कलस्सी 2

1मै चहथुँ कि तुहुरे यी जानलेऊ कि तुहुरिन्के लग मै कतरा मेहनत करथुँ। और ओइन्के लग फेन जेने लाउडिकिया शहरमे बताँ, और उ सक्कुहुनके लग फेन जेनसे मोरिक भेँटा नै हुइल हो। 2मै मेहनत करथुँ ताकि मै तुहुरिन् सक्कुहुनहे विश्वासमे बल्गर बनाई सेकुँ। और एकदोसुर जहनमे तुहुरिन्के प्रेम तुहुरिन्हे एकजुट कराई। और तुहुरे बुद्धिक सारा आशिष भेटाई सेको, और परमेश्वर बाबक रहस्यक ज्ञानहे जाने सेको, अर्थात ख्रीष्टहे चिन्हे सेको। 3ऊ वहे ख्रीष्ट हुइँत, जे परमेश्वरके बुद्धि और ज्ञानहे चिन्हाइत। और जे उ सम्पतिक हस हुइँत, जोन नुकल रहे। 4मै तुहुरिन्हे यी कारणसे कहतुँ कि कौनो मनैया तुहुरिन्हे अपन झूटा शिक्षामे विश्वास करक लग मन्जुर ना करालेहे। 5काकरेकी यदि मै तुहुरिन्से दूर बतुँ कलेसे फेन मै तुहुरिन्के बारेमे सोँच्ती रथुँ। और मै यी देख्के गजब खुशी बतुँ कि तुहुरे कतरा नियममे रथो, और ख्रीष्टमे तुहुरिन्के विश्वास कतरा बल्गर बा।

