गलाती 4

1मोरिक बुझाई खोज्लक मतलब का हो कलेसे: मानो कौनो एकथो धनी मनैयक एकथो छावा बतिस। जबसम ओकर छावा छुटी रहत, तबसम ओकरमे और एकथो नोकरकेमे कुछु फरक नै हो। पर पाछेजाके पक्कै फेन ऊ अपन बाबक पूरा सम्पतिक मलिक्वा बनी। 2पर मलिक्वा बन्ना उमेर नै पुगतसम ऊ ओकर नेगे परना डगर देखाइक लग और ओकर रेखदेख करक लग नियुक्त करगिलक अभिभावक और संरक्षकके अधिनमे रहत। और मलिक्वा बन्ना उ उमेर ओकर बाबा तोकल बतिस।

3ओस्तेहेँके हम्रे फेन वहे छुटी लौँदक हस रही, ते यी संसारके बिनाकामक नियम कानुनके अधिनमे रही। 4पर जब उ समय आइल, जोन समयक योजना परमेश्वर बनैले रहिँत। तब परमेश्वर अपन छावाहे अप्निहीँ यी संसारमे पठैलाँ, और ऊ एकथो मनैयक रुपमे जलम लेलाँ। और ऊ एकथो यहूदिक रुपमे जलम लेलाँ, और मोशक नियम कानुनके पालन करिँत। 5ताकि ऊ ओइन्हे स्वतन्त्र करे सेकिँत, जेने मोशक नियम कानुनके अधिनमे रहिँत। और परमेश्वर हम्रिहिन्हे अपन सग्गे लरका बनालेलाँ।

6काकरेकी हम्रे हुँकार लरका हुइती, परमेश्वर अपन छावक आत्माहे हमार मनमे पठादेलाँ, जोन आत्मा परमेश्वरहे “हे मोरिक बाबा!” कहिके गोहराइत। 7तबेकमारे आब हम्रे गुलाम नै हुइती, पर हम्रे परमेश्वरके लरका बनगिल बती। तबेकमारे परमेश्वर हम्रिहिन्हे उ सक्कु चिज दिहीँ, ज्या-ज्या चिज ऊ अपन लर्कनहे देना वाचा कर्ले बताँ।

गलातिया प्रदेशके विश्वासीनके लग पावलके चिन्ता

8बितल समयमे जब तुहुरे परमेश्वरहे नै चिन्हल रहो। तब तुहुरे उ देउँतनके गुलाम बनल रहो, जेनके कौनो अस्तित्त्व नै हुइतिन। 9पर आब तुहुरिन्के सम्बन्ध परमेश्वरके संग बा। अथवा परमेश्वर हम्रिहिन्हे अपन सग्गे लर्कनके रुपमे स्वीकार करलेले बताँ कलेसे फेनदोस्रे तुहुरे कमजोर और बिनाकामक शिक्षक गुलाम बनक लग काकरे फिर्ता हुइतो? का तुहुरिन्हे फेनदोस्रे ओइनेहेँन्के गुलाम बन्ना इच्छा बा?

10मै सुनल बतुँ कि तुहुरे गैर-यहूदी विश्वासीन यहूदिनके दिन-दिने मन्ना, महिना-महिनामे मन्ना, हरेक छेँकमे (सिजनमे) मन्ना और साल-साले मन्ना तिहुवार मनैथो। यी सोँचके कि असिक कर्लेसे परमेश्वर खुशी हुइथाँ। 11तुहुरिन्के कर्ती रहल कामके कारण महिन्हे चिन्ता लागता कि तुहुरिन्के बिच्चेम कर्लक मोरिक सेवा बर्बाद ना होजाए।

12हे मोरिक विश्वासी भैयो, तुहुरिन्के हस बनक लग मै यहूदिनके उ मोशक नियम कानुन पालन करना छोरदेनु, जोन नियम कानुन मै पालन करतुहुँ। तबेकमारे आब मै तुहुरिन्हे अनुरोध करतुँ कि तुहुरे मोरिक हस बनजाऊ, और यहूदिनके उ नियम कानुन पालन ना करो। पहिले जब मै तुहुरिन्के संग रहुँ ते तुहुरे महिन्से मजा व्यवहार कर्लो। 13तुहुरिन्हे याद हुई, कि मै बेमार हुइलक कारण सुरुकचो तुहुरिन्के थेन खुशीक खबर प्रचार करे आइल रहुँ। 14मै बेमार हुइलक कारण तुहुरिन्हे बहुत समस्या हुइलस। तभुन फेन तुहुरे महिन्हे घृणा नै कर्लो, और महिन्हे तुहुरे बाहेर नै निकर्लो। पर तुहुरे महिन्हे ओस्तेहेँके स्वागत कर्लो, जसिके कि तुहुरे परमेश्वरके स्वर्गदूतहे या खुद येशू ख्रीष्टहे स्वागत करतो।

15उ समयमे तुहुरे बहुत खुशी रहो! आब तुहुरिन्के उ खुशी कहाँ गैल? मै जात्तिकमे कहे सेकम कि उ समयमे तुहुरे महिन्हे हर चिज देहक लग तयार रहो; यहाँसम कि यदि सम्भव बा कलेसे तुहुरे महिन्हे अपन आँखी निकारके फेन दैदेतो। 16और आब महिन्हे काकरे असिन लागता कि मै तुहुरिन्के दुश्मन बनगिल बतुँ? काकरेकी मै तुहुरिन्के सच्चाई बताइतुँ।

