1 Kolini 5

Susu vile mutoxoxa'a muxolu no taine'i Takolini

1Ioxe, a'alo muxali noxilo lexe ilixo vile nuni'u a uxolu no taingengi ne. Mivikalaleli lexe itema vile muno'e momu semau mo uxoxolu noxie. Aloxova? Ilixo nuni'u ne tamitema so isivoxo itavunu ane, ia ngingi to uasi. 2Mo axova so ngingi nga'itingengi lexe ngingi tamitema talaixe ne? Anu laixe loxo opongengi tu'umaxuou mo ngatatamasou mi ne. Mo kalumo, la ngakusaou itema e mu'oxonu ilixo ne so uxolu no taingengi uasi.

3Manina, eni axolu nopaxa noxinge ia opoleli a uxoxolu noxinge ne. Anu iou vilesisi loxo axolu no taingengi ne. Mo etilovosou ilixou itema ne mukalu. 4Laso no anu ualasou Tatananenge Iesua la avikalangengi lexe ta'oxo aloxo 'o. Ngingi ngamitingi mo xavingengi no anu ualasou Tatananenge Iesua a loxo eni melo axolu no mitingi ne. 5Opoleli aloxo 'o. Ngapilixinu itema ne no avolu Uluaou so loxo no anu xoluxolu so vasimolu la uxalisou mamulo. Vasimolu uxalisou mamulo axone ia itema ne ulenusi uxalisou pamauli no voxosou Tatananenge Iesua.

Latilovosou isiti

6Tavivilo, ngingi ngalavusou nga'itingengi to. Anene laixe uasi. A'oxo latilovo aloxo 'o. Loxo pileti la'oluxu, la isiti utuxu sesi u'oxonu usoxo. Xe susu axone kalumo. Loxo iengi si'isou susu sevile no taingengi la anu usuku usuku xo la usu'asinge mukalusi ane. 7Laso ngaxexenu isiti teinu e susu no taingengi mo so usu'asou muamua'i noxingela uasi. Ngamuamua'i no anu xoluxolu alavua mo laixe ane ngexalisou mukalu. Anu manina, xoluxolungenge alavua ne a loxo pileti ane isisitisou uasi. Xo Kalaisiti mupilixinu maulixu singe so ngaxalisou xoluxolu malemalenga ne mukalu. Anu loxo tasipisipi ane Taiuta ilavusou ive'a so isosovosou lavilelu so Mualasi'a. 8Kalaisiti musolisinge mukalu, laso no anu muamua'inenge anu loxo taxolu no anu lavilelu na'a nenge so tasosovosou. Ioxe, no anu lavilelu so Mualasi'a la Taiuta ilavusou i'oxo aloxo 'o. Ane'i ixexenu isiti teinu no tasi'a mo i'ou pileti ane isitisou uasi. Laso no anu muamua'i noxinge la taxexenu isiti teinu e susu ilou ilixo masua. Taxexenu anene, la tano'u ilixo ane manina mo ulapusi a loxo pileti ane isitisou uasi.

9Ioxe, no anu lapasixeli ekaukavunu noxinge mala'o la epela'inge lexe mamu so ngingi ngapita noxi'a tamitema so ilixo nuni'u. 10Evikala ia laxu lexe ngingi ngalipalangengi noxi'a tamitema no lialia avile uasi. Loxo tamitema so i'oxo ilixo nuni'u o i'isu'isu o ipakali o i'itinu momosi'a kalavoi. Ai loxo ngakalipalangengi avile noxi'a tamitema axone la vote'i uasisi, ngaxexesou lialia avile. Uasi to, anene vaikalaxeli laxu uasi. 11Ekaukavu mulai noxinge ne so evikalasi'a ane'i ane ngamoxo'a lexe tavivinge no anu lopala ia loxo opone'i ututuluou ilixo aloxo 'o. Opone'i ututulou ilixo nuni'u o isu'isu o so i'itinu momosi'a kalavoi o isu'asu'anu anaxa'a o utotomu isipaki o ipakali. Tamitema axone la mamu so ngoli'a ngapitapita o so ngaxolu nga'ani uasi. 12Loxo elemolu. Vaikalaxeli ne so si'a tamitema noale no anu pita noxou Tatananenge uasi. Xo axova, anu xaixai noxilo so atilovosi'a? Uasi to! Ia ane'i tatemanu pita noxou Tatananenge la axova so ngingi ngatilovosi'a uasi? 13Ane'i ane noale ne Mosinge molu utilovosi'a. Ia loxo Mosinge vaikalaou ulemolu lexe, “Itema masua no taingengi la ngingi menge ngakusaou uxolu va'axu noxinge.”

Currently Selected:

1 Kolini 5: ATA

Highlight

Compare

Copy