1 Kolini 9

Polu uno'u lapesou xaixai noxou no anu Mosinge vaikalaou uasi

1Ioxe, eni aposeli a. Itema vile u'uli laxuleli uasi. Eni melo emaisou Iesua Kalaisiti anu Tatananenge. Emaisou mo anu molu u'uli laxuleli no anu xaixai noxilo mo a muxalixu nene'axu noxinge ne. 2Ane'i mose'i i'oxo lexe eni aposeli uasi. Ia mi vile uasi, xo nene'axu xaixai noxilo a mupala'a noxinge ne. Xo eni e'oxonu xaixai noxilo no taingengi laso xoluxolu alavua noxinge noxou Tatananenge ne, anu loxo sosovo lexe eni aposeli manina.

3Mose'i ilavusou itilovosou ilixo noxilo la eni akoline'i aloxo 'o. 4Ngingi nene'axu xaixai noxixe laso anu laiti uai noxixe so talingau mi ma'ia so ta'ou o taiexu noxinge ane. 5Xe vile aloxo 'o. Loxo nexi tamitema so taxaxai no anu Mosinge vaikalaou tataula'ixa'a Mosinge ta'olu tasema. Tataula'ixa'a xe loxo noxi'a taxixao no anu pitapita ne'ei la anu laixe so tatemanu i'itixa'a la'ilali kalumo. Xo ta'aposeli se'i xe Tatananenge tavimovimou oli'a Pita ilavusou i'oxo axone. 6Ngingi nga'osa so ngasu'uline'i tavivixe no anu xaixai 'o axone. Ia axova, nexi nexisisi noxou Vanavasi taxaxai no avoxe so mexe tano'u la'ilalinexe? Nexisi laiti uasi no anu su'uli noxinge ne? 7Xo loxova? Ami vile loxo ulai no anu oto la molu ukamulinu xou la'ilali? O itema vile utounu xai la uno'u xou temanu sevile uasi? O itema vile usaxila'a tasipisipi la utau susune'i so uie uasi? Uasi to! Ane'i latala ixalisou nene'axu xaixai noxi'a ane. Ia nexi uasi?

8Ia masi nga'oxo lexe vaikala alemolu 'o anu xavutala loxo noxi'a tamitemasi. Ia uasi. No anu lo noxou Mosinge la anu ulemolu kalumo. 9Xo no anu lo Mosisi mukaukavunu la muvikala aloxo 'o, “Loxo ngingi ngaxixaunixi'a takau so imalomaloxo'u uiti mo so sosou uxexe, la ngasakinu anaxa'a uasi. Loxo i'ani sevile la i'anisi.” Mosinge muvikala axone ia vaikala ne so si'a takau uasi. 10Vaikala mukaukavunu ne so singe kalumo. Xo loxo itema umamulonu lia no xai la anu ulopala lexe ili'i la uxalisou nene'axu ane. Mo itema ane uxaxai so uxexenu uiti sosou la axone kalumo. Anu oponu ututulu lexe anu u'ani no anu nene'axu xaixai noxou ne. 11Xe nexi 'o, nexi tetotou kalumo. Ia mi e tetounu ne anu mimi lailaixe so ulengengisi. Laso loxo nexi tano'u su'uli noxinge no anu mi se so vasimenge la anu laixe, anene utiatila uasi. 12Ane'i mose'i ine'e mo ixaxai sevile no taingengi mo nga'apisou mi vile noxi'a uasi. Laso nexi noxou Vanavasi 'o la laiti no anu anene mutiatila xo xaixai noxinge no taingengi mutiatila manina. Anene laiti noxixe ia tano'u su'uli vile noxinge uasi xo te'italonu laiti anene. Te'italonu xo te'oxo lexe masi se'i ivikala lexe, “Uasi, ane'i ixaxai no anu vaikala ne so ixalisou su'uli so vasime'asi.” Mamu so mi vile utanuxu vaikala laixe so Kalaisiti axone.

