२ कोरिन्थी 9

परमेश्वरके मनैनके लग पैँसा

1यरुशलेम शहरके विश्वासीनहे पैँसा देना सेवक बारेमे तुहुरिन्हे लिख्ती रना महिन्हे जरुरी नै हो। 2काकरेकी मै तुहुरिन्के देना उत्सुकता जन्थुँ। यकर बारेमे माकेडोनिया प्रदेशके विश्वासीनके आघे मै तुहुरिन्केमे गर्व कर्ती कनु, कि अखैया प्रदेशके मनै गैलक एक सालसे सहयोग करक लग तयार बताँ। तुहुरिन्के जोश ओइन्मेसे बहुत जहनहे हौसैले बा। 3आब मै तीतस और औरे दुईथो विश्वासी भैयनहे तुहुरिन्के थेन पठाइतुँ, ताकि हम्रे तुहुरिन्के बारेमे जोन गर्व करल बती, उ गर्व बेकार ना होजाए। पर जसिके मै कले बतुँ ओस्तेहेँके तुहुरे यरुशलेम शहरके विश्वासीनहे दान देहक लग तयार रहहो। 4यदि माकेडोनिया प्रदेशसे गोड्गात विश्वासीन मोरिक संग अइहीँ, और तुहुरिन्के थेन दान तयार हुइल नै मिली कलेसे तुहुरिन्मे कर्लक भरोसक कारण हमार लाज होजाई। काकरेकी हम्रे तुहुरिन्केमे बरवार भरोसा कर्ले रही। पर तुहुरिन्के आकुर धेउर लाज हुई। 5तबेकमारे मै विश्वासी भैयनहे यी अनुरोध करना जरुरी मन्नु कि ओइने महिन्से आघे तुहुरिन्के थेन जाइँत। और तुहुरिन्के वाचा कर्लक खुल्ला मनसे देलक दानके पैँसा पैलेहेँसे तयार करदिँत। तब यी दान बाध्यतासे नै होके खुल्ला मनसे हुई।

खुल्ला मनसे दान देहुइया

6बात यहे हो, कि थोरचे बोउइयन थोरचे कट्हीँ, और बहुत्ते बोउइयन बहुत्ते कट्हीँ। 7जिहिहे जतरा देना मन बा, ऊ ओत्रेहे देहे। मन दुखाके या केक्रो दबाबमे परके ना देऊ। काकरेकी खुशीसे देहुइयनहे परमेश्वर प्रेम करथाँ। 8परमेश्वर तुहुरिन्हे तुहुरिन्के जरुरीसे फेन धेउर देहे सेक्थाँ। ताकि तुहुरिन्हे जरुरी परना हरेक चिज हरदम तुहुरिन्के थेन पलिरहे, और तुहुरे सक्कु मजा कामके लग प्रशस्त मात्रामे देहे सेको। 9जसिके पवित्र शास्त्रमे लिखल बा,

“जे गरीब मनैनहे खुल्ला मनसे देहत,

ओकर धार्मिकता सदाकालसम पलिरहत।”

10परमेश्वर जबफेन किसाननहे बुइक लग बिया देथाँ, और ओइन्हे खाइक लग खाना फेन देथाँ। ठिक अस्तेहेँके परमेश्वर यी फेन सम्भव बनैहीँ कि तुहुरिन्के थेन जबफेन पुग्ना मेरिक पैँसा पलिरहे, ताकि तुहुरे आकुर धेउर खुल्ला मनसे जरुरी परल मनैनहे देहे सेको।

11तुहुरे सक्कु ओहोँरसे आशिष भेटैबो, और तुहुरे सदादिन खुल्ला मनसे देनामे सक्षम होजिबो। और जब हम्रे तुहुरिन्के खुल्ला मनसे देलक दानहे जरुरी परल मनैनहे देहब, ते ओइने परमेश्वरहे धन्यवाद दिहीँ।

12काकरेकी यी सेवा कर्लेसे पवित्र मनैनके कमि किल पूरा नै हुइथिन। पर मनै परमेश्वरहे बहुत धन्यवाद फेन देथाँ। 13काकरेकी जब दोसुर जहनहे तुहुरे सहायता करथो ते तुहुरे अपन विश्वास प्रकट करथो। यहे कारणसे बहुत मनै परमेश्वरके प्रशंसा करथाँ। काकरेकी तुहुरे ख्रीष्टके खुशीक खबर सच्चा हो कहिके स्वीकार करलो। और तुहुरे गरीब विश्वासीनहे और दोसुर सक्कु विश्वासीनहे मन खोलके देके अपन बोलीक पालन करथो। 14ओइने तुहुरिन्के लग परमेश्वरसे प्राथना करहीँ। ओइने तुहुरिन्हे माया करथाँ। काकरेकी ओइने जन्थाँ कि परमेश्वर तुहुरिन्के उप्पर बरवार अनुग्रह कर्ले बताँ। 15परमेश्वरहे हुँकार छावक लग धन्यवाद देऊ जोन असिन दान हो, जिहिहे वर्णन करे नै सेकजाइत।

Currently Selected:

२ कोरिन्थी 9: DVGNT

Highlight

Copy

Compare