फिलिप्पी 3

शरीरमे भरोसा नै करना

1तबेकमारे हे मोरिक विश्वासी भैयो, तुहुरे प्रभुमे बतो कहिके तुहुरे आनन्दित रहो। जोन बात मै तुहुरिन्हे पैलेहेँ लिखल बतुँ, वहे बात घनीघनी लिखक लग महिन्हे कौनो झन्झट नै लागत और जब मै बात तुहुरिन्हे घनीघनी कथुँ ते यी बात तुहुरिन्हे झूँटा गुरुनसे बँचाके धारी। 2ओइन्से हौश्यार रहो जेने, कुकरीनके हस व्यवहार देखैथाँ, और ओइन्से फेन हौश्यार रहो, जेने खराब काम करथाँ। और उ मनैनसे फेन हौश्यार रहो, जेने कथाँ कि तुहुरिन्के उद्धारके लग खतना करवैना जरुरी बा। 3काकरेकी अस्लीमे खतना करल मनै ते हम्रेहे हुइती। काकरेकी हम्रे परमेश्वरके आराधना हुँकार आत्मक अगुवाइसे कर्थी और ख्रीष्ट येशूकमे गर्व कर्थी, और हम्रे अपने कोशिसमे भर नै पर्थी। 4जब कि मोरिक थेन बहुत्ते कारण बा कि मै अपने कोशिसमे भर परुँ। पर यदि केऊ असिन सोँचत कि ओकर थेन असिन मानवीय कोशिसमे भर परना मजा कारण बताँ कलेसे मोरिक थेन उहिसे फेन धेउर कारण बा कि मै अपने कोशिसमे भर परुँ। 5मोरिक जल्मलक आठ दिन पाछे परमेश्वरके आज्ञा अनुसार मोरिक खतना हुइल। मै जल्मत्तिक इजरायल देशके हुइतुँ। और मै बेन्यामिन कुलके हुइतुँ। और मोरिक दाईबाबा हिब्रू रहिँत। तबेकमारे मै फेन हिब्रू हुइतुँ, और मोशक नियम कानुनके बारेमे हो कलेसे मै एकथो फरिसी हुइतुँ। 6यदि जोशके बारेमे हो कलेसे मै मण्डलीहे सतुइया मनैया रहुँ। यदि मोशक नियम कानुनके धार्मिकतक बारेमे हो कलेसे मै मोशक नियम कानुनके पालन करनामे एकथो धार्मिक मनैया रहुँ। काकरेकी मै उ सक्कु नियम कानुनके पालन कर्नु। 7पर ख्रीष्ट महिन्हे देखैले बताँ कि एकथो समयमे जोन चिजहे मै सोँचुँ कि यी मोरिक फाइदक लग हो। पर ख्रीष्टके कर्लक कामके कारण आज उ चिज मोरिक लग कौनो कामके नै हुइँत। 8काकरेकी मै अपन प्रभु येशू ख्रीष्टहे चिन्हे चहथुँ, जे बाँकी सक्कु चिजसे अमूल्य बताँ। तबेकमारे मै सक्कु चिजहे बेकार मानके छोरदेले बतुँ। और ओइन्हे मै कुरकुट हस सम्झथुँ, ताकि मै ख्रीष्टहे जाने सेकुँ। 9और ताकि मै हुँकार संग एकतामे रहे सेकुँ, उ धार्मिकतासे नै हो जोन मोशक नियम कानुनके पालन कर्लेसे किल आइत। पर उ धार्मिकतासे हो, जोन ख्रीष्टमे विश्वास कर्लक कारण परमेश्वर महिन्हे देथाँ। 10मै ख्रीष्टहे जाने और अनुभव करे चहथुँ। और मै फेनदोस्रे जित्ती करुइया शक्तिहे जाने चहथुँ जे ख्रीष्टहे जित्ती करल। और मै ओस्तेहेँके दुःख उठाई चहथुँ और मुए चहथुँ जसिके ख्रीष्ट करलाँ। 11ताकि मै फेन मुअलमेसे फेनदोस्रे जित्ती कराजाऊँ।

लक्ष्य ओहोँर आघे बहरना

12मै यी सक्कु चिजहे पैलेहेँ भेटासेकल बतुँ, या मै पक्का होसेकल बतुँ कहिके मै दाबी नै करथुइतुँ। पर मै कोशिस कर्ती आघे बहरती जाइतुँ ताकि महिन्हे उ चिज मिलजाए। पर मै उ चिजके लग दौरतुँ, जोन चिजके लग येशू ख्रीष्ट महिन्हे चुनल बताँ। 13हे मोरिक विश्वासी भैयो, मै यी दाबी नै करथुइतुँ कि मै पैलेहेँ उ चिज भेटासेकलतुँ। पर हाँ, मै यी जरुर करतुँ कि जोन पैलेहेँ होसेकल बा, उहिहे बिस्रैती भविष्यक ओहोँर बह्रतुँ। 14और लक्ष्यक लग मै कर्रा मेहनत कर्ती बतुँ ताकि मै उ ईनाम भेटाई सेकुँ, और उ ईनाम यी हो कि परमेश्वर महिन्हे स्वर्गमे बलाइतताँ। काकरेकी येशू ख्रीष्ट मोरिक लग मुलाँ। 15तबेकमारे हमारमेसे जतरा जाने फेन विश्वासमे पक्का बती, हम्रे सक्कु जाने एक्के हस सोँची। और यदि कौनो बातमे तुहुरिन्के दोसुर विचार बा कलेसे परमेश्वर तुहुरिन्हे उ फेन फरछ्वार करादिहीँ। 16तबेकमारे हम्रिहिन्हे उ सच्चाइसे जिए परत, जोन परमेश्वर पैलेहेँसे हम्रिहिन्हे देखैले बताँ।

स्वर्गमे हमार नागरिकता

17हे मोरिक विश्वासी भैयो, तुहुरे मोरिक व्यवहारके अनुशरण करो, और उ मनैनकेमे फेन ध्यान देऊ, जेने मोरिक व्यवहारके अनुशरण करथाँ। तुहुरे यनके व्यवहारके फेन अनुशरण करो। 18काकरेकी असिन बहुत्ते मनै बताँ, जेनके बारेमे मै तुहुरिन्हे घनीघनी बतैले बतुँ। और अब्बे फेन मै आँश गिरैती कहतुँ कि ओइन्के जीवन यी देखैथिन कि ओइने क्रूसमे ख्रीष्टके मुलक सन्देशहे घृणा करथाँ। 19ओइन्के अन्त्य विनाश हुइना हुइतिन, और ओइने अपन शरीरके इच्छाहे पूरा करक लग किल जिथाँ। लाज लग्तिक काम करना बारेमे ओइने घमण्ड करथाँ, और ओइने जबफेन संसारके चिजके बारेमे सोँच्ती रथाँ। 20पर हमार नागरिकता स्वर्गक हो, और हम्रे हमार मुक्तिदाता प्रभु येशू ख्रीष्टके स्वर्गमेसे फिर्ता अइना आसरा हेरती। 21येशू ख्रीष्टके थेन हरेक चिजहे अपन अधिनमे धरना शक्ति बतिन। और वहे शक्तिसे ऊ हमार कमजोर शरीरहे अपन महिमक शरीर हस हुइक लग बदलदिहीँ।

Currently Selected:

फिलिप्पी 3: DVGNT

Highlight

Copy

Compare