13Xo loxo ngingi ngelavu. Loxo tamitema isosovosou mimi se'i lexe noxou Mosinge ka ine'enu no tasou, la ane'i tamitema so xaixai ne i'ani no anu kalumo. Xe ane'i ane ixaxai no tanixu navu la ane'i i'ou misoposi pa'usou ane i'elaxu. Anu laixe, Mosinge molu muvikala axone. 14Mo axone kalumo Tatananenge molu muvikala lexe ane'i ane ixaxai so ilanu vaikalasou laixe la ino'u su'uli so vasime'a noxi'a ane'i ane ilomusou vaikala ne. 15Tatananenge muvikala axone ia eni melo ano'u su'uli vile axone uasi. Mo vaikala akaukavunu 'o anu so ano'u su'uli noxinge uasi, anene laxu uasi manina. Eni loxo asolixo ulai ulai avile no anu soli la umomomo so ano'u su'uli noxinge uasi. A'apixo no anu su'uli noxinge xo loxo 'o io vaikalaxeli alemolu utotomu lexe axalisou nene'axu xaixai noxilo uasi ne, masi ulapau vitanisi. 16Opoleli ututulu so alanu Mosinge vaikalaousi. Ia no anu anene la a'itileli uasi. Xo eni melo la vote'i so atalo uasi. Loxo alanu vaikala laixe so Tatananenge uasi la tu'umaxu manina noxilo. 17Loxo eni melo a'oxonu no anu masaxa na'a xeli la masi ngalosilo lapesou. Ia uasi, eni melo ailounu xaixai ano'o uasi. Tatananenge molu mupilixinu noxilo so alanu vaikalasou laixe 'o. 18Laso eni a'osasou lapesou xaixai noxilo kaini axovao? Aloxo 'o. Loxo eni alanu vaikala laixe so Kalaisiti mo alingau lakolisou uasi la eni a'osasou ane. Loxo eni apilixinu laiti noxilo axone la anene loxo lapexelisi.

Polu muvikala lexe anu itema so xaixai vitanisi noxi'a tamitema latala

19Ioxe anu manina, evile u'uli laxuleli no anu xaixai noxilo uasi. Ia eni melo elu'eleli mo so exali loxo itema silevi noxi'a tamitema latala. E'oxo axone so alapune'i tamitema tavu'alo ine'e noxou Kalaisiti. 20Laso loxo axolu noxi'a Taiuta la eni amulinu ilixo noxi'a Taiutasi so alapune'i ine'e noxou. Mo eni, la alavu lexe lo usu'asilola uasi. Ia loxo axolu noxi'a ane'i ane ixolu loxo no laxu losio, la eni kalumo axolu axone mo so alapune'i. 21Mo loxo axolu noxi'a tamitema ane ilavusou lo uasi, la eni amulinu xoluxolu noxi'a kalumo. Ia so axolaxola'u lo noxou Mosinge uasi, eni amulinu lo noxou Kalaisitisi. Axolu axone mo so alapune'i ane'i ane ilavusou lo uasi ine'e noxou Kalaisiti kalumo. 22Xe loxo tamitema tane'i mamalaxu so itilovo laixe uasi la eni xoluxoluxo no taine'i axone kalumo. A'oxo axone so alapune'i mo asu'uline'i no anu vaikalaou Kalaisiti kalumo. Laso ane. Loxo axolu no taine'i tamitema kaini axova la xoluxoluxo loxo ane'isi. Xo eni akakamulinu vote'i so alapune'i tamitema latala so ane'i ine'e ixalisou pamauli. 23Opoleli ututulu so alanu vaikala laixe so Kalaisiti axone, mo so nenge nenge'a mukalusi taxalisou vaikala ne nene'axu lailaixe.

Latilovo so tamitema ane opone'i ututulu so isipoti

24A'oxonu latilovo aloxo 'o. Loxo ngingi ngalavu, ane'i loxo iiave no anu lesisi la itema vilesisi uuini mo uno'u palaisisou. Laso maixene ane'i iiave isoa e isoa ne. Ioxe, loxo nenge, la tasoa no anu xaixai noxou Tatananenge axone. 25Xe noxi'a tamitema so isipoti la opone'i ututulu so iuinisi laso i'oxonu mi vile no anu vasime'a vuluvulusi uasi. No anu xoluxolu noxi'a la i'isalilinoxu masaxa mukalusi no anu mi vilesisi e so ino'u palaisi olele. Ia anu palaisi ne uai ka u'uisi. Ia loxo palaisi ane so nenge tano'u la u'ui uasi, uxolu avilesi. 26Laso noxilo, la iavexo axone. Aiave vuluvulusi uasi, aiave alovo no anu lamakisi. Xe no anu latilovo vile so isipoti ne, la ane'i i'oto so lexe ena'ei uuini no anu. La eni axone kalumo, ia loxo asu'anu avolo vitavitanisi uasi, a'isalilinoxu laixe. 27Xe asolonu latilovo ne aloxo 'o. Loxo ane'i, la i'oto so iua'ulixu menexi'a. Ia eni 'o, la atovonu so aua'ulixu masamasaxa no anu vasimelo mo so u'uli laxuleli uasi. Xo loxo a'oxo axone uasi la masi alanu vaikala laixe noxi'a tamitema latala ia Tatananenge utilovosilo mo uxexeleli no anu xaixai noxou ne.

Currently Selected:

1 Kolini 9: ATA

Highlight

Compare

Copy