2 Kolini 5

1Ioxe, laso nenge telavu lexe vasimenge anu loxo tani alelaxu so lialia 'osi. Taxoxolu no anu ia loxo ili'i ukisilala la nenge tani maninasou a uxoxolu. Tani anene uxali no anu tamitema avo'a uasi, Mosinge molu mulalaxinu so uxolu kaluxu uasi no tualasou. 2La nenge taxolu mo taiele no anu tani ano'o xo oponenge utatamasou tasinge manina no tualasou Mosinge so usu'asinge. 3Mo so loxo takelele ta'una no anu la nenge taxolu vitanisi uasi. 4Xo manina, nenge taxolu no anu tani alelaxu 'o la tatavulenu tu'umaxu mo taiele. Ia mi ane oponenge utatamasou ne a so tapilixinu mo taxolu vitanisi uasi. Tatama lexe ane alavua usu'asingesi mo so anu ane so soli 'o la uxiu uxali kaini so maulisi. 5La anu ane mulalaxisinge so mi ne mu'isalili a Mosingesi. Xe anu mupilixinu Ulenu Laixe uxolu noxinge so lamakisou xoluxolu lailaixe ane so taxalisou ili'i.

6Laso taxavutalanu mi ne so u'oxonu pakia'inge utotomu. Xo telavu, nenge taxolu no anu tani e vasimenge 'o la tatalupexa avile noxou Tatananenge uao. 7Xo no anu muamua'inenge vaimomo 'o la no anu lopalasi, anu so mimi ane ienge lavo'onu usaxisou uasi. 8Ia loxo elemolu, oponenge utulu pakia'usi mo masaxa noxinge lexe taxolu no anu tani e vasimenge 'o uasi. Tamasaxau xoluxolu so ta'unalai tatalupexa no nunisinge noxou Tatananenge avile. 9Ia mi vile uasi, xo loxo taxolu no nunisinge olele o taxolu va'axu aloxo 'o la oponenge u'oxoxu masaxa noxou Tatananenge so tamulinusi. 10Xo ili'i la Kalaisiti utalupexa xe nenge vilevilesi tatulu no iou so utilovosou ilixomenge te'oxonu loxo texoxolu no anu vasimenge 'osio. Utilovosinge no anu ilixomenge ma'ia laixe xe masua so ulosinge lakolisou u'isalilisi.

Polu muvikalasou xaixai ane so isolixu kalipala

11Ioxe, nexi tamama'u noxou Tatananenge axone laso maixene nexi xavinexi so ta'avutinoxu mama'u noxi'a leviani kalumo. La oponexi mo ilixomexi upalasi noxou Mosinge. Xe eni amasaxau lexe upalasi no tangengi kalumo lexe mi ma'ia ta'oxonu la mulapusi. 12Xo axova, tavikala aloxo 'ola so taxilisingengi mo so nga'osasixe? Uasi to! Takaukavunu vaikala aloxo 'o so nga'osa so ngaa'alonexe. Mo vote'i so ngakoline'i ane'i ane imasaxau so ualasi'a utila no ie'i tamitema, ia mi ane uxolu no opone'i la me'a itilovosou uasi. 13Xo loxo manina lexe xavutalamexi 'o ulongulongu la anu mi vile uasi, anu mi noxou Mosingesi. Ia loxo manina lexe xavutalamexi 'o ulamanasi la anu so usu'ulingengisi. 14Sexela noxou Kalaisiti upalupalusixe xo oponexi ututulu aloxo 'o. Itema vile muno'u taninenge mukalusi no anu soli la no anu vote'i anene soli muxalisinge mukalusi. 15Anu musolisinge mukalusi mo so nenge ta'ei texalisou mauli la ta'apisou lexe mauli na'a nengemo uasi. Tapilixinu so lexe anu noxou anu ane musoli ka mutulu no taninenge.

16Ioxe, laso vaimomo 'o tamulinu xavutala so lialia 'o so tatilovosou ilixone'i tamitema uasi. Xo tei la vote'i no anu saxisaxi noxinge noxou Kalaisiti, la temulinu xavutala so lialiasi. Ia vaimomomo 'o nenge tatilovosou axonela uasi. 17Laso loxo itema aneva mu'una muxolu noxou Kalaisiti la anu muxali mi alavuae. La mimi teinu musu'a, xo ngalomu, mimi alavuasi a muxali. 18Ioxe, mimi mukalusi ne molu noxou Mosingesi. Xo tei texolu tekalipala ia noxou Kalaisiti la musolixu tu'umaxu anene ka mupitanenge noxou. La vote'i so kalipala ukalu mo tamitema ipita noxou ne, anu mupilixinu noxixe so taxaxaisou. 19Vote'isou ne aloxo 'o. Noxou Kalaisiti la Mosinge muxoxolu so usolixu kalipala anene mo uxalixu vote'i so upitane'i tatemanu lialia ilivu noxou. Ilivu noxou laso anu ukalusou tina'uxa'a so susu avile. La vaikalasou vote'i so kalipala ukalu axone a mupilixinu noxixe 'oe.

20Ioxe, laso Kalaisiti mutulusixe so tasosovosou mo talemolu vaikalaou. Mo no anu xolinexi la anu loxo Mosinge a u'ava'avali'a tamitema. Nexi a tavikalangengi 'o ia nexi uasi, anu loxo Kalaisiti molu uxolu 'o so ukatu noxinge aloxo 'o, “Tu'umaxu ane ukalipalangengi ne ukalui, xo vote'i a uxolu so ngalivu ngapita noxou Mosinge.” 21Xo noxou Kalaisiti la susu vile uasisi. Ia Mosinge muxalixu vote'isinge aloxo 'o. Mupitanu susu noxinge noxou Kalaisiti mo musaxisou lexe anu susu. Mu'oxo axone mo so loxo taxolu noxou la Mosinge usaxisinge lexe nenge tamalemalenga.

Currently Selected:

2 Kolini 5: ATA

Highlight

Compare

Copy