ल़ेह-पेन 24
24
स्युहङ-पेन छ्यिम्बु फेलिक्सगी दिनला पावल
1ङ्यिहमा ङा तिङले पूजाहारी गो-छ्येवा हननिया दाङ लाहला छ्य़े-ठिम ताङगे लोबेनया़, तर्तुल्लस माएँ ठिम-चेन (वकिल) ख्येर्ती कैसरिया क्याहसाला लेप ओहङसीन। ओहले स्युहङ-पेन छ्यिम्बु फेलिक्स साला काहल्सीम्बाराङ पावलला टा़ह पेहती उजूर पेहसीन। 2ओहले पावलला स्युहङ-पेन छ्यिम्बुगी दिनला ख्योङ फान्ज्यो तर्तुल्लसकगी पावलला फातुर च़ूदी मासीन, “राहङ चा़ छ्यिम्बु पेहती ज़्य़ू नाङगेन्गी फेलिक्स, राहङ रिहक्पा छ्यिम्बु येहकें सोङगोराङ ङ्यिह नाहम माॱनाङ क्यिपु दाङ सेम लो तेहमु पेहती तेह ङ्युङदी येह। ओहले राहङगी काटीनगी पेहती ओहराङ क्याहल-खापला ज्यिबुराङ या़हबु ल़ेहया़ ओहङगेॱराङ येहबा।
3ओ़ह सोङबे राहङगी जे नाङग्योकी छ्या़लेया़ थोङदी ङ्यिह ज्यिबुराङ काहसो येह ओहले राहङगी ङ्यिहला जे नाङग्योगी रो़हराम ङ्यिहगी नाहमॱआङ टेहम्बा च्य़ेह मी़हखुएँ। 4ङाह राहङगी ती़हजी माहङबुनी मेहलेहन, यिहॱनाङ ङाहला निङज्यी जेती ङाहगी ताम च्यी़चे-ङ्यी़चे सेन नाङदोङ ला़ह। 5ङ्यिहगी ङोह स्येक्योगी दि मिह ज्यी़ज्ये ल़ेहमु ल़ेह चोक्पाया़ पेहती डोएँगी मिह यिहम्बा। ओहले दि मिह नासरी माएँ छो़बागी गोबा पेहती जाम्बुलीङगी थाम्ज्यीराङ यहूदीया़की पाहरक्यीला ठ़ूस्यी सिहङदा पेह च्य़ूदी डोॱराङ पेहक्यो ङ्यिहगी थोङदी येह। 6ओहले खोगी छ्योखाङॱलाङ ची़बु ज़ोज्ये छोल्गेराङ येहकें, ओ़हजेलाराङ ङ्यिहगी खोला ज़ुङसीन। [ओहले ङ्यिहगी छ्य़े-ठिमला ते़बे खोला फातुर च़ूज्ये म़ेदी साम्लु ताङग्यो येहकें 7यिहॱनाङ माक्पेन छ्यिम्बु लुसियस फेप्ती ङ्यिह लाहक्पालेगी फ्रो़दी नोम फेप नाङसीन। 8ओहले ङ्यिहला राहङसाला उजूर पेहतोङ म़ेदी का नाङसीन।]#२४:८ ताहङबो ग्रीक तामला प्रुहक्यो निङबा किन्ज्योगी सुङरापला आङ-टा़हङ टुहपादी स्याहर ङ्यिपा यिहन्ज्यु आङ-टा़हङ क्येहपाकी थो़स्यो स्याहर थु सुङया़ म़ेह। का़हलेॱआङ राहङगी खोला टी़ह नाङसीन मानानी ङ्यिहगी उजूर पेहक्योगी ताम खो लाहमलेॱराङ थाम्ज्यी तामया़ क्यी़ह ज्योर्च्ये येह।” 9ओहले लेहमेन यहूदीया़गीॱआङ दि ताम तेहन्दामॱराङ यिहम्बा म़ेदी पाङबु तेर्सीन।
पावलगी राहङगी तेहन्दाला प्रा साल्ग्यो
10ओहले स्युहङ-पेन छ्यिम्बु फेलिक्सगी ताम माज्येला का नाङ फान्ज्यो पावलगी मासीन, “राहङ दि क्याहल-खापला स्युहङ-पेन छ्यिम्बु दाङ ठिम ताङगे छ्या़ले जे नाङग्योदी लोह माहङबुराङ काहल्सीन माएँ ताम ङाहला क्यी़ह येहबा। ओ़ह सोङबे राहङगी दिनला ङाह राहङगी ताम प्रा साल ङ्युहङगेमु ङाहगी सेम काहसो काहल्दी येह। 11ङाह यरूशलेमला किन्ज्योला छ्येपा फुल काहल्ग्योदी ताहन्दा स्याहक्पु च्यिङ्यी़ म़ेदी ल्हाक्पु काहल्ग्यो म़ेह। दि स्याहल राहङगी तेहमु जेतीॱराङ क्यी़ह ज्योर ख़ूएँ। 12खुङया़गी ङाहला सु मिह च्यी़ ङ्याम्बुॱआङ जिङदी तेहक्यो च्य़ेह सिहन्दी म़ेह ओहले ङाहगी छ्योखाङला क्यिनी छो़खाङला ओहले क्याहसाला मिहया़ला क्या़दी ठ़ूस्यी पेह च्य़ूक्योॱआङ च्य़ेह सिहन्दी म़ेह। 13लेहमेन तामनी फारटाङ ज़्यो़, खुङगी ङाहला केन्ग्योगी ङ्य़ेहबागी दास्यी च्यी़ॱआङ खुङया़गी तेन ख़ूज्ये म़ेह। 