1 Pita 1

1Eni Pita a. Eni aposeliou Iesua Kalaisiti. Akaukavunu lapasi 'o ulai noxinge tamitemaou Mosinge e ngepaxelele ka ngaxolu loxo taasila no anu polovinisi ne Ponitusi xe Xalesia xe Kapatosia xe Esia xe Vitinia. 2Tateimo Mosinge anu Maminge mulavusinge lumamo kaio musosovosinge so Ulenu ukalipalangengi lexe ngingi tanoxou u'isalili. Mo so axone la ngalomuxu vaikalaou Iesua Kalaisiti xe sialuxu e munixi la mu'uingengi so ngexali tamalemalenga no iou Mosinge. Eni amasaxau lexe ngingi ngaxamulinu iaiama ilou xoluxolu lalavulusi noxou avile.

Mi ane talopalanu taxomaiou la tasiauxu uasi

3Nenge'a ta'itinu ualasou Mosinge e Mosou xe Momu Tatananenge Iesua Kalaisiti xo anu mu'alaunasinge misevile aloxo 'o. Anu mutulusou Iesua Kalaisiti no anu soli la no anu vote'i anene muxalixu mauli alavua noxinge. Laso maixene nenge'a talopalanu taxomaiou mauli ane tasiauxula uasi. 4Anu musosovosinge lexe uvelunungenge mimiou lailaixe. Mimiou e so ulosinge ne ulaxa'inumengi laixe no tualasou laso anu umomomo so u'ui o nuni'u o tasiauxu uasi. 5Ngingi ngelopala laso Mosinge u'oxonu latolosinge no anu xaviousi xo mo upalasinoxu pamaulisinge avile no anu kaluxusou voxo.

6Ioxe, loxo ngaxavutalanu mimiou Mosinge so ulosinge ne la mi so osa'ilasi. Ia voxo vaimomo 'o ataxu sesi ngingi masi ngatavulenu navunavusou tu'umaxu iouiou. 7Mi axone uxali so utilovosou lopala noxinge. No anu lavo'o koli la ivaxanu no navu so ikilolou lexe manina axova, xo navu u'elaxu mosomoso no anu uxexesi. Ia koli anu mi so uxolu avile to uasi, lopala noxinge anu mi lailaixe muua'ulixu koli. La Mosinge utilovosou lopala noxinge axone kalumo mo so anu ane maninasou no anusi uxolu. Uxolu avile umomomo no anu voxo so Iesua Kalaisiti upala'a laso anu uvikalasou lopala noxinge laixe mo u'itinu ualasingexu. 8Xo ngingi ngemaisou no iengi lavo'onu uasi ia ngasexelaxusi. Xe ngingi ngamaleisou no anu iengi vaimomo 'o uasi ia ngalopalanusi. Laso ngingi ngaxamulinu osa'ila mutoxoxa'a ane vote'i so ngalulusou uasi. 9Lopala noxinge noxousi laso ngaxalisou nene'axu e pamaulisou ulengengi.

10No anu pamauli ne tapolopeti milemolu lumamo xo mipala'anixu iaiama ane so ngaxalisou noxou Mosinge ne. Xe xavine'i manina so ikakamulinu laxulaxu vaikala so pamauli nesi. 11Xo Ulenu Kalaisiti muxolu nonano noxi'a so mupala'anixu mimi e so uxalisou Kalaisiti ili'i. No anu anaxa'a la mulemolu tu'utu'umaxu ane Kalaisiti mutavulenu xe mupala'anixu lexe ili'i la utavulenu uala u'uli'uli. Tapolopeti milemolu vaikala anene kaio mitatali'i lexe “O, anu itema ena'ei ne, mo uxali no voxo aneva?” 12Ia Mosinge mupela'a lexe vaikala milemolu ne anu so si'a uasi. Pamauli e milemolu ne anu so uxali noxinge a vaimomo 'o. Laso maixene Mosinge mupalusou Ulenu Laixe molu no tualasou mulu'e, xe no anu xavi noxousi la tamitemaou mine'e milanu vaikala laixe noxinge. La ane'i ta'angelo talaixe kalumo imasaxau manina so ilamana no anu mimi ane Mosinge mu'oxonu noxinge ne.

