रोमी 14
14
राहङ आदा-नो़ह दाङ आज्यी-नुहमुया़ला फातुर मा़हचु
1यिह-छ्य़ेला सान्दी माहकाहल्बा मिहया़ला लोक पेहतोङ, यिहॱनाङ खोती नोम्साङला फातुर च़ूदी ठुक्पा क्याहप्केन्गी ल़ेहती माहबे।#कल २:१६ 2लाहलागी ना थाम्ज्यी साहज्ये ओहङगे म़ेदी सेमला ने़गे, यिहॱनाङ तेहपाला मा-फाम्बु येहकेनया़गीदी स्या मिहम्बा छ़ेमाया़ च्यी़राङ साहएँ। 3ना थाम्ज्यी साहएँ मिहगी छे़मा च्यी़राङ साहएँ मिहला फातुर च़ूज्ये मेहयोहङगे। ओ़हठीॱराङ पेहती छे़मा च्यी़राङ साहएँदीगीॱआङ ना थाम्ज्यी साहएँ मिहला फातुर च़ूज्ये मेहयोहङगे। च्यिबेमाना खोला किन्ज्योगी लोक जे-नाङदी येह। 4लेहमेनकी योक्पुला ठिम ताङगे ख्ये सु यिहम्बा ले? ओ़हनी ताहक्पुगी गा खोगी ल़ेह या़हबु पेहक्यो यिहम्बानी चोक्पा पेहक्यो यिहम्बा म़ेदी ज़ी़ नाङगे। ओहले खोगी या़हबु ल़ेह पेह ख़ूएँ च्यिबेमाना चो़वोगीॱराङ खोला या़हबु ल़ेह पेहच्ये ज़ो नाङ थुप्कें।
5लाहला मिहगी ङ्यिहमा च्यी़ म़ेदी लेहमेन ङ्यिहमा चा़ छ्यिम्बु यिहन म़ेदी माएँ यिहॱनाङ लाहलागी ङ्यिहमा थाम्ज्यी च्यी़राङ यिहन म़ेदी माएँ। मिह थाम्ज्यीगी राहङ-राहङगी सेमगी तेहम्बा-तेहन्सुम पेहक्यो ल़ेहमुराङ थिउ-निउ पेह कोहएँ। 6लाहला ङ्यिहमा चा़ छ्यिम्बु यिहन म़ेदी ची़गे मिहगी चो़वोला ची़नाङ पेहती खोगी ची़क्यो यिहम्बा। ओहले ना थाम्ज्यी साहएँ मिहगी चो़वोगी तेहन्दालाराङ साहक्यो यिहम्बा च्यिबेमाना खोगी किन्ज्योला थुज्यी-छ्ये़ फुल्दी साहएँ। ओहले मेहसाहएँ मिहगीॱआङ किन्ज्योला ची़नाङ पेहती मेहसाहएँ ओहले खोगी किन्ज्योला थुज्यी फुल्गे। 7ओहराङ सुॱआङ राहङगी तेहन्दाला मेहथार्कें ओहले सुॱआङ राहङगी तेहन्दाला मिहस्यीएँ। 8का़हलेॱआङ ओहराङ थार्के मासीमाना चो़वोकी तेहन्दालाराङ थार्के ओहले स्यिएँ मासीमानाॱआङ चो़वोकी तेहन्दालाराङ स्यिएँ। ओ़ह सोङबे ओहराङ थार्नाॱआङ, स्यिॱना़ङ ओहराङ चो़वोदीॱराङ यिहन। 9दिगी तेहन्दालाराङ मास्यीका टोहङ नाङसीन ओहले येहपाराङ सोम्बो ज़्याङ नाङसीन ओ़ह सोङबे मिहरो स्यिक्योया़ दाङ सोम्बोया़ ङ्यिकाराङकी चो़वो यिहम्बा। 10ओ़हठी यिहन्सीमाना ख्ये रेबेॱराङ से़हया़ साहएँया़गी छे़मा च्यी़राङ साहएँगी आदा-नो़हला च्यिबे फातुर च़ूगे? ओहले ख्ये छे़मा च्यी़राङ साहएँगी रेबेॱराङ स़ेह साहएँदीला च्यिबे फेमा थोङगे? च्यिबेमाना ओहराङ थाम्ज्यी किन्ज्योकी ठिम-खाङकी दिनला लाहङ कोहच्ये येह।#२ कोर ५:१० 11च्यिबेमाना छ्य़ेला दि ल़ेहमु प्री़हदी येहबा,
“चो़वोगी सुङ नाङगे,
‘ङाह सोम्बो येह,
मिह थाम्ज्यी ङाहती दिनला पी़मु च़ूज्ये येह,
