रोमी 1
1
टास्यी-देले
1दि यिहगी ङाह पावलगी प्रुहक्यो यिहम्बा। ङाह मास्यीका येशूगी योक्पु यिहम्बा। मिहरोगीॱराङ ङाहला ल़ेह-पेन ज़ो़-नाङज्येला क़े क्याहप नाङसीन ओहले किन्ज्योकी या़हबु लेहङगु स्येच्येला खा फे़ नाङसीन। 2ओ़ह या़हबु लेहङगु किन्ज्योगी लोह माहङबु तोहङले राहङगी लुहङतेम्बाया़ लाहमले नाम्पार-ताहक्पा सुङरापला ताहम्ज्या ज़्या़ नाङग्यो येहकें।
3ओ़ह या़हबु लेहङगुदी किन्ज्योगी स़ेबु ओहराङ चो़वो येशू मास्यीकाकी तेहन्दाला यिहम्बा। ओहले मिहरो मिहगी मिहली नोम्दी क्याहल्बु दाऊदगी क्यिहला ठुङ नाङसीन। 4ओहराङ चो़वो येशू मास्यीका किन्ज्योकी स़ेबु यिहन म़ेदी नाम्पार-ताहक्पा थुगी ओङ लाहमले सोम्बो ज़्याङदी तेन नाङसीन। 5मास्यीका लाहमले किन्ज्योगी ङ्यिहला काटीन दाङ ल़ेह-पेनगी छ्या़ले नाङसीन। लेहमेन क्यिहपागी मिह थाम्ज्यीगी तेहपा पेहती मिहरोगी सुङ नाङग्योकी स्याहल ङ्यिहन्ज्यु म़ेदी मिहरोगी तेहन्दाला किन्ज्योगी छ्या़लेला कुल नाङसीन। 6ख्याया़ॱआङ खुङ ङ्याम्बुराङ येशू मास्यीकाकी मिहया़ ओहङज्येला क़े क्याहप नाङदी येह।
7रोम क्याहसाला तेहकेन किन्ज्योगी च्याहम्बु ङ्येन्जेन-ङ्येहवाया़ थाम्ज्यीला ङाह दि यिहगी प्रुहएँॱराङ येहबा, किन्ज्योगी ख्या थाम्ज्यीला च्याहम्बा जेती मिहरोकी नाम्पार-ताहक्पा छार्क्यीन ज़ो नाङज्येला क़े क्याहप नाङदी येह, किन्ज्यो ओहराङगी याहप दाङ चो़वो येशू मास्यीकागी ख्या थाम्ज्यीला काटीन दाङ स्य़िहदे नाङज्यु।
पावल रोम क्याहसाला डोज्ये सेम पेहक्यो
8थाम्ज्यी म़ेदी तोहङस्यो, ङाह ख्या थाम्ज्यीगी तेहन्दाला येशू मास्यीका लाहमले ङाहती किन्ज्योला थुज्यी-छ्ये़ फुल्गे, च्यिबेमाना लुहङबा थाम्ज्यीगी ख्यागी तेहपाकी तेहन्दाला थ़े सिहन्दी येह। 9ङाह सेम तिहङ यिहन्ज्युराङ किन्ज्योकी स़ेबुकी या़हबु लेहङगुया़ स्येती किन्ज्योला स्याहप्तो स्युहएँ। ओहले ङाहती सोल्वाङला ख्याॱलाङ नाहम्माॱनाङ टेहम्बा साल्देॱराङ येह, दिगी पाङबु किन्ज्यो ज़्य़ू नाङदी येह। 10किन्ज्योकी थुला ठुङदी येहसीमाना ङाह ला़ खाएँ थु ख्यासाला ओहङ ख़ूज्यु म़ेदी ङाह किन्ज्योला ओहर-छ्य़े स्युहएँराङ येहबा। 11च्यिबेमाना ख्याया़ला मास्यीकाला स्युक छ्यिम्बु ज़ोज्येला यिहक्तेन काबाप कोह ख़ूज्यु म़ेदी ङाहला ख्या ङ्याम्बु ज्यिबुराङ थू़ज्ये सेम क्ये़दी येहबा। 12दि ल़ेहमु पेहती ख्या दाङ ङाहती यिह-छ्य़ेगी ओहराङ नाहङदुङ च्यी़गी च्यी़ला स्युक तेर ख़ूज्यु माएँदी ङाहती सेम्बा यिहम्बा।
