एफिसी 6

छाईछावा और दाई-बाबनहे अर्ती

1-3पवित्र शास्त्रमे असिके लिखल बा, “अपन दाई-बाबक आदर करो, तब तोहाँर लग मजा हुई, और पृथ्वीमे तोहाँर आयु नम्मा होजाई। यी सुरुक आज्ञा हो जिहिहे परमेश्वर एकथो वाचक संग देले बताँ।” तबेकमारे हे लरको, तुहुरे प्रभुहे विश्वास करथो, यी तुहुरिन्के लग एकदम ठिक हो कि तुहुरे अपन दाई-बाबक आज्ञा पालन करो।

4और हे बाबन, अपन छाइछावनहे घनीघनी रीस ना उठाऊ। पर प्रभुक शिक्षा और अनुशासनमे ओइन्हे पालपोष करो।

कामदार और मलिक्वनहे अर्ती

5हे कामदारहुँक्रे, जोन मनै संसारके अनुसार तुहुरिन्के मलिक्वा हुइँत। सावधानीसे ओइन्के आदर और सम्मान करो। देखावती किल ना करो। जसिके तुहुरे ख्रीष्टके आज्ञा पालन करथो। 6ओस्तेहेँके तुहुरे अपन मलिक्वनके फेन आज्ञा पालन करो। ओइन्हे खुशी बनाइक लग ओइन्के आँखीक आघे किल देखावती काम ना करो। पर तुहुरे ख्रीष्टके सेबक हुइतो। तबेकमारे तुहुरे अपन पूरा मनसे करे परत, जसिके परमेश्वर चहथाँ कि तुहुरे असिके करो। 7तुहुरे खुशीसे अपन सेवा करना काम करथो, मानो तुहुरे मनैनके नै होके प्रभुक सेवा करतो; 8काकरेकी तुहुरे जन्थो, कि चाहे उ नोकर रहे चाहे स्वतन्त्र, जे जतरा मजा काम करी, प्रभु उहिहे ओस्तेहेँ ईनाम दिहीँ। 9अस्तेहेँके हे मलिक्वन, तुहुरे फेन धम्की देना छोरके अपन कामदारीनहे मजा व्यवहार देखाऊ। काकरेकी तुहुरिन्हे पता बा कि ओइन्के और तुहुरिन्के दुनु जहनके मलिक्वा स्वर्गमे बताँ, और ऊ किहुहे फेन पक्षपात नै करथाँ।

परमेश्वरके हाँथहँथियार

10मै तुहुरिन्हे कहे परना अन्तिम बात यहे हो कि तुहुरे सक्कु जाने आत्मिक रुपसे प्रभुक शक्तिशाली शक्तिमे बल्गर होजाऊ। 11-13हम्रे मनैनके विरोधमे नै लरथुइति। हम्रे प्रधानतनके और अधिकारीनके विरोधमे और अन्धकारके हाकिमनसे और आत्मिक संसारके शक्तिक विरोधमे लरती। तबेकमारे परमेश्वरके देना सक्कु मेरिक कबज घाललेऊ। और जब उ खराब दिन आई, तब तुहुरे शैतानके चालसे बँचे सेक्थो। और जब यी लड़ाई ओराजाई, तब फेन तुहुरे बल्गर होके ठरह्याई सेक्बो।

14जसिके एकथो सिपाही अपनहे लरक लग तयार करक लग अपन करहिऊँमे पेटी बहान लेहत। ओस्तेहेँके तुहुरे फेन सच्चाइक पालन करो ताकि शैतानसे लरक लग अपनहे तयार करे सेको। जसिके कबज लराईमे एकथो सिपाहीहे सुरक्षा देहत, ओस्तेहेँके तोहाँर धर्मी व्यवहार तुहिन्हे सुरक्षा देहत, जब शैतान तुहिन्हे आक्रमण करत। 15एकथो सैनिक जसिके लड़ाईक लग तयार हुइक लग अपन जुत्ता घालत, ओस्तेहेँके शैतानसे लरक लग परमेश्वरके संग शान्तिक बारेमे जोन खुशीक खबर बा ओम्ने विश्वास करे परत। 16जसिके एकथो सैनिक ढाल लेके अपन उप्पर अइना दुश्मननके तीरसे अपनहे बँचाईत। ओस्तेहेँके तुहुरे फेन ख्रीष्टहे पक्का विश्वास करो ताकि ख्रीष्ट तुहुरिन्हे शैतानके नोकसान पुगैनासे बँचैले रहिँत।

17जसिके एकथो सैनिक अपन मुन्टाहे लड़ाईमे बँचाइक लग मुन्टामे खोप्रिही लगाइत, ओस्तेहेँके परमेश्वर तुहुरिन्हे बँचाइँत। जसिके एकथो सैनिक अपनहे बँचाइक लग तरवाल पक्रल रहत, ओस्तेहेँके अपनहे बँचाइक लग परमेश्वरके वचनके प्रयोग करो। यी पवित्र आत्मा तुहुरिन्हे देथाँ। 18और हर समय और हरेक मेरसे पवित्र आत्मक अगुवाई करल अनुसार प्राथना और बिन्ती करो। यकर लग और परमेश्वरके सक्कु पवित्र मनैनके लग हरदम लगनशील होके हौश्यारीसे प्राथना और बिन्ती कर्ती रहो। 19और मोरिक लग फेन प्राथना करके परमेश्वरहे कहहो कि ऊ महिन्हे बोलक लग सही शब्द दिँत। ताकि मै बिना डरैले खुशीक खबरके बारेमे हुँकार गोप्यमे रहल बात बुझाई सेकुँ, जोन बात सक्कु मनैनके लग हो। 20यक्रेहेक लग मै सिँक्रीलेके बँधल एकथो राजदूत हस सेवा करतुँ। तुहुरे प्राथना करहो, कि मै बिना डरैले बोले सेकुँ और खुशीक खबर प्रचार करे सेकुँ।

अन्तिम नमस्कार

21मै कसिन बतुँ और मै का कहतुँ कहिके तुहुरे फेन जानलेऊ। यी सक्कु बात तुखिकस तुहुरिन्हे बतादी। ऊ हमार विश्वासी भैया और प्रभुमे रहल एकथो विश्वासयोग्य सेबक हो। 22उहिहे मै तुहुरिन्के थेन यहे कारणसे पठैनु, ताकि तुहुरे हमार हालचाल जाने सेको, और ऊ तुहुरिन्हे उत्साहा देहे सेके। 23मै हमार बाबा परमेश्वर और प्रभु येशू ख्रीष्टसे प्राथना करतुँ कि ओइने विश्वासीनहे शान्ति दिँत। और एकदोसर जहनहे प्रेम करना और ख्रीष्टमे लगातार विश्वास कर्ले पलिरना बनाइँत। 24और मोरिक प्राथना यी फेन बा कि परमेश्वर उ सक्कुहुन्हे अपन अनुग्रह देखाइँत, जेने हमार प्रभु येशू ख्रीष्टहे प्रेम करथाँ, जोन प्रेम कबु नै ओराइत।

Currently Selected:

एफिसी 6: DVGNT

Highlight

Copy

Compare