Xalesia 3

Vote'i so lo xe vote'i so lopala

1O ngingi Taxalesia ne ngaxovulaulau ane. Nexi temaxa'u Iesua Kalaisiti noxinge mo anu loxo ngemaisou mulili no ovu valautu no iengi. Axova, evile masi mu'oxo lolongenge so xavutalamengi mupaulu, ne? 2Eni tali'i vile so atali'isinge aloxo 'o. Ngingi ngemulimulinu lo kaso ngexalisou Ulenu Laixe? Uasi, ngingi ngexalisou no anu vote'i e so ngelomuxu vaikala laixe ka ngelopalanu, ne? 3Ia xavutalamengi masi muxali vuluvulusi. Xo no anu xoluxolu alavua noxinge ne la Ulenu Laixe molu mu'avutinoxu. Laso axova, ngingi menge a so ngasivitanoxu avile no anu xavi noxingeio? 4Mimi mukalusi ane muxalisinge ne nene'axu uasi? E uasi, eni axamulinu lexe anu nene'axu ane. 5Mosinge mupilixinu Ulenu Laixe noxinge mo mu'oxonu sosovo so xavi no taingengi. Ia axova, mu'oxo axone xo ngemulimulinu lo? Uasi e, anu mu'oxo axone xo ngingi ngelomuxu vaikala laixe mo ngelopalanusi.

6Ioxe, la anu axone noxou Apala'amu. Xo mulopalanu Mosinge laso no anu anenesi la Mosinge mumoxo'u lexe itema mulapu no iou. 7Laso ngalavu lamana no opongengi lexe ane'i ta'ei so Apala'amu ta'ilusunu u'isalili, a tamitema so ilopalasi. 8Xo vaikala no anu lavukuou Mosinge mulosi mu'uli la mulemolu mi ane muxali mukalu 'oe. Mi e so tamitema noale'ale ixaxali talapu no iou no anu vote'i so lopalasi. Xo no anu vaikalaou ne mulemolu lumamo noxou Apala'amu aloxo 'o, “Noxine la Mosinge uxalixu su'ulisi'a tamitema no anu lailaili mukalusi.” 9Laso maixene tamitema ta'ei so ilopala la ixalisou su'uli aloxo itema so lopala e Apala'amu muxalisou.

10Ia tamitema ta'ei opone'i u'oxoxu lo so imulimulinu la ixoxolu no laxu vaikala so mamulosi ane. Xo loxo Mosinge vaikalaou mulemolu lexe, “Loxo itema umomomoxu lavuloto mukalusi ane uxolu no anu lavuku so lo uasi, la vaikala so mamulo u'isalili noxousi.” 11Xe vaikala vilela aloxo 'o, “Vote'i so Mosinge umoxo'u itema ulapu no iou mo ulosou mauli a no anu lopalasi.” Laso anu upalasinoxu lexe lo ne anu vote'i uasisi so Mosinge umoxo'u itema ulapu no iou. 12Vote'i e so itema umulimulinu lo la anu mi so lopala uasi. Xo loxo Mosinge vaikalaou ulemolu lexe, “Itema umomomoxu lo mukalusi, la anusi uxalisou mauli no anu.”

13Ioxe, no anu telexu lo la ulemolu mamulosingesi. Ia Kalaisiti mu'umenenge no anu vaikala so mamulo ne xo anu molu muno'u taninenge so mutavulenu. A loxo mulemolu no anu Mosinge vaikalaou lexe, “Itema aneva ulili no ovu la utavulenu vaikala so mamulo no iou Mosinge ane.” 14Kalaisiti mu'oxo axone laso anene nene'axu vaikalaou Mosinge lexe uxalixu su'ulisi'a tamitema noale'ale noxou Apala'amu. Laso no anu xaixai noxou Iesua Kalaisiti ne mu'oxonu vote'isinge so nenge ta'ei talopala la taxalisou Ulenu Laixe a loxo Mosinge muvavalimasou.

