Ta'aposeli 28

Polu muxolu no ailani Malita

1Ioxe, nexi texali noale mo laixenexi, la tetali'isi'a tamitema lexe lia aneva ne. La ane'i mivikala lexe anene ailani e Malita. 2Texolu la tamosou lia ne mi'oxonexi laixe misevile. Xo aloxo 'o, uali musisili la nexi sivevexe, laso ane'i mitauxu navu so tetu'exu. 3Tetu'e la Polu mula'unu ovu tavalanu so umulaxu no navu. No ovu tavalanu ne la sineke vile masua a muai nonano. Polu mumulaxu ovu'ovu ne vaxa la sineke muxamulinu navu laso mu'ume mula. Mula sila mungasou Polu avolu mo mulili. 4Xe ane'i tamosou tuala mimalei loxo 'o la sineke a ulili la mivikalane'i ngato'o lexe, “Iu, ngamalei. Itema lakalavusu olele masi muvau itema vile musoli. Anu mu'ume no luaki mo uuo'uo uasi, ia nene'axu susu ne a so uxali noxoui ne.” 5Ia Polu mumuainu avolusi la sineke mulapau mu'una no navu, mo mi vile uxali noxou Polu uasi. 6Mu'oxo axone xe tamotu mixolu miutitiou lexe masi vasimolu usoxo o ulapau so usoli. Ia uasi, miutiti maxuveni ia mi vile uxali noxou uasi laso xavutalai'a muxiu mo mi'oxo lexe anu masi vile noxi'a tamomosi'a e mi'itinu ualasi'a.

7No anu ailani ne tila no anu xamani ualasou lexe Puviliasi. Anu tasou a muxolu alaisi. Itema ne mualixe lexe taxolu no tasou. Texolu no tasou voxonexe tatalu la anu musaxila'ixe laixe. 8Anu momu ne mupipiena mo a uxoxolu. Anu pipiena loxo vasimolu ialuxu mo nixinixi. Texolu xo xe Polu mu'unalai noxou xe muvikala noxou Mosinge. Mukalu la mumulaxu avolu vaxa noxou sila laixenu. 9Anu mu'oxo axone laso ane'i tamitema mipipiena no xale lia ne mine'ene'e noxou Polu so upamauline'i. 10Ane'i mi'oxonu ilixo laixe noxixe manina mo loxo so talutu la ane'i mi'itinexe la'ilali mo mimi so tatavulenu.

Polu mulai muxali ne Lomu

11Nexi texolu ne Malita so'io tatalu. Mukalu la tetelo no lasipi vile. Lasipi ne anu muai ne tei xo tamosou mitalumeu no anu taunu masua ne. Ane'i so Alekisanita. No kusinou lasipi la mipuinu so musaxi loxo mosi'a kalavoi tamei e Susi ta'ilie. Tetelo no lasipi ne mo telutu tela no luaki. 12Telutu xo xe texali no tuala ne Silakusi la texolu ne voxo tatalu. 13Xe telutula la sivo mutavulenu laseli xo xe texali ne Lexiumu. Texolu xe loxo ne'iela la sivo molu no tumalixe mutavulenexi. Teiave voxo vilela laso texali avile ne Puteoli. 14Texali ne la tavivinge talopala se'i a mixoxolu. Laso ane'i mialixe mo noxi'a texolu viki vile loloni. Mukalu la telutu telai texali avile ne Lomu. 15Telai xe tavivinge ne Lomu milomu lexe nexi a tene'e laso ane'i mialanexe so mixalisixe no vote'i. Mialanexe la se'i mixalisixe no maketi ne Apiusi. Xe se'i mixalisixe no anu tuala ilemolu lexe Tani Tatalu Si'a Tapasinitia. Anu Polu mumaisi'a, la anu muvikala laixe noxou Mosinge mo ume noxou tasiau. 16Ioxe, texali ne Lomui, la tatiatila noxi'a Talomu imulaxu Polu no tasou lakalavusu uasi, anu muxolu no tani vitanisi xe ami vile mutuluxu ne.

