli. 8La vasime'a uta'olu vitanisi no loxomala no anu taoni tatila. Taoni ne tatotokalasou no anu uala vile lexe Sotomu xe vile lexe Isipi. Anu taoni e tatei mililixu Tatanane'i no ovu valautu so musoli. 9Vasime'a uta'olu vitanisi axone umomomo no anu aso tatalu xe pa'usou ia tamitema opone'i mamalaxu so i'asixa'a uasi. Uta'olu ne la tamitema vasime'a iouiou xe so xale tuatuala xe vaikalai'a vilevilesi xe no anu lailaili mukalusi isaxisou vasime'a ilou ne. 10La tatemanu lialia mukalusi ne i'osa xo ilou misoli mukalu. La ilelexe mo i'ani'ani mo i'iti'a mimi ngato'o so imaxa'u osa noxi'a. I'osasou soli noxi'a tapolopeti tamei ne xo ilou milosi'a tatemanu lialia navunavu.

11Ioxe, ilou isoli xe iai voxo tatalu xe pa'usou ukalui, laso Mosinge utausou tauxu so mauli u'unalai noxi'a ilou. Sila ilou itulu mo imaulila. La ume toxoxu uxali noxi'a ane'i ane imaisi'a ilou. 12Ilou imauli, laso ilomusou xoli tatila molu no tualasou Mosinge aloxo 'o, “Ngilou ngatelo 'o.” Laso tauluai'a a isaxisi'a itelai i'una no sauma so ilai no tualasou Mosinge. 13La no voxo anene kalumo uni'uni tatila uxali no taoni ne. Laso loxo takalipalanu uxali pa'usou 10, la pa'usou vile umamulo avile. Xe no anu uni'uni ne tamitema isoisoli navasi'a umomomo no anu 7000. La ane'i loxo ixoxolusio imama'u laso i'itinu ualasou Mosinge e uxoxolu no tualasou lailaixe.

14Anu ane, tu'umaxu e mu'oki tameisou mukalu 'oe. Ia ngalomu, maxuveni uasi la tu'umaxu tatalusou a so umulinula.

Angelo 7-si'a mutaunu piuka

15Ioxe, angelo 7-si'a mutaunu piuka noxou. La elomusou xolixoli no tualasou Mosinge muvikala aloxo 'o, “Tatananenge ilou Itema e musosovosou lexe Kalaisiti ne ane'isisi takingi, xo ilou mino'u tanixa'a takingi so lialia mukalusi. Ane'isi ixolu i'uli'uli avile kaluxu uasi.” 16La noxi'a tatiatila 24 e mitalupexa no anu siasia no laxunu Mosinge la milalusi so mitangatulu mo mi'itinu Mosingesi. 17La mivikala aloxo 'o, “Tatananexi, nini Mosixe, nini ninisisi Na'uli'uli avile. Xo tei tei manina nini nexoxolu mo vaimomo 'o naxoxolu. Xavineni tatila a mupala'a xo naxolu no anu tanixene so na'uli laxunu mimi mukalusi. Laso nexi tavikala laixe noxine. 18Tamitema so isivoxo no tuatuala la'iaxa'a ia vaimomo 'o la'ia noxine u'oki mo upala'asi. Xo tamitema loxo misoisoli la voxosi'a so natilovosi'a no anu lakoti a muxali 'oe. Ia loxo tamitema so xaixai noxine e tapolopeti xe tamitemameni u'isalili xe ane'i ta'ei imama'u mo ilu'ene'i noxine, loxo tamitema vitanisi o tatiatila, la voxo so nalosi'a lakolisou lailaixe a muxali kalumo. Ia noxi'a tamitema so mamulo la nini namamulone'isi.”

19Ioxe, tatiatila mivikala axone mukalu laso aitengaxu tasou Mosinge no tualasou mukisi. Mukisi laso emaisou kesi so konitalaki muai ne. Emaisou la lele'e mulamilami mo mupaupau. Xe uni'uni mukunikuni mo uali loxo aisi mululu'e.

Currently Selected:

Mupala'a 11: ATA

Highlight

Copy

Compare