13ए आदा-नो़हया़ दाङ आज्यी-नुहमुया़, ख्याया़ला क्यी़ह ओहङज्यु माएँ ङाहती सेम्बा येहबा: लेहमा माहङबुराङ ङाहगी ख्याया़ला थू़ज्ये सेम पेहसीन यिहॱनाङ च्यि च्यि ल़ेहया़गी पेहती ङाह ख्याया़ला थु ओहङ मा़हखु। लेहमेन क्यिहपाकी मिहया़गी पाहरक्यीले ल़ेहमु ख्याया़गी पाहरक्यीलेॱआङ किन्ज्योला क्याप्केन मिहया़ थेन्ग्यो थोङ ङ्युहङज्यु माएँ ङाहती सेम्बा येहबा।#ल़ेह १९:२१ 14च्यिबेमाना ग्रीक क्यिहपा यिहॱना़ यिहन, ग्रीक म़ेदी लेहमेन क्यिहपा यिहॱना़ यिहन, ख्येम्बा-ताहक्पु यिहॱना़ यिहन, उल्दुम्बा यिहॱना़ यिहन खुङ थाम्ज्यीला या़हबु लेहङगु स्येच्येला ङाहला ठाल फो़दी येह। 15ओ़ह सोङबे ख्ये रोम क्याहसाला तेहकेन्गी मिहया़ला या़हबु लेहङगु स्येच्येला ङाहला ज्यिबुराङ सेम क्ये़दी येहबा।
या़हबु लेहङगुकी ओङ
16या़हबु लेहङगु स्येच्येला ङाह ङोह मेहछाएँ। च्यिबेमाना यिह-छ्य़े मिह थाम्ज्यीगी तेहन्दाला, दि थार्पा तेर्केन्गी किन्ज्योकी ओङ यिहम्बा, तोहङस्यो यहूदी क्यिहपाया़की तेहन्दाला ओहले लेहमेन क्यिहपाया़गी तेहन्दालाॱआङ।#मर्क ८:३८ 17च्यिबेमाना ओहराङला किन्ज्योगी राहङगी दिनला काह-ठि पेहती ठाबे सी़ह च्यु नाङगे माएँ ताम या़हबु लेहङगुगी तेन्गे। ओहले दिदी ओहराङगी छ़ूगे यिहन्ज्यु तिङ थु तेहपा लाहमले च्यी़राङ ज्योर ख़ूएँ। छ्य़ेला दि ल़ेहमु प्री़हदी येहबा, “मिह टाहङबु तेहपा लाहमलेॱराङ थार्च्ये येह।”#हब २:४
तिहक्च्येम्बा मिहया़ थो़ला किन्ज्योकी थुयाल
18स्यिहङगामले माहर किन्ज्योकी थुयाल मिहया़की तिहक्पा दाङ ल़ेह ङ्येहम्बाया़ थो़ला बाप्ती येह। ओ़ह मिहया़गी राहङगी पेहक्योगी ल़ेह ङ्येहम्बाया़गी पेहतीराङ तेहन्दामला नेम ज़्या़दी येहबा। 19किन्ज्योकी तेहन्दाला स्य़े ख़ूएँगी तामया़ खुङया़गी मी़ दिनलाराङ येहबा च्यिबेमाना किन्ज्योगी खुङला ओ़ह से़हया़ तेन नाङ सिहन्दी येह। 20किन्ज्योगी जाम्बुलीङ छ्या़गे यिहन्ज्यु, मिहरोगी ज़ो नाङग्योकी ना थाम्ज्यी से़हया़ला मिहरोदी थोङॱराङ मी़हखुएँगी नाहम्स्यी किन्दु लिहकेन्गी ओङ दाङ तेहन्दामला खुङया़गी या़हबु पेहती थोङ ख़ूएँ ओहले ङोह स्य़े ख़ूएँ। ओ़ह सोङबे खुङया़ला तेलेन पेहकेन्की ग्या़ॱराङ म़ेह। 21च्यिबेमाना खुङया़गी किन्ज्योला ङोह स्य़ेदीॱआङ किन्ज्योला पेह कोहएँगी ची़नाङ माहबे, ओहले थुज्यी-छ्य़ेॱआङ माहफुल, यिहॱनाङ खुङया़ राहङगी नोम्साङला फेनराङ मे़हथोएँ काहल्सीन ओहले खुङया़की उल्दुम्बा सेम तोहरोङ खोक्पा नाहक्पु काहल्सीन।#एफि ४:१७,१८ 22खुङगी राहङला ख्येम्बा-ताहक्पु यिहन म़ेदी क्याहल्गे यिहॱनाङ खुङ उल्दुम्बाॱराङ काहल्सीन। 23खुङगी ज़िज्यिद छ्यिम्बु नोम नाङगे किन्ज्योला छ्येपा फुल कोहएँलानी स्यिदी डोएँगी मिह, च्याह-च्यिहवा, बासो दाङ प्रहङस्यु क्याहप्ती डोएँकी सेम्ज्येनया़की कुया़ जे़दे का ओ़हया़ला छ्येपा फुल्सीन।#व्य ४:१६-१८