ओहले थाम्ज्यीगी ङाहला किन्ज्यो म़ेदी त़ेरा तेच्या फुल्ज्ये येह’।”#यशै ४५:२३
12ओ़ह सोङबे ओहराङ थाम्ज्यीगी राहङ-राहङगी चिदुङ किन्ज्योला च्याल कोहएँ।
सुॱलाङ किन्ज्योलेगी तेहपा लो़ह मा़हच्यु
13ओ़ह सोङबे ता़ह यिहन्ज्यु ओहराङ च्यी़गी च्यी़ला फातुर मा़हचु तोहरोङ ओहराङ राहङ नो़हया़ला नार्तो क्याहप्कें दाङ तिहक्पाला छ्यिच्युगेन्की तामया़ माज्ये म़ेह म़ेदी सेमला तेहम्बा-तेहन्सुम पेह कोहएँ। 14चो़वो येशूला ङाहगी यिह छ्य़ेक्यो सोङबे दि केच्या ङाहला या़हबु पेहती क्यी़ह येह, का़हन्दीॱआङ साहएँ से़हया़ मेहचाङा म़ेह। यिहॱनाङ सुगी ओ़हदी मेहचाङा येह म़ेदी ने़गे, खोगी तेहन्दाला ओ़ह मेहचाङा डोएँ। 15का़हलेॱआङ ख्येगी साहक्यो से़हगी पेहती ख्येती नो़ह नार्तो क्याहप्सीन माना ख्येगी खोला निङज्यी पेहक्यो मिहम्बा। खोगी तेहन्दालाॱआङ मास्यीका टोहङ नाङग्यो यिहम्बा ओ़ह सोङबे ख्येगी साहक्यो से़हया़गी पेहती खो तोङदी माहन्डोज्यु। 16ओ़ह सोङबे ख्येगी पेहक्यो ल़ेह या़हबुला लेहमेनगी चोक्पा म़ेदी मा माहङ्युहङज्यु। 17च्यिबेमाना किन्ज्योगी क्याहल्सी माक्योदी साहज्ये दाङ थुङज्ये च्यी़राङ मिहम्बा, यिहॱनाङ नाम्पार-ताहक्पा थुला टाहङदेन, स्य़िहदे दाङ काहसो यिहम्बा। 18दि ल़ेहमु छ्याप्स्यी पेहती मास्यीकाला स्याहप्तो स्युहएँया़गी किन्ज्योकी थु काहसो ज़ोएँ ओहले मिहया़गी तालुलाॱआङ खुङ या़हबु सी़हगे।
19ओ़ह सोङबे ओहराङ स्य़िहदे तेर्के दाङ किन्ज्योला यिह-छ्य़ेला च्यी़गी च्यी़ला स्युक तेर्केन ल़ेहया़ला च्यी़राङ सेम च्याङ कोहएँ। 20साहएँ से़हया़गी पेहती किन्ज्योकी छ्या़लेला माहनोङ। थाम्ज्यी साहएँ से़हया़ साहज्ये ओहङगे यिहॱनाङ राहङगी साहक्यो से़हगी पेहती लेहमेनला ऩे क्याल्सीमानाती ओ़ह या़हबु मिहम्बा। 21यिहन्ज्ये नि स्या दाङ ज़िगे से़हया़ मिहथुङगेन्दीॱराङ या़हस्यो यिहम्बा दि लाहमले ख्येगी नो़ह साला नार्तो क्याहप्ती रिहल ख़ूएँ। ओहले दि ल़ेहमुराङ लेहमेनॱआङ माहङबुराङ से़हया़ येहबा ओ़ह ख्येगी मेहबेकेन्दीॱराङ या़हबु यिहम्बा। 22ओ़ह सोङबे ख्ये ङ्याम्बु येहकेन्दी तेहपा किन्ज्यो दाङ ख्येगी पाहरक्यीला ज़्या़दोङ। ओ़ह मिह काहजे सोनाम-साक्पु! का़हन्दीगी राहङगी ठाबे दाङ या़हबु ने़क्यो से़हया़गी पेहती राहङगी राहङला क्येन ता़ मेहकोहएँ। 23यिहॱनाङ सुज्यीगी थेचुम पेहती च्यिरा साहसीन माना खो ङ्य़ेहबा फो़ज्ये सी़हगे, च्यिबेमाना खोगी तेहपागी साहक्यो मिहम्बा। तेहपा माहबेबा पेहती ओहङग्योकी ना थाम्ज्यीराङ से़हया़ तिहक्पाराङ यिहम्बा।
Currently Selected:
रोमी 14: HYLM
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