17ख्रीष्टके खुशीक खबरहे बिगारे चहुइया मनै तुहुरिन्हे अपन समूहमे शामिल करक लग अपन पूरा कोशिस करतताँ। पर ओइन्के उद्देश्य तुहुरिन्के भलाई करक लग नै हुइतिन; ओइन्के मतलब ते तुहुरिन्हे महिन्से अलग करना किल हुइतिन ताकि तुहुरे ओइन्के चेला बनजाऊ। 18हरदम मजा उद्देश्यक लग हौसल रना मजा रहत। और उ समयमे किल नाही जब मै तुहुरिन्के बिच्चेम हाजिर हुइथुँ।

19हे मोरिक लरको, जसिके कौनो एकथो जन्नी मनैया लरका पाईबेर व्यथा लागके एकदम बत्था महसुस करत, ओस्तेहेँके मै फेनदोस्रे एकचो तुहुरिन्के लग दुःख सहतुँ। मै यी दुःखमे तबसम पलिरहम जबसम तुहुरिन्के विश्वास ख्रीष्टमे हिर्गर नै होजाई। 20मै बहुत चहथुँ कि आब मै तुहुरिनेके संग रहुँ ताकि मै तुहुरिन्से नरम होके बात बत्वाई सेकुँ। काकरेकी मै बुझे नै सेकथुइतुँ कि मै तुहुरिन्हे का कहुँ।

हागार और सारा

21और तुहुरे, जेने मोशक नियम कानुनके अधिनमे रहे चहथो! मोरिक बात सुनो! मोशक नियम कानुनके किताबमे का लिखल बा कहिके मै तुहुरिन्हे बतैम। 22पवित्र शास्त्रमे असिके लिखल बा, कि अब्राहामके दुईथो छावन रहिस; ओकर एकथो छावक जलम हागारसे हुइलिस, जोन जन्नी एकथो नोकर्नी रहे। और दोसर छावक जलम सारासे हुइलिस, जे नोकर्नी नै रहे। 23नोकर्नी जन्नीक छावक जलम मनैनके कोशिससे परमेश्वरके वाचाहे पूरा कर्लक कारण हुइल रहिस। पर अब्राहामके जन्नीक छावक जलम खुद परमेश्वरके वाचाहे पूरा करक लग हुइल रहिस।

24यी दुनु जन्नी मनै परमेश्वरके दुईथो करारके हस हुइँत, जोन करार परमेश्वर अपन मनैन संग बहन्लाँ। यी करार परमेश्वर इजरायलके मनैनहे सीनै कना पहाड़मे देलाँ, जब परमेश्वर ओइन्हे अपन नियम कानुन देले रहिँत, यी करार हागारके हस हो। 25अब्बक यरुशलेम शहरके मनै परमेश्वरके आघे धर्मी ठहरक लग मोशक नियम कानुनके पालन कर्लक कारण ओइने गुलाम हुइँत। ओइने हागारके हस गुलाम हुइँत, जोन अरब देशके सीनै पहाड़मे बहानगिलक वाचाहे देखाइत।

26सारक तुलना उ यरुशलेमसे करे सेकजाइत जोन यरुशलेम स्वर्गमे बा। आब हमार लग सारा एकथो दाईक हस हो। काकरेकी सारा गुलामीमे नै रहे, और हम्रे मोशक नियम कानुनके पालन करनासे स्वतन्त्र बती। 27काकरेकी परमेश्वरके अगमवक्ता यशैया पवित्र शास्त्रमे असिके लिख्ले बा,

“हे बाँझी जन्नी मनै, तुहुरे जेने कबु लरका नै पाइल हुइतो।

और जेने लरका पैना बत्था कबु महसुस नै कर्ले हुइतो।

तुहुरे खुशी होऊ। चिल्लाऊ और आनन्दित होऊ।

काकरेकी थरवा रहल जन्नीकसे धेउर लरका बाँझी जन्नीक लरका बताँ।”

28हे मोरिक विश्वासी भैयो, जसिके अब्राहामके छावा इसहाक परमेश्वरके वाचक अनुसार जल्मल रहे। ओस्तेहेँके हम्रे फेन परमेश्वरके वाचक अनुसार परमेश्वरके सन्तान बनगिल बती। 29जसिके मनैनके कोशिससे जल्मल लरका इश्माएल परमेश्वरके शक्तिसे जल्मल लरका इसहाकहे सतैलस। ओस्तेहेँके आब तुहुरिन्हे फेन उ मनै सताइतताँ, जेने चहथाँ कि तुहुरे मोशक नियम कानुन पालन करो।

30पर पवित्र शास्त्र कहत, कि “गुलाम जन्नी मनैया और ओकर छावाहे दूर पठादेऊ। गुलाम हागारके छावा अपन बाबक सम्पतिक हकदार हुई नै सेकी। उ हक गुलाममे नै रहल सारक छावक किल हुइतिस।” 31हे मोरिक विश्वासी भैयो, मोरिक कहे खोज्लक बातके निष्कर्ष का हो कलेसे, हम्रे गुलाम जन्नीक लरका नै हुइती, जेनहे मोशक नियम कानुन पालन करे परना जरुरी बतिन। हम्रे ते उ जन्नी मनैयक लरका हुइती जे गुलाम नै रहे, जेनहे येशू ख्रीष्टकेमे विश्वास कर्लक कारण परमेश्वर स्वीकार करथाँ।

Currently Selected:

गलाती 4: DVGNT

Highlight

Copy

Compare