रोमी 5
5
स्य़िहदे दाङ सेम काहसो
1ओ़ह सोङबे ओहराङ यिह-छ्य़े लाहमले किन्ज्योकी दिनला टाहङबु सी़ह ख़ूसीन। ओहले ओहराङकी चो़वो येशू मास्यीका लाहमले ओहराङ किन्ज्यो ङ्याम्बु थिन ख़ूसीन। 2चो़वो येशूगी ओहराङला तेहपा लाहमले किन्ज्योकी काटीनला नोम फेप नाङदी येह। ताहन्दा ओहराङ ओ़ह काटीनलाॱराङ लाहङदी येहबा। ओहले किन्ज्योगी ज़िज्यिद छ्यिम्बु नोम्गेमु ओहराङॱआङ मिहरो ङ्याम्बुराङ ओहङज्ये येह माएँ रेहवाला क़ेहनाङ पेहकें। 3ओहजे च्यी़राङ मिहम्बा, तुहक्पुकी ती़हजीॱलाङ ओहराङ क़ेहनाङ पेहकें च्यिबेमाना तुहक्पुगी ओहराङला ना़ ख़ूएँकी ओङ तेर्के, 4तुहक्पु ना़ ख़ूएँ ओङगी ओहराङगी पेहताङया़ला या़हबु ज़ोएँ, ओहले या़हबु पेहताङगी ओहराङला रेहवा क्ये च्य़ूगे। 5रेहवागी ओहराङला सेम स्यि मी़हच्युएँ, च्यिबेमाना किन्ज्योगी ओहराङला नाम्पार-ताहक्पा थु नाङदी येह ओहले ओ़ह नाम्पार-ताहक्पा थुगी ओहराङगी यिहला किन्ज्योकी चेवा ज़्या़ नाङदी येह।
6च्यिबेमाना ओहराङ मा-फाम्बु येहकेमुराङ मास्यीका तिहक्च्येम्बाया़गी तेहन्दाला ठाबे ती़हजीला टोहङ नाङसीन। 7मिह टाहङबुगी तेहन्दाला स्यिज्येलाॱआङ ठाबे ओहङगे मिह ज्योर्च्येलानी का़हबुॱराङ ओहङडो, ओहले ज्यिबुराङ या़हबु मिह येहसीमाना खोगी तेहन्दाला सुज्यी स्यिज्येलाॱआङ स्युक पेह ओहङ। 8यिहॱनाङ किन्ज्योगी राहङगी चेवा ओहराङला दि ल़ेहमु जेती तेन नाङसीन, ओहराङ तिहक्च्येम्बा येहकेमुराङ मास्यीका ओहराङगी तेहन्दाला टोहङ नाङसीन। 9दि ल़ेहमु पेहती मास्यीकाकी ठा़ लाहमले ओहराङला किन्ज्योकी दिनला टाहङबु सी़ह च्यु नाङसीन मानानी ता़ह तोहरोङ मिहरोगी ओहराङला किन्ज्योगी थुयाल यिहन्ज्यु थार च्य़ू नाङज्ये येह। 10च्यिबेमाना ओहराङ किन्ज्योगी टाह येहकेमुराङ मिहरोगी स़ेबु ओहराङगी तेहन्दाला टोहङ नाङसीन ओहले मास्यीकाकी स्यिवा लाहमले किन्ज्योगी ओहराङला राहङदीराङ रो़ह ज़ो नाङदी येह मासीमाना, ता़ह ओहराङ तोहरोङ माहङबु किन्ज्यो ङ्याम्बुराङ डी़क्यो सोङबे मास्यीकाकी मिहली लाहमले किन्ज्योगी ओहराङला थार च्य़ू नाङज्ये येह। 11ओहजेच्यीराङ मिहम्बा, यिहॱनाङ ओहराङ चो़वो येशू मास्यीकागी पेहती ओहराङ किन्ज्योला त़ेरा तेच्या फुल्गेराङ काहसो पेहकें च्यिबेमाना मास्यीकागी ओहराङला किन्ज्यो ङ्याम्बु डी़ च्यु नाङदी राहङदी रो़ह ज़ो नाङदी येह।
आदम दाङ मास्यीका
