१ यूहन्ना 2

1मोरिक प्रिय लरको, मै यी बात यी कारणसे लिखतुँ, ताकि तुहुरे पाप ना करो; और यदि केऊ पाप करत कलेसे परमेश्वर बाबक थेन हमारिक एकथो सहायक बा, जे धर्मी येशू ख्रीष्ट हुइताँ। ऊ हमार पापहे माफ करक लग परमेश्वरसे अनुरोध करथाँ। 2और हमार पापहे दूर कराइक लग ख्रीष्ट एकथो बलिदान बनगिलाँ। और हमार लग किल नै होके, पर संसारके सारा मनैनके पापके लग फेन।

परमेश्वरके आज्ञा

3यदि हम्रे परमेश्वरके आज्ञा मन्बी कलेसे यिहिएसे हम्रे जन्बी कि हम्रे हुँकिन्हे चिहिन्थी। 4जे केऊ कहत, “मै हुँकिन्हे चिहिन्थुँ”, पर हुँकार आज्ञा पालन नै करत कलेसे ऊ झूटा हो, और ऊ परमेश्वरके सच्चाइमे नै जिअत। 5पर जे परमेश्वरके वचन पालन करत, ओकरमे जात्तिकमे परमेश्वरके प्रेम पूर्णता भेटालेले बतिन। यिहिएसे हम्रिहिन्हे पता चलत कि हम्रे हुँकारमे बती। 6और जे असिक कहत, कि मै हुँकारमे पलिरथुँ कलेसे उहिहे अप्निहीँ फेन ओस्तेहेँ रहे परत, जसिके येशू रहतिहिँत।

सक्कुहुनहे माया करो

7हे मोरिक प्रिय संघरियन, मै तुहुरिन्हे कौनो लावा आज्ञा नै लिखथुइतुँ, पर वहे पुरान आज्ञा लिखतुँ, जोन सुरुएसे तुहुरिन्के संग रहे। यी पुरान आज्ञा उ वचन हो, जोन तुहुरे तब सुन्लो, जब तुहुरे ख्रीष्टहे विश्वास करलो। 8तभुन फेन मै तुहुरिन्हे एकथो लावा आज्ञा लिखतुँ; काकरेकी येशू यी आज्ञक सच्चाइमे जिलाँ, और तुहुरे फेन यम्ने जिअतो। काकरेकी अंधार ओरैती जाइता और सच्चाइक ओजरार आब चम्के लागल बा। 9जे असिके कहत, कि मै ओजरारमे जिअतुँ, पर अपन विश्वासी भैयाहे घृणा करत कलेसे ऊ अभिनसम अंधारेमे जिअता। 10जे अपन विश्वासी भैयाहे प्रेम करत, ऊ ओजरारमे जिअत। तबेकमारे ओकरमे असिन कुछु फेन चिज नै हो, जोन कौनो दोसुर जहनहे पाप कर्नक कारण बनजाए। 11पर जे अपन विश्वासी भैयाहे घृणा करत, ऊ अंधारमे रहत, और अंधारमे जिअता। और ऊ नै जानत कि ऊ कहाँ जाइता। काकरेकी अंधार ओकर आँखीहे आँधर बनादेहल बतिस।

चिट्ठी लिख्नक कारण

12मोरिक प्रिय लरको, मै तुहुरिन्हे लिखतुँ, कि येशू ख्रीष्टके नाउँसे तुहुरिन्के पाप माफ होगिल बा। 13हे बाबन, मै तुहुरिन्हे यी कारणसे लिखतुँ, कि जे सुरुएसे बताँ, तुहुरे हुँकिन्हे चिहिन्थो। हे जवानो, मै तुहुरिन्हे यी कारणसे लिखतुँ, काकरेकी तुहुरे उ शैतानहे जितल बतो। हे मोरिक प्रिय लरको, मै तुहुरिन्हे यी कारणसे लिख्नु, कि तुहुरे परमेश्वर बाबाहे चिहिन्सेकल बतो। 14हे बाबन, मै तुहुरिन्हे यी कारणसे लिख्नु, कि जे सुरुएसे बताँ, हुँकिन्हे तुहुरे चिहिन्सेकल बतो। हे जवानो, मै तुहुरिन्हे यी कारणसे लिख्नु। काकरेकी तुहुरे बल्गर बतो, और परमेश्वरके वचन तुहुरिन्केमे पलिरहत, और तुहुरे उ शैतानहे जितल बतो।

