2 Kolini 2

1Laso opoleli lexe no anu ano'o, la ane'e noxinge uasi xo loxo 'o io lailai noxilo masi uxalixu navunavu a loxo ane mala'o. 2Xo ane'i ane so i'avutinoxu osa noxilo, a ngingi nesi. Laso loxo lailai noxilo u'oxonu opongengi tu'umaxu, la ena'ei so u'oxonu opoleli u'osala? 3Laso maixene ekaukavunu lapasisi mune'e noxinge mala'o. Xo e'oxo lexe mamu so ane'e mo axalisou tu'umaxu noxinge ngingi tamosou e ngalavusou ngaxalixu osa noxilosi. Eni elavu manina lexe mi ma'ia uxalixu osa noxilo la anu uxalixu osa noxinge kalumo ane. 4Ia mala'o ekaukavunu lapasi ne la no anu navunavu mo tamasi, mole ieli lexaxu munixi. Alemolu aloxo 'o so u'oxonu opongengi tu'umaxu uasi, alemolu so ngalavu manina no anu sexelasinge u'isalili e uxolu no opoleli 'o.

Pelototo lexe opone'i Takolini ulu'e so susu noxou menexi'a

5Ioxe, anu ane loxo muxalixu tu'umaxu no taingengi la navunavusou uxalisilo uasi. Io', eni amasaxau alemolu vaikala pakia'u no anu mi ne malaxo uasi, ia avikala se lexe navunavusou mi ne a muxalisingesi ne. 6Ia mi e ngingi tavu'alo opongengi vilesisi no anu so ngelovonixu itema ne la umomomo se. 7Xo nge'oxonu mukalui laso anu laixe so ngasukunula uasi. Ngingi masi opongengi ulu'e so susu noxou mo ngamamatolanu xo loxo 'o io oponu tu'umaxu mo umaloxo'u itema ne avile. 8Laso eni akatu noxinge lexe ngingi ngalai ngapala'anixu opongengi noxou lexe ngingi a ngasexelaxusio.

9No anu lapasi e ekaukavunu mune'e noxinge mala'o ne so etovonu opongengisi, lexe ngalomu laixe no anu mimi mukalusi o uasi. 10Ia loxo opongengi ulu'e so susu noxou menexinge aneva, la anu axone kalumo noxilo. Xo susu ma'ia loxo mututulusio la elu'enu opeleli no anusi. Ia mi olele 'oxo taleli uasi, eni exavutalangengisi laso elu'enu opoleli so susu ne no iou Tatananenge. 11E'oxo axone mo so vote'i noxou Uluaou so uua'ulinenge uasisi. Xo nenge ienge selevenuou lolo noxou uasi, anu upalasi noxinge ane.

Polu mukakamulinu Taitusi

12Ioxe, no voxo loxo ene'e ne Toloasi so alanu vaikala laixesou Kalaisiti la Tatananenge mukisinu aitengasilo so exaxai ne. 13Ia opoleli uai se'isisi uasi xo axalisou vivilo Taitusi ne uasi. Laso epilixine'i Tatoloasi xe elutu la ene'e exali ne Masetonia polovinisi 'o.

Ta'aposeli mixalisou su'uli noxou Mosinge

14Ia alemolu laixe noxou Mosinge xo anu upamuxanexi aloxo 'o. Kalaisiti muua'uli no anu oto ka anu u'uli laxunexi 'o. Xe nexi taxixao taa'aloxu laso lavulavusou anu loxo mi tuma'u lailaixe ane sivo utavulenu uxalixu no tuatuala mukalusi. 15Xo nexi 'o, aloxo mi tuma'u lailaixe ane Kalaisiti u'elaxu so lexe noxou Mosinge. U'elaxu la tuma'u upolo ulai no taine'i tamitema ane'i ane so ipamauli xe ane'i ane so imamulo. 16Ia noxi'a ane'i ane so imamulo la anu loxo tuma'u masua manina xo uxalixu mamulosi'a. Xe noxi'a ane'i ane so ipamauli la tuma'u lailaixe xo anu uxalixu pamaulisi'a. Iauo, itema ena'ei umomomo no anu xaixai mutiatila aloxo 'o? 17La nexi loxo tamitema leviani uasi xo ane'i la ilailai so imaketi no anu Mosinge vaikalaousi. Ia nexi 'o takalavoisou uasi xo texalisou xaixai ano'o noxou Mosinge mu'isalili. Laso taxolu noxou Kalaisiti so talanu vaikalaou no iou Mosingesi.

Currently Selected:

2 Kolini 2: ATA

Highlight

Compare

Copy