ख्रीष्टके जीवनसे छुटकारा

6तबेकमारे, जसिके तुहुरे ख्रीष्ट येशूहे प्रभु मानके ग्रहण करलेले बतो, ओस्तेके हुँकारमे अपन जीवन बिताऊ। 7ख्रीष्टमे तुहुरिन्के विश्वास एकथो रुख्वक हस हुई परत, जेकर जर बहुत गहिँरसम रहत। या ते फेन एकथो असिन घरक हस होए, जोन एकथो बल्गर जगमे बनागिल रहत। अपन विश्वासमे बल्गर पलिरहो जसिके तुहुरिन्हे सिखागिल रहे, और रोट्दिन धन्यवाद देती रहो। 8ध्यान देऊ, कि बिना मोलके और खोँखर छलसे केऊ तुहुरिन्हे फँसा ना लेहे। जेने ख्रीष्टके अनुसार नै होके मनैनके परम्परा और संसारके शिक्षामे आधारित रथाँ। और जोन कारण हम्रे मनैनके देहल शिक्षक पाछे चले नै चहथी उ कारण यहे हो, 9कि जब ख्रीष्ट मनैया बन्लाँ, तब ऊ पूरा रुपमे परमेश्वर रहिँत। तबेकमारे तुहुरे यी मनैनसे अपनहे धोखा देहे ना देऊ। 10ख्रीष्ट हरेक शक्ति और अधिकारमे सक्कुहुनसे भारी बताँ। तबेकमारे यदि तुहुरे ख्रीष्टमे बतो कलेसे तुहुरिन्हे कौनो फेन चिजके कमि नै हो। 11जब तुहुरे ख्रीष्टमे विश्वास कर्लो, तब तुहुरिन्के खतना मनैनसे नै करगिलस (जसिके यहूदी मनै करथाँ), पर उ खतना ख्रीष्टके माध्यमसे हुइल, जोन तुहुरिन्के पापी स्वभावहे काटके दूर करना हो। 12जब तुहुरिन्हे डुब्कि देगिलस ते उ यी देखाइत कि तुहुरिन्के पापी स्वभावहे दफ्नादेगिल बा। ओस्तेके जसिके ख्रीष्टहे दफ्नादेगिल रहे। और तुहुरिन्हे एकथो लावा स्वभावके संग जित्ती करागिलस जसिके ख्रीष्टहे जित्ती करागिल रहे। असिके यहे कारणसे हुइल, काकरेकी तुहुरे विश्वास कर्लो कि परमेश्वर अपन शक्तिसे ख्रीष्टहे मुके सेकलमे फेनदोस्रे जिवादेलाँ। 13और तुहुरे फेन अपन अपराध और अपन पापी स्वभावके शक्तिसे स्वतन्त्र नै रहो, और मुर्दा हस रहो। तब परमेश्वर तुहुरिन्हे ख्रीष्टके संग जिवैलाँ, और हमार सक्कु अपराधहे माफ करलाँ। 14यी असिन रहे जसिके परमेश्वर हमार पापके तमसुकहे मेटादेलाँ, जेम्ने हमार विरोधमे आरोप लिखगिल रहे। जब ख्रीष्ट क्रूसमे टँगादेगिलाँ, तब येशू उ सक्कु कानुनी दाबीनहे पूरा रुपमे हटादेलाँ। 15येशू प्रधानतनहे और सक्कु अधिकारके शक्तिनहे हरादेलाँ। और क्रूसमे मुके ऊ यी प्रधानताहे और अधिकारके शक्तिनहे सक्कुहुनके आघे लाज करादेलाँ, और यनहे जितदेलाँ। 16तबेकमारे तुहुरे किहुसे फेन अपनहे धोखा हुई ना देऊ। और अपन न्याय किहुहे फेन करे ना देऊ। तबेकमारे खैना और पिनामे, या तिहुवारके दिन, या औँसी या बिँसैना दिन मन्ना बारेमे कौनो मनैया तुहुरिन्के न्याय ना करे। 17काकरेकी यी सक्कु नियम अइना बातके छाहीँ हस किल हुइँत, पर वास्तविकता भर ख्रीष्टमे रहत। 18-19ऊ शरीरके मुन्टा हुइँत, यी हुँकार माध्यमसे हुइत कि शरीरके सक्कु अंगक रेखदेख हुइत, और ओइन्हे एक्के संग धारजाइत। तबेकमारे यी ओसिके बह्रत, जसिके परमेश्वर चहथाँ कि यी बह्रे। हौश्यार रहो, कि केऊ फेन तुहुरिन्हे बेज्जत करके और स्वर्गदूतके आराधना करके तुहुरिन्हे अयोग्य ना ठहराए। असिन मनै उ बातके बारेमे बहुत गहिँराइमे जैथाँ, जोन बात ओइने देख्थाँ। और यी ओइन्के मानवीय सोँचके कारण ओइन्हे मूर्खता भरल घमण्डसे भर देथिन। ओइने ख्रीष्टहे छोरदेले बताँ।

ख्रीष्टके संग जिना और मुना

20काकरेकी तुहुरिन्के पापी स्वभाव ख्रीष्टके संग मुगिल बा। तबेकमारे आब तुहुरिन्हे यी संसारके नियमहे मन्ना जरुरी नै हो कलेसे तुहुरे अभिन फेन यी नियमके पालन काकरे करथो जसिके कि संसार अभिन फेन तुहुरिन्हे अधिनमे धारल बा? 21जसिके कि तुहुरे उ चिजहे अपन हाँथेम ना पकरहो, असिन खाना ना खैहो और असिन चिजहे हाँथ फेन ना लगैहो। 22यी सक्कु नियम कौनो कामक नै हो, काकरेकी यी मनैनके आज्ञा और शिक्षा अनुसार बा। 23असिन लागत कि जसिके यी नियम ओइन्हे बुद्धिक डगर देखाइत। और ओइने परमेश्वरकेमे अपनहे बरबत्ति समर्पण करथाँ, झूँट नम्रता देखैथाँ। और अपन शरीरसे कर्रा व्यवहार करथाँ। पर यी नियम पालन करके सेकके फेन मनै पापमे जिना बन्द नै करथाँ।

Currently Selected:

कलस्सी 2: DVGNT

Highlight

Copy

Compare