24ओ़ह सोङबे किन्ज्योगी खुङया़ला राहङगी सेमला ऩेक्योगी तिहक्पाकी ल़ेहया़ पेहती तेहक्यो ती़हजीलाराङ क्युर ज़्या़ नाङसीन। ओहले खुङया़गी राहङ नाहङदोङराङ ङोहजाकी ल़ेहया़ पेहसीन। 25च्यिबेमाना खुङया़गी किन्ज्योकी तेहन्दामला यिहॱना़ मिहम्बाकी से़हया़ ङ्याम्बु च्येहप्सीन। ओहले साज्या-नाम्ज्या छ्या़ च्य़ू नाङगे ओहले नाहम्माॱनाङ ची़नाङ ज्योर कोहएँकी किन्ज्योला मिहम्बा, यिहॱनाङ मिहरोगी ज़्याङ नाङग्योकी से़हया़ला गा खुङया़गी छ्येपा फुल्दी स्याहप्तो स्युहसीन।
26ओ़ह सोङबे किन्ज्योगी खुङया़ला राहङगी सेमला ने़जेबा ङोह छाएँगी ल़ेहया़ पेहच्येला क्युर ज़्या़ नाङसीन। खुङ पी़हमी-पेहजाया़गी राहङगी ख्योवा ङ्याम्बु माहङ्याहल्बा पेहती पी़हमी-पेहजा नाहङदोङराङ तिहक्पा पेहसीन। 27ओहले ओ़हठीॱराङ पेहती खुङगी क्येप-ख्योवाया़गीॱआङ राहङगी पी़हमी ङ्याम्बु ङ्याहल्ज्ये क्युर्ती च्यी़गी च्यी़ला सेम स्योर्ती क्येप-ख्योवा नाहङदोङराङ तिहक्पा पेहसीन। दि ल़ेहमु पेहती खुङ राहङ ज़ुबुगी पेहक्यो ल़ेहला ते़बे ङ्य़ेहबा खुर्सीन।
28दि ल़ेहमु पेहती खुङया़गी किन्ज्योला ची़नाङ पेहच्ये क्युरक्यो सोङबे किन्ज्योगी खुङया़ला ल़ेह चोक्पाया़ पेहच्यु म़ेदी खुङया़की नावा नोहङग्यो ती़हजीलाराङ क्युर ज़्या़ नाङसीन। 29ओ़ह सोङबे खुङ नामे नाजोकी तोक्ला छान्दी, ती़हसेमगी काहङग्यो ओहङगे। खुङया़गी मिहया़ला नाम्दो पेहकें ओहले ह्अम्बा पेहकें, लेहमेन मिहला ठादो पेहकें ओहले मिहला सेकें। खुङ ठुक्पा क्याहप्कें, चिहन क्याहप्के, मिहदाम च्येहके ओहले ताम ख्येर क्याहप्कें, 30ओहले मिहला आब्रु तेन्गे, किन्ज्योला क्युक्टो पेहकें, सुॱलाङ चा मेहबेकें, छ्य़ेन्दो तेन्गे ओहले ठासक तेन्गे। ओहले खुङगी चोक्पा-चोक्पा तामया़ छोल्दी माएँ। खुङगी आबा-आमागी माक्यो तामया़ च्यिॱआङ मिहङ्यीहन्गे। 31खुङ उल्दुम्बा ओहङगे, ओहले खुङगी पेहकें माएँगी तामया़ मेहबेकें। खुङगी सेम तोह ल़ेहमु सान्दी ओहङगे ओहले सुलाॱआङ निङज्यी मेहबेएँ। 32दि ल़ेहमु ल़ेह पेहकेन मिहया़ स्यिज्ये सी़हएँदी ओहङगे माएँदी किन्ज्योकी छ्य़े-ठिम ङोह स्य़ेदी स्य़ेदीॱआङ खुङगी दि ल़ेहमु ल़ेहया़ च्यी़राङ पेहकें मिहम्बा, यिहॱनाङ दि ल़ेहमु ल़ेह पेहकें मिहया़ ङ्याम्बु निङ थाक्पा यिहन्ज्युराङ डी़गे।
Currently Selected:
रोमी 1: HYLM
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