Masaxa noxou Mosinge lexe tamitemaou ixolu malemalengasi

13Laso ngaxolu xavutalamengi ulalaxi aloxo itema ulalaxi so umuamua'i, xe ngalaxa'inu opongengi laixe so uxovulaulau uasi. La ngatulu pumungenge avile so ngalopalanu ngaxomaiou iaiama ane ngaxalisou no voxo loxo Iesua Kalaisiti upala'a. 14Tatei la ngalavu to uasi laso masamasaxa no anu vasimenge mupamuxangengisi. Ia vaimomo 'o la mamu so ngalivuou mimi ne so ukapikapingengila, ngaxolu loxo tamolomolo ane ilomunganiou vaikalaou mami'asi. 15Xo Mosinge e mu'avalinge ne anu malemalengasi laso ngingi kalumo ngaxolu malemalenga no anu ilixomengi mukalusi. 16Aloxo uxolu ukaukavu no anu vaikalaou lexe, “Xoluxolungenge no anu malemalengasi, xo eni a Mosinge 'o, a malemalengasi.”

Mosinge mulotone'i tamitemaou milivu no anu lape tatila musuku

17Ioxe, Mosinge e ngalavusou ngakatunu lexe Maminge, anu utaxane'i tamitema no anu ualauala uasi, anu utilovosinge vilevilesi no anu mi ma'ia ta'oxonu. Laso no anu xoluxolungenge loxo taasila no lialia 'o la ngamuamua'i no anu mama'usi. 18Xo loxo ngelavu, tatei la ngepungengi no anu xoluxolu ngexalisou noxi'a tatiatilasinge. Ia Mosinge muno'u lape ka mupilixinu so mu'umengengi no anu xoluxolu axone. Lape mupilixinu ne anu mi so lialia e ulavusou umasua aloxo siliva o koli 'o uasi. 19Anu mulotonenge no anu mi lailaixe e uua'ulixu lamoli mukalusi, mi e sialuxu Kalaisitisi. Kalaisiti ne anu loxo sipisipi ilie ane vasimolu xalexalevinu o nuni vile no anu uasi. 20Tei manina loxo Mosinge ukoinu lialia uao la musovosou Kalaisiti lumamo no anu xaixai ane so ulotongengi ngalivu noxou. Laso vaimomo 'o no anu kaluxusou voxovoxo 'o la anu mupala'a so usu'ulingengi. 21Musu'ulingengi la ngingi a ngelopala noxou Mosinge e mutulusou Kalaisiti no anu soli kaio mulosou uala ane u'uli'uli. Laso maixene lopala noxinge utulu pumuxu noxou Mosinge mo ngingi a ngalopalanu ngaxomaiou mimi e muvavalimasou.

Laixe so Mosinge ta'olu isexelaxa'a ngato'o

22Ioxe, ngingi ngelomuxu vaikala ane temanu manina la no anu vote'i anene nge'uingengi ngexali tamalemalenga no iou Mosinge. Xe ngingi a ngasexelaxa'a tavivinge Mosinge ta'olu, laso xavingengiou so ngasexelangenge no opongengi manina. 23Xo Mosinge muxalixinge tamitema ta'alavua la mauli noxinge ne so utalo uasi xo tava'u no anu vaikalaou e mauli no anu mo kaluxu uasisi. 24A loxo lavukuou Mosinge ulemolu, “Tamitema no lialia mukalusi maulixa'a ata'ataxu sesi aloxo laxalasi 'osi. Xe ualaualasi'a tasiauxu palea aloxo xixi sesenu 'osi. Xo laxalasi uxolu maxuveni uasi ka uxaloxalosi, xe xixi sesenu ununu paleasi. 25Ia vaikalaou Tatananengesi uxolu avile kaluxusou uasisi.” Vaikalaou nesi a vaikala laixe e mivotongengixu.

Currently Selected:

1 Pita 1: ATA

Highlight

Copy

Compare