1 Pita 3

Pelototosi'a tataula'i

1Mo axone kalumo noxinge tasema itaula'i. Ngalu'engengi noxi'a tamulumengi mo so loxo se'i noxi'a ilomuxu vaikalaou Mosinge uasi la xoluxolungenge ulapune'i ane. Xo manina, ngato'ome'a no anu vaikala vile uasi, 2ia loxo imaisou xoluxolungenge mulapusi mo ngataxane'i laixe laso anenesi ulapune'i. 3Mo mamu so opongengi ututuluou lavilasi so vasimenge aloxo tokolomosou kisinge misevile xe lingilingi ilou xapo ane lamolisou tatila musuku xe lavuluti ane so uxalixu isuisu. 4Opongengi ututuluou lavilasi axone uasi, lavilasi noxinge ane laixe so uxolu kalaxu uasi, a mi so tangengisi uasi. Lavilasi anene a so ngaxolu opongengi se'isisi mo lexasi, xo mi anenesi Mosinge usaxisou lexe lailaixe misevile. 5Tatei la tasema ane mipilixinu mauli noxi'a noxou Mosinge ka milopalanu mixomaiou nene'axu vavalima noxou la mi'oxo axonesi. Ane'i mivilasine'i no anu ilixo e so milu'ene'i noxi'a tamului'a. 6Xo Sala milomuxu mulue Apala'amu mo milemolu lexe anu tilasie. Laso loxo ngamulinu ilixo laixe axone mo opongengi kalaua uasi la ngingi loxo ta'ilie u'isalili ane.

7Xe noxinge tamulu kalumo, no anu xoluxolungenge ngoli'a tasemamengi la tangengixa'a laixe mo ngalavu lexe ane'i mamalaxa'asi. Xe ngataxane'i laixe xo ane'i kalumo so ixalisou nene'axu iaiama noxou Mosinge e mauli kaluxu uasi. Mo so axone la mi vile so utanuxu vaikalamengi e so ngalemolu noxou Mosinge uasi.

Loxo tamitema isusunixinge la takolinu no anu alaunasi

8Ioxe, telexu vaikalaxeli aloxo 'o. Ngingi mukalusi ngaxolu opongengi vilesisi mo tangengingenge xe ngasexelangenge ngato'o xo ngingi tavivinge no anu lopalasi ane. Xe nga'oxonu alaunasi'a tamitema mukalusi mo ngalu'engengi noxinge ngato'o. 9Xe loxo tamitema isusunixinge la ngasusunixi'a so ngakoline'i uasi. Xe loxo ivikalasinge masua la ngakoline'i no anu vaikala masua uasi. Ngakoline'i aloxo 'o. Ngalingau su'ulisou xoluxoluxa'a noxou Mosinge, xo mi e mu'avalingexu a so ulosinge xoluxolu laixe. 10Aloxo Mosinge vaikalaou ulemolu lexe, “Loxo itema umasaxau xoluxoluxu laixe mo no anu osasi, la u'apixu levexu no anu vaikala masumasua xe anaxu no anu vaikala kalavoi. 11Xe uxiu tumalouou susu ka u'oxonu ilixo laixesi. Xe xavinu so ukakamulinu vote'i so uxolu se'isisi noxi'a tamitema latala. 12Xo iou Tatananenge la uititii'a tamitema talapu xe sangalou ukisi no anu vaikalai'a ilemolu noxou. Ia noxi'a tamitema so susu la uxililiie'i tosi.”

Alaxu mose'i tatavulenu navunavusou ilixo laixe

13Loxo xavingengiou ili'ilixo laixesi la ena'ei so umasuangengi? 14Ia loxo nga'oxonu ili'ilixo ulapusi kaio ngatavulenu navunavusou la anu mi so nga'osasousi. Mo loxo imolo umengenge la opongengi u'olo'olo mo uauavuti uasi. 15La nga'itinu Kalaisiti no opongengisi lexe anusi Tatanangengi. Mo ngaxolu ngalalaxi utotomu so loxo tamitema imaititiiengixu mi ane tangengi ulopalanu uxomaiou la nga'oxonu latolosou. 16Ia loxo ngakoline'i la ngataxane'i laixe so ngavikala se'isisi noxi'a. Xe nga'oxonu ilixo ulapusi mo so tangengi uai se'isisi mo uto'omengi uasi. Xo loxo nga'oxonu ilixo laixesi so ngamulinu Kalaisiti kaio ipupuiengixu la anu upalasi no ie'i tamitema mole ane'i ane ito'omenge ne itavulenu mailasousi. 17Loxo uxali no anu masaxa noxou Mosinge mo tatavulenu tu'umaxusou ilixo ulapu, la anu mi laixesi. Ia loxo tatavulenu tu'umaxusou susu na'a nengesi la anu laixe to uasi.

Kalaisiti musoli xe mutulula so mupamaulinenge

18Xo tangengi umulinu Kalaisiti kalumo. Anu mulapusi ia muno'u tanixa'a tamitema tamasua. Musoli alaxu vilesisi anesi so ukolinu tina'unenge so susu ka muno'inge tene'e noxou Mosinge. Ane'i tamitema mivau musoli no anu vasimolu ia anu a umamauli no anu xoluxoluxu ulenu. 19La no anu anene anu mulai muvikala lamana noxi'a tamitema ta'ulene'i ane'i ane a ixolu ikakalavusu. 20Ane'i ne tamosou e milomuanu vaikalou Mosinge no voxo loxo Noa muxolu. Xo tatei ne Mosinge umamulone'i palea uasi muxomai'a se'isi no anu tautau ie loxo Noa muxolu mutulusou lasipi. Ia no anu lasipi ne ane'i tavu'alo i'unalai uasi, ane'i e tamitema 8 mososi mixolu so Mosinge mupamauline'i mu'umene'i no tainu lexa tatila. 21La anu axone kalumo ilixo so kelele anu latilovosou pamauli e muxalisinge. Anu mi so uxexenu mi masua no anu vasimenge uasi. Anu vavalima noxou Mosinge lexe nenge taxolu tanenge malemalenga no iou, la tava'u xo anu mutulusou Iesua Kalaisiti no anu soli. 22Xe vaimomo 'o Kalaisiti ne a mu'unalai no tualasou Mosinge mukalu mo a uxoxolu no anu avolu tema noxou Mosinge. Mo ane'i ta'angelo xe ta'ulenu ane xavine'i xe tami ma'ia xavine'i musuku ixolu no laxu xaviou Kalaisiti.

Currently Selected:

1 Pita 3: ATA

Highlight

Copy

Compare