फिलिप्पी 3

जीवनों लक्ष

1याआ कोअता ऐ माआ पाही प्रभु मेहे खुशिमेहे रोवा तीच गोठी तुमाहा घोड घोड़ीई लेखुहु माहू किज कष्ट निमिले अने याआ मेहे तुमाआ कुशलता होय, 2याआ कुत्राप रोत सावधान रोजे पाप कामोमे होय तियाअ वाईट काम कोअनाराप रोत सावधान रो. 3काहाके खोरो सुंता कोयु आमाहा होये जे आमाआं उपासना परमेश्वरोओ अर्पण कोईत होये अने ख्रिस्त येशु माय गर्व राख्नारो, तेहलूज जे किबी डीलो होय तियापो भोरुसो मेकीत नाहा. 4ओमे आय डीलोपो पोन भोरुसो कोअयु ओतलू परंतु जर कोडु एहेलू विचार कोअयु ओतलू का त्याजागे डीलोपो विश्वास कोअलाआ विचार होये तो पण मा आहने जाखा होय. 5जाहा आय आठ दिहिओ ओतु तेहलाम माआ सुंता उवी ओती आय इस्राएल होय आय बिन्यामीन च्या वंशज चा होय, आय इब्रानी याह्ही बाही देखोअ जन्म उवलू एक इब्रानी होय जोपोरोत माआ नियमशास्त्राचा होय, आय परुसी होय. 6जोपोरोत माआ निष्ठेचा प्रश्न होय आय मंडली जास्तीज ठगीत्लो ओते जोपोरोत धार्मिकताआ प्रश्न होय जे नियमशास्त्र हिकाडतो होय, आय निर्दोष होय. 7पोन माआ जांहा फायदा ओतु आज तीयामे ख्रिस्ताआ आय नुकसान होमजीत्लू. 8याआ पेक्षा वोडी गोठी ए होय का आय आपाआ प्रभू येशु ख्रिस्ताची ज्ञानाआ श्रेष्ठतेणे ओमेजा आखे किबी नुकसान होमजीत्लू तियाआ कोताज आय आखे किबी आय सोडीत आप्लु होय अने आखे किबी सामानो कोसरू कोईत होय यकोअता का आय ख्रिस्ताहा मेलवूहु 9अने तियाआ मायज जाऊ सेकेहे, माआ धार्मिकताने नाहा परंतु नियमशास्त्रावर उबु होय परंतु तियाअ धार्मिकते काहाके जो ख्रिस्तापो विश्वासा मिलीलो रोतो जे परमेश्वारापो रोत जोळे अने ज्याचा आधार विश्वास होय, 10आय ख्रिस्ताहा ओलखुहू इच्छितो अने तिया शक्तीचा अनुभव कोअला होय ज्याआपोरोत तियाआ पुनरुस्थान उवे ओते आय तियाआ क्लेशा मेहे पण सहभागी ओवुहू इच्छितो अने तियाआ रुपोहो मेलवूहु इच्छितो ज्याहा तिये आपाआ मोईत जुळाविते ओते 11तिया एहला आरी आय पण ऐहकोईत मोईलामरोत उठित पुनरुस्थान जोडयो कोहू.

लक्षो वोल वोड़ते जावा

12एहलो नाहा का माहु उपलब्ध उवे होय किंवा आय पुरो सिद्ध ओवयू परंतु आय तियाअ उपलब्धी याकोअता कायम प्रयत्न कोईत रोही याकोअता ख्रिस्त येशु आपाआ शिष्य बनविल्यो होय. 13ऐ पाहीही, आय ओ विचार कोईत नाहा का आय तियाहा जोडयो कोल्यु गोये होय परंतु ए गोठी होय काजे फासाडी घोडये गोये ते विहराइत जे माआ आगाडी होय तियाअ लक्ष्यापर्यंत पोचीत गोलयो आय संघर्ष कोईत रोही. 14आय तिया लक्ष्या काजे निरंतर प्रयत्न कोईत रोला होय का आय तियाअ बक्षिसोहो मेलवूहु जे ख्रिस्त येशु माय मिलवीत परमेश्वराने आमाहा उसे हादाडये होय. 15याकोअता तिया माहुंहु जे आपाआ माय सिद्ध माहु बोन्यो होय, भाव पोन एहलो रोही परंतु जर तुमु कोडनीबि गोठीपो ढोंगीपणा ओत विचार कोअता परमेश्वर तुमा कोअता तिया स्पष्टीकरण कोईत आपही. 16ज्या हाजाप रोते आमू पुग्या होय, आमाहा त्यापोजे चालते रोअलो.

स्वर्ग मेहे आपाआ नागरिकता

17ऐ पाही, दिहीराआरी मिलून माआ अनुकरण कोईलो जे उदाहरण आय तुमा आगाडी मेकल्ये होय, तीयावाही जो विजयी होय तियापो लक्ष्य लागाडा, 18काहाके एहलो पण वारुज मांहे होय जे ख्रिस्ताच्या क्रूसाला शत्रुता मेकीत विजयी उवे होय (आय तुमामे जास्तीज टायमोआ कोयु अने ओमेभी आय फासी-फासी कोयु होय). 19तिया विनाश तियाआ नियमशास्त्रा प्रमाणे होय, तियाआ पोटु तियाआ ईश्वर होय अने तीयावाही तियाहा लाज जोडयो ओते त्यापो ते लक्ष्य केंद्रित कोअता तियाहा फक्त भौतिक गोठीमेहे रोत चिंता शेतली. 20पोन आपाआ जन्मभूमी ताहा होर्गाम होय, तिहिजे आपाआ तारण कर्ता येशु ख्रिस्ताची वाट पालीत रोतो. 21आपाआ जोरावार ज्याआपोरोत आखे सामानोअ तो आपाआ अधीन कोअत्लू आपाआ दुर्बल डीला बोदलीत महिमा देहा सारखे बोणाडीत आपही.

Currently Selected:

फिलिप्पी 3: NOINT

Highlight

Copy

Compare