Ipilu 10
10
Mimi ane mine'enu lexe noxou Mosinge tatei ne umomomo uasi manina so ukalusou tina'u so susu
1Ioxe, lo to ne temanu manina uxolu no anu uasi, anu loxo xalexu mimi lailaixe ane so uxali ili'isi. Xo no anu lo la ane'i ine'enu mi iou vilesisi no anu tau ie utotomu. Mine'e noxou Mosinge no anu vote'i axone ia anene umomomo so uxalixa'a laixe avile uasisi. 2Xo loxo umomomo la ane'i i'oxonu utotomu axone uasi, ine'enu mi ne noxou Mosinge alaxu vilesisi. Ine'enu xe uxalixa'a malemalenga ukalu la i'oxonula uasi xo ixamulinu tane'i uai laixe so susu noxi'a avile. 3Ia uasi, mive'ave'a tamimi lexe noxou Mosinge tautau ie utotomu laso mulivunoxu xavutalai'a no anu susu noxi'a lexe ukalu avile uasi. 4Xo sialuxa'a takau tamulu oli'a takoti umomomo so uxexenu susu avile to uasi.
5Laso maixene Kalaisiti so une'e no lialia la muvikalanu Mosinge aloxo 'o, “Tamitema ive'ave'a tamisoposi mo ine'enu mimi lexe noxine. Ia anene oponeni ututuluou uasi. Laso nelalaxisilo vasimelo so axolu no anu. 6Xe loxo i'elaxa'a tamisoposi avile lexe noxine la na'osasou uasi to! 7Laso eni evikalaneni aloxo 'o, 'Mosilo, eni a ene'e so amulinu masaxa noxine, a loxo mikaukavusilo no anu lavuku noxine.'” 8A mulemolu tei lexe, “Tamitema imulinu lo so ive'ave'a tamisoposi mo ine'enu mimi mo i'elaxa'a tamisoposi lexe noxine so usu'asou susu noxi'a. Ia anene oponeni ututuluou uasi mo na'osasou uasi to!” 9Xe mukalu la muvikala aloxo 'ola, “Eni ene'e so amulinu masaxa noxine a.” Laso no anu anene la muxexenu vote'i tei mo so u'avutinoxu lakolisou alavua 'o. 10Xo Iesua Kalaisiti mumulinu masaxa noxou Mosingesi mo mupilixinu vasimolu so susu noxinge alaxu vilesisi. Laso no anu vote'i anene la nenge texali tamalemalenga mo tanoxou Mosinge mu'isalili.
Mi ane Kalaisiti mupilixinu la umomomo so uxexenu tina'u so susu
11Mo aloxo 'ola. Noxi'a tapilisiti mukalusi la itutulu i'oxonu xaixai noxi'a voxovoxo utotomu. Itutulu ixaxai no anu mi lexe noxou Mosinge la iou vilesisi mo lalaxu ia umomomo uasi manina so uxexenu susu. 12Ia noxou Kalaisiti la alaxu vilesisisi mupilixinu mi vilesisi so lapesou susu. Mupilixinu mukalu la mutalupexa no anu Mosinge avolu tema. 13Mo anu a uxoxomaiou voxo so umaloxo'a tauluaou no tava'u. 14No anu mi e mupilixinu ne la mu'oxone'i tanoxou Mosinge u'isalili mixali talaixe loloni, mo anene kaluxusou uasi. 15La Ulenu Laixe mupela'ingexu mi ne kalumo xo vaikalaou mulemolu aloxo 'o, 16“Tatananenge muvikala lexe, 'Konitalaki alavua eni a'oxonu noxi'a ili'i la aloxo 'o. Eni amulaxu lo noxilo no opone'i mo akaukavunu no alaie'i.'” 17Xe musolonu aloxo 'o, “Susu noxi'a mo ili'ilixo masua noxi'a la axavutalanula uasi.” 18Laso ane, loxo Mosinge ukalusou tina'u so susu axone, la tane'enu mi vile so usu'asou susu nela uasi.
Nenge ta'ume uasi, talopala so tasuku alai noxou Mosinge
19Ioxe laso tavivilo, ta'unalai no anu ngiou noxou Mosinge u'isalili mo ta'ume uasi xo no anu vote'i so sialuxu Iesuasi. 20Vote'i alavua ne umamauli xo anu molu mu'avutinoxu so ta'una tapolo no tainu lavalava e utilovosou vasimolu. 21Xe nenge pilisiti tatila so usaxila'inge nenge tatemanu tasou Mosinge. 22Laso nenge talai alai mo oponenge lamana mo lopala noxinge pumuxu avile. Xo Kalaisiti mupeinu sialuxu noxinge so mu'uinu susu ane tanenge muto'omengexu mo mu'uinu vasimenge no anu lexa malemalenga.
