फिलोमोन 1

शुभकामना

1पौला वोलरोत जो मसीह येशुउ कैदी होय अने पाही तीमुथियुस वोलरोत आमाआ प्रिय हेगांति फिलेमोन, 2अने बोईहही आफ्फीया, अने आमाहा हेगाती सिपायडू अरखिप्पुस अने फिलेमोनाआ कोआ मंडली नाव 3आमाआ बाह्हू देव अने प्रभू येशु ख्रिस्ता वोलरोत कृपा अने शांती तुमाआ मिलीलो राहो.

धन्यवाद अने प्रार्थना

4आय कायम देवोहो धन्यवाद कोईत रोनारू, अने आपाआ प्रार्थनाम पण ताहु ओर कोईत रोही, 5काहाके आयताआ तिया प्रेमावाही अने विश्वासाआ विषयी मानत्लू, जो आखे पवित्र मांहोरी अने प्रभू येशुपोओ होय. 6आय प्रार्थना कोअत्लू का विश्वासामेहे आयताआ सहभागीता उवे, तुमु आखे हाजा ओलखील्यु ताहा, ख्रिस्ता कोअता सफल उवे. 7ताआ प्रेम वाही माहु जाअखो आनंद ओवयू अने माआ सांत्वन उवे, काहाके अने पाही, तापोरोत पवित्र जोओ जीवोहो विसाक जोड़ी होय.

उनेसिमुसो कोअता विनती

8याकोअता यास्तव माहु ख्रिस्तात वोडो उचो होय का ज्या गोठी ठीक होय, तियाआ आज्ञा माहु आप. 9तेबी पोन माहु वृध पौलाहा जो आत्माआ ख्रिस्त येशुहू बाधित मेकल्यो होय, अने फासी बी होमजीत पोडये का प्रेमाहा विनंती कोहू. 10आय आपाआ पोऱ्याहा उनेसिमुस याकोअता, जो माआ त्यापोरोत माआ कैद जोल्मो लेदो होय, ताहु विनंती कोअत्लू. 11तो ताहा पहीले ताआ आखे कामा ने ओतू, पोन ओमे ताहु अने माहु ए वोडो कामुज होय. 12तीयाहा म्हणजे जो ताआ हृदयआ बोटकु होय, मिती ताआ जागे फासी कोयु होय. 13तियाहा आय आपाआ जागे मेकीला ओते का ते ताआ जागे आव बादइलो जे सुवार्ता मुळे, माआ सेवा कोअनारू. 14बी आयताआ इच्छा विना किबी कोआडीलो नाहा होमजतोलो का ताआ ओ उपकार दाबाडनारू नाहा पोन आदाजी होय. 15काहाके याकोंअता मालुम तो ताआ जागे किबी दिहेजा अर कोइला मुळे अलग ओवयू का कायम ताआ जागे रोही 16पोन ओमे पोरोत दासाआ हारखू नाहा तियाहा दासाआरी बी जाखा, म्हणजे पाही सारखो रोअलो, जेताहा माआ तो विशेष प्रिय होय पोन ओमे डीलोम अने प्रभूमे बी, ताआ पोन विशेष प्रिय होय.

फिलेमोनो आज्ञाकारिता सी उत्साहित

17आखरी जर तू माहु आपाआ सहभागी उल्लासीत, ताहा तियाहा आव प्रकारे ग्रहण को जेहलो माहु. 18जर तिये ताहु किबी नुकसान कोयु होय, कोयो जागे किबी आपलो होय, ताहा माआ नावापो लेखित ले. 19आय पौलुस आपाआ आथोसी लेखोहो का आय फेडीत आपी; अने याहा कोअला किबी गोरोज नाहा का माआ कर्ज जो तापो होय ते तांहुज होय. 20ऐ पाही, ओ आनंद माहु प्रभू मेहे ताआ त्यापोरोत जोडीत ख्रिस्ती मेहे माआ जीवोहो निलो कोईत देदु. 21आयताआ आज्ञाकारी लेईलो भरसो वाही ताहु लेखोहो, अने ओ होमजीत्लू काजे किबी आय कोत्लू, तू याआ पेक्षा किबी जाखा कोअनारू. 22अने ऐ बी का माआ याकोअता दाबिला कोते जागू तीयार मेका माहु आशा होय का ताआ प्रार्थनावाही ताहु आप्या जानारू.

आखरी शुभकामना

23इपफ्रास, तो ख्रिस्त येशुआरी कैदी होय, 24अने मार्क अने अरिस्तर्खुस अने देमास अने लुक जे माआ मोदत कोल्यो होय, याहा माआ नमस्कार. 25आमाआ प्रभू येशु ख्रिस्ताआ कृपा तुमाआ आत्मा आरी होय आमेन.

Currently Selected:

फिलोमोन 1: NOINT

Highlight

Copy

Compare