Lo uxexenu vavalima uasi

15Tavivilo, eni a'oxonu latilovo no anu ilixo noxinge tamitema aloxo 'o. Loxo tamitema tamei ixalixu konitalaki ka ikaukavunu ualasi'a no anu so isakinu la anu uxolu axonesi. Anu vote'i so evile uiasou ili'i o usolonu no latanu vitanisi uasisi. 16Ioxe, tatei Mosinge mu'oxonu vavalima noxou Apala'amu ilou ilusunu. No anu anene la vaikalaou laxu lexe upolonu su'uli noxi'a ta'ilusunu Apala'amu mukalusi uasi. Anu muvikalasou ilusunu vilesisi, ane Kalaisitisi. 17Tava'u vaikalaxeli ne aloxo 'o. Tei la Mosinge muvavalima noxou Apala'amu. Xe tau ie 430 mulai mukalui la Mosinge muxalixu lo. Anu lo muxali ili'i axone laso umomomo uasi so uiasou konitalaki e Mosinge musakinu no anu vaikala lumamo. Xe vavalima no anu ne, uxexenu kalumo uasi. 18Laso loxo nenge tamulimulinu lo so taxalisou mimi lailaixe, la anu upalasi lexe anu mi so vavalima uasi. Ia uasi, nenge telavu lexe Mosinge mu'oxonu vavalima noxou Apala'amu kaio mupilixinu mimi lailaixe no anu xoluxoluxu.

19Ia tava'u axova so Mosinge mupilixinu lo 'o? Tava'u xo Mosinge umasaxau lexe upela'ingexu susu na'a nenge. La mu'oxonu so lo uxolu xo mo ilusunu Apala'amu e muvavalima noxou uxalii, laso ane. La vote'i so Mosinge mupilixinu lo aloxo 'o. Ta'angelou mipela'uxu itema vile so mutulu nonixi. Mukalu la anu itema ne mupela'ingexu. 20Loxo tamitema tamei ixalixu konitalaki so xaixai vile la masi itema so utulu nonixi axone. Ia no anu ano'o la itema vilela so utulu nonixi uasi, xo Mosinge vilesisi mo anusisi so uxalixu nene'axu vavalima noxou.

Lo ne anu so upamuxanenge talai noxou Kalaisiti

21Ioxe, telemolu axone ia axova, lo ne uxililiou vavalima noxou Mosinge? Uasi to! Xo loxo Mosinge mulosinge lo vilela so ulosinge mauli la anu vote'i uxolu so tamulimulinu ka taxali talapu no iou Mosinge no anusi. 22Ia uasi, xo vaikala no anu lavukuou Mosinge ukapikapine'i tamitema mukalusi so ilavu lexe ixoxolu no laxu sususi. Mosinge mu'italonu axone mo so ane'i ane ilopala noxou Iesua Kalaisitisi la ixalisou nene'axu vavalima noxou.

23Xe loxo voxo so lopala aloxo 'o uxali uao la texolu lo mukalavusunenge xo mo voxosou lopala 'o mupalasi avile. 24Laso lo ne anu muxolu loxo itema so uititi'a tamolomolo mo upamuxane'i. Ioxe, lo mu'oxo axone so ulaolenenge xo laso uxalixinge avile noxou Kalaisiti. Mo so loxo talopala noxou la Mosinge umoxo'inge lexe talapu no iou. 25Laso vaimomo 'o tava'u so taxolu no laxu mi e mupamuxanenge tei nela uasi xo lopala muxali mukalu.

26Xo ngingi mukalusi ngepita noxou Kalaisiti Iesua no anu vote'i e so lopalasi laso maixene ngingi Mosinge ta'olu ane. 27Ngingi ane ngexalisou kelele so nge'una noxou Kalaisiti, la ngesu'asinge avile noxou aloxo itema usu'asou no anu lavalava. 28Ngexolu noxou axone laso no iou Mosinge la ngingi loxo Taiuta xe Takiliki o tasilevi xe tamitema ixolu lalavulusi o tamulu xe tasemamo uasi. Mi vile ukalipalangengi axone la uasi, xo ngingi ngaxolu vilesisi noxou Kalaisiti Iesua. 29Laso ane, ngingi ta'ei tamitemaou Kalaisiti ne, ngingi ta'ilusunu Apa'alamu maninasou. Xo tamitema so ixalisou nene'axu vavalima e Mosinge mu'oxonu noxou Apala'amu a ngingi to ne.

Currently Selected:

Xalesia 3: ATA

Highlight

Compare

Copy