23Xe mi ane nenge tapala'anixu lexe talopalanu taxomaiou la tasasalo no anu uasi, takamakulunu pakia'u. Ia xo ma'i, xo anu ane muvavalimasou la utotomu uxalixu nene'axu vaikalaou ane. 24Xe takamulinu vote'i so ta'avutinixinge ngato'o so tasexela mo ta'oxonu ili'ilixo laixesi. 25Xe ngaxiunu tumalingeou pita na'a nenge uasi, xo se'i la mi'oxo axone mukalu. Mo ngamaisou, voxo olele a unene'e, laso xavinenge so tapelototosinge ngato'o.
Ane'i ane ixiunu tumali'aou lopala la itavulenu tu'umaxusou misevile
26Xo aloxo 'o. Loxo nenge taxalisou lavulavu no anu vaikala e manina ia ili'i loxo taxiu tumalinge so tapolo no anu mi ane talavu lexe sususi, la mi vilela so ulotonu susu noxinge uasi e uasi manina. 27Axone la mi vilesisi so taxolu taxomaiou mo ta'umolu manina. Mi e voxosou Mosinge utongone'i tamitema mukalusi. Xo no voxo ne la navu no anu la'ia noxou so si'a ta'ei ixililiou la usexetelusi'a avile. 28Xo loxo telavu, loxo itema vile tatei mumatapianu lo noxou Mosisi mo muxiunu tumalouou. Ioxe, loxo tamenexu tamei o tatalu milavusou mo mia'aloxu la lo muvikala lexe vote'i so tamitema tane'ixu mo so ie'i uvaxaou susu noxou uasi. Ivau itema ne usoli avilesi. 29Ioxe, lakolisou ne tu'umaxu ia loxo vaimomo 'o itema umaloxo'u ualasou Mosinge Olu la ngaxavutala axova, lakolisou tu'umaxu e lapilai uasisi. Xo sialu so konitalaki alavua so ukalipalanu itema ne lexe anu noxou Mosinge, la muvila'isou vitanisi mo mupupuiou Ulenu so iaiama. 30Xo nenge telavu lexe Mosinge muvikala aloxo 'o, “Eni melo akolinu mo apilixinu lapesou susu noxi'a tamitema.” Mo aloxo 'ola, “Tatananenge molu utilovosi'a tamitemaou no lakoti.” 31Ai manina misevile, loxo itema uxolu uxomaiou Mosinge so ukolinu susu noxou la oponu u'ume mo kalaua avile.
Tatulu pakia'inge no anu lopala
32Xe tangengiou voxo tatei e vaikala lamana muxali noxinge, xo ngetavulenu tu'umaxusou tatila ia ngetulu pakia'inge no anusi. 33Xo voxo se'i mitulusinge vilevilesi no ie'i tamitema so ito'omenge mo ixililiienge. Xe voxo se'i la mipitangengi so mi'oxo ilixo axone noxinge latala. 34Xe loxo mikalavusune'i se'i noxinge la tangengixa'a mo nge'oxone'i laixe. Xe loxo taxilili mi'umenu mimi noxinge la nga'apisou uasi. Nge'osa so ngepilixinusi xo ngelavu lexe mimimenge lailaixe ane kaluxusou uasi a mulalaxisinge.
35Ioxe, tatei lopala noxinge mututulu pakia'u axone laso ngapilixinu vitanisi mamu. Ngatetelisou xo anu uxalixu nene'axu lailaixe ane. 36Ngatulu pakia'inge axone mo ngaxolu ngamulinu masaxa noxou Mosinge xo mo ngaxalisou mimi ane muvavalimasou. 37Xo loxo mulemolu, “Maxuveni uasi la anu ane so une'e la uxali, uvovoxo uasi. 38Tamitemaxeli talapusi la ixolu no anu lopalasi. Ia ane'i ta'ei ane ixiu tumali'a ilivu la opoleli u'osasi'a uasi.”
39Ia nenge tamitema so taxiu tumalinge talivu no anu vote'i so mamulo uasi. Nenge nenge'a 'o, nenge telopala laso texalisou pamauli 'o.
Currently Selected:
Ipilu 10: ATA
Highlight
Copy
Compare
Share
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
