एफिसी 3

पावल गैर-यहूदिनके लग प्रचारक

1तबेकमारे मै पावल, तुहुरिन्के लग प्राथना करतुँ। मै झेलमे परल बतुँ, काकरेकी मै येशू ख्रीष्टके लग काम करथुँ, जोन काम गैर-यहूदिनहे खुशीक खबर प्रचार करना हो। 2पक्कै फेन तुहुरे सुनल बतो, कि परमेश्वर महिन्हे खुशीक खबर प्रचार करना जिम्मा हुँकार अनुग्रहसे देले बताँ।

3मै तुहुरिन्हे पैलेहेँ फेन छोटकरीमे लिखल रहुँ, कि परमेश्वर महिन्हे उ गोप्य योजना प्रकट करलाँ। 4जसिके तुहुरे मोरिक लिख्लक चिट्ठी पहरबो, ते तुहुरिन्हे यी फेन पता चली कि मै जात्तिकमे ख्रीष्टके रहस्यक बारेमे कतरा मजासे बुझ्थुँ। 5यी गोप्य योजना बितल पुस्तनके मनैनहे नै बतागिल रहे। पर आब पवित्र आत्मा अपन पवित्र निउतरह्यनहे और अपन अगमवक्तनहे उ सन्देशके खुलासा कर्ले बताँ।

6यी परमेश्वरके योजना हुइतिन कि खुशीक खबर सुनके हमार सम्बन्ध येशू ख्रीष्टके संग हुइलक कारण यहूदिनके हस गैर-यहूदिनके फेन वहे आशिष भेटैहीँ। और ओइने एक्के शरीरके हिस्सा और यहूदिनहे कर्लक परमेश्वरके वाचामे साझा हकदार हुइहीँ। 7परमेश्वरके महिन्हे फोकत्यामे देलक अनुग्रह और पराक्रमी शक्तिसे महिन्हे हुँकार खुशीक खबर प्रचार कर्ती सेवा करना मौका मिलल।

रहस्यक उद्देश्य

8मै परमेश्वरके सक्कु पवित्र मनैनसे कम खास बतुँ। पर परमेश्वर महिन्हे अनुग्रह करलाँ, और मै गैर-यहूदिनहे यी खुशीक खबर बताई सेक्नु कि ख्रीष्टके थेन अतरा आशिष बतिन कि हम्रे कल्पना फेन नै करल हुइती। 9और मै हरेक मनैनहे सम्झाई सेक्थुँ कि परमेश्वर उ चिजहे कसिके पूरा कर्ले बताँ, जोन चिजहे ऊ पैलेहेँ करना निर्णय कर्ले रहिँत। यी चिज बहुत पहिले देखा नै परल रहे, काकरेकी हरेक चिजहे बनुइया परमेश्वर यिहिहे नुकाइल रहिँत।

10आब परमेश्वरके उद्देश्य मण्डलीक प्रयोग करके हुँकार बहुत मेरिक ज्ञान उ सक्कु आत्मनके उप्पर प्रकट करना हुइतिन, जेनके अधिकार और शासन नै देखजैना संसारमे बतिन। 11और परमेश्वर अपन यी सदाकालके योजनाहे हमार प्रभु येशू ख्रीष्टके माध्यमसे पूरा करलाँ।

12हमार सम्बन्ध ख्रीष्टके संग रलक कारण और हम्रे हुँकिन्हे विश्वास कर्लक कारण आब हम्रे परमेश्वरके हाजिरीमे हिम्मत और आत्मविश्वाससे आई सेक्थी। 13तबेकमारे मै अनुरोध करतुँ कि तुहुरिन्के लग मै दुःख भोग्लक कारण तुहुरे निराश ना होऊ, काकरेकी यी सक्कु तुहुरिन्के फाइदक लग हो।

एफिसी शहरके मण्डलीक लग प्राथना

14तबेकमारे मै परमेश्वर बाबक आघे ठेहुनी टेकके प्राथना करतुँ, 15ऊ वहे हुइँत जे विश्वासीनके पूरा परिवारके बाबा हुइँत, जे स्वर्ग और पृथ्वी दुनु ठाउँमे बताँ। 16मै प्राथना करथुँ, कि परमेश्वर अपन महिमक सम्पतिमेसे हुँकार आत्मा तुहुरिन्हे शक्ति दिन् ताकि तुहुरिन्के मन बल्गर होजाए।

17और तुहुरे ख्रीष्टहे विश्वास कर्लक कारण तुहुरिन्के मन बल्गर होए, और ख्रीष्ट तुहुरिन्के मनमे स्थायी रुपमे वास करिँत। मै प्राथना करतुँ, काकरेकी तुहुरे ख्रीष्टहे पक्कासे और ईमानदारीसे प्रेम करथो। 18परमेश्वर सक्कु पवित्र मनैनके संग तुहुरिन्हे बुझे सेक्ना शक्ति मिलजाए कि ख्रीष्ट हम्रिहिन्हे अतरा धेउर प्रेम करथाँ कि हुँकार प्रेमके हम्रे लम्बाई, चौड़ाई, उँचाई और गहिँराई#3:18 लम्बाई, चौड़ाई, उँचाई और गहिँराई यी कलक हम्रे हुँकार प्रेमहे बयान करे नै सेक्थी। सम्झे नै सेक्थी। 19और मै प्राथना करतुँ कि ख्रीष्ट हम्रिहिन्हे कत्थुक प्रेम करथाँ कहिके अनुभव करनामे तुहुरे सक्षम हुई सेको। ताकि तुहुरे हरेक मेरसे पक्का हुई सेको जसिके परमेश्वर पक्का बताँ।

20परमेश्वर सक्षम बताँ, और हमार भित्तर काम करना हुँकार शक्तिक कारण ऊ हमार माँगल और सोँचलसे फेन बहुत धेउर-धेउर काम करे सेक्थाँ। 21मण्डलीमे और येशू ख्रीष्टमे हुँकार महिमा सदादिन बहुत पुस्तासम हुइती रहिन। आमेन! (यकर मतलब हुइत, अस्तेहेँ होए।)

Currently Selected:

एफिसी 3: DVGNT

Highlight

Copy

Compare