Polu muvotovoto ne Lomu

17Ioxe, texali ne Lomu la Polu muxolu voxo tatalu. Mukalu la mu'avali'a tatiatila noxi'a Taiuta mipita. Mipita mukalu la muvikalane'i lexe, “Tavivilo, eni a'oxonu mi vile so axililie'i laili noxinge uasi mo axola'u lavuloto vile noxi'a ta'ilusunenge uasi. Ia ane'i Taiuta ne Ielusalemo mitetelisilo xe mipilixileli no avo'a Talomu. 18Mipilixileli noxi'a axone xe Talomu mitilovosilo, la mitongoleli lexe a'oxonu susu vile so iveloxu uasi. Laso Talomu ne mi'oxo lexe ipilixileli alaisi. 19Ia Taiuta mixililiou vaikala ne mole eni vote'i uasi. Eni evikala lexe ane'e so Sisa molu utongoleli. Ia eni vaikala vile so ato'ome'a tamitemaxeli anene no anu uasi. 20Eni a'avalinge so tapita 'o xo tava'u aloxo 'o. Eni emasaxau avikala lamana lexe misakileli no anu seni ano'o xo ma'ia. Misakileli xo eni opoleli ututulu no anu mi e nenge Ta'isilaeli taxomaiou.”

21La tatiatila mikolinu lexe, “Lapasi vile molu ne Iutea une'e so uvikalasine uasi. Mo vivinge Iuta vile une'e ua'alomexi so vaikala masua vile sine uasi. 22Nexi tamasaxa lexe talomusou oponeni u'isalili. Xo nexi talavu lexe tamitema no tuatuala isu'anu anaxa'asou laili alavua e muxali no tainenge nenge Taiuta.” 23Mivikala axone mukalu la misosovosou voxo vile so tamitema latala ipita noxou Polu no tani ne. Mune'e xe mipita axone la musoko'u no kakau mulai muxali no olovoxo la mutovonu so upela'axu voxo so Mosinge molu u'uli laxune'i tamitemaou. Mo mutovonu so upalasinoxu laxu vaikalai'a tapolopeti xe lavuku so lo e Mosisi mukaukavunu lexe anu uvikalasou Iesua u'isalili. 24Milomusou, la se'i opone'i mukasou lexe manina, ia se'i ne uasi. 25Ane'i opone'i mukalipala axone la mikusukusu'a no anu vaikala ngato'o. Xe ane'i so ilala la vaikalaou Polu kaluxusou aloxo 'o, “Ai, Ulenu Laixe muvikala manina noxi'a ta'ilusunenge no anu anaxu polopeti Aisaia aloxo 'o, 26'Nini nalai noxi'a laili ano'o mo navikalane'i lexe, Ngingi utotomu ngalomusou vaikala ia ngalamana no anu laxu uasi. Mo utotomu ngasaxisou mimi ia ngatongonu uasi. 27Xo tamitema ane xo ne, opone'i pumuxusi mo sangali'a muamuaxu xe me'a mivuvu. Xo loxo 'o io imaisou xe ilomusou vaikala xe ilamana mo ixiunu opone'i la eni apamauline'i.'” 28Polu mulemolu vaikalaou polopeti mukalu la musolonu aloxo 'o, “Laso ngingi ngalamana, vaikala laixe so pamauli noxou Mosinge anu mukalanu noxi'a tamitema noale'ale. Xe ane'i ilomusou la ilomuxu.” 29Polu muvikala axone mukalu la ane'i Taiuta milutulutu so milai. Milai la mipelesou anaxa'a so vaikalaou Polu ne.

30Ioxe, Polu muxolu tau ie tamei ne Lomu. Anu muxolu no anu tasou itema vile la mulolotonu. Muxolu no tani ne xe tamitema ta'ei ine'e noxou la anu mu'osasi'a so i'una mo ivivikala. 31Oli'a ivivikala la anu u'ume uasi so ulanu vaikala so voxo ane Mosinge molu u'uli laxune'i tamitemaou. Mo anu muvotovoto so Tatananenge Iesua Kalaisiti la evile u'apixu uasi.

Currently Selected:

Ta'aposeli 28: ATA

Highlight

Compare

Copy