14यिहॱनाङ दि तामदी ङाह माएँ, थार्पा थोप्केन्गी लाहमला खुङया़गी दि तेहन्दाम मिहम्बा म़ेदी माएँ, ओ़ह लाहमलाराङ तिङ ङ्यादी ङाह राहङगी आख्ये मे़हमेया़गी किन्ज्योला क्याप्केन ओहले छ्य़ेसेम पेहकें। यिहॱनाङ लुहङतेम्बाया़गी प्रुह नाङग्योकी छ्य़े दाङ मोशागी नाङग्यो थाम्ज्यीराङ छ्य़े-ठिमला ङाह यिह-छ्य़े पेहकें। 15ल़ेह टाहङबु पेहकें दाङ ल़ेह टाहङबु मेहबेकें मिह ङ्यिकाराङ स्यिदी तिङले येहपाराङ सोम्बो लो़हगे माएँ तामला खुङगी लोक पेहक्यो ल़ेहमुराङ ङाहॱआङ किन्ज्योला रेहवा पेहको येह। 16ओ़ह सोङबे मिह दाङ किन्ज्योकी दिनला ङाह राहङगी नावाला नाहम माॱनाङ चाङमा ज़्या़ज्ये छोल्गे।
17लोह माहङबुराङ काहल फान्ज्यो ङाह राहङगी यहूदी आदा-नो़हया़ला रो़हराम पेहच्ये दाङ डेल्बा फुल्ज्येला यरूशलेमला ओहङग्यो येहकें।#ल़ेह २१:१७-२८ 18दि ल़ेह पेहकें पेहकेनॱराङ खुङया़गी ङाहला छ्योखाङला च्य़ेह सिहन्सीन। ओहजेला ङाहगी चाङमा ज़ोएँगी ल़ेहया़ पेह सिहन्ग्यो येहकें। ओहले ओ़हला सुज्यीॱआङ मिह मिह-माहङया़ म़ेहबा येहकें ओहले च्याहउँडाॱआङ म़ेहबा येहकें। 19यिहॱनाङ एशिया क्याहल-खाप छ्यिम्बुले ओहङग्यो लाहला यहूदीया़गी ङाहला छ्योखाङला थोङसीन। का़हलेॱआङ खुङया़गी ङाहगी तेहन्दाला च्यिरा तामया़ माज्ये येहसीनमाना खुङराङ राहङसाला ओहङदी उजूर पेह कोहच्ये येहकें। 20मिहन्सीमानानी यहूदीया़की छो़बा छ्यिम्बुला ङाहगी च्यि ल़ेह जोल्ग्यो च्य़ेह सिहन्बा? देला येहकेया़गी स्येच्यु। 21खुङगी ङाहला ताम च्यी़ला फातुर च़ू ख़ूज्ये येह। ओ़ह च्यि यिहम्बा माना ‘स्यिक्यो मिह येहपाराङ सोम्बो लो़हज्ये येह माएँ तामला ङाहगी यिह छ्य़ेक्यो सोङबे देला ङाहती खाम्ज्यु डोॱराङ येह’ म़ेदी ङाहगी क़े तेन्दी माक्यो येहकें।”#ल़ेह २३:६
22फेलिक्सला थार्पागी लाहमगी तेहन्दाला या़हबु पेहती क्यी़ह येहकें। ओ़ह सोङबे खोगी मासीन, “ता़ह ख्या फे़बेया़गी उजूरी माक्पेन छ्यिम्बु लुसियस फेप्तीले च्यी़राङ साम्लु ताङगे” म़ेदी मासीन। 23ओहले देजे म़े फान्ज्यो फेलिक्सगी माक्पेनला, “पावलला या़हबु पेहती सुङदोङ। यिहॱनाङ, खोला कोहकेन्गी से़हया़ क्याल ओहङगेन्गी रो़हया़लादी मा़हका ओहले खोला तेहमु पेहती ज़्या़दोङ” म़ेदी का नाङसीन।
फेलिक्स दाङ द्रुसिल्लागी दिनला पावल
24स्याहक्पु तोबा तिङले फेलिक्सगी राहङगी यहूदी पी़हमी द्रूसिल्लाला ख्योङदी ओहङसीन। ओहले खोगी पावलला क़े क्याहप्ती येशू मास्यीकाला तेहपा पेहकेन्गी तेहन्दाला पावल लाहमले ङ्यिहन्सीन। 25यिहॱनाङ पावलगी, “किन्ज्योगी छ्य़ेगी काया़ ङ्यिहन्दी ल़ेह पेह कोहकें, ओहले राहङगी सेमला थिक-चि ज़्या़ कोहकें ओहले किन्ज्योगी ठिम ताङगे ती़हजी ओहङगेॱराङ येहबा” माएँ ताम स्येकेमु फेलिक्सगी का क्याहल्दी मासीन, “टी़हसीन, तिहरीङला देजेराङ येहच्यु, ता़ह ख्ये डो ख़ूएँ। लोहङ ओहङगे ती़हजीला ख्येला येहपाराङ क़े क्याहप्के।” 26ओहले फेलिक्सगी पावल लाहमले टाङगा साह ङ्युहङगे नि म़ेदी रेहवा पेहक्यो येहकें। ओ़ह सोङबे पावलला लेहमा टाहङमाराङ क़े क्याहप्ती ताम टी़हउ येहकें। 27ओहले लोह ङ्यी़ तिङले फेलिक्सकी छापला पर्किअस फेस्तस माएँ स्युहङ-पेन छ्यिम्बु च्यी़ ओहङसीन। ओहले फेलिक्सगी यहूदीया़ला क़ेहनाङ लाहङ च्य़ूज्येला पावलला चोन-खाङलाराङ ज़्या़सीन।
Currently Selected:
ल़ेह-पेन 24: HYLM
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