संसारहे प्रेम नै करना

15तुहुरे संसारहे और संसारमे रहल कौनो फेन चिजहे प्रेम ना करो। यदि कौनो मनैया संसारहे प्रेम करत कलेसे परमेश्वर बाबक प्रेम ओकरमे नै हो। 16काकरेकी ज्या चिज फेन संसारमे बा: शरीरके अभिलाषा, आँखीक अभिलाषा और जीवनके घमण्ड परमेश्वर बाबक थेनसे नै हो, पर संसारमेसे हो। 17संसार और ओकर अभिलाषा दुनु नाश होजिहीँ, पर जे परमेश्वरके इच्छा अनुसार जिअत, ऊ सदादिन पलिरही।

ख्रीष्ट विरोधिनके बारेमे चेतावनी

18हे लरको, अन्तिम समय यहे हो। और जसिके तुहुरे सुन्ले बतो कि ख्रीष्टके विरोधी आइक लग बा। और यी समयमे फेन बहुत्ते ख्रीष्ट विरोधीन देखा परल बताँ; यिहिसे हम्रे जन्थी, कि यी अन्तिम समय हो। 19ख्रीष्टके विरोधीन हमार थेनसे निकरगिलाँ, काकरेकी ओइने हमार नै रहिँत। यदि ओइने हमार रताँ कलेसे ओइने हमारे संग पलिरताँ। पर ओइने सक्कु जाने हमार नै रहिँत कना बात जनाईक लग ओइने निकरगिलाँ। 20पर ख्रीष्टसे तुहुरिन्हे पवित्र आत्मा देगिल बा, और तुहुरे सक्कु जाने सच्चाइहे जन्थो। 21तुहुरे सच्चाइहे नै जन्थो कहिके मै नै लिख्नु। पर यी कारणसे लिख्नु कि तुहुरे उहिहे जन्थो, और यी कारणसे कि कौनो फेन झूँटा सच्चाइमेसे नै आइत। 22झूँटा के हो? झूँटा वहे हो, जे येशूहे ख्रीष्ट नै मानत। और ख्रीष्टके विरोधी वहे हो, जे परमेश्वर बाबक और छावाहे अस्वीकार करत। 23जे छावाहे अस्वीकार करत, ओकर थेन परमेश्वर बाबा फेन नै हो। जे छावाहे मान लेहत, ओकर थेन परमेश्वर बाबा फेन बा। 24उ सच्चा सन्देश जोन तुहुरे सुन्लो जब तुहुरे ख्रीष्टमे विश्वास करलो। वहे सन्देश तुहुरिन्केमे पलिरहे। यदि उ सन्देश तुहुरिन्केमे पलिरही कलेसे तुहुरे फेन छावकमे और परमेश्वर बाबकमे पलिरबो। 25परमेश्वर हम्रिहिन्से वाचा कर्ले बताँ कि ऊ हम्रिहिन्हे सदाकालके जीवन दिहीँ। 26मै तुहुरिन्हे उ मनैनके बारेमे चेतावनी देहतुँ जे झूटा शिक्षासे तुहुरिन्हे धोखा देना कोशिस करतताँ। 27तुहुरिन्के लग, उ पवित्र आत्मा, जिहिहे तुहुरे ख्रीष्टके ओहोँरसे भेटाइल बतो, वहे तुहुरिन्के भित्तर रहत। तबेकमारे किहुहे फेन तुहुरिन्हे सच्चाइक बारेमे सिखैना जरुरी नै हो। यकर सटाहा, पवित्र आत्मा (जोन ख्रीष्ट तुहुरिन्हे देले बताँ), ऊ तुहुरिन्हे उ सक्कु बातके बारेमे सक्कु सच्चाइहे जानक लग सहयोग करी। और ज्या चिज पवित्र आत्मा तुहुरिन्हे सिखाइत, ऊ बिना कौनो झूँटसे पूरा रुपमे सच्चा बा। तबेकमारे ख्रीष्टके संग एकतामे पलिरहो, जसिके पवित्र आत्मा तुहुरिन्हे करे कहल बा।

परमेश्वरके लरका

28हे लरको, ख्रीष्टके संग एकतामे पलिरहो; ताकि जब ऊ प्रकट हुइहीँ, तब् हमारमे हिम्मत होए। और जब ऊ फेनदोस्रे देखा परहीँ, तब हुँकार आघे हमार लाज ना होए। 29तुहुरे जन्थो कि ख्रीष्ट धर्मी बताँ, और तुहुरे यी फेन जन्थो कि धार्मिक काम करुइया हरेक जाने परमेश्वरके सन्तान हुइँत।

Currently Selected:

१ यूहन्ना 2: DVGNT

Highlight

Copy

Compare