लूका 6:27-49

“पर मै तुहुरे सुनुइयनहे कहतुँ, अपन दुश्मनहे प्रेम करो और घृणा करुइयनहे भलाई करो। सराप देहुइयनहे आशीर्वाद देऊ, और दुर्व्यवहार करुइयनके लग प्राथना करो। तुहिन्हे एकथो गालमे पिटुइयाहे दोसुर गाल फेन दोगदेऊ। और यदि कौनो मनैया मुद्दा चलाके तोहाँरिक झुल्वा लेना दाबी करता कलेसे, उहिहे तोहाँरिक कोट फेन दैदेऊ। तुहिन्से मगुइयन प्रत्येक जहनहे देऊ। और तोहाँर ज्यात्या लैजुइयनसे फेनदोस्रे जिन मंग्हो। मनै तुहुरिन्से जसिन व्यवहार करिँत् कना तुहुरे चहथो, तुहुरे फेन ओइन्के संग ओस्तेहेँक व्यवहार करो। तुहुरिन्हे प्रेम करुइयनसे प्रेम करथो कलेसे, तुहुरिन्हे का फाइदा हुइल? काकरेकी पापीन फेन अपनहे प्रेम करुइयनसे प्रेम करथाँ। तुहुरिन्के भलाई करुइयनहे भलाई करबो ते तुहुरिन्हे का फाइदा हुइल? काकरेकी पापीन फेन ओस्तेहेँके करथाँ। यदि तुहुरे ओइन्हे सापट देबो, जिहिसे तुहुरे फिर्ता पैना आशा करथो कलेसे केऊ तुहुरिन्के प्रशंसा काकरे करी? काकरेकी पापीन असिन पापीनहे सापट देथाँ, जे ओइन्हे फिर्ता करे सेकत। पर अपन दुश्मनहे प्रेम करो, और ओइन्के भलाई करो। फेनदोस्रे मिली कना आशा बिना कर्ले सापट देऊ, और तोहाँर ईनाम भारी हुई। और तुँ परमप्रधानके सन्तान हुइबो। काकरेकी परमेश्वर गुन नै मनुइयनके और दुष्ट मनैनके उप्पर फेन दयालु बताँ। तुहुरिन्के बाबा दयालु रहल हस तुहुरे फेन दयालु होऊ।” “दोसुर जहनके न्याय ना करो, और तुहुरिन्के फेन परमेश्वर न्याय नै करहीँ। दोसुर जहनहे दोष जिन लगाऊ, तब् तुहुरिन्हे फेन दोष नै लगाजाई। माफ करो और तुहुरिन्हे फेन माफ करजाई। देऊ और तुहुरिन्हे फेन देजाई। मनै प्रशस्त मात्रामे दाब-दाबके जोरसे हिलाके, अँरैना मेरके तुहुरिन्के कोनामे धारदिहीँ। काकरेकी जोन नापसे तुहुरे नप्थो, वहे नापसे तुहुरिन्के लग फेन नाप जाई।” और येशू ओइन्हे एकथो दृष्टान्त फेन कलाँ, “का एकथो आँधर मनैया दोसुर आँधर मनैयाहे नेगाई सेकी? ओइने दुनुजाने गड्ढामे परजैहीँ। चेला अपन गुरुसे भारी नै रहत, पर सक्कु ज्ञान पाके सेकके ऊ अपन गुरु जसिन होजाई।” “तैँ अपन भैयक किल छुटीछुटी गल्ती देख्थे, अपन बर-बर गल्ती भर तैँ नै देख्थे। तोरिक अपने बर-बर गल्ती बा कलेसे कसिके तैँ अपन भैयक छुटीछुटी गल्तीहे सुधारे सेक्बे! ए कपटी! आघे तैँ अपन बर-बर गल्ती सुधार, तब् तैँ अपन भैयक छुटीछुटी गल्तीहे मजासे सुधारे सेक्बे।” “कौनो मजा रुख्वा खराब फारा नै फराइत, ना ते खराब रुख्वा मजा फारा फराइत। प्रत्येक रुख्वा ओकर फारासे फेन चिहिन्जाइत। काकरेकी काँटक झर्कत्तीमेसे केऊ फेन अञ्जीर नै टुरत, ना ते ऐँसेलुक झर्कत्तीमेसे अंगुर टुरत। एकथो मजा मनैया अपन मनमे रहल मजा चिजसे मजै बात निकारत। पर एकथो खराब मनैया अपन मनमे रहल खराब चिजसे खराबे बात निकारत। काकरेकी जोन बातसे मन भरल रहत मनैयक मुहेँमेसे वहे निकरत।” “मोरिक कहल बात नै मन्थो कलेसे काकरे महिन्हे ‘प्रभु, प्रभु,’ कथो? जे मोरिक थेन आइत, मोरिक वचन सुनत और वहे अनुसार करत, ऊ कसिन मनैया हो, मै तुहुरिन्हे बतैबुँ। ऊ एकथो असिन घर बनुइया मनैया हस हो, जे गहिँर कोरके चट्टानमे जग बैठाइल। और जब पानी बर्सल और बहार आइल और पानीक बेग हल्कोरा मर्ती आके उ घरेम ठोकल। तब् उ घरहे हिलाई नै सेकल, काकरेकी ऊ बल्गर बनाइल रहे। पर जे सुनत और फेन वहे अनुसार नै करत, उ एकथो असिन मनैया हस हो, जे धर्तीमे बिना जगके घर बनाइल। जब ओकर घरक उप्पर पानीक हल्कोरा आके ठोक्लिस्। तब् उ घर जुरतेहेँ ढलगिल, और उ घरक बरवार नोकसान होगिलिस।”