Mupala'a 1

1Ioxe, tatei vaikalasou mimi ane so uxali la mutalumesi. Ia Mosinge mupilixinu noxou Iesua Kalaisiti so upala'anixu lamana noxi'a tamitema so xaixai noxou. Laso Kalaisiti mupalusou angelou so uvulunu noxilo. Xo eni Tioni 'o, eni amitema so xaixai noxou. 2Mo so vaikalaou Mosinge aneva elomusou xe mi ma'ia emaisou Iesua Kalaisiti mu'oxonu o mulemolu la aa'aloxu u'isalili.

3Laso ena'ei u'itisou o ulomusou vaikala so pela'a 'o mo ulomuxu, la uxalisou osa no anu xoluxoluxu xo voxosou nene'axu a so uxali.

Tioni mukaukavunu pelototo so ulai no anu pita 7

4Eni Tioni a. Vaikala ano'o ulai noxinge ngingi tatemanu pita 7 ne Esia polovinisi. Mosinge uiaiamangenge mo ulosinge xoluxolu lalavulusi xo anu muxolu tei tei manina mo a uxoxolu vaimomo 'o mo anu a une'e uxolu ili'i kalumo. Xe su'uli anene kalumo ngaxalisou noxou Ulenu ane noxou 7 e uxoxolu no laxunu sia kingi noxou Mosinge. 5Xe noxou Iesua Kalaisiti kalumo. Anu ua'aloxu vaikalaou Mosinge maninasi mo anu u'uli'uli noxi'a tamitema so itulu no anu soli mo anu tilasi'a takingi no lialia mukalusi. Mo kalumo anu musexelanenge misevile laso mulotonenge no anu sialuxu so mu'umenenge no anu susu noxinge. 6Xe anu kingi na'a nenge mo taxolu noxou, laso nenge tapilisiti noxou Mosinge anu Maminge. Ioxe manina, laso ta'itinu ualasou Iesua Kalaisiti teitexi manina so anu u'uli laxunenge ulai ulai kaluxu uasi.

7Xo ngalomu, ngasaxi utelo. No voxo loxo une'e la upolo no anu sauma ulu'e. Une'e la tamitema mukalusi imaisou no anu ie'i lavo'onusi. La ane'i ane mito'omolu vasimolu la imaisou kalumo. La tamitema no anu lailaili mukalusi no lialia 'o ixavutala mo itatamasou. Mi anene uxali manina ane.

8La Tatananenge anu Mosinge uvikala aloxo 'o, “Eni ane tei a xe eni kaluxu uasi a. Evile uua'ulixo uasi, xo tatei eni exoxolu xe vaimomo axoxolu mo ulai ili'i la eni ane'e axolusi.”

Kalaisiti mupala'a noxou Tioni

9Ioxe, eni avivinge Tioni a xo nenge nenge'a taxolu noxou Iesua. Taxolu noxou laso nenge so taxolu no voxo loxo Mosinge molu u'uli laxune'i tamitemaou. Laso maixene nenge tatavulenu tu'utu'umaxusou ia taxolu se'isisi so taxomaiou. Xo eni elanu vaikalaou Mosinge mo ea'aloxu Iesua laso ane'i mikusailo xe mipalusilo so axoxolu no anu ailani Patimosi 'o. 10Ioxe, exoxolu xo xe voxo so ta'itinu Tatananenge ualasou la Ulenu Laixe mupamupamuxaleli sila elomusou xoli tatila loxo piuka no talilo. 11La muvikalaleli aloxo 'o, “Mimi ane so nasaxisou la nakaukavunu no lavuku vile ka nakalanu ulai no anu pita 7 no tuatuala ano'o. Ne Epesusi xe ne Semelena xe ne Pelexamumi xe ne Taiataila xe ne Salitisi xe ne Vilatelevia xe ne Laotisea.”

12Elomu xe ieli muxiu so amaisou mosou xolinu ne sila emaisou lalamo koli 7. 13La no tainu lalamo la emaisou anu ane muxali itema a mutulu. Lavalava veveni musu'asou la muxali no tava'u avile. Xe musinixu laleti koli no lutunu. 14La laxusou muvalukeasi a loxo sipisipi laxusou mo loxo saumaxu tavaukela. Xe iou kaxu a loxo navu 'o. 15Xe tava'u loxo valasi ane mi'elaxu mo so axexaxu. Xe xolinu loxo lexalexa loxu. 16La no avolu tema anu mutetelisou tataoto 7. Xe laviso mula muxolu no anaxu. Laviso ne anaxu xalevile tatamei. La alaiou lamanaxu loxo aso uiei e u'oki manina.

17Ioxe, emaisou sila elapau no tava'u a loxo itema musoli. Ia anu mumulaxu avolu tema noxilo mo muvikala aloxo 'o, “Na'ume uasi. Eni ane tei xe eni kalaxu uasi a. 18Eni ane axoxolu amauli 'o. Eni esoli ia namaisou, eni axoxolu kaluxu uasi a. Xavi no anu soli mo tanixu soli a uxoxolu noxilo mo atetelisou lakisou. 19Laso nini nakaukavunu mimi e nesaxisou 'o. Mimi e so vaimomo 'o xe so ili'i kalumo. 20Xo nemaisou tataoto 7 no avolo tema xe lalamo koli 7 a ututulu. Anu so latilovo mo laxu mutalume ia apala'anixu noxine aloxo 'o. Tataoto 7 ne anu sosovosi'a ta'angelo 7 no anu pita 7 vilevilesi. Xe lalamo 7 ne anu usosovosou pita 7 ne.

Currently Selected:

Mupala'a 1: ATA

Highlight

Copy

Compare