12मेहन्दा च्यी़ लाहमले जाम्बुलीङला तिहक्पा ओहङसीन, ओहले तिहक्पा लाहमले स्यिवा। दि ल़ेहमु पेहती मिह थाम्ज्यीगी तिहक्पा पेहक्यो सोङबे मिह थाम्ज्यीला स्यिवा फेल्सीन।#उत ३:६ 13छ्य़े-ठिम नाङगे म़ेदी तोहङलेॱआङ जाम्बुलीङला तिहक्पा येहकें, यिहॱनाङ का़हला छ्य़े-ठिम मेहयोहङगे, ओ़हला तिहक्पाकी टाहङजीॱआङ मेहयोहङगे। 14आदम यिहन्ज्यु छुर-ताप मोशा थुगी मिहया़लाॱआङ स्यिवागी ओङ छ्य़ेसीन, ओहले आदमगी ल़ेहमु तिहक्पा माहबेबा मिहया़लाॱआङ स्यिवाकी ओङ छ्य़ेसीन। ओ़ह आदमदी तिङला फेप नाङगे मास्यीकाकी ताक्छेन यिहन्गे।
15यिहॱनाङ किन्ज्योगी आहन्डाराङ नाङग्यो काबाप दाङ आदमकी तिहक्पाला माहङबुराङ ख्येपार येहबा। च्यिबेमाना मेहन्दा च्यी़गी पेहक्यो तिहक्पागी पेहती मिह माहङबुराङ स्यिसीन मानानी तोहरोङ माहङबु किन्ज्योगी काटीन दाङ मेहन्दा च्यी़, पे यिहॱना़: येशू मास्यीका लाहमले आहन्डाराङ ओहङग्यो काबाप, मिह माहङबुराङगी तेहन्दाला बोल्बु काहल्सीन। 16येहपाराङ, किन्ज्योगी आहन्डाराङ नाङगेन्गी काबाप मेहन्दा च्यी़गी पेहक्यो तिहक्पाकी नामीन ल़ेहमु मिहम्बा। च्यिबेमाना आदमगी पेहक्यो तिहक्पा च्यी़गी पेहती मिह थाम्ज्यी तिहक्च्येम्बा काहल्सीन ओहले खुङला ङ्य़ेहबा फो़गे काहल्सीन। यिहॱनाङ मिहया़गी माहङबुराङ तिहक्पा पेहॱनाङ किन्ज्योगी आहन्डाराङ नाङग्यो काबाप लाहमले खुङया़ टाहङबु सी़ह ख़ूसीन। 17मेहन्दा च्यी़गी तिहक्पागी पेहती स्यिवागी मिह थाम्ज्यी थो़ला ओङ छ्य़ेसीन। ओ़हठीॱराङ पेहती किन्ज्योगी बोल्बु जेती आहन्डाराङ नाङग्यो काटीन दाङ टाहङदेन ज्योर्केया़गी च्यिमे च्यी़राङ मिह, येशू मास्यीका लाहमले तिहक्पा दाङ स्यिवाला दुल्दी था़ म़ेहबा मिहली थो़ला ओङ छ्य़ेज्ये येह।
18ओ़ह सोङबे मिह च्यी़गी तिहक्पागी पेहती मिह थाम्ज्यीला ङ्य़ेहबा फो़गे काहल्सीन, ओ़हठीॱराङ पेहती च्यिमे च्यी़राङ मिहगी ल़ेह टाहङबु पेहती मिह थाम्ज्यी किन्ज्योगी दिनला टाहङबु सी़हदी मिहली ज्योर्के काहल्सीन। 19च्यिबेमाना आदम मेहन्दा च्यी़गी किन्ज्योगी का माहङ्यीहम्बा सोङबे मिह थाम्ज्यीराङ तिहक्च्येम्बा काहल्सीन, ओ़हठीॱराङ पेहती मास्यीका मेहन्दा च्यी़गी किन्ज्योगी का ची़क्यो सोङबे मिह माहङबुराङ किन्ज्योकी दिनला टाहङबु सी़ह ख़ूसीन।
20छ्य़े-ठिम ओहङ फान्ज्यो तिहक्पाॱआङ माहङबु काहल्सीन, यिहॱनाङ तिहक्पा ङ्याम्बुराङ किन्ज्योगी काटीनॱआङ तोहरोङ माहङरो माहङरो काहल्सीन। 21ओ़ह ती़हजीला तिहक्पागी स्यिवा लाहमले मिहया़ थो़ला ओङ छ्य़ेक्यो ल़ेहमु ताहन्दा किन्ज्योकी काटीनगी ओङ छ्ये़गेॱराङ येहबा। दि काटीनगी पेहतीराङ ओहराङला किन्ज्योगी दिनला टाहङबु सी़ह च्य़ू नाङसीन ओहले ओहराङ चो़वो येशू मास्यीका लाहमले ओहराङला था़ म़ेहबा मिहली ज्योर्ती येहबा।
Currently Selected:
रोमी 5: HYLM
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
